[مدام وائل]

اكيد كلنا بنحب الفول

تعالوا نتعلم بعض طرقه

بعض اطباق الفول المدمس

الفول بالزيت و الكمون:يضاف للفول عصير ليمون و ملح و كمون و زيت (ذرة او زيتون زي ماتحبوا).

2- الفول بالدقة:تجهز دقة من ثوم مدقوق و ملح و كمون و كركم و ليمون و نضيفها عليه مع زيت و ممكن نضيفله طحينة.

3- الفول بالسلطة:تقطع طماطم مكعبات صغيرة و بصل و فلفل أخضر برضه مكعبات صغيرة و نضيف لهم ملح و كمون و خل و ليمون و نضيفهم للفول و نحط زيت و طحينة حسب الرغبة.

4- الفول بالطماطم:تقطع الطاطم مكعبات صغيرة و لما الفول يسخن نضيفها و نتركها إلى أن تذبل ثم نضيف الليمون و الملح و الكمون و الزيت.

5- الفول بالسمنة أو الزبدة:نضيف للفول سمن أو زبدة حسب الطلب و بدل الكمون بنضع فلفل أسود و ملح.

6- الفول بالبيض:نقلي البيض عادي و بعدين نضيف له الفول و ملح و فلفل أسود.

7- الفول بالثوم و الطماطم:نقطع فصوص الثوم بالسكين شرائح بالعرض و نقلبها في السمن أو الزبدة حتى يصير اللون ذهبي و بعدين نضيف الطماطم المقطعة مكعبات و نضع ملح و فلفل اسود و بهارات و لما الطماطم تذبل نضيف الفول و نقلبه كويس.

8- صينية الفول بالبيض في الفرن:نفس الخطوات السابقة ننفذها و بعدين نضع الفول الساخن في صينية الفرن و نكسر عدد البيضات اللي نحبه عليه بحيث يكون الصفار سليم و بعدين ندخله الفرن ونولعه من تحت شوية لحد ما البيض يستوي و بعدين نولع الشواية من فوق شوية لحد مالوجه يكون ذهبي.

9- البيض بالسجق:نجيب السجق و نقطعه و نحمره في السمن و بعدين نضيف الفول و الملح و الفلفل الاسود.

10- الفول بالباذنجان:لو باقي عندك شوية مسقعة أو باذنجان مقلي أو بابا غنوج قلبيه مع الفول و ضيفي ليمون و ملح و كمون و زيت بيبقى طعمه روعة.
4- فول بالبيض المسلوق:نحط للفول عصير ليمون و ملح وفلفل أسود و كمون و زيت وتكوني سلقة بيض عادي ونقطعة و يقلب مع الفول (و يا سلام لو زعتر دقة عليه

فول بالطحينة
فول مدمس – طماطماية- معلقة كبيرة بقدونس مغسول ومفروم
نص معلقة صغيرة ثوم مهروس - معلقة كبيرة طحينة
معلقة خل - معلقة عصير ليمون
معلقتين كبار زيت - ملح و كمون
الطريقة
سخنى الفول واهرسية بالشوكة وقطعى علية الطماطماية قطع صغيرة
ضعى فى طبق الطحينة والخل والزيت والثوم و البقدونس واخلطيهم كلهم مع بعض
وبعدين ضعيهم على الفول وتبلى بالملح والكمون

فول بالفلفل الاخضر
فول مدمس- نص معلقة صغيرة ثوم مهروس
واحدة فلفل رومى - كوب عصير طماطم
ملح وفلفل وكمون
2 معلقة زيت (او ممكن لو بتحبية بالزبدة يبقى معلقة زبدة)
الطريقة
ضعى الزيت او الزبدة على النار وحمرى فيه الثوم لحد ما يصفر
ضعى علية عصير الطماطم وخليها على النار لحد ما تتسبك
ثم ضعى الفول وشوية مياة صغيرين
قطعى الفلفل مكعبات صغيرة وضعية على الفول و تبلى بالملح والكمون
يغلو غلوة مع بعض
واغرفية بالهنا والشفا

فول بالزبدة والثوم
فول مدمس - 2معلقة صغيرة ثوم
معلقة كبيرة زبدة - معلقة عصير ليمون
ملح وفلفل وكمون
الطريقة
ضعى الزبدة على النار وحمرى فيها الثوم ثم ضعى عصير الليمون وقلبيهم
ثم ضعيهم على الفول وهو سخن وتبللى بالملح والفلفل والكمون
ويغرف وبالهنا والشفا


عجة الفول المدمس





4 بيضات
بصلة صغيرة مبشورة
مثلا كوب فول مدمس
معلقة صغيرة زيت
معلقة صغيرة بقدونس مفروم
ملح – فلفل – كمون
الطريقة
شيلى القشرة بتاعة الفول واهرسية كويس بالشوكة او صفية
حمرى البصلة فى الزيت
اضربى البيض بالشوكة كويس وعلية الملح والفلفل والكمون
و البصلة المحمرة والبقدونس وضعى عليهم الفول المصفى
نضع معلقة زيت فى المقلاية ونضع فيها الخليط كله ونستنى لحد ما القاع يمسك وبعدين نقلبها على الوش التانى
لحد ما يمسك وتستوى نقلب العجة فى طبق التقديم

[مرمريكا]

ايوة كدة فول
على راى اسمه بتاع المسرحية لو لقيت واحد ماشى فى الشارع اكيد حتلاقيه واكل فووووووول

[مرمريكا]

سورى قصدى لو لقيت واحد ماشى متنح فى الشارع اكيد حتلاقيه واكل فووووووول

[sasoooooooooooooo]

تسلم ايديكى

[eltourky]

حلوه الطرق دي
اهو تغير من طعم الفول العادي
تسلمي ياعسل

[مدام وائل]

بالهنا والسفا ويارب تعجبكم

[ام عمر المصرية]

تسلم ايديك ام وائل

[رانيه]

[IMG]http://[/IMG]

[نادو]

تسلم ايديكى ياسكر