[elbatool5]

ازيكم يا اخواتى الحبيبات

النهارده حابه اناقشكم فى موضوع مهم جداااا
كل ام بتفتكر انها بتعدل بين اولادها وممكن يكون فى نظرهم العكس
ياترى فى عيد الام حاسه انك عملتى اللى عليكى مع ولادك ومش بتفرقى بينهم
خلونى احكيلكم حكاية واحده صحبتى
كانت امها وابوها يفرقوا بينها وبين اخوها وخاصة امها
وكان اخوها حاسس بمكانته عندهم وكان يبتذ اخته
صحبتى كان عندها تبول لا ارادى لحد ماوصلت لتالته ثانوى وكانت بتتقطع من جواها
وكان اخوها وهى صغيره يقولها اضربى نفسك بالالم على وشك او اخبطى راسك فى الحيطه ولو ماعملتيش كده هفضحك واقول للناس انك بتتبولى على روحك
اما امها كانت على طول تضربها على الصغيره والكبيره حتى لما كبرت ووصلت لتالته ثانوى
موقف من المواقف كانت هى وامها واخوتها وابوها بيتفرجوا على صور رحله طلعوها وكانت الام بتبص كتير فى الصوره وصحبتى عاوزه الصوره فكانت بتخطفها من امها بهزار راحت الام صفعاها على وجهها امام الجميع وقدام اختها الصغيره وكانت صحبتى وقتها عندها 17 سنه
اليوم ده صحبتى مش قادره تنساه لان تانى يوم كان عيد الام وهى الوحيده فى اخواتها اللى كانت جايبه هديه لامها وابوها كمان وصعبت عليها نفسها اوىىىىى
وكانت دايما تنام بتبكى من القسوه اللى هى حاسه بيها وفى يوم سمعت فى الراديو ان مادام التبول الا ارادى من غير سبب عضوى يبقى بسبب نفسى وممكن يكون الاباء والامهات بيفرقوا بين الاخوات
حتى فى حلم الام لصحبتى كانت وهى فى ثانويه عامه تقولها انتى مخ على قدك ادخلى ادبى انتى بطيئه فى الفهم انتى مش زى اخوكى وصحبتى اخدتها تحدى ودخلت علمى وجابت 94 % وهى فى تانيه راح ابوها قالها حولى ادبى وادخلى رياض اطفال او تربيه , صحبتى جالها احباط ومجموعها قل فى تالته
كانت امها تقولها نفسى اخوكى يدخل صيدله وانتى تجاره انجليزى واختك الصغيره كلية الطب
حتى فى احلام الام وضعتها فى مستوى ادنى من اخواتها

صحبتى وهى فى اولى كليه اتقربت من ربنا اكتر واكتر وكانت تحفظ قران وكانت تدعى ربنا انه بس يحنن قلب امها عليها ويخليها تحبها زى اخواتها
وسبحان الله فى نفس السنه الام اتغيرت تماما مع صحبتى ولما تروح الكليه وترجع بدرى عن ميعادها الام بتنبسط جداااا وتخدها فى حضنها وتقولها وحشتينى
وهى دلوقتى متجوزه والام مابتقدرش يعدى يوم وماتكلمش بنتها
اما اخوها فالام نفسها يتجوز لانها مابقتش بتقدر تتحمله وتتحمل طلباته
سبحان الله صحبتى كانت حاسه انها مكروهه من الجميع ودلوقتى بتحس ان كل الناس بتحبها وبتحب تكون موجوده بينهم
اسفه انى طولت عليكم بس حبيت اقولكم الحكايه دى وكل ام تراجع نفسها مع اولادها

[رانيه]

[IMG]http://[/IMG]

[اتوتة]

اختي البتول

ربنا يخلي لنا اولادنا يارب

بالنسبة لي انا عندي ولدين 4 سنين و 3 سنين

واحاول جهدي اني ما افرق بالمعاملة بينهم

حتى اني لما اشتري اي شيء

اخذ منه اتنين

عندي عقدة من هالشيء

مع اني اكبر وحدة من اخوتي

والمدللة عند العيلة كلها مش بس عند ابي وامي

الا ان هذا الموضوع

سبحان الله واخد حيز من تفكيري

واحاول جهدي ان تكون تربيتهم سوية وبالعدل

لان عندي عقدة من حماتي وهي تفرق بين اولادها

اللي تحبه زيادة تحب مراته وولاده لو ايش ماعمل وغلط تتحمل غلطه


واللي تتضايق منه << ما اعرف شلون ان ام تفرق بين اولادها بهذا الشكل

تكرهه وتكره مراته وتتضايق لاتفه الاسباب من اولاده

حتى لو اشعل لها اصابعه العشر ماترضى عليه

وتشوفي الكلمة الحلوة واقفة على لسانها مش راضية تطلع



وفوق كل هذا وذاك

اكيد ان التفرقة بين الاولاد حرام



موضوع حساس ومهم اختي

شكرا لك ودمتي بخير

[wella]

انتو متتخيلوش التفرقة بين الاخوات بتعمل ايه في نفسية الواحد انا امي بتفرق بيني وبين اخواتي في كل حاجة في المعاملة والاهتمام حتي لما بحتاج اتكلم معاها مبتهتمش بكلامي وعشان تريح نفسها بتقول اني بعيدة عنها مع اني بحاول اقرب منها كتيرالمشكلة ان امي وامهات كتير بيقولوا دايما ان ربنا وصي الاولاد علي اهلهم وموصاش الاهل علي ولادهم وده طبعا كلام غلط لان اللي عنده حتي لو بنت واحدة واحسن تربيتها ربنا بيدخله الجنة مش عارفة ليه دايما ميحبوش يعرفوا غلطهم ويحالوا يصلحوه وبقول لكل ام من خبرتي ومعاناتي بلاش تفرقي بين ولادك حرام عليكي تجرحي حته منك بايدك

[sara_al111i]

والله الموضوع ده موجود كتير ان الام بتفرق بس هي ساعات مبتحسش بده يعني انا مثلا ساعات بلاقي ماما بتفرق بيني وبين اخواتي بس لما بفكر كويس بعرف ان في سبب وساعات تانيه بتفرق برده بس بيبقي لصالحي هي مثلا ممكن تشوف اني محتاجه حاجه اكتر فتديهاني وممكن تشوف حد من أخواتي محتاج الحاجه دي اكتر تديهاله ده بقلب الام واحنا لما نشوفها من السطح نفتكره تفرقه بس هو يبقي احساس
وبالنسبه للقصه دي فالحمد لله ان ربنا هدي ولدتها عليها لان حنان الام ميتعوضش ابدا

[semsema40]

جزاكى الله الف خير وهوبجد موضوع مهم جدآ وانا نفسى بعانى منو مع اسرتى وانا لسة ماعنديش اولاد ربنا لسة مارزقنيش بس ان شاء الله لما يرزقنى عمرى ما هفرق ولا فى المعاملة ولا اى شئ خالص بجد

[eltourky]

ياجماعه نفرقه الام مع اولاده راجع لاشياء كتير
منها حب الولد اكتر من البنت
ومنها انه ممكن تكون بنتها مش بالجمال ال كانت تتمناه
ومنها عند بنتها نفسها مع امها
ومنها الاحساس الغريزي الي بيخلي الام تفضل الصغير ع الكبير
او تفضل اكبر اولا دها ع الباقي
ومنها الحاله المزاجيه للام عند كل موقف
هي ف الاخر بشر
بس لازم تاخد بالها قوي من النقطه الحساسه دي ال بتعقد الاولاد نفسيا
طبعا مش الام بس والاب كمان
المهم ربنا يهدينا ويهدي ابنائنا ويهدي امهاتنا

[hana]

انا الصراحة عندى بنت واحدة ومافيش غيرها ولو بجد ربنا رزقنى تانى عمرى ما هفرق فى المعاملة ابدآ .

[Om Hassan]

كنت مرة سمعت ان المفروض عدم التفرقه حتى فى القبلة والحضن لان ده بيسيب اثر سىء جدا فى نفسية الاطفال وممكن يوصلهم لكره اخواتهم ووالديهم وخصوصا لو التفرقة من سن صغير

ربنا يعينا ويهدينا

[nehad]

جزاك اللة خيرا

[أم لوجى و ملك]

انا عندى بنتين 3سنوات وسنه هما صحيح مش فاهمين بس بحبهم الاتنين زى بعض تمام وما بفرقش بينهم خاااااااااااااااااالص حتى فى الحضن
لان التفرقه بتسيب اثر سىء جدا فى نفوس الاطفال
وشكرا لطرحك موضوع فى منتهى الاهميه