[بوسى2000]

انا بنت عندها عشرين سنة معندهاش ام ولا اخوات بنات بجد ساعدونى لانى مشلاقية حد يساعدنى انا كتير تعبانة انا مخطوبة لابن عمتى هو كان نفسى يخطبنى بجد لانة مهندس وطيب ومؤدب وكل حاجة كويسة ماعدا خام جدا وبحس انة مبيكنليش اى مشاعر بقالى سنة مخطوبة عمرة ما قالى بحبك فى وشى بيقولى مثلا فى رسالة مبيكلمنيش فى اى موضوع خالص انا افضل احكى احكى ووقت ما اسكت الحوار يخلص والدتة الى هية عمتى تتصل بية وتقولى انى انا جافة وجامدة المشاعر والمفروض انى ادردحة مشفاهمة ادردحة ازاى يعنى بجد انا مش زى ماهية بتوصفنى كدة خالص انا حد طيب ومرهف المشاعر بجد كرهنى فية مش قادرة استحملة مش قادرة اقول لوالدى ان عايزة اسيبة عشان مبيقوليش كلام حلو بس احنا فاقدين العاطفة خالص وانا صعب علية اتجوز بدون حب وقرايبى يقولولى دة قريبك وطيب وضمنين اخلاقة احسن من حد يغمرك بعاوطفة وبعدين يبهدلك معقول مفيش وسط انا مش سعيدة خالص بجد ومشلاقية حد اكلمة وينصحنى اعصابى بجد تعبتنى مع انى مش وحشة لأبيقولولى انى امورة بس بحس انة مشراغب فية خالص ساكت على طول انا محتاجة احب واتحب اعمل اية اسيبة ويمكن ربنا يعوضنى بالاحسن ولااخدة وهو جوز مشهيهنى وبدون حب ومشاعراعمل اية بجد رودوا علية محتاجلكم كلكم مش قادرة اخد القرار لواحدى ومشلاقية حد يساعدنى وشكرا

[preatywoman]

بصي حبيبتي اعتبريني زي اختك اديله فرصه يمكن هوا فعلا من النوع الخجول وفي بعض الرجاله مش بيعرف يعبر عن مشاعره بالكلام ممكن بالفعل ادي لنفسك مهله تغيري منك ومنه يمكن انتي بتصديه او بتحرجيه لو محستيش بتغير مفيش حاجه في الدنيا تجبرك انك تتجوزيه الجواز حاجه تانيه غير الخطوبه لازم لما تاخدي الخطوه دي تكوني متاكده انه هيكون حبيبك ودنيتك وكل حاجه ومفيش تراجع
حاولي تشوفي مميزاته وعيوبه هو عارف ربنا ولا لاءه
وكمان صلي صلاة استخاره باستمرار الى ان تري ما قدره الله لك
وابقى طمنينا عليكي

[rehab]

يمكن مكسوف عشان أنتي بنت خاله
في نوع م الرجال كده بيتكسفوا من قرايبهم
عارفة يا بوسي والله العظيم أنا وجوزي لما أتخطبنا كنا نبقي ع التليفون ومبنتكلمش كنت بفتكر كتيييييييييير أن الخط قطع
لكن دلوقتي خدنا علي بعض جداااااااااااااااااا لدرجة أني معرفش أعيش مع واحد غيره
فأنتي زي ما قالتلك بريتي وومن صلي أستخارة واللي عايزة ربنا هيكون

[eltourky]

انا حاسه بيك قوي
لاني كنت مخطوبه قبل كده وحسيت بنفس احساسك ان حياتنا هتبقي جافه جدا
مقدرش يحببني فيه فسبته ع طول رغم انه كان محامي وفيه مميزات حلوة
بس مقدرتش استحمله ولا احبه
تعرفي بقي اتخطبت بعد كده لجوزي الحالي برده كان بيتحرج من الكلام ده
بس انا حبيته قوي قوي لاني حسيت جواه بحب كبير
وبعدين انت فعلا تقدري تدردحيه يعني تساليه
انت بتحبني ولا لا؟
انا ليه بحس انت مش مبسوط معايا؟
ومتتحرجيش اساليه وانت هتعرفي من رده وهتحسي
وقبل ماتاخدي اي قرار لازم تصلي استخاره
مش مرة ولا اتنين لا كتيرررررررررر
وصدقيني ربنا هيدلك ع الصح

[أم لوجى و ملك]

بصى يا قمر انا رايى انك تقوليله بصراحه عن اللى مضايقك قوليله ليه مش بتقولى كلام لطيف او كلام حب انت مش بتحبنى
مثلا قوليله احب اسمع منك كلام يدل على حبك ليا وكده ممكن يكون بيخاف من رد فعلك تجاه اى كلام يقوله لك جربى تواجهيه بس بلطف

[رانيه]

بوسي حبيتي لنل مع التر يكي بس هو ابن عمتك انتي عارفه هو فعلا خجول ولا ايه الحكايه انتي وحدك تقدري تحددي وكمان بريتي كلامها صح بس هو ابن عمتك يعني المفروض انك عارفه علشان ترتحاي صلي الاستخاره والله الموفق

[أمولة]

والله الاخوات كفوا وفوا اعملي بنصيحتهم----

[بوسى2000]

بجد شكرا لنصائحكم بس بجد انا مقدرش اقولة يقولى كلام حلو انا مش هشحت الحب من حد نفسى تصعب علية اطلب الطلب دة وبعدين الانسان الخجول نقول خجول فى اول الخطوبة انا يقالى اكتر من سنة مخطوبة وكلمتة وقولتلة زى مقولتولى انت مبتتكلمش معايا لية حتى فى مواضيعك الشخصية رد علية انة متعودش يحكى لحد بس هيتغير ومفيش جديد من الاخر اخواتى انا كلمتة امبارح وقولتلة احنل لية بعيد عن بعض وشخصيتنا مختلفة رد وقالى انا طبعى كدة ومش هقدر افرض نفسى عليكى فكرى انتى عايزانى ولا لأ وردى علية وهو فى انتظار الرد بجد انا زهقتكم بمشاكلى بس جزاكم اللة كل خير ايها العظيمات

[أم مريم]

مادام مستنى ردك يبقى اتكلموا مع بعض و بصراحة يمكن يكون بيحبك فعلاً بس هو من النوع اللى ميعرفش يعبر بالكلام عن حبه
ولو شايفة انه مؤمن و هيصونك زى ما بتقولى يبقى اتكلى على الله و كملى معاه
لكن لو لقيتى ان كلامه معاكى عادى و انه مش بيحبك بس شاريكى يبقى ممكن جداً انكوا بعد الجواز تاخدوا على بعض
لكن بقى اذا لقتيه مرتبط بيكى ارتباط تقليدى و انك مش فارقه معاه انتى او واحده غيرك يبقى مش هينفع متهيألى انكوا تكملوا مع بعض
والشئ الاساسى انك تصلى صلاة الاستخارة دى لازم

وربنا يوفقك

[نيللى]

يعنى الكورة دلوقتى فى ملعبك انت فكرى كويس وصدقينى لو متدين وحيصونك اتوكلى على اللة وبردة صلى صلاة استخارة على فكرة انا عارفة طبعا ان الحب مهم جدا قبل الجواز بس عمر حد ما بيلاقى الحب الكامل قبل الجواز لان بعد الجواز كل حاجة بتتغير يعنى ممكن الحب يزيد بالعشرة الطيبة قولى لى انت عمرك ماشوفتى موقف واحد منة يدل انة بيحبك ممكن يكون مش بيعرف يتكلم بس ساعات كتير التصرفات بتغنى عن الكلام ان شاء اللة اللى ربنا رايدة خير حيكون

[soso_100]

بصى حبيبتى الحب قبل الجواز مهم بس المهم يكون هوبيحبك وبعدين انا مسمعتش انك سالتيه مثلا بتحبنى انت عايزنى ولا ايه ولا جواز قرايب وكدة وحاولى تانى بس لو مكنش بيحبك سبيه ولكن لو حسيت ولو ذرة بسيطة بحبه حاولى معاه كتير

[سوكة الددة البيضة]

بصى يا حبيبتى .البنات قالو الى فيه الكفاية.
اضيف عليه حاجة بايخة (اعزرينى زاعزرونى كلكم)
اسأليه لو فى حد تانى فى حياته؟...بصراحة رده الأخير ليكى هو الى ادانى الاحساس ده.ودى حاجة اعتقد انها مش هتضايقك لأنك ولا مرة قولتى انك بتحبيه.

ولا شىء قبل ولا بعد صلاة الاستخارة ....الفايدة فيها ان شاء الله

[T.0.T.A]

بصــــــــي يا قمر الصراحه مفيش احسن منها اصل انتو مش لسه هتتعرفو علي بعض بعد سنه خطوبه انتو داخلين علي جواز وبدل لا قدر الله يحصل بينكم انفصال ولا حاجه انتي لازم تقوليله انك زي اي بنت محتاجه تسمع كلمه حلوه لانه هو الي بقيلك وهوهيكون كل حياتك لازم تصرحيه وانتي الي تحوليه تطلعي منه الكلام وخالي بالك من اهم حاجه انكم قرايب وربنا يوفقك

[أم بتول]

أنامع ساندى كلامه الاخير مش مريحنى لما تردى عليه حاولى تفهمى منه اكتر إن كان ده طبعه فعلا ولاهو مش بيحبك وحطى فدماغك ان اغلب الرجالة مبيعرفوش يقولوا كلام حلو وخصوصا مع القريبين منهم لكن لو مش بيحبك دى حاجة تانية سيبه واكيد ربنا هيعوضك بواحد يحبك
فى النهايه لازم تساليه وتقوليلوا على اللى انت حساه وخايفة منه وهو هيبان في عنيه ولهجته كل حاجة وحاولى متندلقيش عليه يمكن يكون حس بنفسه شويه عشان انت اللى اتمنتيه زى ماقولتى وربنا يوفقك للى فيه الخير

[heba saad]

طب انا كنت بعانى يا جماعة من نفس المشكلة دى وفسخت الخطوبة بسبب الاسلوب دة بالظبط ورجع تانى ووفقت على امل انة يتحسن في المعاملة بس اللى في داء مابيبطلوش
في الاخر قلت لااهلى انا مش هقدر اكمل معاة
وهم بصراحة استجابو لرغبتى
مشكلتى نفس مشكلتك بس الفرق اننا مكناش قرايب
انصحك تقرري من دلوقتى احسن ما ترجعى تقولى ياريت اللى جرا ما كان

[sara_al111i]

ربنا معاكي
والله ردو وقالو كل حاجه
بس متتردديش انك لو مش حاسه معاه بالامان انك تسيبيه
انا قعدت مع خطيبي 9 شهور وكان بنفس الاسلوب ده كنت حساه بعيد عني ومش مهتم بيه خالص
سيبته وربنا يعوضني بفرصه تانيه احسن
وانتي كمان فكري كويس اوي اوي لان ده جواز يعني مشتقبلك اللي انتي هتختاريه بايدك وبعدين مش هتلومي غير نفسك
ربنا يصلحلك الحال ويهديكي للعمل الصح وبالك يهدي

[المشتاقه الى الجنه]

حبيبتى اعتبرى ان خطيبك مش رومنسى ومش حنين
بس عايزه اقولك حاجه بصى كده حوليكى هتلاقى راجل قليل الادب والتانى بخيل والتالت انانى والرابع مش بيصلى ولا بيعرف ربنه
انا هجبلك من الاخر ده العيب الوحيد فى خطيبك اقبلى زى ما هو واحمدى ربنا ان ده بس العيب احسن ما يكون لا يصلى ولا يعرف ربنا
وبعدين تعالى هنا صحيح
هههههههههههههه انتى نسيه ان الكلام ده لا يجوز بين اتنين مخطوبيبن يعنى حرام بحبك والكلام ده قبل الجواز
انا قولتلك رائى كأنك اختى تمام

[سوكة الددة البيضة]

عزيزتى مشتاقة ..مال كلام الحب بواحد بيقولها انا كده وطبعى كده شوفى انتى ايه رايك؟
اعتقد انها تقصد الكلام الناشف.....ما هو ممكن خطيبى يقولى كلام حلو يحسسنى انى مهمة فى حياته غير بحبك وبموت فيكى؟

مثال : ايه رأيك فى كذا انا قلت لازم اخد رايك الأول علشان مينفعش اعمل الحاجة دى من غير ما اشورك.....الشورى سنة عن الرسول صلى الله عليه وسلم.
اوعى تزعلى منى يا مشتاقة......انا بتناقش معاكى

[مدام ديدى]

ربنا يوفقك حبيبتى اناشايفه ان كلام تركى وبريتى كلام معقول لازم تدى لنفسك فرصه تفهمى قبل ماتسبيه علشان متندميش وبرضه اوعى تتجوزى من غير حب
والاستخااااااااااااااااره وربنا معاكى ويديكى الى مافيه الخير لكى

[مدام ياسر]

انا من راى مدام ديدى فعلا راى التركى وبريتى معقول وكمان انتى لازم تتكلمى معاه ودى مش اسمها انك بتشحتى الحب بس ممكن تتكلمى معاه بحنية وتقوليله مثلا انا بحبك وبحتاج احس باهتمامك وان اى ست فى الدنيا حقها تحس بحب جوزها ليها خاصةلما تكون بتحبه اوى زى انا مابحبك
حاولى تغمريه بمشاعرك واذا استجاب لك ربنا يوفقكم ويتمملكم بخير
لكن اذا ما استجاب فكرى مليون مرة الاول هل هتقدرى تعيشى معاه وتتحملى سكوته وصمته وللا لاء
وربنا يهديهولك يارب ويتمملكم بخير وماتنسيش الاستخارة طبعا
وابقى طمنينا حبيبتى