خلى ابنك نسر مش دجاجة

تكبير · #1 13-5-2011 13/5/2011 09:13pm

سبحان الله أطفالنا عجينة فى ايدينا نقدر نشكلها احنا
مع الاحتفاظ بطبعه طبعا

لأن الانسان بيولد بطبعه لكن الشخصية بتتحكم فيها الظروف اللى حواليه
الى كل أم
فى ايدك ابنك يطلع ملك وبإيدك ابنك يطلع ولا حاجة
شخصية ابنك معاكى
شكليها انتى

قريت قصة رمزية زمان (لأنطونى دى ميلو)رائد من رواد التنمية البشرية وانبهرت بيها جدا وأثرت فيا كثير عن النسر اللى اتربى فى حظيرة الدجاج
ملخص القصة ان دجاجة كبيرة لقت بيضة نسر واقعة من على شجرة وقررت تتبناها
وحطت البيضة مع البيض بتاعها وفقس البيض مع بعض
بيضها طلع منه دجاج والبيضة الكبيرة طلع منها نسر
لكن الدجاجة الكبيرة مفهمتش النسر انه ملك الطيور ويقدر يحلق بعيد فى السما
وفضل النسر طول عمره بينقر الحب فى الأرض وراسه تحت فى التراب
كان بيبص على النسور اللى فوق وهيا محلقة فى السما وماكانش شايف نفسه انه زيهم لأنه بيبص على الدجاج اللى حواليه بس
ولما حب فى مرة يجرب ويرفرف بجناحه
ضحكت الفرخة وكل الفراخ اللى حواليه وقالوله انت دجاجة
واقتنع النسر انه دجاجة
عاش النسر ومات .. دجاجة .. لأنه ظن أنه ... كذلك
وانتى يا عزيزتى الأم وأنا وكل أم عايزين ولادنا نسور؟ .. ولا .. دجاج؟

متحديش من قدرات ابنك
الطفل بيعتقد باللى انتى بتقنعيه بيه

خليه يشطح لفوق بخياله وشجعيه

خليه يقتنع انه نسر مش دجاجة

عشان انتى اللى بتوحى لإبنك هوا ايه بالظبط

أب وأم وطفل راحو مطعم
المضيفة سابت 3 قوائم طعام
ورجعت فى ايديها الورقة والقلم
وبصت للأم وقالت لها حضرتك اخترتى تاكلى ايه؟
قالتلها اخترت بانيه وسلاطة وخضار
بصت للأب وحضرتك اختارت تاكل ايه؟
قالها سمك ورز وسلاطة
بصت للولد الصغير الطفل وماسكة الورقة والقلم ومستعدة تكتب وقالتله وحضرتك اختارت تاكل ايه؟
الولد بص لباباه ومامته
باباه قالها هاتيله ممم...
قاطعته المضيفة وأصرت تبص للولد وكررت السؤال بإصرار
حضرتك قررت تاكل إيه؟
الولد بص فى القائمة وقالها آخد برجر
ومشيت المضيفة
وبص الولد فى ذهول لمامته وباباه وقالهم

دى افتكرتنى انسان وضحك

الولد كان مذهول لأنه لأول مرة فى حياته حد يحسسه انه انسان
هوا أصلا ماكانش يعرف انه انسان زيه زى باباه ومامته
لأن باباه ومامته بيربوه على انه قطعة من ديكور فى البيت
او حيوان أليف بياكلوه ويشربوه ويعتنو بيه
لكن ماشافوش انه انسان زيه زيهم
وماتعاملوش ومجربوش يتعاملو معاه من الناحية دى

فى منتهى البساطة تعالو نتعامل مع أولادنا الصغيرين على انهم ........ انسان
شخصيات حية عايشة معانا
مش هاحط أسس ولا قواعد للتعامل
كفاية قوى تشوفى الانسان والبنيآدم والشخصية والعقل اللى عايش معاكى محتاج ايه
وانتى انسانة وعارفة متطلبات الانسان اللى زيك

الموضوع جه فى بالى دلوقت على طول ومفكرتش ومجمعتش كلام وكتبته
يارب يعجبكم

والتقييم ياريت عشان أكمل

أم صديق · #2 13-5-2011 13/5/2011 09:17pm

يسسسسسسسسسسسسسسسسسسسلمو

جواهرية · #3 13-5-2011 13/5/2011 09:17pm

عندك حق

Sendrella · #4 13-5-2011 13/5/2011 09:19pm

الموضوع جميل ياريت تكملي

ام نووور · #5 13-5-2011 13/5/2011 09:19pm

جزاك الله خير موضوع جميل

بحيائى ارضى ربى · #6 13-5-2011 13/5/2011 09:20pm

جزاكى الله خير على كلامك ملخبطة

SaNa · #7 13-5-2011 13/5/2011 09:21pm

رااااااااااااااااااااااااااااااااااااائع
بارك الله فيك
نفس تفكييرري بس للاسف اللي حواليا محسسني اني هبله هههههههههه
أنا أولادي لسه صغيرين يعني من سنه الي خمس سنوات وبعاملهم اني أأخد رأيهم
بس بيعتبروني مش عارفه اللي بيشوف تصرفي اني مش مقدرة أنه طفل
المهم
موضوعك عجبني جدا وأحلى تقييم
تقبلي مروري