[soso.salah]

ازيكم يا بنات ويا ستات فتكات
طبعا من العنوان واضح ان شعري جاف وتالف من البلاوي اللي بعملها فيه
وتقدروا تقولوا اني واحدة مهووسة بمنتجات التجميل سواء للبشرة او للشعر وبصرف كل جنيه معايا على المنتجات دي
انا حبيت اشاركم خبرتي في منتجات الشعر الجاف والتالف لاني استخدمت منتجات كتييييييييييييير وفي اللي زود الطين بلة وفي اللي طلع حلو بجد
هبدا بالشامبوهات الكويسة اللي جابت نتيجه حلوة
شامبو موشنز

شامبو حلو اوي بيرطب الشعر ويطريه وينظفه من غير ما يسبب اي جفاف بالعكس بيرطبه هو امريكي وسعره حوالي 30 جنيه انا جربت العلبتين دول اللي هي الطويلة والعلبة ام وسط والاتنين احلى من بعض
شامبو كارتييه

شامبو فرنسي رائع ناعم جدا على الشعر وريحته تحفة وطبعا اكتركم جرب حمام الكريم بتاعه وعارف انه تحفة والشامبو تقريبا نفس نتايج حمام الكريم سعره 45 جنيه
شامبو وبلسم ايفون باللوز والافوكادو للشعر الجاف والتالف

الصراحة المجموعة دي حلوة جدا كانك بتغسلي شعرك بزيت اللوز يعني شعرك بيبقى عامل زي ما يكون فيه زيت بجد وطري وبيلمع سعره الشامبو 23 والبلسم 23 ومكتوب عليه صنع في ايطاليا
شامبو دوف الالماني

وانا بشدد على كلمة الالماني مش مكتوب عليه ولا كلمة عربي الشامبو ده ربعه كريم وانت بتغسلي شعرك هتلاقي الكريم بجد في شعرك حلو جدا وبينعم الشعر اوي
شامبو وبلسم تريسمي

الشامبو ده من غير البلسم بينشف الشعر جدا يعني لازم البلسم بتاعه هو سعره 50 جنيه الشامبو و50 جنيه البلسم

شامبو هيربل

نفس قصة تريسمي من غير البلسم بينشف الشعر مع البلسم بتاعه تحفة وريحته حلوة اوي
شامبو نيفيا للشعر المجعد

حلو اوي بيقلل من كسرات الشعر بس اهم حاجة الفرنسي اللي مش ممكتوب عليه ولا كلمة عربي ب 25 جنيه

[Nimo Morsy]

ميررررررررررسي كتييييييييييير

[soso.salah]

شامبو جي كازانوفا

شامبو سعودي بكريم مرطب حلو جدا كانك بتغسلي شعرك بكريم وسعره رخيص ب 20 جنيه بس

شامبو جليس الالماني


شامبو الماني حلو اوي بس لازم معاه بلسم بتاعه عشان بينشف الشعر انا جربت الاصفر اللي في الصورة ده للشعر التالف سعره 25 جنيه
شامبو كريستاس

شامبو فرنسي هو شبه كارتييه بس هو شركة تانية خالص حلو جدا خفيف على الشعر اوي مش بيسبب جفاف بس مش بيرطب زي كارتييه وبحوالي 40 جنيه مش فاكرة اوي

شامبو غارنييه

انا جربت للشعر الكيرلي حلو اوي بينعم الشعر اوي وبيقلل التجاعيد والكسرات اللي في الشعر وريحته حلوة اوي سعره 25 جنيه

شامبو وبلسم الفيف من لوريال

انا استخدمت الاصفر حلو جدا بيحول الشعر من جاف الى عادى بالاستمرار حوالي 25 جنيه الشامبو وكذلك البلسم هو تقريبا فرنسي
شامبو بروتي كير

هو افضل شامبو طبي استخدمته لان اي شامبو طبي بينشف الشعر لكن الشامبو ده لا مش بينشف الشعر خالص وبيقلل التساقط بنسبة كبييييرة سعره 20 جنيه

[soso.salah]

نييجي بقى للشامبوهات السيئة اللي زودت الجفاف والتلف
شامبو دوف للشعر التالف

الشامبو دة خدعة كبيييييرة واعلانته كذب لانه بيزود الجفاف والتلف بينشف الشعر جدا بيخليه سلك مواعين هو تقريبا صناعة الامارات
شامبو جونسون للاطفال

المفروض انه فيه مواد كيميائية اقل من الشامبوهات العادية لكن للاسف كان بيخلي شعري زي اللي مسكت فيه الكهرباء وهايش جدا وبيتقطع
شامبو بانتين

طبعا عارفة انكم مستغربين لان اكتركم بيحبه هو فعلا بينعم الشعر وبيقلل من التلف لكن للاسف فيه عيب خطير بيزود من تساقط الشعر وده مش كلامي نا بس ده كلام دكتوري وكمان ده نفس اللي حصل مع اختي وصحباتي انا عارفة انه بينعم الشعر لكن بيوقعه

شامبو كلير

شامبو انا مسمياه مية نار لانه بيحرق جدا فروة الراس وكمان لما كان بينزل على وشي كان بيولعه الصراحة انا جبته مرة واحدة عشان شعري المعتوه جاتله فترة استهبل وعمل قشرة رغم انه جاف عته بأة

الشامبوهات بقى اللي لا بتحل ولا بتربط يعني لاضرتني ولا نفعتني هما شامبو صانسيك وشامبو برت بلس

[salma fergany]

شكراليكى يا قمر

[soso.salah]

بالنسبة للبلسم افضل استخدام نفس نوع الشامبو اللي بتستخدميه للحصول على افضل النتايج وده مش كلامي ده كلام خبراء التجميل

[ميرو 2000]

ميرسي يا قمر بساغلب المنتجات اول مرة اسمع عنها

[soso.salah]

تابعوني لسة حمامات الكريم وكريمات التصفيف وبديل الزيت

[شاديه ام صالح]

جزاكى الله خير

[الرحمه منك يارب]

جزاكى الله خيراً