[شيرين سامي]

انا زوجةمنذ 5 سنوات ومشكلتي كلها تتلخص في ان امي لم تعلمني اي شيءوالحمد لله انا نجحت في الطبيخ بس ما عنديش خبرة في الغسيل والتنظيف وحتى ما بعرفش اعمل سويت لنفسي رغم انها ست بيت من الدرجة الاولى ولكنها كانت تبعدني دائما عن هذة الاشياء ولن تصدقوا اذا قلت لكم اني اسكن في نفس البيت لان بابا اعطاني شقة في البيت لانه كان يعلم انني لن انجح في حياتي الزوجية لانني لن اتعلم شيء وعندما اعاتبها واخبرها ان زوجي بيتضايق من كذا او كذا فعلميني يا امي تقول لي خليه يحمد ربنا انه قاعد وما بيدفعش ايجار وبعدين لو مش عاجبه خليه يعمل هو او يسيبك انتي مش محتاجة له في حاجة فيا اخواتي انا نفسي اكون ست بيت علشان احافظ على جوزي فماذا افعل وكيف اتعلم ساعدوني؟؟؟

[drnahla]

المنتدى ده هيخليكى ست بيت درجة اولى
اقرأى مواضيعه بجد هتستفيدى

[ام بسنت]

قولى بالظبط انتى عايزه تتعلمى ايه واحنا تحت امرك وممكن تكتبلى رساله على الخاص اى حاجه انتى عايزاها ولازم انتى تملى عين جوزك من كل حاجه ادخلى قسم معامله الازواج واقرى واتعلمى وانتى بايدك تعلمى نفسك بكل حاجه

[مونى88]

انا من راى نهلة وام بسنت كلامهم جميل وصح
ويارب يوفقك فى حياتك

[شيرين سامي]

نفسي اتعلم انظف نفسي ازاي وازاي اغسل الملابس البيضا بشكل ناصع البياض وارتب يومي ازاي وازاي انظم مصروف البيت فزوجي يعطيني مبلغ 700ج للعلم انا عندي طفلين اسلام سنتين ونص وسيف 3 شهور وعندي مشكلة البامبرز وللعلم ايضا انا كنت مدرسة اعدادي مادة دراسات اجتماعية وعندي 29 سنة

[أم مريم]

شوفى كل اللى انتى عايزاه هتلاقيه هنا فى المنتدى
و اللى متلاقيهوش اسألى عنه و هتلاقى ألف مين يقولك
وكلنا فى الخدمة و اعتبرينا كلنا زى اخواتك بالظبط
احنا فعلاً كلنا اخوات
و اهلاً بيكى اخت جديدة لينا

[drnahla]

انتى نورتى المنتدى يا شيرين
وامنتدى ده هيبقى نقطة انطلاقك
بجد انا استفدت منه كتير
وربنا يخلى ليكى اسلام وسيف
تصفحى المنتدى هتلاقى اجابة لكل اسئلتك
واهتمى بقسم معاملة الازواج وقسم الاسرة
فى النتدى ده تجتمع خبرات السيدات المصريات
ربنا يوفقك

[شيرين سامي]

عايزة وصفة لغسيل السجاد تكون كويسة وسريعة

[ام بسنت]

بالنسبه للهدوم ممكن تنقعيهم من باليل وفيه واحده هنا فى المنتدى كانت كتبه انها بتحط خل فى الغسيل وفيه مبي للغسيل بينباع وتجيبى داونى عشان يبقى ريحتها حلوه والعنايه بنفسك دى ادخلى قسم العنايه بالبشره انا عامله عنوان برنامج متكامل للعنايه بالجسم حيفيدك جدا جدا وممكن تلاقيه تحت اسمى فيموايعى اللى بتبقى موجوده تحت المشاركه واى حاجه قول عليها واحنا نساعدك وربنا يخليلك ولادك

[شيرين سامي]

نفسي اوي اكون كويسة بس خايفة خايفة اوي

[وسام عادل]

بصى يا شرين مش ضرورى ماما تعلمك المهم انت تحاولى لوحدك وربنا ادانا العقل لازم تشغلى عقلك الاول اولا موضوع البامبرز انا عندى كان عبد الرحمن ابنى ومريم اختة منت بعمل ايه البسهم بنطلون طول النهار واول ما ينامو البسهم البامبرز اما موضوع مصروف البيت فانت مفروض تدبرى امورك ومش ضرورى كل يوم اكل جديد سيبك من كلام ماما اما بالنسبة للغسيل الابيض فممكن تنقعى الغسيل الابيض من الليل فى اريال وكلور وزهرة وتحطية فى الغسالة هيبق زى الفل اما بالنسبة لقمصان جوزك انا بعمل اية بغسل الليقة والاساور الخاصة بالقميص وبعدين احطها فى الغسالة وبتبقى نظيفة اما السويت فلازم تعملى لنفسك وتتعودى بعد الاولاد ما ينامو اعملى لنفسك اما انت فلازم تهتمى ان يمون مظهرك عند جوزك كويس سرحى شعرك حطى برفان حطى روج ادى لنفسك الاهتمام هيوصل لجوزك وربنا يوفقك

[شيرين سامي]

ممكن لو سمحتوا من واقع خبرتكم تنصحوني انظم مصروف بيتي ازاي على البنود دي : الاكل . المنظفات.الكدليز.الصيانة20ج.الكهرباء. التليفون. الموبايل. العلاج.

[مونى88]

او ممكن طريقة تانية للهدوم البيضاء ممكن
تغسليهم برنامج كامل وبعد اما يخلص
تعيدى البرنامج تانى وتحطى الكلور
والزهرة وداونى عشان ريحته
وصدقينى هيطلع فى منتهى النظافة
انا بعمل كده عندى وبيطلع ابيض ناصع

[شيرين سامي]

ربنا يخليكم انا اول مرة احس اني مش لوحدي في الدنيا انا فرحانة اوي بس خايفة اكتر

[شيرين سامي]

مدام ام بسنت ممكن تساعدني في تظبيط مصروف البيت ارجزكي

[ام بسنت]

بصى ياستى انتى اولا تجيبى ورقه وقلم وتكتبى بتحتاجى كام كيلو رز فى الاسبوع وتكتبى السعر وتجمعى بقه على اربع اسابيع
واللحمه زى الرز بتجيبى كام كيلو
والخضار قولى مثلا 400ج اكل فى الشهر ولو اتفضل حاجه تعنيها على جنب وتزودى 50 ج للطوارىء
وتشوفى بتدفعى اد ايه كهربا وميه فى الشهر وتزودى خمسه جنيه كده
والفاتوره طبعا بتاع التليفون كل تلات شهور
واما بالنسبه للبامبرز المفروض تعلمى ولادك يعملو حمام فى الحمام مش تلبسى بامبرز على طول كده وممكن تلبسيه باليل او للضروه لو خارجه وكمان الحر جاى والبامبرز بيجيب التهابات حاولى كل شويه تدخلى ابنك الحمام كل عشر دقايق فى الاول حيتعبك بعد كده حيتعود
يارب اكون قدرت افيدك لو اى حاجه عايزاها اسالنى انا تحت امرك

[ام بسنت]

نسيت اقولك على الموبايل عشرين جنيه كويس
والصيانه 20
والكهربا والميه فرضا انت تشوفى متوسط الى بتدفعيه كل شهر وبيزيد از ينقص
بصى لماتفتحى وتقعدى ممكن تبعتيلى رساله على الخاص عشان اكلمك وان كنتى عازه اى حاجه اسالنى لو فى مقدرتى اقولك او اساعدك مش حتاخر

[رونا]

بصى حبيبتى أهم شئ مش تقعدى تفكرى كتير وتقول ازاى هنظم البيت وازاى هنظم المصروف وازاى وازاى ... الخ

كل ده هيقلب دماغك وهيشغلك عن الشئ المهم والأساسى .. الا وهو إنك إزاى تتعلمى

أنا لما إجوزت كنت بعرف حاجات بسيطه ومتواضعه ومع الوقت إتعلمت

وربنا يخلى النت والكتب بيعلمك كل شئ لدرجة إنى مش بلجأ لماما فى أى شئ دلوقت

حتى لما أحتار فى أكله بدخل على عمو جوجل وأكتبها ما شاء الله تطلعلى وصفات كتير

واضح إنى أكبر مشكله عندك عايزه تسيطرى عليها هى تنظيم مصروف البيت

أنا جربت كل البرامج إللى تخطر على بالك علشان أنظم بيها مصروف البيت

وبدأت أول حاجه بطريقه حلوه

هى كل حاجه أشتريها أكتبها واكتب السعر قدامها

يعنى الشهر 4 أسابيع أكتب كل أسبوع فى ورقه بأيامه

وكل يوم أكتب فيه أنا إشتريت إيه والسعر قدامها

تيجى آخر الشهر تبصى على الورقه دى هتلاقى عيوبك ونقاط ضعفك من خلال إللى إشترتيه


يعنى أنا مثلاً أول ما عملتها لقيت اكبر عيب إنى بشترى أكل جاهز من بره كتير ولقيت إنى بصرف

عليه مبلغ كبير ومتخيلتش إنى المبلغ يطلع كده!!

قلت يعنى أنا باخد المرتب وأروح أنفع بيه هارديز وكنتاكى أو أى مطعم وطبعاً بعد كده إنتبهت

وقلصت المبلغ أكل بره للنص تقريباً.. وبدأت أنا أعمل بورجر فىا لبيت او اجيب بورجر مثلج واجيب انا

باقى المكونات لقيت فى فرق كبير يعنى إللى بنصرفه فى خروجه واحده ممكن ناكل بيه اسبوع

مش معنى كده ، حتى لو معانا فلوس كتير نرميها فى الارض

الرفاهيات مطلوبه ولكن بوسطيه

بدأت أعمل ميزانيه كمثال كالآتى:

ترفيه : فى الاسبوع 10 دينار

ميزانيه أكل البيت " سكر ورز ولحمه والخ: 100 دينار

تليفونات : متخرجش عن مبلغ محدد على اد امكانياتى

فواتير كهربا وميه : كذا ...

وبخلى مبلغ للطوارئ إن شاء الله يكون 10 جنيه ولو مستخدمتهوش بضمه لمبلغ الطوارئ للشهر إللى بعده .. وتصدقى حوشت مبلغ من الطريقه دى

يعنى إنتى نظميها حسب احتياجاتك

واياكى والخوف مش هيخليكى تتقدمى خطوه .. جمدى قلبك وتوكلى على الله وادعى دايماً"

اللهم لا سهل إلا ما جعلته سهلاً وأنت تجعل الحزن إذا شئت سهلاً."

وااللهم اهدني وسددني

و يا حي يا قيوم برحمتك أستغيث، أصلح لي شأني كله، ولا تكلني إلى نفسي طرفة عين


صدقينى من توكل على الله فهو حسبه

إنتى بس اصبرى على نفسك وشوفى بعد كام شهر إنت إللى هتيجى وتعلمينا أصول إدارة المنزل على حق

ربنا يوفقك ويسدد خطاك

ولو عندك أى أسئله أنا حاضره

[raghoda]

ربنا معاكى لو عوزتى اى حاجه اسئلى حتلاقينا كلنا معاكى و حنفيدك ان شاء الله

[مدام ياسر]

ربنا معاكى ويوفقك انا فعلا مقتنعة براى ام بسنت انا كنت بعمل كدة قبل ماجوزى يسافر وكل حاجة بحسبها بالورقة والقلم وصدقينى هتلاقى نفسك بتوفرى اخر الشهر مبلغ كويس.
وربنا يكرمك ويخليلك اسلام وسيف