[مدام ياسر]

انا اتجوزت وانا لسة بدرس من 8 شهور ونص عن قصة حب جميلة اوى واول 3 شهور كنت مبسوطة اوى مع جوزى وكنا فى منتهى السعادة بعدها جاله شغل يسافر برة مصر وكنا فى انتظار التأشيرة كنت بعيط ومنهارة مش متخيلة انه هيبعد عنى وهو كمان كان بيضمنى اوى ويطمنى ان اننا علطول هنكون مع بعض بالتليفون وعلى النت وكان بيعيط هو كمان ويقولى "انا مش عارف هسافر ازاى واسيبك انا مقدرش ابعد عنك ابدا" ولما التأشيرة جت قبل السفر بعشرة ايام حسيته اتغير خلاص الايام هتمر ويسافر ويبعد لما كنت اعيط بقى يتنرفز ويقوللى "خلاص هقعد جمبك يعنى وبلاش مستقبلى يعنى انتى هتحبينى اكتر من امى ما هى امى قاعدة اهى عادى ماسكة نفسها قدامى وبتضحك يعنى هتخافى عليا اكتر منها" مسكت نفسى لحد ماجه يوم السفر ورفض انى اوصله المطار استحملت لحد سافر خلاص بدأ يرجع تانى زى زمان ويقولى" وحشتينى اوى يا مراتى يا حبيبتى ومشتاقلك مووت" والكلام الحلو بتاعه رجع تانى وبقينا نتكلم زى ماكان موجود معايا ودلوقتى بقاله اربع شهور مسافر بدأ يتغير من اسبوعين مش بقى يحكيلى على اى حاجة بتحصل معاه ولو سالته يقولى "انا مش فاضى للكلام دة اصل انتى رايقة وانا هنا طالع عين اهلى وانتى مش بتحسى بحاجة" ومهما حاولت اتكلم معاه يقوللى انا قرفان ومخنوق ومش عاوز اتكلم بالرغم انه كان بيتكلم مع والدته عادى جدا وانا كنت عشت مع والدته واخته فى البيت بعد ماسافر من اسبوعين قاللى اروح اقعد عند اهلى واروح لوالدته فى زيارات وبعدها باسبوع حصل خلاف بينه وبين والدته وقاللى مش اروح هناك خالص وسالته عن السبب مش وافق يقوللى اى حاجة سالت والدته قالتلى هى مش عارفة اصلا انه قاللى كدة وزعلت منه ورفضت تكلمه لمدة 3 ايام وزعلت منى انا وقالتلى "ليه يقولك ماتجيش هنا هو انا عملت فيكى حاجة اكيد فى كلام اتقال بينكم خلاه يقولك كدة" ولما حلفتلها انا مش قولت اى حاجة وانه قال كدة لوحده بعد خلافه معاها دخلت اخته تصالح بينى وبين والدته والحمد لله اتصالحنا واتفقنا انها مش هتقوله حاجة عشان مش يتخانق معايا انا الغريب ان من يومها وهو دايما يدخل على النت ومش يرن عليا عشان اقعد اكلمه زى ما كان بيحصل ولما سالته مش بيرد عليا وبقا دلوقتى ممكن اقعد اتكلم وهو مش بيرد خالص حتى التليفون اوقات كتير مش يرد عليا واخرها من يومين قولى "خلاص انا من يوم ماسافرت وانا عارف انها خربانة اعملى اللى انتى عاوزاه براحتك " ولما جيت اتكلم معاه فى موضوع مامته عشان انزل اروحلها قاللى "مش اروح عندها خالص ومش اكلم اى حد من العائلة خصوصا بنت خالته " الشك بدأ يملا دماغى لان بنت خالته دى كانت والدته وخالته عاوزين يجوزوهم لبعض وخالته اتغاظت لما عرفت انه بيحبنى وفضلنى على بنتها ودلوقتى هو هناك معاهم فى نفس البلد وكمان جوز خالته ممكن ينقله فى شغل تانى احسن بكتير يساعدة يبنى مستقبل احسن ورغم ان فى بداية سفره كان بيحاولو يقربوه ليهم لكن كان بيعمل مشاكل معاهم دلوقتى انا بعيد عن كل حاجة ومش فاهمة ليه اتغير اوى كدة وخصوصا موضوع والدته وبسبب كلامه انا كنت هعمل مشكلة كبيرة اوى مع بنت خالته لكن والدتى قالتلى "سيبك من مشاكله مع اهله واسكتى هو اللى يحلها ويتصرف معاهم" لكن انا مش عارفة اسكت لان خايفة اوى يضغطوا عليه وخايفة يسبنى او بيتى يتخرب وانا لسة ببنيه معاه وخايفة اوى قصة الحب دى تنتهى بالفشل وهتجنن واعرف ايه اللى غيره كدة ومش عارفة اكلمه خالص ولو سالته مش بيقول حاجة وكمان ممكن بقوم ويقفل الايميل منغير مايتكلم ولا يرد خالص ..
ارجوكم تفيدونى اعمل ايه واتصرف ازاى فى المشكلة دى انا محتارة اوى.

[2nashwa]

شوفي يا حببتي اولا غلطتك انك وافقتي انه يسافر ويسيبك هنا لان البعيد عن العين بعيد عن القلب دى طبعا عند الرجالة والرجل اول ما يبعد عن مراته بيكون فريسه سهلة وغالبا من حكيتك زوجك بيعرف وحده تانية ممكن ماتكونش بنت خلته لان كبريئها ميخلهاش ترجعله بعد ما سبها واتجوز انا عوزاكي تكونى قوية ومفيش حاجة تهزك الرجالة طبعهم الخيانة وانتي متكلمهوش خالص اتقلي عليه خليه هو الي يهتم بيكي ويدور انتى ليه متغيره ومبتكلمهوش ولمه يكلمك خليه يحس انك غير مهتمية به ومتسئلهوش عن اي شىء وتكون اجاباتك عليه عاديه يعنى عامله ايه تقولي الحمد لله في احسن حال مبسوطة جدا باكل واشرب وبخرج اتفسح مع اصحابى وحجات زى ى خليه يتجنن وهو ال يهتم بيكى صدقينى لو في واحده تانيه في حياته سوف يتركها ويرجعلك احسن من الاول بس انتي جمدى قلبك واتقلي عليه وربنا معاكى ويصبرك ولوعايزه اى شىء ابعتيلي رسالة وسوف ارد عليكى

[ام لوجين]

السلام عليكم يا مدام ياسر و يا نشوة عاملين ايه
انا رايي من راي نشوة و ياريت تجمدي قلبك و تعملي كده والله لمصلحتك انتي لسة ما عيشتيش مع الرجالة كويس يلزم 10 سنين كده على ما تفهميهم صح و تعرفي الراجل اللي معاكي كويس و بيحبك بجد وللا لاء انا من كلامك بشك ان مامته بتشتكيله منك و مش بتبين علشان ما تكدبيهاش و تدافعي عن نفسك و انها مابتكلمهوش 3 ايام دي تمثيلية و الله اعلم انتي حاسسه ان فيه حاجة يبقى فيه حاجة احساس الست عمره ما بيكدب بس الواحدة ما بتبقاش عارفة فيه ايه بالضبط بس بتحس بيه انتي عايشة معاهم وللا لاء لو كنتي متجوزة عند حماتك و عايشة معاهم او شقتك جمبهم اوعي تسيبي شقتك انا اختي عملت كده مرة و راحو غيرو كالون الشقة و كانو هيرموها من غير عفشها و حاجتها و يتصرفو فيها واهل جوز اختي ناس محترمة و متدينة وخاللي مامتك تقرا اللي احنا كتبينه ده مامتي كانت طيبة و ماكناش بنحب المشاكل لكن الواحدة المصحصحة القوية اللي ماتخليش حد يقرفها و هي اللي تقرف اللي حواليها هو المطلوب في الزمن ده نصيحة هما بيقولو حرص من صاحبك ولا تخوونه خالليكي في بيتك وخدي اختك او اخوكي ولو جوزك قاللك لاء قوليله انا برتاح هنا و انتي رايقة و مبسوطة و من غير بكاء و رومانسية
والله هما الرجالة عايزين كده و اهل جوزك لما يلاقوكي قوية هيعملولك الف حساب
و ماتخليش حماتك من الاول تعمل فيكي و تقول عليكي براحتها
و كلميها و قوليلها انا نفسي اعرف ايه اللي غيير ياسر من ناحييتي نفسي اعرف فيه ايه و ارمي الكلام عليهم و شوفي شكل وشهم والله ساعتها هتتاكدي انهم هما السبب وللا لاء و صدقي احساسك كويس بس اتاكدي
انا طولت عليكي بس مش عايزة حد من الستات يحصل له اللي حصللي لمجرد انك بتحبي اوي و بتخلصي و بتسمعي الكلام
و لو عايزة اي مساعدة او مشولرة احنا موجودين و اصحابك و ربنا يوفقك يا رب و ينور لك اللي بيحصل في الضلمة

[ام بسنت]

السلام عليكم ورحمة الله وبركاته

اولا ياستي مبروك علي الجواز مع انها متاخره، واحب اقولك حاجه اولا تغير جوزك معاكلي لما جات التأشيره دا امر طبيعي لانه قلقان من تجربه جديده وبلد مايعرفهاش واول مره يتغرب فطبيعي جدا انه يتغير ويتعصب ويمكن انت عشان ماتعرفيش الشعور دا فهمتي انه تغير كمان المفروض انك تتعاطفي معاه وتسانديه ماتبقاش القصة كلها البعد فيه مستقبل ليكم انتو الاتنين بتبنوه سوا لازم تصبريه، انت جانب اهلك وناسك، وهو وحيد في غربه، يعني لو تعب مش هايلاقي حد يناوله كوبايه ميه، خالينا واقعيين، صح، بعدين كونه يرفض انك توصليه للمطار دا دليل انه متعلق بك، اصعب لحظات على الانسان لحظات الفراق، مش عايز يشوف لحظة الفراق في المطار، وتفضل معاه طول غربته، صحيح انه بيودعك في البيت، بس في المطار اصعب، واللي يعرف كدا اللي جرب السفر، حاجز بين بلدين، بين بلده واهله وبين مجهول غريب، مايعرفش فيه حد
بالنسبة انه بقاله اربعة شهور مسافر ومبقاش يحكيلك عن حاجه، شوفي فيه حاجه اسمها صدمة السفر، يعني مجتمع مختلف ناس مختلف طبع مختلف اكل حتي مختلف، ناس كلها حرصها الاول علي القرش، وتخيلي بتتعاملي كدا، مش معني كدا ان كل الناس في الغربه وحشين لاسمح الله، ولكن اللي بيبقي اول مره يسافر بيصدم لما يلاقي طبيعة ناس بالشكل دا، لان باقولك وضع مختلف وانصحك تصبري عليه لحد ماالفتره دي تعدي، هو نفسه في مرحله حيره ودايما كلمية عن مشاكله، بياكل ازاي، بينام ازاي، عامل ايه في شغله، وشويه فكره بذكرياتكم الحلوه، عشان تخففي عنه، وبعدين موضوع ماماته اذا كان منعك تروحي، نفذي امره، وقوليله لو مش عايزني مااروحش مش هاروح، بس انا اروح اخفف عنها، وحاجه من ريحتك، قوليله انك بتروحي عشانه، لكن لو هو مش عايزك ماتروحيش يبقي كلامه هو اولي
بالنسبه لموضوع بنت خالته، اعتقد انت قولتي اتجوزتو عن قصة حب جميله وكنتو سعدا مع بعض، انا بصراحه مااعتقدش ان فيه داعي للشكوك دي طالما اختارك ليه هايفكر في غيرك، وحتي لو كان اهلها هايسعدوه مش مبرر انه يسيبك، وتعرفي لو عمل كدا عشان الشغل اسمحيلي اقولك انه كدا بتاع مصلحته، بيجري ورا القرش ايا كان مصدره واعتقد انت فاهمة عايزة اقول ايه، بالنسبه للكلام علي النت خاليكي وراه، ماضاع حق وراءه مطالب، يعني قوليله حتي لو مش عايز ترد عليا وتكلمني انا هاكلمك وهاقولك كل اخباري، انا مش عارفه ليه انت اتغيرت كدا، يمكن الغربه والمشاكل عندك، انا بادعيلك من كل قلبي اني ربنا يهون عليك ويوقفلك دايما ولاد الحلال وكدا يعني وان شاء الله بيستجيب
في النهاية ربنا يوفقك ويسعدك ويجمعكوم علي خير

[أم مريم]

انا رأيى برضه ان المفروض انك كنى سافرتى معاه حتى لو ظروفه وحشه فى الاول
منتوش أول ناس يبدأوا حياتهم باره مع بعض من تحت الصفر

قوليله دلوقتى انك عايزه تسافريله و تقفى جنبه و تساعديه وتخففى عنه الغربة اللى هو فيها دى و ان موافقش قوليله يرجع و ابدأوا سوا هنا برضه و معلش استحملى معاه شويه و قوليله ان وجوده اهم من الفلوس و ان موافقش برضه متعمليهاش زعلة

و بعد كده اعملى زى نشوى ما قالت وان شاء الله تلاقيه جايلك جرى
و اذا قدر الله الف بعد الشر يكون بيعرف واحدة تانيه و مهتمش بيكى يبقى لازم بعد فترة كده تفهميه انه لازم يرجع عشان تتفاهموا فى حياتكم مع بعض اخرتها ايه و تحطوا النقط على الحروف

[ام لوجين]

يا نهار ابيض بعد كلام ام بسنت حسيت اني سريرة اوي بس و الله انا من كتر حسن النية للناس و كتر سوء النية منهم بقيت عايزة اصحي كل واحدة كانت نايمة زيي
يعني الرومانسية الزيادة مش بتخللي الواحدة تشوف صح والله انا ندمانه اني حبييت اوي و اخلصت اوي
بس هقول ايه برضه الامر ما يسلمش و الرجالة او الشباب اليومين دول كل همهم الفلوس و بيمشو ورا كلام امهاتهم جدا
و ممكن يكون حماتك بتقول عنك كلام او بتشتكي فجوزك مش عايزك تروحي هناك علشان يعمل لك كرامة و مش وقت مشاكل خالص بالنسبة له فيمكن علشان كده مش عايز يكلمك
ربنا يوفقك و يسعد كل ست اامين يا رب

[preatywoman]

اولا حبيبتي هو اللي حصل حصل وسافر خلاص عشان يبني مستقبلك وهو دلوقتي في دوامه جديده عليه وبعدين متزعليش مني يعني الواضح انك بتكلمي كتير في موضوع انتا فيك انتا متغير مني وهكذا وطبيعي انه اضايق لانه شايف غير انك مش حاسه بيه وحاسه بنفسك بس غيري من اسلوبك حسسيه انك بتحبيه اوي واغمريه بالكلام الحلو هو زي ما قالك طالع عين اهله يعني تعبان مش عايز لما يجي يكلم معاكي تكملي عليه عايز السدر الحنين
بالفنسبه لبنت خالته في ساعه صفا بينكم قوليله انك بتغيري عليه من حبك فيه وخايفه انك تبعد عني والكلام ده واساليه عليها وربنا يهديه حبيبتي ويرجعلك بالسلامه

[مدام ياسر]

ام لوجين: شكرا على ردك بس انا ليا شقتى بعيدة عن اهله خالص بس انا اللى قفلتها وروحت قعدت مع اهله عشان اكون مع والدته واخواته مش اكون لوحدى وانا متاكدة ان مامته مش ليها اى علاقة بتغيره انا كنت معاها وكنا بتحايل عليها عشان تكلمه انا واخته وكانت بتعيط وزعلانة اوى من كلامه وانا اللى كنت اتصلت بيه من هناك وخليتها تكلمه، والدته من قبل جوازنا دايما بتنصحنى وتعاملنى كانها امى ومش بتفرق بينى وبين بناتها ابدا.
ام بسنت: شكرا اوى على نصيحتك ،انا والله من قبل السفر وانا دايما بصبره وواقفة جمبه وعمرى ماطلبت منه اى حاجة عارفة انه مش هيقدر يجيبها وبعد السفر دايما اقوله انا معاك وجمبك وباذن الله ربنا يجمعنا وعمرى ماقصرت فى حاجة والله.
ام مريم: انا مش ينفع اسافر معاه لان السكن مش متوفر لسة هو قاعد مع 5 من اصحابه فى سكن واحد ومش ينفع اروح اقعد معاهم خالص وهو مش يقدر يوفر سكن خاص لينا دلوقتى وكمان انا لسة بدرس وقدامى لسة سنتين على ما اخلص دراستى .
ادعولى ربنا يصلحلى الحال واى نصيحة عاوزة اسمعها لانى تعبانة اوى بجد وشكرا لنصايحكم الغالية ..

[مدام ياسر]

شكرا اوى لنصيحتك preatywoman

[omyaser]

اسمعي حبيبتي وانا بقرا قصتك كل الحكي اللي كنت بدي احكي
قالته ام بسنت
الامور هادي ما بينفع فيها العواطف
بدها شوية عقلانيه ولو استخدمتي عواطفك راسك كتير رح يوجعك
من شان ما خلاكي تيجي معه للمطار انا معه لانه انا مغتربه ولما بكون
عند اهلي زياره وبدي ارجع ما بحب حدا يروح معي للمطار لانه اخر لحظات بتكون صعبه علي كتير
وانه تغير معاكي فعلا متل ما حكت ام بسنت وفعلا انا هيك صار معي اول فتره بتصير مع الواحد صدمه بده شوية وقت لحتى يتاقلم مع وضعه الجديد لانه كل شي بالنسبه له صار جديد
بس انا بنظري سفر الزوج وانه يترك مرته لوحدها ظلم لالها
المفروض سافرت معه بما انه من غير شر لسه ما عندكم اولاد
لحالكم بتظل اخف عليكم
بس هاد كله ما بيمنع انه يكون بحياته واحده تانيه لمصلحه ما
انا هلا ما بنصحك تطنشي لاحقي بهاي الفتره لحتى تعرفي السبب الحقيقي
لتغيره
وازا ما نفع معه احكيله انه ما ظل عندك صبر
وهددي انك رح تتركي وما رح تظلي معه
الله يوفقك

[sara_al111i]

والله الاخوات ردو عليكي ردود كلها خبره
انا من رأيي برده انك تنفضيله شويه بس مش اوي وتحاولي انك تخليه يحس انك هتبدأي تبعدي عنه وهو علشان بيحبك مش هيستحمل يعني مثلا قعدي يومين متكلميهوش انتي ولو هو اتصل مترديش خليه يقلق ويدور عليكي بس مش تقعدي كتير مترديش بعد كده ردي عليه قوليله كنت عامله الموبايل سيلنت او فيشه التليفون كانت واقعه مكنتش واخده بالي حاجات كده بس وتفضلي متبعه اسلوب التنفيض لحد مايقولك انا حاسس انك متغيره روحي انفجري بقي واتكلمي معاه بس بأسلوب هادئ فكريه بالايام الحلوه وقليله انت كنت حنين عليا اوي بس انت اتغيرت وقوليله كل اللي ف نفسك بس بحب وحننيه للايام الحلوه ف وسط كلامك فكريه وحطي قدامه مقارنه بين اللي فات ودلوقتي
وبعدين حاجه ليكي انتي بقي هو ممكن يكون من الغربه تعبان ومدايق وقرفان وانتي بعيد عنه اكيد ده مأثر فيه وبعدين خلي ثقتك فنفسك وحبك وحبه كبيره يعني اوعي تفتحي موضوع بنت خالته اللي انتي حكيتيه ده لانه لو مش واخد باله منها او منفضلها ممكن انتي كده تخليه ياخد باله
وبعدين انتي بتقولي هو بيدخل النت ممكن يكون بيدخل شات اوكده برده عادي لانه مثلا حاسس بالوحده ده ممكن وممكن تكون في حاجه تانيه شغلاه فانتي برده خفي عليه شويه مش كل شويه تتذمري من اي حاجه لان الراجل مبيحبش الست اللي تشتكي كل شويه
ولو حصل اي مشاكل حاولي انتي متحكيش علشان متشيلهوش مش كل لما تتقابلو ده حصل وحصل وحصل لآ وحتي لو هو حكالك وقالك انتي عملتي كذا حاولي تاخدي الموضوع ناحيه تانيه علشان ميشيلش هم وان شاء الله ربنا يوفقك وابقي طمنينا وقوليلنا انتي عملتي فيه ايه الموضوع ده علشان كمان لو في واحده عندها مشكله زي دي تستفيد

[eltourky]

والله ياحبيتي انا شايفه ان كل ده زوبعه ف فنجان
هو متزوجك عن حب ليه هيفكر ف بنت خالته
ماهي كانت قدامه وبعدين انتم لسه تعتبروا عرايس
مش بسرعه يقدر ينساك ويفكر ف واحده تانيه او حتي بنت خالته
هو واضح انه بيحبك
وهو متغير بس من اسبوعين
متضمنيش حالته النفسيه ايه او ف مشاكل عنده مايرضاش يضايقك بيها
هو الغريب انه قالك متروحيش لمامته
مش فاهمه هو ممكن لما يزعل مامته يقول كده0صعبه الحكايه دي
وانت كمان غلطانه انك قولتي لمامته انه قالك مترحيش عندها
بصي انا عايزاك تهدي ع الاخر
وشيله الشك ع جنب
لانه ممكن يحطمك ويخايك عصبيه معاه من غير ماتحسي
وربنا يهديلك حالك

[moheyeldin]

اختى الحبيبة اولا لااريدك ان تدخلى الشيطان بينك وبين زوجك فهو فى الغربه وحتى لوكان بيكسب ملايين يكفى بعده عنك وعن اهله
انتى هنا ولاتعلمى ماذا يحدث معاه هناك
فكما اخبرنى زوجى عن فترة سفرة قبل زواجنا (اى قبل تحمل مسؤلية زوجة ) انهفى الاعمال هناك يكون ما يشبه الحرب كل واحد عايز يبين لصاحب العمل انه الافضل ولذلك فهو انهى العقد بعد سنه واحده وعاد الى مصر لانه لم يتحمل هذة الضغوط
فيمكن ان يكون زوجك يعانى من مثل هذة الضغوط وكان يتخيل انه سيجنى العسل ليعود به اليك ولكنه فوجىء بالواقع
ولذلك تغير وقال لك اعملى ما يحلو لك
ارجو منك انتستمرى فى التحدث اليه ولكن بدون ان تشتكى
ولكن تخبريه انكى تعلمى انه يعانى من البعد عنك وعن اسرته
واذا كان يشعر بالتعب من العمل هناك فليرجع لان وجود المال وهو غير سعيد لايساوى فرحه واحدة تدخل قلبه
واجعلية يتأكد انه عندك اغلى من كنوز الدنيا
ولتفعلى كل هذا ونيتك لله وحده انك تريدين الحفاظ على زوجك وبيتك
فنحن ماذا نفعل اذا ابتلانا الله بزوج لايعرف قيمة زوجته الا ان نأمل فى التعويض من الله عز وجل
ولذلك اخلصى النيه لله ولن يخذلك ابدا ان شاء الله

[رانيه]

الله يهدي باللك اهدي شوي وكلام ام بسنت صح مع احترامي للجميع ديري باللك وانتبهي وخد الامور بعقلانيه واصبري وكل شي حيبين

[مدام ياسر]

شكرا لنصايحكم الغالية وانا فعلا عملت بيها امبارح اتصل عليا وكنت عند الدكتور حسيت بقلقله اوى عليا وقعد يقوللى يا حبيبتى بلاش دلع انتى مش عندك حاجة بس ارتاحى بس وماتقلقيش عليا انا كويس واتكلم معايا حلو اوى وقاللى انه هيكلمنى على النت لما ارجع من عند الدكتور ولما كلمته كان بيتكلم كويس جدا وفكرته بأيام ما كنا لسة بنحب بعض وكلامنا الحلو ولان احنا ماعشناش فترة خطوبة لانها كانت شهر واحد وكنا مشغولين فيه بتجهيز الشقة ومش كنا بنخرج زى اى اتنين مخطوبين بس دة اتعوض بعد الجواز قعدت افكره بكل حاجة وكان ساكت مش بيتكلم وبعدين قاللى " ياحبيبتى "انتى اللى بتقولى كدة" لما قولتله ان الايام دى كانت اجمل ايام عشتها فى عمرى كله وان الدنيا جمبه جنة ومن غيره جمر بيحرق كل حاجة حواليه قاللى "كملى يا روحى" وسابنى اتكلم منغير مايرد باى كلمة وفجاة قاللى ثوانى وراجعلك وفضلت مستنية حوالى نص ساعة ولما زهقت قولتله انت بتكلم مين دة كله قاللى مش انا قولتلك ماتكلمنيش دلوقتى ورجع اتقلب تانى لقيته بيقوللى انا بكلم ناس قرايبى ومش فايقلك دلوقتى حسيت انى اتنرفزت واتضايقت جدا لان انا بتكلم معاه فى موضوع راح سايبنى وكلم قرايبه ومش عارفة ليه حسيت انها خالته استنيت شوية وبعدين قولتله "انت كل دة بتكلم خالتك ابقى سلملى على العروسة" انا عارفة ان الكلمة دى غلط بس انا بجد اتغاظت اوى ومش رد عليا لمدة ساعة اللا ربع وفى الاخر قولتله انا تعبانة وهدخل انام رد عليا بقسوة جامدة اوى وقاللى "غورى يللا انتى خنقتينى وانا مش ناقصك" قفلت الايميل وانا مش قادرة اصدق نفسى عمره ماكان بيقوللى اى كلمة جارحة اوى كدة كان دايما بياخد باله من كلامه وتصرفاته اللى ممكن تضايقنى الغريب انه رن علي التليفون بعدها بس انا مش رديت عليه والنهاردة قاعد على النت طول النهار وانا مش بتكلم معاه خالص قولولى اعمل ايه تانى لان بجد الكلمة اللى قالها دى صعبة اوى عليا وانا حسة انى لو كلمتة هنتخانق وانا مش عارفة هقوله ايه لو اتكلم ارجوكو انصحونى.

[sara_al111i]

أنتي غلطانه لو قريتي قبل كده الكلام اللي قولتهولك قلتلك أوعي تجيبي سيره خالته وبنت خالته مهما حصل علشان ميحصلش مشاكل
أنا مش عارفه ليه وانتي بتحكي حاسه انكو اتنين يعرفو بعض مش أكتر يعني مش اتنين متجوزين
اصبري عليه شويه ماهو انتي مش هتلاقي نتيجه من أول مره ولازم تتعبي
كرري اللي انتي عملتيه تاني الجزء الأول بس مش الجزء الخير ومتسيبهوش وتخشي تنامي انتي كان المفروض تفضلي معاه ياستي يقولك استني استني ساعتين مش مهم وبالراحه كده وبدلع انت مشغول عني ياحبيبي والحركات دي ده انتو متجوزين يابنتي ادلعي عليه وحشتني الحركات دي ده انتي كمان بتقولي انكم بتحبو بعض يعني الكلام ده سهل وممكن تعمليه شوقيه ليكي
أنا معرفش ازاي لاني مش متجوزه ممكن واحده من الأخوات المتجوزين يبقو يقولولك علي تجاربهم لو واحده عندها حاجه شبه دي اكيد موضوعك ليه حل
ومتيأسيش ابدا ابدا ده جوزك بتاعك انتي ولازم تعملي اي حاجه علشان يبقي معاكي
وبكررها مره تانيه متكلميهوش علي بنت خالته مهمااااااااا حصل نفضي اعملي عبيطه وبرده اتبعي معاه لغه الحوار والصبر ثم الصب ثم الصبر
وادعي ربنا اهم حاجه واول حل
ربنا يهديكي ويهديه وترجعو لبعض احسن من الاول ان شاء الله

[مدام ياسر]

شكرا يا سارة على نصيحتك وربنا يرزقك بابن الحلال ويسعدكم سوا .
حماتى اتصلت دلوقتى وماما اللى ردت وحكيتلها اللى حصل حماتى قالتلى ادعى ربنا يهديلى جوزى واتحسبن فى اى حد يحاول ياخدة منى وهى كمان قعدت تقول حسبى الله ونعم الوكيل فى اى واحدة او واحد تحاول تخرب بيت ابنها وقالتلى بردة اتكلم معاه براحة واستحمله لحد مايهدى بس المشكلة دلوقتى زادت لانى عرفت ان مامته كانت تعبانة وراحت المستشفى امبارح ورجعت النهاردة الصبح وهى اصلا ساكنة معانا فى نفس الشارع بيت اهلى فى اول الشارع وحماتى فى اخر الشارع ومش عارفة انزل اروحلها من وراه وللا اعمل ايه .

[أم الطيب]

انت اتقلي عليه شوية وما تلاحقيهوش علطول علشان ما يزهقش منك وزي ما سارة قالتلك اوعي تجيبي سيرة خالته وبنتها خااااااااالص.
وطبعا ما تروحيش لحماتك من غير إذنه انت كلميها وهي هتقدر طبعا طاعتك لزوجك.
بلاش تكلميه ل يوم علشان ما يحسش انه مقرر لازم يؤديه كل يوم، اصبري يوم واتنين علشان توحشيه لغاية لما يكلمك هو.
ولازم تكوني عارفة ان اي واحد في الغربة بتقابله مشاكل ياما بس بيستحمل. فبلاش تكوني انت كمان عبء عليه، يعني لما يكلمك ما تسأليهوش على تفاصيل شغله اللي عايز يحكيه يحكيه، وانت خليك المسكن بتاعه لغاية ما يحس انه لما يبقى متضايق يجري عليك علشان يحس بالراحة.
وطبعا لا تنسي الدعاااااااااااااء، ربنا يحفظه ويبعد الشيطان عنكم ويجمعكم على خير.