[فتوكه مصريه37]

السلام عليكم ورحمة الله وبركاته

طبعا كلنا متفقين ان كل شيخ وله طريقه فى المطبخ

النهارده عملت ممبار وشطيطه(كرشه)وفته بس بطريقتى

يارب تنول رضاكم

وعلى فكره دى 3 مره اكتب فيها الموضوع والمنتدى يفصل معايه

اولا الممبار


المقادير

كيلو ممبار-شبت وبقدونس وكزبره-ملح وفلفل-نص كيلو طماطم-4بصلات كبار-2 قرن فلفل حامى-3 كوب رز-زيت

الطريقه

نخرط البصل والبقدونس والشبت ونخرط الطماطم مكعبات ونخلطها ببعضها جيدا ونضيف عليها الرز والزيت والملح والفلفل وطبعا لو تحبى تضيفى بهاراتك الخاصه برحتك طبعا بس انا بكتفى بكده



ونبتدى نحشى لحد ما نخلص المقدار كله



نغلى مايه ونضيف عليها ملح ونبتدى نسقط الممبار المحشى واحده واحده ومن غير ما نقفله بخيط هو بيقفل لوحده زى رقب الحمام


اول ما يتسلق ونعرف انه استوى نطلعه على طول علشان مش يفرقع واختبار السوى هو انك تضغطى بأيدك على طرف الممبار وتطلعى شوية رز من جواه وتشوفيه استوى ولا لالا


بعد كده نجيب المقلايه ونحط شوية زيت ونحمره


واتفضلى بالف هنا وشفا

[فتوكه مصريه37]

نيجى بقى للشطيطه وهى طريقه من طرق عمايل الكرشه

المقادير

كيلوكرشه مقطع مربعات-4 ثمرات طماطم-ملح وفلفل وشطه-بصله كبيره

نحط شوية سمنه ى الحله ونضيف عليها البصله ونشوحها على خفيف وبعدكده نضيف الكرشه ونسيبها تطلع مايتها وتشربها وبعدها نضيف الطماطم المعصوره والشطه والملح والفلفل ونسيبها تتسبك عليها وكل شويه نضيف شوية مايه لحد ما تستوى الكرشه

وهنا استوت وبقت عال العال اتفضلى بالف هنا وشفا

[فتوكه مصريه37]

نيجى بقى لعمايل الفته

المقادير

كيلولحمه ضانى-بصل-ذبده+زيت-ملح وفلفل-حبهان وورق لورى

هنجيب المقلايه ونحط فيها ذبده على زيت ونبتدى نعمل صدمه للحمه

اول ما تسخن نرص اللحمه من غير ما نحركها

بعد ما تتحمر نقلبها على الناحيه التانيه تاخد لون

بعد كده نكون بنغلى مايه ونفرم البصله ونضيفها على المايه ونضيف الملح والفلفل والحبهان وورق اللورى ونضيف عليهم اللحمه اللى شوحنها من قبل

نسيبها تتسلق

ونبتدى نجهز للفته

نحمص عيش فى الفرن

وبعد ما يتحمص نكسره فى صنيه ونرش عليه شوية فلفل اسود ونحط قطع ذبده عليه

وهنشوف ده فى الصور

نيجى لعمل الخل والتوم

توم-طماطم-خل ابيض-ذبده

نفرم التوم ونحط قطعة ذبده ونشوحه فيها لحد ما ياخد لون ذهبى وبعدها نطفيه بالخل ونضيف عليه عصير الطماطم وملح وفلفل ونسيبها تتسبك وبعد ما تتسبك نضيف عليها كبشتين شوربه

وهنا صنية العيش اللى جهزناها من شويه

نغلى الشوربه والصلصه بالخل والتوم

تضيف جزء من الصلصه على العيش وبعدها نضيف الشوربه ونقلبها ونسيبها علشان العيش يشربها

وندخل اللحمه الفرن تحت الشوايه تاخد لون وتنشف شويه

نغرف الفته فى الصحون ونغطيها بالرز الابيض ونرش على وشها صلصه من صلصة الفته ونرص عليها قطع اللحمه

طبعا انا صورت الرز الابيض بس الكاميرا كانت منوره الصور اوى فكانت الصور مش باينه بس انا هقول طريقته

هنحط مقدار من الذبده لحد ما تسيح وتسخن شويه ونضيف عليها الرز المغسول ونحورهم مع بعض بعد كده نضيف عليهم المايه او الشوربه لو حبيتى ونظبط الملح واول ما تغلى المايه ويبتدى يتشرب الرز نوطى عليه ونسيبه يستوى براحته

ومقدار الرز كيلو ومضاف عليه لتر سائل

وبكده خلصت السفره اتفضلى بالف هنا وشفا

[ام شهد وهيما]

بصي انا حجزت طبق الفتة لوووحدي لاني بمووووووووووووووت فيه
تسلم الايااادي يا حبيبتي
بالف هنا وعافية
والتقييم ممتاز طبعااااااااااا

[۩۞۩ الحمد لله رب العالمين ۩۞۩]

الله الله جريتى ريقنا يا ندى
الاكل شكله مغرررررررررررى اوى
تسلم الايادى الحلوة
ممتااااااااز

[فتوكه مصريه37]

بصي انا حجزت طبق الفتة لوووحدي لاني بمووووووووووووووت فيه
تسلم الايااادي يا حبيبتي
بالف هنا وعافية
والتقييم ممتاز طبعااااااااااا

حبيبتى نورتينى وشرفتينى

شكرا ليكى

وبالف هنا وشفا

شكرا الف شكر على التقييم

[**العنـــود**]

ابداااااع ماشالله تسلم الاياااادي حبيبتي

[ام عمرو خالد 2010]

يا جمالو يا جمالو
اوعى وشك ايه الحلاوة دى تسلم الايادى يا ست الكل
روووووووووووووعة طبعا والتقييم ممتاااااااااااااز

[أم أحمد & محمد]

روووووووووعة تسلم ايديكى

[فتوكه مصريه37]

الله الله جريتى ريقنا يا ندى

الاكل شكله مغرررررررررررى اوى
تسلم الايادى الحلوة
ممتااااااااز

ربنا يخليكى يا قمرايه

بس اكيد مش احلى من اكلك

بصراحه انتى مطبخك فوق الممتاااز

شكرا الف شكر ليكى يا حبيبتى