[المشتاقه الى الجنه]

.انا عايزه اعرف طريقة عمل الفشه والكرشه
انا عمرى ما عملتها
وانا اصلا مش عارفه افرق دى كرشه وفشه ولا(كبده )هى لونها افتح من الكبده بشويه فيه قطع بيضه
محدش يضحك عليه بجد مش عارفه افرق جوزى اشتراها من السوبر مركت ومش مكتوب عليها حتى دى ايه وقالى اعمليهالى بكره وقالى شكلها كبده.

[rehab]

هي لو حمرا شويه تبقي فشه
اما الكرشه بتبقي رمادي

[المشتاقه الى الجنه]

هى لونها رمادى فعلا ومعاها فشه
طب مش عارفه الطريقه ازاى
وجزاكى الله خير

[مرمريكا]

صح زى ماقالت رحاب الفشة لونها احمر فاتح
والكرشة لونها رمادى
انا بمعرفش اعمل الكرشة بس بعرف اعمل الفشة
ليها طريقتين
الطريقة الاولى(لزيزة قوى)
اسلقى الفشة فى مياه مغلية وبس
بعد السلق قطعيها الى قطع صغير زى الكبدة
وحطى عليها ثوم مفروم وكمون وشطة وملح زى الكبدة
وحمريها فى الزيت دى بتبقى تحففةةةةةةةة

الطريقة التانية(كمونية الفشة)
قطعى الفشة بعد غسلها قطع صغيرة زى الكبدة
جهزة اناء عميق وحطى فيه الفشة وعصير طماطم
وملح وفلفل اسود
وسيبيها على النار لحد ماتستوى

وبالهنا والشفا

قدمنا لكم وصفة اليوم اتمنى ان تنال اعجابكم
مع تحياتى الشيف اميرة

[المشتاقه الى الجنه]

ههههههههههههههه شكرا يا حضرت الشيف بجد انتى عسوله مووووووووت
وهعملها ويارب تطلع وحشه علشان اعرف انتى شيف ولا

[active_girl]

الكرشة طبعا متنظفة برده هتغسليها كويس وتشوحيها مع ملعقة سمنة وبصلة مقطعة شرايح وطبعا بهارات وفلفل وكمون كتير شوية وبعد ما تشوحيها حطى المياه بس هى بتاخد سوا كتير يعنى يفضل لو عندك حلة برستو وقبل السوا بشوية حطى الملح.
الفشة برده بتقطعيها قطع صغيرة زى الكبده وتشوحيها مع فلفل وبهارات وتحطى مياه بس مش كتير وخلاص

[rehab]

بصي هي الكرشه بتتنضف بالكربوناتو عشان ما تعملش ريحه
في ناس بتنضفها بأنها بتسقطها في مياه مغليه عليها كربوناتو وبعدين تسيبها خمس دقايق ةتتطلعها وبعدين تقعد تنزل الوساخة اللي عليها بالسكينه تكحتها يعني
وفي ناس بتحط عليها الكربوناتو وتقعد تتدعك فيها لغايت ما تنضف وباردوا تكحتها بسكينه
أنا عن نفسي ماما بتنضفها بالطريقة الأولانيه
وبعدين تتسلق وترمي المياه اللي أتسلقت فيها وبعدين بتتعمل زي الطبيخ تتقطع صغير وكده
لاااااااااااااااازم كربوناتو عشان الريحة بتبقي نتنه لو معندكيش أنصحك أجليها

[المشتاقه الى الجنه]

شكرا لا معنديش بكربونات طب لو خليتها يومين فى الفريزر عادى مش يحصلها حاجه

[المشتاقه الى الجنه]

شكرا ليكى اوى يا _اكتف جيرل

[مرمريكا]

بسنت نسيت اقولك
الفشة ممكن تقعد ساعتين فى السلق
عادى متخفيش
ابقى اختبرى سواها بالسكينة
وممكن تحطى الكرشة فى الفريز شهر لو عايزة مش حيحصلها حاجة

كانت معكم الشيف اميرة من برنامج مايطلبه الفتكاوات

[مدام ديدى]

الكرشه وصلت بصى ياقمر اهم حاجه فى الكرشه تغسليها كويس جدا
لوكانت لونها رمادى يبقى هتعزبك فى غسلها تجيبى ميه مغليه وتسقطى فيها الكرشه
وتنظفيها بالكحت بالسكينه لغايه ماتبقى بيضاء وبعدين تغسليها بالخل وتشطفيها كويس وبعدين والدقيق
تسلقيها فى ماء غزير وتحطى بصله وفلفل اسود وحبهان زى اللحمه بالظبط
واوعى تحطى ملح الا لما تستوى كويس جدا احسن تجلد ومتستويش بسرعه
بعد ماتغلى وطى عليها لغايه ماتستوى وخلى بالك انها بتاخد وقت كبير فى التسويه
يعنى تولعى عليها من بدرى وممكن على بيات بعد ماتستوى ممكن تعمليها كمونيه زى ماقالتلك مرمر
او تتطبيخيها بالحمص اواللوبيا الناشفه وجنبها ارز ابيض
وبالهناء والشفاء وممكن تعمليهم تقاطيع

[المشتاقه الى الجنه]

شكرا ليكى يا ديدى
انتى يا بنت يا مرمر على الله اسمعك تقولى شيف تانى ال شيف قال اومال انا رحت فين

[Om Hassan]

مفيش احسن من اللى قالوه الفتكوات
وربنا يعينك يا قمر

[ام ميداء]

الفشة هى يا ستى الرئتين بتكون وردية اللون
احسن طريقة ليها زى كباب الحلة . تقطعيها وتحطى فلفل ولورا وحبهان وبصل وثوم
وملعقة سمن والماء كوب كوب حتى النضج والملح فى الاخر