[أم الطيب]

أنا بعرف أعمل آيس كريم بس نفسي أعرف آيس كريم المستكة بيتعمل إزاي؟؟؟؟؟؟
لأني بموت فيه ومش عارفة نكهة المستكة بتتعمل إزاي..
يا ريت لو واحدة تعرف طريقته تقولي ولكم مني جزيييييييييييييييير (على رأي عبد الله ابني) الشكر

[ام بسنت]

طريقة تحضير الايس كريم



مدة التحضير: 15 دقيقة
الكمية تكفي: 9 أشخاص
المقادير باكيت كريمة جاهزة كوب حليب جاف كوب حليب سائل قليل من مستكة (أو فانيلا) بيضتان القليل من نكهة الفراولة أو أي نكهة أخرى سكر حسب الرغبة مكسرات للتزين
الطريقة 1-تخفق الكريمة مع الحليب السائل والحليب الجاف.
2-نضيف البيض على الخليط.
3-قوم بطحن المستكة وإضافتها إلى الخليط.
4-نضيف النكهة والسكر.
5-ضيف المكسرات (حسب الرغبة) ويتم تحريك الخليط جيدا.
6-ضعه في الثلاجة حتى يجمد الآيسكريم
ده اللى لقيته حدور واقولك

[ام بسنت]

الايس كريم بالمستكة
كيلو حليب – 10 صفار بيض – 50 ج جولكوز(1/4 كوب) – 50 ج ذبدة (1/4 كوب) – 250 ج سكر( كوب وربع) – باكو فانيليا – 100 ج لبن بودرة (1/2 كوب)– 10 ج مثبت ومحسن آيس كريم (م ك )
4 أحجار مستكة
الطريقة
نضع الحليب فى حله على النار ثم نضع المستكة و اللبن البودرة والزبدة والجولكوز والمحسن ونقلبهم ونتركهم لحد ما الحليب يغللى
فى طبق غويط (البسيمة) نضع صفار البيض و الفانيليا والسكر وشوية حليب صغيرين علشان يلف معاكى كويس ونضربهم بالمضرب السلك اليدوى كويس قوى لحد مايتخلطوا ثم نضعه على خليط الحليب مع التقليب السريع لحد مايستوى ( وتعرفى انه استوى لما تحطى فى الحله سكينة او معلقة فى الخليط وتطلعيها وتمسحى فى منتصفها بصابعك اذا اتمسحت يبقى استوى واذا الخليط ضم على بعضه يبقى لسة شوية )
وبعدين اشيله واصفيه بالمصفاه واتركه لحد مايبرد ثم اضعه فى ماكينة الايس كريم لحد ما تلاقيه على وهش و مسك حوالى من ربع لتلت ساعه تروحى حطاه فى الفريزر واذا معندكيش الماكينة يبقى تحطيه فى الطبق الاستنلس المدور (البسيمة ) على حمام مائى فيه ثلج مجروش وتفضلى تقلبى فيه تقلبى فيه بالراحة بالمعلقة البلاستيك العريضه لحد ما يمسك حوالى نص ساعه (لأ كان بياخد منى اكتر من نص ساعه ) ثم تضعيه فى الفريزر

[أم الطيب]

هجرب الطريقة التانية ان شاء الله لأن الطريقة الاولى المستكة مش هي النكهة الاساسية
جزاك الله خيرا يا أم بسنت..ربنا يبارك فيك

[ام سعيد]

انتى عارفة يا ام الطيب لو كنت اعرف كنت قلتلك
وانتى عارفة السر وما فيه؟؟؟؟؟

[Hanan Fouad]

والة لو اعرف ما عزها عليكى

[bes_bes]

انا كان نفسي افيد بس سبقوني في الرد فقلت اقولك تبعتيلي حته بقي علشان اقولك الطريقه دي كانت صح ولا لا

[مدام ديدى]

يااااااااااااااسلالالالالالالالام ام الطيب لها طلب من عنينا ياقمر
هقولك على اللى عندى مع انى بمووت فى الجيلاتى بالمانجو وهو ده المفضل عندى
اما المستكه هقولك الموجود
نصف كيلو لبن سكر للتحليه 2 فص مستكه
ملعقه كبيره نشا 2 معلقه كبيره ماء بارد
2بيضه وفانليا اوممكن نسطعيض عنهم بعلبه لبن مكثف نسله
معلقه صغيره سكر سنترفيش ومعلقه كبيره ماء
توضع المستكه مع معلقه السكر السنترفيش على الماء البارد وتوضع على نار هادئه
حتى يذوب السكر والمستكه ويبداء اللون فى الاصفرار ثم يرفع من النار
يضاف اللبن والسكر الى الخليط السابق مع التقليب على النار حتى يغلى ثم يضاف النشا المذاب فى الماء البارد مع التقليب الجيد على النار حتى يكون مثل المهلبيه الخفيفه
يرفع الخليط من النار
يترك ليبرد ثم يضاف البيض والفانيليا او اللبن المكثف ويضرب الخليط جيدا بالمضرب
يقسم الخليط ويلون حسب الرغبه فمثلا جزء يلون بالشيكولا
وجزء احمر رائحه الفراوله وجزء باللون الاخضر وترك جزء بلونه الطبيعى
يعبا ويترك ليجمد يغرف ويقدم فى الكاسات وزينيه بقى مهو انت شطوره

[أم الطيب]

أم سعيد وحنان وبسبوسة.. تسلمولي يا قمرات
وتسلم ايدك يا ديدي يا قمراية ربنا يخليك ليا