السلام عليكم ورحمة الله وبركاتة
اسأل الله العلى العظيم رب العرش العظيم ان يتوب علينا من المعاصى والذنوب واوصيكم واوصى نفسى بتقوى الله واتمنى ارسال هذة الرسالة فى كل المنتديات وعبر الماسنجر لك الأجر والثواب
والسلام عليكم ورحمة الله وبركاتة
وقفات مع سورة القيـامـة
لا أُقْسِمُ بِيَوْمِ الْقِيَامَةِ (1)
لما الملك يقول " لا أقسم "
يعنى عارف لما واحد يقسم لواحد يقولة بص انا مش هحلف بس لو معملتش الموضوع الفولانى انت حر
" لا اقسم " كلمة فيها غضب من الجبار
من الذى اغضب الله سبحانة وتعالى ؟؟
يا ترى ذنوب المذنبين
ولا عصيان العاصين
ولا غفلة الغافلين
ولا أعرا ض المعرضين
يوم القيامة دا مدتة قد اية
50 الف سنة كما روى عن رسول الله صلى الله علية وسلم
انت متخيل معايا ان يوم القيامة 50 الف سنة
وممكن بعض العصاة ال50 الف سنة يعذب والعياذ بالله
وَلا أُقْسِمُ بِالنَّفْسِ اللَّوَّامَةِ (2)
اية هى النفس اللوامة ؟
النفس اللوامة اللى يقع فى المعصية ويرجع يتعب بس يقع فيها تانى
النفس اللوامة اللى عاوز يطيع ربنا ولكن شهواتة غلباة
اللى شوية بيصلى وخاشع فى الصلاة ومع ربنا
وشوية بعيد
النفس اللوامة اللى ماشى على سطر ويسيب سطر
طيب انت لية مبتطعش ربنا بالطاعة التى يستحقها الله ؟
يقولك مش قادر
هو يا جماعة الدين سهل
هو الدين حاجة سهلة ؟؟
انت عشان يبقى عندك مليون جنية
لازم تتعب ولا لأ !!
طب عشان الجنة مش لازم تتعب ؟
عشان حد ياخد شهادة عالية دكتوراة ولا حاجة – لازم يتعب ولا لأ
طيب الجنة مش عاوزة تعب ؟؟
اشمعنى الدنيا عاوزة تعب والجنة مش عاوزة تعب !!
اشمعنى الدنيا عاوزة شغل واجتهاد
والأخرة مش عاوزة شغل واجتهاد !
تلاقى الطالب مثلا فى الثانوية العامة او فى الجامعة بيزاكر 10 ساعات فى اليوم
تقولة طيب اقرأ يعنى ساعة قرأن كل يوم يقولك اصل انا مصدع اصل انا تعبان
اصل انا عندى امتحانات
تلاقى الواحد ممكن يقعد يتفرج على ماتش كوورة ساعة ونص عينية متقفلش طول الساعة ونص
تقولة فية درس فى الجامع بين المغرب والعشاء تعالى احضر
يقولك والله مش فاضى اصل انا مشغول
لية يا جماعة همنا الدنيا ومش همنا الاخرة ؟؟
لية عظمنا الدنيا وخوفنا من الدنيا وعملنا حساب مشاكل الدنيا ومعملناش حساب مشاكل الأخرة !
لو واحد عندة 10 عيال وقولتلة انت بتعرف تنام ؟ يقولك لا يمكن أنام
طب لية ؟
يقولك دا انا عامل زى اللى بيتكربج بالظبط
لما اجى انام الاقى كرباج نازل عليا
قوم اشتغل هيأكلوا منين العشرة دول
قوم اشتغل عشان تأكلهم
اقوم اشتغل
ارجع انام اريح
الاقى كرباج تانى نازل عليا قووم اشتغل العيال دى مش هتدخل مدارس
وعايزة لبس وعايزة وعايزة ...
كذلك دا عاوز حد يصحية ييجى ينام يلاقى كرباج نازل علية قووم
هتعمل اية فى سؤال الملكين؟
هتدخل القبر ازاى ؟
هتعدى من على الصراط ازاى ؟ وجنهم تحت الصراط ولا يوجد طريق للوصول الى الجنة الا من العبور من على الصراط
قوم – انت هتنام !! ؟
فى الاخرة ميعرفش ينام
تخيلوا يا جماعة معايا
نهر النيل
لوجبنا عمارة على الضفة الأولى عمارة 10 ادوار
وعمارة تانية على الضفة التانية 10 ادوار
وجبنا حبل وربطناة بين العمارتين
لو قولتلك عدى
تعرف تعدى ؟
ولو عديت !!
تحتك النيل
اللى هيقع هيقع فى النيل
فما بالك بقى لما يكون تحت جهنم !!!
فليس لك وقتها الا عملك ورحمة الله سبحانة وتعالى عليك
مينفعش ترجع !
كما قال ربنا سبحانة وتعالى
" ولو نشاء لمسخناهم على مكانتهم فما استطاعوا مضيا ولا يرجعون(67)
يتمسخ وهو بيعدى من على الصراط
فما استطاعوا مضيا ولا يرجعون
يعنى ميعرفش يكمل الدنيا ضلمة هيكمل ازاى
ولا يرجعون هيرجع ازاى مفيش رجوع
الصراط يا جماعة مش حبل ...
الصراط دا لو ماسورة مياة ممدودة على البحر المتوسط مثلا فالأنسان ميقدرش يعبرها الا بعملة ورحمة ربنا سبحانة وتعالى
يبقى على حسب عملك دلوقتى
على حسب ايمانك دلوقتى
على حسب نجاتك من النار وجنهم وبئس المصير والعياذ بالله
شوفوا وقت الامتحانات
الطلبة بتبقى مرعوبة ازاى
والاهالى مشدودة ازاى
لية
العيال بتمتحن !!
فما بالك بقى ان فية امتحانات فى الأخرة لازم تعمل حسابها
كل واحد فينا عندة امتحانين فى القبر
وتلات أمتحانات يوم القيامة
هيعمل اية فيهم !!
عندك فى القبر
1 – امتحان الملكين
من ربك !
ما دينك !!
مين ربك ؟؟ اية دينك !! انت كنت مؤمن بدينك ولا لأ !!
الامتحان التانى 2- امتحان العمل
هو عملك
ممكن الانسان يفضل يتحاسب فى قبرة لحد يوم القيامة على عملة !! فى الدنيا
يعنى مثلا تخيل
واحد مثلا سرق وتوفى بعد 14 سنة
تعالى بقى
14 سنة ويوم
صحيت الصبح – مصلتش لفجر فى الجامع قبل ما الشمس طلعت لية ؟؟
اخرت الطاعة لوقتها لية !!
ثم – بعد كدا .. نزلت تروح لمدرستك قابلت واحد شتمتة وشتمك – شتمتة لية ؟؟
ثم بعد كدا ..رجعت ابوك كلمك شوحتلة !!
شوحتلة لية ؟؟
بعد كدا قعدت قدام التليفزيون قعدت تتفرج ع التليفزيون على اغانى ورقص
تخيل كل دا فى أول يوم
بعد كدا .. 14 سنة ويومين
14 سنة و3 ايام
14 سنة و4 ايام
طب 10 ايام !!
لية يا جماعة احنا عاملين حساب مشاكل الدنيا وناسين مشاكل الأخرة !!
لية خايفين من هموم الدنيا ومش خايفين من هموم الاخرة !!
لية مش عاملين حساب اول يوم فى القبر
حينما يلف المرء بكفن لية له جيوب محدش هيحطلة فلوس فى جيبة !!
انتوا متخيلين الدنيا دى عاملة زى أية !
عارفين عاملة زى
جنينة حواليها سوور
والجنينة دى مليانة كنوز وجواهر ..
فالناس دخلوا الجنبنة فا كلة قعدوا يلموا فى الكنوز
ولكن السلطان – موقف ع الباب بتاع الجنينة واحد
بيقولة اى حد يخرج من الجنينة دى
ممنوع يخرج بأى حاجة فى ايدة !
خد منة كل اللى فى ايدة
محدش هيخرج من الجنينة ومش معاة حاجة
كذلك الدنيا
احنا قاعدين نجمع نجمع فى الاموال
وربنا أمر ملك الموت
اى حد هيخرج من الدنيا
اى حاجة مالكها من الدنيا مش هتروح معاة
عندة اراضى عندة بيوت وجواهر وفلوس كل دا قضى
يبقى اللى قاعد يجمعة دا بيجمعة لية ؟
ماهو رايح رايح !!!
مش هتدخل قبرك الأ ومعاك أعمالك فقط لا غير ..
لسة كل دا فى امتحانين فى القبر بس
لسة فية 3 امتحانات يوم القيامة !
احنا لية خايفين من الدنيا ومضخمين فيها
ومش عاملين حساب للاخرة ومش مهتمين بيها
صلاة الجماعة
النبى علية الصلاة والسلام بيقول .. ان صلاة الجماعة افضل من صلاة الفرض فى بيتة
يعنى انت دلوقتى لو عندك محل
والمحل دا قدامك انك تتاجر فية بدهب
وقدامك انك تتاجر فية بفول وطعمية
هتكسب كدا 10 ا لاف جنية وهتكسب كدا 200 ج مثلا
اللى ميتاجرش فى الدهب يبقى مش حاسبها صح !!
فربنا قالك تعالى تاجر فى الدهب وفى اللى اغلى من الدهب اللى هى صلاة الجماعة
يا جماعة دلوقتى – احنا فى الدنيا بنندم
تلاقى واحد يقولك
دا الأرض الفولانية بقيت بالتمن الفولانى الوقتى
زمان كانت معروضة عليا بملاليم
وانا مرضتش اشتريها
فتلاقى ولادة زعلانين اوى وندمانين اوى
ياريتك اشترتها دا احنا كان زمانا اغنية يا جماعة يوم القيامة الناس هتندم
كان اسهل حاجة فى الدنيا انى اصلى واطيع ربنا
وانى اصلى قيام ليل واصوم ونوافل واذكر ربنا واقرأ قران واحفظ قرأن
كان اسهل حاجة
ولكن كلة هيندم فى الاخرة لية !
لان الناس مش بتستغل الدنيا صح
مش عايشة الدنيا صح
لو روحنا على المقابر
وربنا احيا لينا الأموات
وسألناهم كلهم
امنية حياتكم اية ؟؟
كل واحد هيقول 5 دقايق ارجعهم بس
اصلى ركعتين
طيب ما احنا قدامنا الدنيا فيها 5 دقايق و10 و100 و1000
عملنا اية !!
نفذنا اية
!!
لية نستنى لغاية ما نندم !
لو انت بتعمل معصية معينة !!
وربنا سمعك واحد فى المقابر بيعذب على نفس المعصية اللى انت بتعملها
هتفضل تعملها !! ؟؟
لا طبعا !! لانك سمعت واحد بيتعذب عليها
يا جماعة احنا مش احسن من اللى ربنا بيعذبهم فى قبورهم
انت اللى بينك وبين ربنا عملك !!
فيجب ان ننظر للاخرة نظرة اهم من كدا ونعمل عشانها
يعنى فى المشاريع الكبيرة
لما الواحد يقول انا هعمل مشروع يقولك انا هعمل دراسة جدوى يعنى هشوف المشروع دا هيكسبنا قد أية !
طيب انت عمرك دا مش محتاج دراسة جدوى !!
احنا عاملين زى اللى عندة رصيد فى البنك بس ميعرفش الرصيد بتاعة كام
فا كل يوم يروح البنك عاوز فلوس خد فلوس ! عاوز فلوس خد فلوس
لغاية ما جة مرة عاوز فلوس !! قالولة مفيش !!
طب ازاى – طيب كنتوا عرفونى بدرى
كذلك الدنيا .. كذلك عمرك
انت كل يوم بتصحى بتقول يارب عاوز اى حاجة بتتمناها يعطيك ويديك من فضلة لانة الكريم
لغاية ما تيجى تطلب خلاص !!
لية
رصيد عمرك خلص
فلازم يا جماعة ناخد بالنا
من عمرنا بيعدى
وان احنا دلوقتى فى امتحان والله العظيم
وفية على يمينك وشمال ملكين بيكتبوا كل حركة وسجدة بيعملها
يعنى انت دلوقتى جوة امتحان
كل اذان بيأذن سؤال !!
لو روحت الجامع وتصلى يبقى جاوبت على السؤال – يا اما الواحد هيكسل وينام يبقى دا هيفشل فشل ذريع
كل منظر حرام بييجى فى التلفزيون امتحان
با اما انك تغض بصرك وتستغفر ربنا – يا اما انك تقع فيها
يبقى انت كدا جاوبت غلط
احنا دلوقتى فى امتحان
والوقت بيعدى
وشوية والامتحان هيخلص
والورق !! هينسحب
ويوم القيامة هنتحاسب وهيتصحح الورقة دى فى 50 الف سنة !!
لكن فية اختلاف كبير
امتحان الدنيا فى امتحان دور تانى
امتحان الاخرة مفيهوش دور تانى
امتحان الدنيا لو الواحد سقط هيحصلة اية يعنى هيترفد مثلا !!
امتحان الاخرة اللى هيسقط والعياذ بالله جنهم وبئس المصير
هيترمى فى جنهم والعياذ بالله
امتحان الدنيا
اسهل بكتير اوى من امتحان الأخرة
ومع ذلك ان احنا بنفكر فى امتحان الدنيا
وناسيين امتحان الاخرة
يعنى هنا انا عاوز اقول اية
انا عاوز اقول ان احنا لازم نفكر للاخرة
فاضلها قد اية
لازم يكون شاغل تفكيرك اول ليلة فى القبر هتعمل اية !؟!
لازم يكون شاغل تفكيرك يوم القيامة هتعدى من على الصراط ازاى !!
بحيث انك متجيش يوم القيامة تندم
لا أُقْسِمُ بِيَوْمِ الْقِيَامَةِ (1) وَلا أُقْسِمُ بِالنَّفْسِ اللَّوَّامَةِ (2)
اللى عاوز يطيع ربنا ومش قادر
مش قادر لية
طيب انت تقدر على عذاب القبر !!
طيب انت تقدر على السقوط فى جنهم !! من ع الصراط
طبعا لأ !
طيب اذا كنت متقدرش على عذاب معصية
يبقى متعصيش من باب أولى
أَيَحْسَبُ الإِنسَانُ أَلَّنْ نَجْمَعَ عِظَامَهُ (3)
هو انت فاكر لما تموت وتبقى تراب !! والتراب شوية فى الشرق وشوية فى الغرب وشوية طاروا فى الشمال وشوية طاروا فى الجنوب وفاكر ان ربنا مش هيقدر يجمعهم تانى ؟؟
يوم القيامة
لما يبقى العبد تحت التراب
ولما ربنا يأذن , يبدأ جسمة يتجمع ايدة ورجلة وجسمة وكل حتة فية تتجمع !! وعينية وكل حتة بتتجمع تحت التراب !!
وبعدها يرفع ويجمع من تحت الترات ويقوم
ماهو من 1000 سنة كان فية واحد مكانك مدفون
ومن 3000 سنة كان فية واحد قبلة مدفون فى نفس مكانكوا
فا الناس لما بتطلع كلها بتطلع فوق بعضها
«يوم تشقق الارض عنهم سراعا » (ق)
يوم تشقق الأرض
الأرض تتشقق ويطلع ناس
ويطلعوا سراعا بيجروا
طيب سراعا لية ؟؟
ماهو دا مدفون جنب ابوة !
ودا مدفون جنب مراتة
ودا مدفون جنب بنتة
الناس المفروض بعد ما تطلع تحضن بعض بقى وحشتنى وازيك يبنى وازيك يا بنتى ويا أمى ويا ابويا !!
من هول يوم القيامة
محدش بيفكر فى حد
محدش بيفتكر حد ولا حتى فاضى يبص له
كل واحد بيجرى !! يشوف مصيرة اية !!
فى هذا اليوم العظيم
حتى يقف بين يدى الله سبحانة وتعالى
أَيَحْسَبُ الإِنسَانُ أَلَّنْ نَجْمَعَ عِظَامَهُ (3) بَلَى قَادِرِينَ عَلَى أَنْ نُسَوِّيَ بَنَانَهُ (4)
بنان الانسان دا هو عقلة الأصبع
اللى بيسموها دلوقتى بصمة الصابع
البصمة اللى يقولك مفيش حد بصمة صابعة زى التانية
انت من مليارات بنى ادمين عايشين على وجة الكرة الأرضية
ربنا بيقولك دا انا مش بس هبعثك تانى
وهجمعك تانى
دا انا بصمة صابعك فى الدنيا هرجعهالك تانى يوم القيامة
ربنا انعم علينا كلنا بنعم كتيرة اوى لا تعد ولا تحصى
احنا مش حاسين بيها ومش بنحمد ربنا عليها
وربنا انعم علينا بيها مقابل اية
مقابل اننا نعصية بيها ؟؟
اعطاك عينين عشان تبص للمصحف وتقرأ فية
اعطاك ودانك عشان تسمع بيه
اعطاك لسانك عشان تذكرة بيه
اعطاك رزقك ودنيتك واعطالك كل حاجة فيها
عشان تذكرة وتعبدة بيها
مش عشان تعصية بية
مش عشان تماطل فى المعاصى بيها
بَلَى قَادِرِينَ عَلَى أَنْ نُسَوِّيَ بَنَانَهُ (4) بَلْ يُرِيدُ الإِنسَانُ لِيَفْجُرَ أَمَامَهُ (5)
الناس كلها فاكرة ان فية شهوة المال وشهوة النساء
لا
دا فية شهوة تانية اعظم اسمها شهوة الفجور
ازاى
!!
لما تلاقى الواحد يشرب سجاير كدا
يسحب النفس
وينفخ ! على الناس اللى حوالية
زى اللى قاعد فى ميكروباص ومشغل اغانى
هو لو شهوة الاغانى عندة بس هيشغل الأغانى بصوت واطى ويسمعها
لكن شهوة الفجور فى انة يجهر بالمعصبة علنا ودا الفجور
دا عايز يحس ان مفيش حاجة مقيداة
مفيش حاجة واقفة فى وشة !
عايز يحس ان مفيش حاجة حرام !
عايز يستمر فى الفجور محدش يقولة حرام ولا حلال !! ولا متعملشى !! مينفعش !!
دا دين !!!!
انت اتخلقت عشان هتتحاسب يوم القيامة
هتتحاسب 50 الف سنة
على عمل عملته
وكل كلمة قولتها
يبقى لازم من دلوقتى تعمل حسابك
دا انت لو عندك فاتورة ولا قسط هتدفعة اخر الشهر
بتفضل حامل همة طول الشهر
طب انت هتقف بين ايدى الملك !! ثم بعدها جنة او نار !!
يعنى مش مشكلة فى مشاكل الدنيا البسيطة لا دى مشكلة مصيرك واخرتك !!
الناس بتستقل بالنار
النار دى عمقها
70 سنة !!
يعنى ما بين سطح النار وما بين قاعها مدة تستغرق 70 سنة !! والعياذ بالله
يعنى اية 70 سنة
عارف يعنى اية 70 سنة !!
يعنى واحد اتولد واتعلم وكبر ودخل جامعة واتخرج واشتغل واتجوز وخلف وعيالة كبرت واتعلمت ودخلت جامعة واشتغلت واتجوزت وخلفت
احنا مستصعبين الطاعة رغم ان الطاعة دى هى اللى تخلى ربنا يحبك وهى اللى تخلى ربنا يفتح عليك فى الدنيا والاخرة وهى اللى هتخلى ربنا يقيك من عذاب النار والأخرة !
ربنا بيقول فى كتابة الكريم
فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا
لية منستغفرش ربنا ونسيب المعاصى ونعمل الطاعات عشانك يارب ؟
اللهم اغفر لنا وتب علينا يارب
يرسل السماء عليكم مدرارا ويمددكم باموال وبنين ويجعل لكم جنات ويجعل لكم انهارا
.. لو اطعت ربنا ربنا هيغرقك من انعامة عليك عاوز فلوس هيعطيك كل ما تتمناة لانك قريب الصلة بربك ومش بتعصية
يبقى لية احنا مبنعملش كدا
تلاقى الواحد يقولك انا بجيب الجنية بطلوع الروح
لية ! ماهو مش مصدق قول ربنا سبحانة وتعالى
ولو أن أهل القري أمنوا واتقوا لفتحنا عليهم بركات من السماء والأرض
(4) بَلْ يُرِيدُ الإِنسَانُ لِيَفْجُرَ أَمَامَهُ (5) يَسْأَلُ أَيَّانَ يَوْمُ الْقِيَامَةِ (6)
حلنى بقى على ما ييجى وقت القيامة !!
ايان دى يعنى حلنى
!!
يعنى حلنى بقى على ما ييجى يوم الحساب !
يا اخى ان الله غفور رحيم
سبحان الله !! ما اعجب غرور العبد بالله
شوفوا ربنا بيقول اية فى أخر السورة
كَلاَّ إِذَا بَلَغَتْ التَّرَاقِي (26) وَقِيلَ مَنْ رَاقٍ (27) وَظَنَّ أَنَّهُ الْفِرَاقُ (28) وَالْتَفَّتْ السَّاقُ بِالسَّاقِ (29) إِلَى رَبِّكَ يَوْمَئِذٍ الْمَسَاقُ (30) فَلا صَدَّقَ وَلا صَلَّى (31) وَلَكِنْ كَذَّبَ وَتَوَلَّى (32)
• كلا اذا بلغت التراقى
يعنى لما روح الأنسان تكون هتطلع وبلغت الحلقوم خلاص هتطلع
• وقيل من راق
يعنى اجروا شوفولنا دكتور ودوة المستشفى بسرعة
وقيل من راق !!
مين يلحقة !
مين ينجدة ؟
اللى حوالية
اهلة ابوة وامة وعيلتة كلها بيشوفوة وهو ميت ومش عارفين ينقذوة ولا ينجدوة
مين هيطلع بروحة للسماء !!
ملائكة بيض الوجوة
ولا سواد العتمة والظلمة والعياذ بالله !!
• وظن انة الفراق
اللى حوالية لسة مش عارفين انة هيموت
لكنة عارف انة هيموت
ميت ميت
خلاص !!
ادرك سقرات الموت
!! الفراق دا لما يكون اتنين بيحبوا بعض وبيبعدوا عن بعض يبقى دا الفراق
الفراق دا كلمة تدل انة هيسيب حاجة بيحبها أوى
يبص لمراتة بيحبها بس هيسيبها غصب عنة
ويبص لولادة وبيحبهم بس هيسيبهم غصب عنة
ويبص للبيت اللى بناة وشقا عمرة كلة وهيسيبهم بس غصب عنة
• وألتفت الساق بالساق
لما الانسان يبدأ ينكمش من الرعب
خايف من الموت
ولما واحد رجلية تلف فى بعضها
مش عايز روحة تطلع للسماء
مش عايز يتحاسب
مش عايز يدخل قبرة !!
معملش حسابة
منتا لازم تفرش قبرك من دلوقتى
انت كل صلاة بتصليها
قبرك دا يا أما قصر من قصور الجنة
يا اما حفرة من حفر النار والعياذ بالله
فا انت من دلوقتى افرش القبر بتاعك
افرش السجاد بتاعك والستاير
والعفش بتاعك
عشان تعيش فى نعيم
بعد ان تغادر هذة الدنيا
• الى ربك يومئذ المساق
اللى امرك وانت عصيتة
اللى نهاك وانت مسمعتش كلامةاللى امرك وانت عصيتة
اللى نهاك وانت مسمعتش كلامة
الى ربك اللى انعم عليك
وانت مش حاسس بنعمة
الى ربك يومئذ المساق !!
• فلا صدق ولا صلى
رايح لربنا ايدية فاضية
رايح من غير رصيد !
رايح معهوش حاجة يقابل ربنا سبحانة وتعالى بيها
والعياذ بالله
اسأل الله ان يعافينا ويعافيكم
ياجماعة احنا هدفنا فى الدنيا دى حاجة واحدة بس
هى طلــــــــــــــــب النجــــــــــــــــــــــــاة
احنا عايشين الدنيا دى عشان نطيعة عشان ننجو يوم القيامة !! يوم نقف بين يدى الله
فعلى من عصى الله ان يلتفت للمتبقى من عمرة
وعلى من يطيع الله ان يجتهد اكثر
لأجل طلب النجاة
لان اللى مش هينجو والعياذ بالله اين سيذهب !
فانما الجنة او النار !! لا ثالث لهما
فيجب ان نثبت على دين الله سبحانة وتعالى
عاوزين نثبت على طاعة الله
الأذان بيأذن فى الجامع ننزل ال5 فرووض
القرأن المجيد
كل واحد منا لازم يقرا ولو صفحة ولو صفحتين ولو 5 6 صفحات كل يوم بعد ما يصلى الفجر يقعد يبدأ يومة بكلام ربنا
لازم نبقى من أهل طاعة الله يا جماعة
لازم نسمع كلام ربنا
اشمعنى بنسمع الممثلين والمغنيين فى الاغانى والافلام ومش بنسمع كلام ربنا
!!
و قالوا لو كنا نسمع أو نعقل ما كنا في أصحاب السعير) اشارة الى الندم و الحسرة (فاعترفوا بذنبهم فسحقا لأصحاب السعير(
ياريتنا سمعنا
ياريتنا سمعنا كلام الدين
ياريتنا سمعنا كلام الله
ياريتنا سمعنا كلام اللى بيفكرنا بالاخرة
ياريتنا سمعنا كنا نعمل حسابنا ونستعد للقاء الله سبحانة وتعالى
اول حاجة هتشهد عليك يوم الدين – اذنك – ودانك دى
انت اديت ودانك لمين
اديتها للاغانى والمسلسلات
ولا اديتها لاهل الدين والعلم !!
الصحبة اللى انت كنت بتصاحبها
كنت بتصاحب صحبة سووء بتذكرك بالمعصية ومديها ودانك ولاصحبة صالحة بتفكرك بالله ومديها ودانك
ويوم يحشر أعداء الله إلى النار فهم يوزعون حتى إذا ما جاءوها شهد عليهم سمعهم وأبصارهم وجلودهم بما كانوا يعملون
ودنك أول حاجة هتشهد عليك ! ولابد من الثبات على دين الله
عاوزين نثبت يا جماعة !! اية المانع ان احنا نثبت
احد الصحابة اسمة عبد الله ابن حذافة بعد ما مات الرسول علية الصلاة والسلام ومات ابو بكر وتولى سيدنا عمر ابن الخطاب الخلافة .. عمر ابن الخطاب بعت الناس تحارب الروم .. عبد الله ابن حذافة ذهب ليحارب الرووم وهو بيحارب الروم حاصرووة – فملك الروم كان بيسأل مين اصحاب محمد دول دول أنس ولا جن .. هاتولى حد من اصحابة .. قالوله احنا عندنا واحد من اصحاب محمد علية افضل الصلاة والسلام قالهم هاتوة فلما جاءة عبد الله ابن حذافة قال له ملك الروم تنصر واعطيك حريتك .. شوية وقالة تنصر واعطيك نصف ملكى .. قاله والله لأعطيتنى ملكك وملك ابائك على ان اشرك بدين الله ما تركتة
انت مش عارف ثبات المؤمنين على دينهم ولا أية !!
قالوا خلاص
هقتلك
قالوا اقتلنى .. أمر رجالة يضربوة بالسهام بس أوعوا تجيبوها فية بجد عشان نذله
هما عاوزين يذلوا المسلمين
مش عاوزين يموتوة
ماهو الصور اللى بنشوفها فى الجرايد لتعذيب الفلسطينين والعراق ماهى صور تعذيب وكان من السهل جدا موتهم لكنهم غايتهم انهم يعذبوا المسلمين والأهانة من الحقد اللى فى قلوبهم على الأسلام وعلى المسلمين
زى ما ربنا قال
وإن نكثوا أيمانهم من بعد عهدهم وطعنوا في دينكم فقاتلوا أئمة الكفر إنّهم لا أيمان لهم لعلهم ينتهون ) التوبة / 12
طعن !!
هما عاوزين يطعنوا فى الأسلام باى حاجة من الغل والحقد
قالهم ارموة بالسهام من غير ماتجيبوها علية فرموة بالسهام !! مفيش فايدة
قالهم خلاص احبسوة وجوعوة وعطشوة
ولما يجوع ويعطش دخلولة الخمرة ولحم الخنزير
عشان يذل المسلمين
فلما عملوا ذلك نظر عبد الله ابن حذافة الى الطعام ثم قال لكنى لا اشمت اعداء الله فى دين الله
مشمتش اعداء الله فى الأسلام
يا شماتة الكفار فينا من الشباب اللى ماشى دلوقتى لابس لى سلسلة فى رقبتة
يا شماتة الكفار فينا لما يفتحوا القنوات المحلية والفضائية بتاعتنا يلاقوا العرى والفجور زى قنواتهم بالظبط
يا شماتة الكفار فينا لما يشوفوا الجامعات بتاعتنا والتبرج اللى بنات المسلمين ماشية فيها
الواحد مش عارف يفرق بين المسلم والكافر فى الشارع
مش عارف مين مسلم ومين مش مسلم
ابن دا بيقف على ناصبة الشارع يعاكس فى اللى رايحة واللى جاية
وبنت دا . بتخرج فى الشارع لابسة نفس اللبس اللى بتلبسة بنت دا
متعرفش البنت دى مسلمة ولا مش مسلمة
الأتنين ميتفرقوش على بعض
نفس الحال مع الشباب
اية اللى فارق
ان دا بيروح الجامع
ودا بيروح الكنيسة !
اذا كان بقى شكلنا زيهم
وحياتنا زيهم
نرجع تانى لعبد الله ابن حذافة
بعد ما بائت كل محاولات ملك الروم بالفشل امر بدخول واحدة من بنات الروم عارية وقولة ملك الروم باعتلك دى
فلما دخلت المرأة علية خرجت المرأة وهى تستعجب وتقول أادخلتمونى على بشر أم ادخلتمونى على حجر !!
حجر لية !! قبل ما تعصى ربنا احسبها
ماهو المعصبة دى نار
بعدها امر ملك الروم بانهم يحضروة ويحضروا واحد من المسجونين معاة
وقالهم هاتوا قطر نحاس فية زيت بيغلى
وأرموا المسجون اللى معاة فى الزيت اللى بيغلى دا
لما يموت هيخاف
فلما فعلوا ذلك بكى عبد الله ابن حذافة
ملك الروم قال خلاص دا كدا خاف راح سألة بتبكى لية !
قال ابكى لانى وذلك الرجل كنا نتنافس فى طاعة الله وقد مات موتة لا اسبقة بعدها أبدا
ناس كل تفكيرها فى الأخرة مش فى الدنيا
بعدها ملك الروم أمر برمية فى الزيت
بعدها عبد الله ابن حذافة بكى
قالة اية !! سلمت ولا أية .؟
قالة ابكى لان ليس لى الا نفس واحدة أموتها فى سبيل الله
ولو ان لى مائة نفس كلها تموت هذة الموتة فى سبيل الله
ياريت ليا 100 رووح تطلع فى سبيل الله من كتر حبة لله وكتر حبة لدين الله
ملك الروم غلب معاة يعمل اية قالة قبل رأسى وأطلق سراحك
فقال لا حتى تطلق سراح الدنيا ومن عندك من المسلمين
فما كان من عمر ابن الخطاب رضى الله عنة انة قال حق على كل مسلم ان يقبل رأسك يا عبد الله
احنا عملنا اية يا جماعة لنصرة ديننا !!
اخواننا فى غزة لما الكهرباء تقطع عنهم ومفيش ولا زاد ولا داوء
اخواننا دول اللى ماتوا فى رقبة مين!!
عثمان ابن عفان لما أشيع وقيل انة قتل
الصحابة بايعوا رسول الله على الموت
عشان مسلم واحد بس ! لمجرد اشاعة انة مات
ولا حول ولا قوة الا بالله
دلوقتى الاف كل يوم بتموت ومفيش اى رد فعل
لما أمرأة مسلمة جندى من جنود الروم اعتدى عليها فى الأسواق عمر ابن الخطاب بعتلهم جيش اوله من عند الروم واخرة عند عمر ابن الخطاب لية !! عشان مرأة مسلمة اتأذت
لية الناس دى كان حاسة بغيرة على دينها واحنا لا !!
دلوقتى الاف النساء الفلسطينين فى سجون االيهود واحنا عملنا اية !!
عشان الانسان ينتصر وينتشر
فية ناس ضحت عشانة يا جماعة
من اجل دين الله سبحانة وتعالى
عشان احنا كلنا نطلع مسلمين
وراء كل مسلم على وجة الارض ناس فارقت عمرها عشان تدعوا الى الله
ورائهم اجيال عايشين عمرها فى الدعوة الى الله
رجالة استحملت عشان دين الله ينتصر
احنا بقى عملنا اية لنصرة ديننا
لازم كل واحد فينا يعمل حاجة لدين الله
لازم تعمل اللى تقدر علية
ولو بدعوة على كل ظالم ومفترى وانت ساجد !!!!!
الكفرة بيعملوا فيلم ونزل دلوقتى عن الأسلام اسمة " فتنة " ومشوهيين فية صورة الأسلام والقرأن ومجسدين فية الرسول ومستهزئين بالأسلام والمسلمين
كل دا لية ؟
عشان احنا سيبناهم يعملوا الصور !!
ملوقش ردة فعل !!
عملوا فيديو
ولا حول ولا قوة الا بالله
اللهم اهلك الظالمين بالظالمين واخرجنا من بين ايديهم سالمين
==
زمان الأوروبيين جمعوا جيوشهم وراحوا لمحاربة المسلمين فى الأندلس أول لما وصلوا لقوا عيل صغير بيعيط !! بيسألوة بتعيط لية ؟ قالهم انا كنت بجيب بالنبلة بتاعتى حمامتين فى الطلقة الواحدة دلوقتى بقيت بجيب حمامة واحدة بس !!
بعد محاولاتهم اللى كل مرة تبوء بالفشل بعد زمن بعيد راحوا الأندلس بعدها بفترة زمنية لقوا واحد بيعيط !! بيسألوة بتعيط لية ؟ قالهم اصل البت بتاعتى سابتنى !!
قالوا اة , دلوقتى بس , نقدر نهزمهم ونقدر نحشد جيوشنا على الأندلس !!
انا عاوز اوصل لكوا يا جماعةا ننا لازم نغير من نفسنا ونصحى للغرب واللى بيعملوة فينا من عولمة وأمركة ومصطلحات هما اختلقوها عشان يحاربونا بيها وللأسف احنا بنتمادى وماشيين مع افكارهم وسياستهم وحياتهم وسايبين ديننا !!
دلوقتى انت لو سألت واحد فى الشارع اسم اعز صاحب ليك اية . هيقولك اسمة بالكامل!!
لكن لو سألتة اسم الرسول علية افضل الصلاة والسلام اية مش هيعرف !!!
طب الحل اية يا جماعة
الحل اننا نتوب
ونستغفر ربنا على اللى فات
ونحاول نبقى كويسين
ولو غلطنا ! مفيش مشاكل نرجع تانى ونبقى من التوابين
المهم اننا منبعدش عن ربنا
ونطلب منة الرحمة والمغفرة دايما يارب
طب نعمل اية كمان
انك تلتزم وتتوب
لان معصيتك دى
هى السبب فى فساد الأمة
وتوبتك الى الله هى السبب فى اصلاح الأمة
معصيتك دى هى السبب حجب النصر عن الأمة
يبقى أول حاجة نعملها
نتوب
تانى حاجة بيوتنا
محدش يشغل الا القنوات الاسلامية
اى قناة تانية تملأ البيت شياطين وعذاب
نتمنى ان دا يحصل
ثم
ان بيوتنا نطهرها بقى
نشغل قرأن ونسمعة ونحفظة
ثم – اللى يقدر انة يتبرع بما ربنا قدرة من مال او اى شىء يعمل ويطلع لله ويسارع فى الخيرات
لو معاة فلوس وليكن مبلغ قليل
يجيب شرايط دينية مؤثرة ويوزعها على اصحابة وزمايلة والمقربين ليه
هى دى الدعوة لنصرة ديننا
يعطى للسواق بتاع الميكروباص ويقولة بس امانة عليك انك تشغلة يبقى انت كدا اخدت ثواب كل اللى هيسمعة
لازم كلنا يا جماعة نعمل اى عمل خير
ننسخ اسطونات ونوزع
لازم نحافظ على صلاة الجماعة
وصلاة الفجر قبل أى صلاة عشان منتكتبش من المنافقين
لازم يا جماعة نحصن نفسنا كويس جدا
عشان يوم ما امريكا تيجى تحارب مصر
ماهو امريكا دى حاربت كلة ما عدا مصر
فلسطين والعراق بعدها ماهو مفيش غير مصر بعد كدا بقى
الدور على مين ؟
عشان يوم ما ييجوا يلاقوا رجالة تطير رقابيهم اول ما يفكروا انهم يجولنا
انما دلوقتى مين اللى هيقف فى وش أمريكيا ؟ الشباب اللى من 15 ل 25 سنة اللى ماشيين الوقتى لابسين سلاسل فى الشوارع ومسقطين البنطلونات ! وكل همة اشرب دا واعمل دا واكلم البنت دى ازاى
مين يا جماعة
مين اللى هيقف قدامهم ! الممثلين والمغنيين ! واهل الفجور والفسق والعصيان ؟؟
مين اللى هيقفوا فى وشهم
مش الرجالة اللى عارفين ربنا ولا أية !
يبقى انت لما تبقى راجل
انت بتحصن بلدك
لازم تعرف
ان عمرك بيعدى
وانك فى امتحان
وفى لحظة هيتسحب منك الورق
فأياك ان تعصى ربنا
واجتهد فى طاعة الله
ثم
أعمل شيئا لدينك ولنصرة دينك
كل واحد يشوف اية اللى قدامة يقدر يعملة لنصرة الدين ميتأخرش عنها
الطالب اللى فى الجامعة
يدعوا الى الله مع زمايلة
نهاية اسأل الله العلى العظيم رب العرش العظيم ان يتوب علينا من المعاصى والذنوب واوصيكم واوصى نفسى بتقوى الله واتمنى انك تبعت الملف دا لكل اصحابك اللى على ايميلك اونلاين او تبعتهالهم فى رسالة لك الأجر والثواب دى بمثابة انك عملت دعوة فعلا , ولما ربنا تقف قدامة يوم القيامة ويسألك انت عملت اية لما عرفت ان الرسول علية افضل الصلاة والسلام اتسب !! هترد وقتها وتقول انك حاولت انك تدعى الناس انها تهتدى وقبل دا كلة حاولت انك تصلح من نفسك وتبقى كويس
والسلام عليكم ورحمة الله وبركاتة
تفاصيل لقاء عيد ميلاد فتكات في الموضوع ده:
