[hager aly]

.انا عضوه جديده بالمنتدى وفعلا انا حبيت منتدى فتكات واستفدت كتير منه انا من الاسكندريه عندى 21 سنه مشكلتى هى انى مخطوبه وامى متوفيه من 11 سنه ولحد دلوقتى معزمتش اهل خطيبى على الغدا او العشا انا بعرف اطبخ ونفسى حلو بس مخبيش عليكو لا يقارن باكل حماتى بجد انا قولت لابد لازم اعزمهم الايام دى وطلبه المشوره منكم
1- انا بفكر اعمل محشى كوسه وفلفل وبدنجان وطاجن تورلى وطاجن باميه وفراخ و ارز مشويه السؤال ياترى كده كويس ولا ازود حاجه ؟؟؟؟؟؟؟؟
2- طريقة التقديم يعنى بيتحطوا فى ايه والتوزيع ازاى
3- لو انا عزماهم على العشا ايه الممكن اعمله على العشاء
انا عرفه انى اسالتى كتير وياريت تعزرونى
شكرررررررررررررررررررررررررررررررررررا.

[raghoda]

اهلا و سهلا بيكى فى المنتدى
بصى يا هاجر بالنسبه للاكل كده كويس اوى بس حاولى تركزى على البهارات فى الاكل عشان طعمه و ريحته تطلع كويسه ...
بالنسبه للتقديم لو عندك صوانى بيركس ممكن تعملى فيها الاكل وتقدميه ولو معندكيش ممكن ترتبى المحشى فى اطباق كبيره بشكل كويس بس كل نوع لوحده والارز تعمليه فى حله تيفال ويتقلب فى طبق كبير عند الاكل و الفراخ قطعيها على اربعه اى ان كان عدد الفراخ وشويها كويس وعند التقديم حطى ورق جرجير فى الطبق وحطى الفراخ عليها..
لو على العشاء برده الاكل ده كويس عادى بس ابقى اعملى سلطه
ويارب الاكل يطلع حلو زيك و لو عوزتى وصفات حاجه ابعتيلى على الخاص او اكتبى موضوع عادى و انا حرد عليك
على فكره انا برده من الاسكندريه من ميامى
ابقى طمنينى عملتى ايه

[sara_al111i]

ربنا يكرمك يارب
والله انا مبعرف اطبخ اساسا كنت افادتك
في هنا فتكوات كتير تقدري تعتبريهم زي مامتك لان كلهم عساسيل اوي
ربنا يوفقك وهما اكيد هيفيدوكي لانهم مش بيتاخرو علي حد
اتمني لك التوفيق

[hager aly]

انا بجد متشكره على النصيحه الغاليه ربنا يخليكى ليا ويخلى كل الفتوكات

[مدام ديدى]

بصى ياقمر اعتبرينى زى مامتك
لوتقدرى تجيبى بطه حلوه كده وتحشيها بالفريك وتسلقيها عادى
وتعملى من شوربتها ملوخيه وتحطى الشوربه فوق المحشى
وتحطى البطه فى سرفيس وتحتها بقدونس اوجرجير بتقى حاجه تشرف
وجنبها ممكن برضه تكملى فراخ مشويه او بانيه برضه بتبقى جميله جدا
والمحاشى طبعا لايعلى عليها فى العزايم
واحطى ورد يكون فى فاظه صغنونه ومش طويل فى وسط السفره
وتغرفى كل المحاشى فى سرفيس كل نوع لواحده وبطريقه مرتبه
وتشوفى كام عدد المدعويين وكل واحد تحطى له طبق فاضى
لو فى شوربه او ملوخيه يبقى فى طبق كبير وغويط وجواه مغرفه ستاناس
علشان تغرفى لكل واحد فى طبقه وبالنسبه للبطه او الفراخ او لحمه لبكون فى شوكه كبيره بتاعه الطقم علشان تمسكى بها الفراخ او البط او اللحوم
والسلطه فى الوسط تعمليها الخس مش مقطع وترصى وحدات الخص وفوقها حلقات الطماطم والخيار بطريقه دائريه وترشى فوقهم ملح وفلفل وليمون
وكل واحد امامه الشوكه والسكيبنه وطبقه وكوب ماء فارغ
وتعملى عصير او حاجه ساقعه قبل مايقوموا من الاكل يبلعوا بها
وكل
ورتبى السفره هاتى فوط السفره واعمليها زى المروحه واقسميها نصفين وضعيها
فى الكوب الفرغ هيديكى شكل مروحه جميل
وقبل ماتبداى تقعدى معاهم على السفره تكونى مجهزه طبق فاكهه كبير وبطريقه شيك علشان تشيلى الاكل وتحطى مكانه الفاكه على طول وربنا يوفقك ولو عايزه اى حاجه
انا تحت امرك ياقمره

[أم الطيب]

بعد الكلام اللي قالوه القمرات ميه ميه.. بس بلاش التورلي مادام فيه طاجن بامية باللحم لان كده كله خضار المحشي والتورلي والباميةكتييييييييييير.. ممكن تكتفي بالمحشي والبامية باللحم والفراخ او البط ولو ملوخية او شوربة وممكن حاجة نواشف زي رقاق او جلاش باللحمة المفرومة بيكون رااااااااااائع مع الطبخة دي.. وعل فكرة مرات عمي كل ما تعزمنا نطلب منها الاكل ده بالضبط.
وربنا يعينك يا قمر.

[أم مريم]

طبعاً كلامهم كلهم زى الفل
بس ياريت بلاش تعملى فراخ مع لحمه لأن ده غلط على المعدة و بيأثر على الهضم
يعنى ياما تعملى الاكل كله بلحوم او كله بطيور
يعن زى ما مدام ديدى قالت ممكن تعملى بط مع فراخ و لازم يكون فيه شوربه
لكن متخلطيش نوعين مع بعض على السفرة
والفاكهة تحطيها بعد الغدا علطول بس تكونى مجهزاها و حطاها على ترابيزه الانتريه او الصالون
يعنى فى المكان اللى هتقعدوا فيه بعد الغدا مش على ترابيزة السفرة
وكمان تحطى فى اعتبارك يكون فيه كيك او حلويات تتاكل مع اى مشروب او شاى بعد الغدا و الفاكهة يعنى بعد ساعتين كده والا حاجة

و لو هتعزميهم على العشا فتقللى الاكل شويه يعنى كفايه مثلاً المحشى مع فراخ مشويه زى مانتى عايزه بس تزودى بقى زى ما رغودا قالت السلطه
تعملى تشكيلات منها و تنوعى فيها و اهمها سلطة الزبادى لأنها بتبقى حلوة مع المحشى و كمان بتبقى خفيفة علشان ده عشا لازم يكون أخف شويه من الغدا
و ربنا يوفقك و يسعدك

[ام لوجين]

ربنا معاكي يا هاجر و كل الفتكاوات اخواتك وامهاتك
وانا كنت هقول زل ام الطيب اعملي رقاق او جلاش مع المحاشي بيبقى جميل و خصوصا لو هتسقيه بشوربة البط او حتى الفراخ
و لو عايزة اي وصفة اطلبي و احنا نقوللك
و يا رب يتمم لك بخير و يعجبهم الاكل ان شاء الله

[hager aly]

والله انا مش عارفه اقولكم ايه انتو افدونى بجد بس المشكله انى معرفش اعمل رقاق او جلاش بس بجد شكرا ليكو