[elbatool5]

انا وجوزى متضايقين من بغض شويه
الحكايه انه اساسا من الارياف واخته بيتها موجود فى نفس منطقة اهلى
وجوزها سافر من مده بسيطه وهى راحت عند اهلها بالفلاحين
ورجعت من اسبوع هى واختها الاصغر عشان تنضف بيتها
وجوزى دعاهم ييجوا ويباتوا معانا واتغدوا معانا والكلام ده كان من يومين بالظبط

جوزى وهو بيكلم اخته اللى عندها 28 سنه واخته التانيه 22 قالها انه هييجى النهارده الجمعه عند اهلى عشان يدى لماما هدية عيد الام فهى قالت له خلاص تعالى اتغدى عندى وبعدين انزلوا لطنط
ملحوظه جوزى هيسافر يوم السبت مع اخواته لبلده عشان هو عنده تدريب فى القاهره وهى قربه لبلده فهيروح يقعد اسبوعين وكان من المفترض ان احنا نبات عند اخته عشان هما يسافروا مع بعض وانا اروح لاهلى اقعد معاهم
امبارح بنكلم اهلى عشان المولد النبوى ونقول لهم ان احنا جايين النهارده راح بابا قال لجوزى خلاص هنستناكوا على الغدا بكره فجوزى قاله اختى عزمانا معلش ياعمى فبابا قاله ياسيدى اتغدوا عندنا واتعشوا عندها مادام هتباتوا عندها وبعدين احنا اولى فجوزى قاله ربنا يسهل ياعمى (لحظوا مانهاش الموقف) وكلم ماما وماما قالتله هنستناكوا تيجوا قالها ربنا يسهل ياطنط
امبارح كلمنا اخته تانى وهى بتقولى هستناكوا على الغدا فقلتلها معلشى بابا وماما مسكوا فينا وهنجيلك نسهر معاكى
بعد ما قفلنا جوزى قالى انتى بتتصرفى من دماغك مين قالك ان احنا هنتغدى عند اهلك بكره اقوله طيب ليه وبعدين هما الاكبر وغير كده احنا بقالنا كتير مارحناش اتغدينا معاهم واخواتك كانوا لسه عندنا
العزومات مافيهاش كبير وصغير اللى عزم الاول هو اللى نروح له
قلت له مش مشكله اختك مش هتزعل وتنشنا مع بعض شويه والصبح اتصل باخته قالها احنا جايين على الغدا
قلتله انت كده كانك بتقول لاختك سيبك منها ومن اهلها احنا جايين لك انتى
فاتصلت بماما وهو بيصلى الجمعه وقلت لها ان احنا مش جايين على الغدا
فزعلت وقالت لى انا عملت حسابى انكم جايين وبابا كمان كان وراه مشوار ومارحهوش عشان احنا جايين وبعدين جوزك ماقلش انه مش جاى ليه من الاول وساب الموضوع عايم وغير كده انتوا المفروض جايين تعيدوا عليه يبقى الاولى انكم تيجوا تقضوا اليوم معايا
وقالت لى على عموم لو عايزين تروحوا براحتكوا
ولما جه جوزى قلت له اللى حصل وان ماما زعلانه
فاستغرب وشاف انه مش غلطان ومصمم على رايه قلت له خلاص اروح انا لاهلى وروح انت لاختك
راح قال لى روحى وهو متنرفز
فانا عاوزه انهى الموضوع بلطافه وقلت له يعنى انت مش همك زعل اهلى وقعدنا نتكلم
قرر ان احنا مش نازلين خالص ولا حتى رايحين لماما اللى مستنيانا ولا حتى اعتذر لهم
وهو دلوقتى نايم ومش عارفه اعمل ايه
مين اللى غلطان وانتوا رايكوا ايه وبحاول اتكلم معاه مش بيرد عليه
بالله عليكم ادونى النصيحه ولو انا اللى غلطانه قولولى

[الألماسه]

حبيبتي هدي حالك والمشكله بسيطه ان شاءالله والزم ماعليك طاعة زوجك وانا معاك ان زوجك غلطان من ناحيه واحده انه لما كان يفكر انه يتغدى عند اخته لماذا لم يعتذر من والدك
وانتي غلطانه من ناحيه انك مفروض ماعتذرتي من اخت زوجك في الهاتف المفروض تركتي زوجك يعتذر منها او على الاقل تكوني عارفه من زوجك انه وين يبغى يتغدى عند اخته او عند والدك (يعني انتي تصرفتي من غير ماتعرفي راي زوجك علشان كذا هو عصب عليك)
وصدقيني هو بيحب اهلك ويحترمهم بدليل انه قال لك خلاص احنامش رايحين لحد لانه مايبغى يزعل اهلك ولايزعل اخته
انصحك انك تتركيه نايم ولما يصحى تكلميه عادي وكان شي لم يكن
وتقولي له ولايهمك تتغدى عند اهلي ولا عند اختك مافيش مشكله اهم شي تكون مبسوط ومرتاح (لانه اكيدراح يكون متظايق بسبب تردده وزعل امك فهو يحتاج يسمع منك كلمه حلوه)
بنسبه لزعل امك صدقيني هي اهم حاجه عندها سعادتك
واذا لم يعتذر زوجك اعتذري انتي بنيابه كلكم واحد
وبعدين تعالي هنا انتو رايحين تتفسحوا ولا تتخانقو مع بعض هههههها
اتمنى لك من كل قلبي الحياه السعيده في ظل زوجك

[ام لوجين]

و الله الرجالة دول سوسة اقول ايه كلهم نسخة واحدة
و راي الالماسة دبلوماسي اوي ولكن فيه شيء من الصحة
انتي اتقمصي و وريه انك مالكيش وش تعتذري لحد لا مامتك ولا اخته
لانه خلاكي انتي اللي في وش المدفع وهما الرجالة كده لما يكونو عايزين يعملوا حاجة تزعل بيعرفو ازاي يقلبوها و الموقف يطلع منك ربنا يهديهم

[elbatool5]

مشكورين يا جماعه والله وانا امبارح طلع عينى لحد ماصالحته وهو زى ما بتقولى يا ام لجين حطنى فى وش المدفع وجزاكى الله خير يا الالماسه على ردك بجد ريحنى

[أم الطيب]

انا شايفة انك انت اللي غلطانة في الموضوع ده كله.. هقولك ليه.. لما لقيتيه ساب الموضوع عايم ومردش على باباك وده طبعا علشان مش عايز يحرج باباك كان لازم تتكلمي انت معاه وقوليله انت ناوي على ايه ولما يقولك انه عايز يروح لأخته تكلمي انت باباك وتفهميه بطريقة ظريفة ان انتو هتروحو عند اخته وما كانش باباك هيزعل منه ولا منك، ايه لما تتغدو عند اخته وبعدين تروحو لباباك؟ انت لو مكان اخته هتزعلي ان بعد ما اتفقتو معاها راجعين تعتذرولها.. طبعا مش لطيفة.
وطبعا انت غلطانة لما اخدتي انت القرار.. كان لازم تكوني متفقة معاه الأول قبل ما تكلميها وتعتذريلها.
وما كانش له لزوم موضوع انك تروحي لأهلك وهو يروح لأخته.. ليه طورتي الموضوع؟ ليه خليتي فيه أهلي وأهلك؟ حسسيه انه واحد تروحي هنا وللا هنا مش مشكلة حتى لو كان اللي جواك غير كده (وده أكيد طبعا).
انت لازم تصالحيه وتفهميه انك غلطانة، وأنك مش هتاخدي أي قرار غير لما ترجعيله لأن ما فيش راجل ابدا يحب ان الست تتكلم نيابة عنه وتبقى متصدرة القرارات.
ربنا يديم المودة بينكم.

[فرحه]

والله انا بقول كل واحد يتغدى فى بيته
ومفيش داعى للعوزمات والخناقات
وشيل ده من ده يرتاح ده عن ده
ومن خرج من داره اتقل مقداره
ويجعله عامر ههههههههههههههه لا والله بجد يا قمر هو اكتر حاجه ممكن تدايق جوزك الغلط باى شكل مع اهله هى كل الرجالة كده عقلها صغير واهله دول عاملين زى المنطقة العسكريه ممنوع الاقتراب او التصوير لازم يغلطك حتى لو انتى صح وصدقينى لو الحكاية حتبقى اهلك واهلى يبقى الموضوع حيكبر ومش خالصين حاولى تريحى جوزك وتعالى على نفسك شوية لان صدقينى عمره ما حيغلط نفسه وبقى طبيعى ان الست هى اللى بتتنازل وربنا يهدى سرك وحاولى تكونى انتى العاقله وتريحى كل الاطراف
دعائى لك بظهر الغيب ربنا يسعدك

[بنوته شيك]

فعلا كلام ام الطيب صح صح اوى كمان وبعد كدا قبل اى شئ اتفقو على قرار واحد منعا للاحراج
ودايما اكسبى وعززى نفسك اوى عندو طول ماانت محافظه على كرامتك ومعززا نفسك ومحافظه على كرامتو هو ايضا اكيد وانشاء الله مش هيحصل مشاكل صدقينى الرجاله دول عاملين زى الاطفال اوى بس زوجك حنين
واما يكون متنرفظ او مضايق حاولى متتكلميش معاه تجنبى

[أم لوجى و ملك]

انا رأيى انه اللى عزمكوا الاول تروحو عنده يعنى كان المفروض انتى تساليه قبل ما تتفقى مع باباكى وعموما المشكله بسيطه
وبعد كده ما تتفقيش مع حد غير لما تشوفى ظروف جوزك الاول