[دودينا]

لو شاطر .. تعرف تعيش فى مصر بـ 1000 جنيه فى الشهر !!!

بيان المصروف اليومى والشهرى :

- عيش بلدي : 1 جنيه يومياً = 30 جنيه شهرياً
(بس لازم تلحق دورك فى طابور الفرن وتلحق شغلك فى نفس الوقت ربنا معاك )

- حليب : 4 جنيه يومياً = 120 جنيه شهرياً
( عدد واحد لتر يومياً ويارب ميطلعش بودرة سيراميك ويكفى العيال )

- فول : 8 جنيه إسبوعياً = 32 جنيه شهرياً
( كيلو فول اسبوعيا يعنى 125 جرام يوميا رضا والحمد لله )

- جبنة بيضاء : 20 جنيه إسبوعيا ً= 80 جنيه شهرياً
( كيلو في الأسبوع 125 جرام يوميا انت عايش )

- بيض : 5 جنيه إسبوعياً = 20 جنيه شهرياً
( عبارة عن 10 بيضات فى الاسبوع يعنى لو اربع افراد يبقى بيضه ونص يومياً للأربعة أفراد )

- خضار : 10 جنيه إسبوعياً = 40 جنيه شهرياً
( عبارة عن صنف واحد بس + كيلو طماطم + ليمونه وحزمة جرجير أسبوعيا )

- فاكهه : 5 جنيه إسبوعياً = 20 جنيه شهرياً
( عبارة عن كيلو برتقال أو قشر موز مرة أسبوعيا عشان العيال تفتكر إسمه )

- شاى : 10 جنيه شهرياً
( لزوم الكيف اللى بيذل والضيوف الرزلين )

- سكر : 4 جنيه إسبوعياً = 16 جنيه شهرياً
( عدد واحد كيلو أسبوعيا .. لزوم الكيف اللى بيذل والضيوف اللى معندهمش دم )

- أرز : 4 جنيه إسبوعياً = 16 جنيه شهرياً
( عدد واحد كيلو أسبوعيا للعائلة كلها .. يعنى 125جرام يوميا للأسرة ومتوسط الفرد 40 جرام )

- زيت طعام : 10 جنيه إسبوعياً = 40 جنيه شهرياً
( لتر اسبوعيا علشان تشرب بق على الريق يزيت معدتك ويستعمل كبديل للخضروات )

- مكرونة : 8 جنيه إسبوعياً = 32 جنيه شهرياً
( عبارة عن عدد 4 كيس 400 جرام أسبوعيا .. خلى العيال تنبسط )

- دجاج : 20 جنيه إسبوعياً = 80 جنيه شهرياً
( عدد واحد دجاجة أسبوعيا للعائله .. أظن معقول )

- لحم : 30 جنيه إسبوعياً = 120 جنيه شهرياً
( عدد واحد كيلو لحم أسبوعيا لزوم صنف الخضار والليمونه وحزمة الجرجير.. ألف هنا وشفا )

- بقوليات : 10 جنيه شهرياً
( عبارة عن كيلو واحد بس شهريا ونقى اللى بتحبه براحتك .. عدس - لوبيا - فاصوليا )

- توابل : 10 جنيه شهرياً
( عبارة عن دقيق + ملح + كمون + فلفل + كسبرة + وممكن تديها خل براحتك )

- صابون : 15 جنيه شهرياً
( عبارة عن صابونه واحدة للحمام + صابون مواعين + مسحوق للملابس ( النظافة عموما )

- مواصلات : 2 جنيه يومياً = 60 جنيه شهرياً
( بعد طابور الفرن تركب أتوبيس الهيئة ذهاب وعودة وبهدله لفرد واحد يوميا )

- حلاق : 10 جنيه شهرياً
( عبارة عن حلاقة الشعر + ماكينات حلاقة الذقن ( طبعا متنساش انت جبت صابونه للحمام هى هى الصابونه اللى هتحلق بيها دقنك ( نعيما ياباشا )

- مصروفات مدرسية : 10 جنيه إسبوعياً = 40 جنيه شهرياً
( عبارة عن مصروفات المدرسة + مصروف العيال اليومى + كراسات وأقلام وجلاد ... إلخ )

- دكتور : 30 جنيه شهرياً
( نمرض بالدور طبعا .. عدد أربعة أفراد × مرة واحدة للفرد كل 4 اشهر وربنا يستر )

- أدوية : 50 جنيه شهرياً
( أكيد طبعا العلاج بالدور وربنا يستر واثنين ما يمرضوش فى وقت واحد .. تبقى كارثة )

- فاتورة التليفون : 10 جنيه شهرياً
( اشتراك الهيئة فقط .. هنرد بس ومش هنتكلم .. ماعدش ينفع كلام )

- فاتورة المياه : 10 جنيه شهرياً
( للأسف ده لو فلوسك على أدك ويبقى لازم تشرب مياه ملوثة بالمجارى )

- فاتورة الغاز : 5 جنيه شهرياً
( الحمد لله .. غاز طبيعى .. الله يكون فى عون اللى عنده أنابيب (10 جنيه للأنبوبة) وممكن تطلع فاضية )

- فاتورة الكهرباء : 20 جنيه شهرياً
( لمواكبة التطور .. غساله ملهاش مسحوق .. تلاجة فاضية .. بوتجازيستخدم مرة كل أسبوع )

- قمامة : 10 جنيه شهرياً
( ودى إجبارى طبعا ومن الواضح إن العيشة دى ما فيهاش أكل أساساً .. يبقى القمامة هتيجى منين ؟ )

- بواب : 15 جنيه شهرياً
( ماهو من حقه يعيش هو كمان .. لو عشرشقق يبقى 150 جنية شهريا .. خليه يهيص )

- صيانة : 30 جنيه شهرياً
( لإصلاح الأجهزة بالدور .. غسالة - سخان - بوتوجاز - مروحة - ثلاجة - سباكة - لمبات إنارة .. الخ )

- ملابس : 100 جنيه شهرياً
( عبارة عن الصيفى والشتوى داخلى وخارجى واحذية وشرابات وكلونات واتصرف بقى )

------------------------------------------
الإجمـالى : 1081 جنيه شهرياً
-----------------------------------------

أكيد اللى ها يخليك تعرف تعمل الكلام اللى فوق ده ها يخليك تتصرف وتضغط مصروفاتك شويه علشان تبقى الحسبة 1000 جنيه بس .. أقولك نصيحة ؟ : ما تمرضش وما تخدش أدوية وشيل 80 جنيه معلش ربنا يقويك وينصرك على من يعاديك ويكفيك شر المرض

إيجار الشقة طبعا قانون جديد وللأسف مالهوش قانون .. كل واحد وبخته .. ومش ها نحسبها كل واحد يقعد عند أمه .

وبالمناسبة .. عيد الام ربنا يخليها ويديها الصحة .. كل سنة وهى طيبة

عيد الكحك .. مضر ومالهوش لازمة

عيد اللحمة .. مضر ومالهوش لازمة

حلاوة المولد .. السكر مضر ومالهوش برضه لازمة .. ولو على الحلويات رمضان كريم وخيره كتير

أخ خ خ نسيت احسب زكاة الفطر بس مش عارف هادفعها ولا هاخدها ؟

عموما هاقولكم على قائمة الممنوعات والمحظورات .. متقربوش منها علشان تعرفوا تتنيلوا وتكملو الشهر

ممنوع .. الحلاوة والمربى والعسل والزبدة وكافة أنواع الجبن عدا ما ذكر فى التعيين ( الجبنة البيضا )
ممنوع .. المعلبات .. تونه - بلوبيف - لانشون - سالمون – فول - وطبعا البسطرمة والزيتون والمخللات

أوعى قلبك يحن لعيل من العيال وتجيبله شيبسى ولا بيبسى أو كراتيه ونايتى ولاعسلية ولا بسكوت ولا شيكولاته .. إياك ومنتجات العيال الصغيرين حتى لو حليب بالفواكه أو لبان وجيلى كولا وهوهوز .. حتى الشيتوس يتفرج على الكرتون بتاعه فى التليفزيون ومتخليهوش يتفرج على الاعلانات بين الفاصل

ممنوع اللحوم بانواعها .. البوفتيك والاستيك والرقبة والموزة واللوزة كله كلام فاضى خليك فى تعيينك الاسبوعى .. ومتنساش ان البانيه والفيليه من الممنوعات .. وماتقربش وماتمشيش فى الشارع جنب كنتاكى وهاردييز وهاربيز وتكه ومؤمن وكوك دور .. وإياك من السندوتشات عموما زى الطعمية والبطاطس والباذنجان والحاجات الحلوة دى مش مطلوبه تعملك حموضه وهتحتاج فوار وإحنا ماعملناش حسابه فى مشتروات الدوا .. وطبعا مش محتاج أقولك وافكرك انك ممعكش فلوس علشان يبقى نفسك فى سندوتش فرنساوى مليان كبدة اسكندرانى ولا مخ .

خليك واقعى وانسى المحمر والمشمر واللب والسودانى والتسالى بانوعها والمحمصات والمقرمشات والمكسرات بأنواعها .. بالعربى أنت زى العصفورة تاكل عيش ودنيبة رز وتشرب ميه .. عمرك سمعت عن عصفورة ركبت دش أو وصلت نت او حتى فكرت تاكل ترمس او تشرب حمص كله كلام فاضى ممنوع ياسيد

اهم حاجة ماتروحش لدكتور ومتجبش مدرس ولا ادوية وإياك من المعجنات زى البيتزا والفطائر ومش محتاج افكرك ان البسبوسه والجلاش والكنافة والقطايف والجاتوة والشاتوة والتورت وام على وصوابع زينب ورموش الست والكحك والغريبة ممكن تستغنى عنهم

طبيعى انك مش هتقرب من الفواكهة خالص زى البرقوق والمانجو والبطيخ والفراوله والكيوى والخوخ والعنب والتفاح حتى الكاكا والحرنكش والنبأ والقصب والدوم والتوت ممنوع سيادتك

وطبعا معجون الاسنان والحلاقة والشامبو والبلسم كلها رفاهيات ماليكش فيها زى البصل والتوم والبطاطس كلها أساسيات ماليكش فيها برضه .. وماتنساش تبعت الميل للناس اللى تعرفهم هما اكيد زيك محتاجين شوية نظام مش اكتر هما غلابة .. وفكرهم يقولوا لعيالهم لو شافوا مسلسل فى التليفزيون مليان بهرجه إن دى قصص خيالية كانت فى العصور القديمة فترة من الزمن وإن الواقع زى ماهما شايفيين دلوقتى .
حتى الإعلانات حاولوا تفهموهم إنها مجرد ألوان مبهرة وتكنولوجيا فى علم التصوير وتخيلات ممكن تحصل بعدين زى ماحصل فى امريكا وكندا وفرنسا والمانيا واوروبا كلها .. وان الحجات دى علشان لما الناس دى ييجوا عندنا يلاقو منها ويعرفو يعيشو هى مش لينا دى ليهم هما أصحاب البلد ولازم ينبسطو

عموما لو على الكلام مش هايخلص روح بقى الحق طابور العيش لايفوتك .. تبقى مصيبة لو أنا اللى عطلتك ورحت لقيت الفرن شطب وتقعد طول اليوم تدعى عليا .


( منقول لتعميم حرق الدم )

اذا اعجبك الموضوع و اردت نشره في المنتديات الاخرى فاستخدمي هذا الرابط:
لو شاطر .. تعرف تعيش فى مصر بـ 1000 جنيه فى الشهر !!!
http://forums.fatakat.com/thread12210

[sponge pop]

نسيتى حاجه يا دودى انك تصححى بعض الاسعار خصوصا اللحمه بقت ب 35 جنيه ان لاقيتيها بالسعر ده و مش طلعت لحمة .... ولا بلاش


و لموضوع حرق الدم انا محروق دمى جاهز بس شكل اللى كاتب الموضوع ده راجل بس هو عرف ده كله منين دول اخرهم يجيبوا فاكهه

[بسكوووووته]

ربنا مع الجميع بصراحه لأن الوضع بدأ يبشر بأن التاريخ بيعيد نفسه وان ثورة الجياع قربت ده اذا مش كانت بدأت فعلا .

[heba saad]

يلهوى عليا دة فعلا 1000 جنية متقضيش اية دة
دنا مش عايشة في الدنيا انا مابنزلش اشتري حاجات ولما قرات الموضوع اتصدمت
انا لسة ببيت اهلى يعنى الواحد ما يتجوزش احسن ويفضل بالبيت
الف جنية من غير ايجار ومن غير علاج يلهوى
فعلا ربنا يسترها احنا بزمن الناس هتاكل بعضها فية
ربنا يكون في عون النااااااااااااااااااااااااااااااااااااااااااااااا اااااااااااس

[مدام ياسر]

فعلا والله ربنا يكون فى عون الجميع بس الاسعار فى زيادة مستمرة يعنى كل ما حاجة يزيد سعرها نستغنى عنها تبقى مش ليها لزمة ومش لازم ناكل الاكل دة بردة رفاهية
هههههههههههههههههههههههههههههههههه

[مدام ديدى]

انا مش عارفه اقول ايه طب انت بتتكلمى عن اربعه افراد وطبعا اللى موجود ده وهم
ازاى يعيشوا بفرخه واحده وكيلو لحمه وفين الخضار والطماطم اللى بقت بتلاته جنيه ونص ده انا لو حسبتها وبالمعقول ياخرااااااااااااااااااااااااااااشى ده احنا فى ستر من عند ربنا انا كمان زيك ياهبه مبشتريش حاجه بس محرق دمى ده كل يوم الاسعار فى العالى وبعدين فاتوره النور اللى مكتوبه ديه من ايام توت عنخ امون مين اللى بيدفع عشره جنيه فى الشهر ولافاتوره التليفون ولا سندوتشات المدرس اللى مش موجوده فى اللسته انا بعد ماقريت موضوعك يا دودينا انا اكتشفت انى مش عارفه الشهر بيعدى ازاى ده ستر من عند ربنا وبحمد الله عليه الاسعار ضربت فى كام

[rookaaa20]

احسن حل يرخسوا الحاجة او يرجعوا نظام المقايضه من تانى

[may55]

عندك حق بس سعر اللحمة 59جنيه وسعر علبة اللبن 6جنيه اما الفراخ ب33جنيه ودي اخر الاسعار ممكن نعمل رجيم احسن ونستغني عن كل حاجة

[preatywoman]

لان فعلا مبقاش حد عارف يعيش مبقتش تفرق بين وموظف ومواطن عادي وربنا يستر

[د/لولي]

انا بعترض
ليه لحمه كل اسبوع وليه فراخ كل اسبوع كله مره واحده في الشهر
وبعدين فين الميه والكهرباء اللي ب20 جنيه دي لو جت اققل من ميه هاعمل فرح
وبعدين فواتير الموبيل والنت
انا بتوقع خلال خمس سنين الشعب هايتقسم 2 اغنيا اوييييييييييييييييييي ودول بالكاد هايعيشو وفقرا اويييييييييييييييييييييييييييييييييييييييييييييييي ييييييييييييييييي ودول هايموتو هايموتو ويبقي احسن عشان البلد تفضي

[s.amro]

جيتى على الوجيعة بس الموضوع اسلوبه ظريف اوى

[Marwa Esmael]

ربنا يسترها وهقول ايه عمار يامصر فرجه قريب