[أم الطيب]

طريقة عمل كيك الرخام
تمت اضافة وصفة طبخ جديدة في موقع مطبخ فتكات ، و يمكنك مشاهدتها من هنا:
كيك الرخام
اذا كان لديك تعليق او استفسار او ملاحظات فيمكنك كتابتها هنا في هذا الموضوع .
الجميع في انتظار مشاركاتك!

[زيزي]

شكلها حلوة لكن ما نعلم على طعمتها نجرب قبل .

[أم الطيب]

مش هاتندمي أنا بموت فيها ما بقيتش أعمل الكيكة العادية (البيضاء) وبحب أزود الشوكولاتة فيها يعني مايكونش العجينة البيضاء والسوداء متساويين العجينة السوداء بتكون حوالي ثلثي الكمية.

[ام القري]

مشكورة يا ام الطيب باين عليكي شاطرة

[أم لوجى و ملك]

واضح انك شاطرة اوى فى عمل الحلويات تسلم ايديكى كنت عاوزه اسال ممكن نغطى الكيكة بالكريمة السائلة ولا لا

[أم الطيب]

هي كده بتكون تحفة ولو عايزة انت تبدعي فيها بعد كده براحتك بس انا بموت فيها كده

[أم بسنت]

يا جماعة إنتو فعلاً حتخلوني أتشجع و أبدأ أعمل حلويات في البيت من كتر ما وصفاتكم تجنن و ربنا يستر على الريجيم .

[marwamos]

السلام عليكم
انا بسأل اد ايه كميه البيكنج بودر

[أم الطيب]

حوالي ملعقة صغيرة بيكنج بودر.
ويا ام بسنت كل كام يوم لما تعملي حاجة حلوة وتاكلي منها حاجة بسيطة مش هتعملك حاجة. حرااااااااام عليك بسنت وباباها

[أم بسنت]

أنا فعلاً متشكرة جداً يا أم الطيب على النصيحة دي لأني فعلاً لازم أبدأ أبقى ست بيت بجد و أبطل دلع خصوصاً بعد 12 سنة جواز ، منظري بايخ مش كده ؟

[أم الطيب]

يا حبيبتي ربنا يبارك فيك وعقبال ما يكونو 100 سنة جواااااااااااز
اصل انا لو ماعملتش حاجة حلوة ابني الكبير(5 سنين) يتمرد عليا وجوزي كمان ده ساعات الساعة 10 بالليل في الصيف يقولي ماتعمليلنا حاجة حلوة وابني يقعد يستنى و ينام وهو مستنيني، لأ الحلويات عندنا ادماااااااااااااان بس بقيت اعملها بحساب علشان ما نتخنش.

[mousho]

مشكورة ياام الطيب انا كنت قررت ابطل عمل كيكات تانى لانها بتطلع مسكوكة ياريت تقوليلى الغلط فين؟انابضرب السوايل بمضرب البيض وبعدين اضيف الدقيق ومعرفش اطلعها عالية وهشة ازاى؟

[أم الطيب]

اوعي تزهقي وتفقدي الأمل، انا بوظت كيكات وحلويات أد كده بس ما بطلتش لغاية ما بقيت بريمو (ماشاء الله)،
أهم حاجة في الكيكة المسكوكة انك تتأكدي من تاريخ البيكنج بودر وانا بستخدم باكو بيكنج بودر" كوكس" ومايكونش مفتوح قبل كده، وكمان كمية الدقيق ما تكونش كتيرة يعني تحطي شوية دقيق وتقلبي وبعدين تحطي تاني وتقلبي لغاية ما ترفعي المضرب بالعجين تلاقي العجين بينزل ويفرش لوحده وهو ده المطلوب لما تصبيه في الصينية انه يفرش بالراااااااحة لوحده مش يفرش بسرعة ويكون سايل، وبعدين تضربي السمن أو الزبد مع السكر الاول بمضرب كهربائي ثم تضيفي البيض والفانيليا وتكملي ضرب وبعدين اللبن وبعدين تضيفي الدقيق والبودر وتقلبي بالمضرب اليدوي، والفرن يكون ساخن يعني تفتحيه قبل ما تبتدى وتظبطي على درجة متوسطة لما تحطي الصينية 200 درجة واوعي تفتحي عليها الفرن قبل مرور 30 دقيقة أو 40 يبقى أحسن.
ياريت اكون افدتك وجربي وقوليلي عملت ايه.

[ام سعيد]

رائعة يا اْجمل اْم طيب فى الدنياااااااااااااااااااااااااااااااااااااااا

[bostan_aleman]

جزاكى الله خيرا ..
ان شاء الله هجربها قريبا وسوف ارسل الرد

[ايمان فريد]

تسلم الايادى

[أم الطيب]

تسلمولي يا غاليين عليا

[روميو بدون جوليت]

مرسى على كل الحاجات الحلوة