[أم ايثار]

انا زى ماقلت قبل كدا ان بنتى ايثار عندها 3 سنين بس فيه مثلا حماتى بتعاملها على انها كبيرة يقعدوا يقولوا انها شقية وانا بصراحةبتضايق وبيخلونى بسبب كلامهم ده اضربها جامد جدا لدرجة انى بعد كدا بعيط من كتر ضربى لها والمشكلة اننا بنروح كل يوم جمعه رغم انهم عندهم ابن عمتها اصغر منها بسنه بس حسه ان هما بيحبوه اكتر منها والطريقة دى بتضايقنى قولولى اعمل ايه ولو ما رحتش جوزى حيزعل منى واتصرف ازاى(مع العلم انى كنت بروح كل يوم بس بسبب الكلام انا خليته يوم )

[rehab]

طب يعني كل أما حد يستفزك تتطلعيه عليها هي ذنبها أيه حرااااام دي كده تكرهك لما تلاقيكي بتضربيها من غير ما تعمل حاجة
وبعدين أساسا المصريين بيحبوا الصبيان عن البنات ومتعرفيش ليه يعني مع أن البنات بيبقوا زي السكر
ربنا يخليهالك
خدي كلامهم من ودن وطلعيه م الودن التانيه ولا كأنك سمعاه وهما هيزهقوا لما يلاقوكي ما بترديش وهيبطلوا شوية بشويه

[جيهان عبدالله على ربع]

رحاب قالت المفيد واوعى تاخدى بنتك على الضرب من دلوقتى بعد كدة مش هيهمها الضرب وهتعمل كل اللى يعجبها وعلقة تفوت ولا حد يموت وبعدين سنها ده سن الدلع كله وخدى بالك الاطفال فى السن ده بيبقوا اذكياء جدا وبيفهموا كل حاجة ماتديش ودنك لحد واعملى اللى انتى شايفاه فى صح من غير ماتزعلى حد يعنى طنشى واعملى نفسك لا شايفة ولا سامعة ولو صحيح بنتك عملت حاجة تانية عاقبيها بشىء غير الضرب مثلا تخاصميها او ما شابه وتفهميها انك خاصمتيها علشان الغلط اللى عملته وربنا يبارك لك فيها وتشوفيها احسن الناس

[نادو]

صح رحاب وجيجي جابو المفيد
اوعى تسمعى كلامهم وبعدين كل الاطفال دلوقتى كدة وصحيح اوعى تعوديها على الضرب عشان متتعقدش خدى بالك من النقطة دى بالزات انها ممكن البنت تتعقد وبعدين سيبك منهم خلى اللى يقول يقول مطلعيش همك فى بنتك حرام عليكى خديها فى حضنك ربنا يخليهالك يارب ويحميهالك ويهديهالك لو شقية شوية بس دة سن طبيعى للشقاوة لان الاطفال فى السن دة جواهم طاقة هيطلعوها ازاى وفين يعنى ربنا يخليهالك يارب ويباركلك فيها

[أم ايثار]

تسلموا يا جماعه على ردكم

[نادو]

اهم حاجة بس اوعى تيجى على بنتك عشان خاطر كلام اى حد مهما كااااااان

[rehab]

هي دي أيثار
حراام عليكي دي ما شاء الله عسوله
ماتضربيهاش بقي دي سكر

[أم ايثار]

والله يا جماعة بيبقا غصب عنى مش اكتر بس انا فعلا بلوم نفسى على كدا كتييييييير اوى

[umaesha]

هى الامورة اللى لبسه احمر فى نهاية التوقيع هى ايثا بسم الله ما شاء الله ربنا يخليهالك بالله عليكى اوعى تضربيها خديه فى حضنك وانتى عندهم واشغليهيها بيكى و اتشغليى انتى بيها و سيبك من كلامهم عندى عائشة بنتى هى كل حياتى كمان قبل بابها ولما بضربها ببفى عايزة اضرب نفسى

[أم ايثار]

ربنا يخلى لك بنتك والله انا ايثار دى حياتى كلها بس المشكلة انى لما بروح هناك ببقا مشغولة اكتر الوقت اذا كان تحضير اكل او غسيل الاطباق مش بعرف اقعد الا وقت قليل جدا

[نادو]

بصى خلااص بس خدى عهد على نفسك انك مش تضربيها تانى عشان دى ملااك ياحبيبتى ربنا يخليهالك يارب

[أمولة]

والله كلام الاخوات عين العقل الله يخليلك بنتك وسيبك من كلام حماتك
وكل محد يقولك كلمه قولي دي طفلة اعملها ايه
والاطفال احباب الله
والله يخليلك اياها ويحرسها000

[أم مريم]

الاخوات جابوا المفيد
بنتك أغلى ما عندك أغلى من كلام اى حد
و السن ده لازم يبقى شقى
و مدام انتى عارفة تربيتك ليها شكلها ايه يبقى خلاص اى كلام تانى فى الهوا
واذا عملت اى حاجة غلط فهميها بهدوء عشان الضرب هيخليها بعد كده تعند و هتاخد عليه و مش هيأثر فيها و نتايجه كمان وحشة جداً على نفسية البنت
و ممكن كمان تكره جدتها لأنها لما بتروح هناك بتضرب بسببهم
ربنا يخليهالك و يباركلك فيها يارب

[مدام ياسر]

رحاب وجيجى فعلا قالوا المفيد كله
خدى كلامهم من ودن وطلعيه من الودن التانية حرام دى طفلة لسة مش فاهمة حاجة
ربنا يصبرك يا حبيبتى ويفرحك بيها

[ناننو]

على فكره دا عادي بس مش العادي انك تتأثري كده يا ام ايثار :-) انا كمان حماتي بتحب ابن بنتها اكتر من بنتي وده غالبا طبيعي ومش مفروض يأثر فيكي واكيد هاتلاقي مامتك بتحبها اكتر .... كبري دماغك وطنشي وخليكي بارده خصوصا في تعاملاتك مع البنت قدامهم ومتخليش اي حاجه تنرفزك على ايثار العسل وووو هاتيها تلعب مع كنزي بنتي

[رونا]

يعنى الرسول وصانا انى اول سبع سنين فيما معناه لعب ومرح وتهذيب باللين للطفل وبعد كده بنبتدى نستخدم الشده

يعنى 3 سنين ده بيدرك حاجه او عارف إنه بيعمل شئ غلض!! غير لما ننبهه

أنا عارفه إنى غصب عنك بتضربيها .. بس سيطرى على أعصابك ضرورى.. أطفالنا دول أمانه ونعمه

لأنى صدقينى البنت هتتعقد وهتوصل لمرحله إنها قبل اى تصرف تبص عليكى وتشوف رد فعلك

وده هيخلى شخصيتها متردده

خلى بالك إنتى بتبنى فرد جديد فى المجتمع .. خليكى حريصه كل الحرص وإنتى بتربيها

وسيبك من أى كلام.. وإلا لو إنتبهت ليه بطريقتك دى يبقى الضحيه الوحيده هى بنتك

أنا مش ببالغ بس أوقات بنعمل شئ وبنعتاد عليه .. ومنبقاش مدركين عواقبه غير لما يحصل

أتمنالك التوفيق

[مونه]

اوعي تطلعي غلك في بنتك عموما ابن او بنت الابنه بتبقي اقرب الي قلب الام عن ابن او بنت ابنهالان اللي بتربيه ابنتها فلابد تطلعها احسن واحده تربي حتي احسن منها هي المهم حوالي تاخذي هذا الكلام بهزار وده يوم استحمليه وخلاص وبالنسبه الضرب بيخلي الاولاد اكثر شقاوه وليس حل وعموما الطفل الشقي هو طفل سوي طبيعي جدا وحولي تروحي يوم بنتها مش هناك بحجة ان الاولاد بعملوا دوشه وهم مع بعض وبعدين بنتك ممكن تكون غيرانه من حبهم لابن عمتها فلذلك تصرفتها كذالك وربنا معاكي ويقويكي وخدي الامور ببساطه ده يوم واحد بس

[samasemo]

البنت يا ام ايثار بتبقى صديقة امها لما تكبر ولو ضربتيها من دلوقتى ممكن تحس انك مش بتحبيها وحيبقى صعب تشيلى الفكرة ديه من راسها فحاولى تتملكى اعصابك ولما تحسى انك حتتعصبى ابتسمى واذكرى الله
وربنا معاكى

[ام رحاب]

معلش استحملى علشان خاطر زوجك وبالنسبه لبنتك حولى خالها بجنبك وارضها باى
شىء علشان متحسش بالفرق فى المعامله بين ابن عمتهاوهى ولم تضربيها
علشان هى ملهاش ذنب

[أم ايثار]

والله يا جماعة افدتونى وانا عملت بنصيحتكم النهارده وكبرت دماغى من اى كلام وعلى فكرة هى عندها بردو اولاد ابنها التانى بس المعاملة بتختلف معاهم بردو عموما حتة الاختلاف فى المعاملة دى مش مع ايثار بس ؟؟؟لأمع باباها كمان يعنى هى بتفرق بينه وبين اخواته فى المعاملة ومتشكرة جدا على ردكم ليه وربنا يخليكو ليه يا قمرات