البروستد وبلا دسم وبلا كوليسترول
واهي الصوره
والطريقه سهله جدا جدا وسريعه سدقوني ما بتاخد دقايق تحضير
أول شي المقادير
طبعا دجاج بدون جلد ويفضل هنا الأفخاذ لأني جربتها بالصدر وطلعت ناشفه
توست أسمر حمصيه واطحنيه
بخاخ زيت ذره ( ممكن الإستغناء عنه )
بهارات على ذوقك انا بحب استعمل الماسالا وبودره توم وبودرة بصل
الطريقه
ممكن اذا بتحبي تنقعي الدجاج من قبل بليله بشوية خل وليمون بس عن نفسي معظم الأحيان ما بنقعها
بعد ما تغسلي الدجاج وتنزعي جلده حطي بهاراتك على التوست اللي طحنتيه انا ما كنت ضيف ملح لأني بحاول ابتعد عن الملح لأنه بيحبس السوائل بجسمك مما يؤدي الى تبطيء عمليه نقصان الوزن
خلي الدجاج على جنب شوي يصفي ميته وبعدين غمسيه بالتوست ورشيه بخه صغيره من الزيت ( انا استغنين مؤخرا عن هالخطوه بسبب دسامة الدجاج وما لقيت فرق بالنتيجه )
أدخلي الدجاج الفرن وخليه على مهله لحد ما تخزيه بسكينه تلاقيه استوى
ممكن تعمسيه بالبيض قبل التوست وكمان بيطلع لذيذ بس انا بلاقيه هيك لذيذ جدا بقول بالناقص كام كالوري زياده
سدقوني بيطلع مقرمش ولذيذ كتير صحيح الفكره بايخه بس الواحد مع الريجيم بدو اي شيء يعطيه احساس انه متل متل باقي الناس وما حرم نفسه من شيء
ان شاءالله تعجبكم
ــــــــــــــــــــــــــــــــــــــــــــــــــ ـــــــــــــــــــــ
المسخن
المقادير
صدور دجاج مسلوقه طبعا مع بصله صغيره وورق غار بدوووووون بهارات
3 ملاعق اكل زيت زيتون ( لا تكوني كريمه يعني مو ضروري تكون مليانه الملعقه )
سماق ( انا بحط كتير لأنه هوه اللي بيعطي الأكله طعم حلو )
بصل (كتري يعني لصدر دجاجه وحده بحط تلات بصلات كبار )
خبز المسخن ويفضل اسمر بس انا ما بلاقي منه في كندا فبستعمل الابيض او خبز التورتيلا الأسمر ( خبز المسخن اقل سعرات حراريه ) ويومها كمان ما كان عندي اسمر فاستعملت الابيض
طبعا المفروض صدر الدجاجه يعملك مايكفي غدا يومين وخبزة المسخن الوحده انا كنت احسبها حصتي لمدة يوم كامل من النشويا طبعا هيه كبيره كتير بس رقييييييقه جدا لذلك اعتبرتها حصة يوم كامل من النشويات لذلك اذا اخدتي نصها على الغدا ( المفروض نصها يشبعك وزياده لأني بكتر فيها الحشوه ) بيبقى عندك نص حصة نشويات للعشاء قطعة توست اسمر مثلا
لا تضيفي الملح لأنه السماق فيه طعم كفايه وملوحه بتغنيكي عن الملح
والطريقه هيه المعروفه والعتاده للمسخن وللي ما بتعرفها
أول شيء قطعي البصل جوانح وارفعيه على النار مع زيت الزيتون حتى يحمر وبعدين اضيفي صدور الدجاج والسماق وانا بضيف شويه من مرقة الدجاج يعني يادوب رشه حتى يتشرب الدجاج السماق وبعد ما نشفت
صرتي جاهزه لحشيها والصوره توضح
بس طبعا الحشوه هنا قليله كتري الحشوه حتى تكون عندك كمية الخضار والبروتين اكتر من النشويات
وبعدين اخلطي على جنب شوية من شوربه الدجاج اللي سلقتيه مع ملعقة زيت زيتون وحده كمان ما تخليها مليانه
طبعا الدسم الجسم بيحتاجه ولازم تدخليه لنظامك الغذائي بشكل معقول ومتوازن على الأقل ملعقة من الزيت او المايونيز او صوص السلطه الجاهز او اللي تحبيه باليوم ( ماعدا الشحوم المشبعه مثل السمنه ) والان بعد ما خلطتي الشوربه بالزيت ادهني الصينيه بالفرشاه من الخلطه حطي المسخن فوقها خلي الباقي على جنب لأنك حتدهني وش المسخن منها كمان
بعد ما تدهني وش المسخن بباقي الشوربه دخليها الفرن ولحد ما تتحمر شوي من فوق وكلي معها سلطه ولبن قليل الدسم اذا بتحبي وصحتين وهنا
انتبهي انه تكون الحشوه اكتر من الصوره يعني انا بحط عادة 3 اضعاف اللي بالصوره بس يومها كنت بدي اخدها معي برا فعملتها صغيره
ــــــــــــــــــــــــــــــــــــــــــــــــــ ـــــــــــــــــــــــــــــ
نسكافيه تشيزكيك
[color=DarkGreen]
http://www.lakii.com/vb/showthread.p...ED%D2%DF%ED%DF
وهاي بالفراوله بتجنننن
http://www.lakii.com/vb/showthread.p...ED%D2%DF%ED%DF
سنيكرس تشيزكيك
http://www.lakii.com/vb/showthread.p...ED%D2%DF%ED%DF
ــــــــــــــــــــــــــــــــــــــــــــــــــ ــــــــــــــــــــــــــــــــــــــ
هي الوصفه انا بحبها كتير لأني من كتر ما اكلت لحومات زهقت منها وبلاقي هي الوصفه تغيير وبنفس الوقت لذيذه وفيها بروتين بيغني عن اللحومات وسدقوني حتى أهل البيت بياكلوها معي والأولاد اللي ما بياكلو خضار شكلها مغري والخضار فيها ما بتبان كتير بحبو طعمها وبياكلوها بدون ما يحسو شو فيها..
نبدأ بالصوره
[/IMG]
أول شيء حضري صينية الكب كيك وجيبي الفلفل اقطعي من فوق وفرغيه من البذر وحطي كل وحده طبعا لحالها بصينية الكب كيك
بعدين حيلزمك كيس خضار متلجه عبي كل فلفله بالخضار على قد ما تقدري
على جنب اخفقي 4 بيضات مع نص كوب حليب قليل الدسم وبهارات على ذوقك مع بودرة بصل وشوي بودرة ثوم ( هي بترجع لذوقك انا مثلا بضيف بس فلفل وبودرة بصل وبودرة توم بدون بهارات )
عبي الفلفل بمزيج البيض وانتبهي تخليها واقفه بشكل شاقولي تماما حتى ما ينكب البيض منها ودخليها الفرن وبعد ما تستوي طلعيها من الفرن ورشي على الوجه جبنة موزاريلا أو تشيدر قليلة الدسم ورجعيها الفرن من فوق بس خمس دقايق أو حتى تتحمر شوي انا يومها كنت مستعجله وما استنيت تتحمر
ملاحظات
حتى لو انكب منها بيض ما تخافي ما بتخرب بضل طعمها وشكلها حلو
للمره المليون يا بنات حاولي تستغني عن الملح يمكن تلاقيها صعبه بالبدايه بس بعدين حتتعودي على الأقل على ملح قليل جدا
بهالوصفه الموضوع صعب شوي لأنه ما بدك تكتري جبنه بسبب سعراتها الحراريه المرتفعه يعني مافي بديل يعطيكي طعم الملح فإذا كان ولا بد اضيفي شوييييه ملح بس على خلطة البيض بس اذا بدك تقدميها للناس طبعا أضيفي الملح وخلي شوي على جنب الك بدون ملح وإالا بيقلولك مين اللي عطاكي هالوصفه الله لا يعطيها العافيه فوق تعبها وساعتها بزعل كتير
ــــــــــــــــــــــــــــــــــــــــــــــــــ ــــــــــــــــــــــــــــــــــــــــ
الطريقه مع المقادير
اخلطي على جنب نص كأس لبن زبادي ( انا ما استخدمت قليل الدسم لأنه خبرتي معه بعد تعريضه للحراره سيئه جدا عدا عن ذلك الدسم معظمه بيسيل من الدجاج بعد الشواء )
مع ملعقتين مليانين بهار الماسالا ( ضروري ) وملعقه مليانه بهارات التندوري الهنديه
ملعقه مليانه خل مع ملعقه مليانه ليمون
بهار دجاج كما ذكرت سابقا
3 فصوص توم
اخلطيها جيدا بالشوكه ولاحظي انها تكون سميكه بعض الشيء
والان اغسلي الدجاج وانزعي جلده وغزي فيه السكين بشكل عشوائي حتى يتشرب الخلطه ثم جففيه من الماء واذا لزم الأمر استخدمي مناديل المطبخ الورقيه
غمسي كل قطعه من الوجهين بالخلطه ورتبيها بصينيه مسحطه بهذا الشكل
لاحظو لون الصلصه
خليها من الليل الى تاني يوم وأنا احيانا اذا ما عندي وقت بخليها اقل ممكن ساعه وحده في بعض الأحيان مع تقليبها كل ما سنحت الفرصه
والان اشويها وانا في الصوره ما شويتهالأنه برا بردددد كتير حطيتها بالفرن بصينيه شبك حتى ينفصل الدسم عن الدجاج تماما طبعا الشواء ألذ بكتير
ــــــــــــــــــــــــــــــــــــــــــــــــــ ــــــــــــــــــــــــــــــ
المقادير
تفاحتين حجم وسط مقشرين
نص موزه
اتنين كيوي
حوالي سبع فراولات
كوب اناناس طازج طبعا
نص كوب لبن زبادي قليل الدسم
أربع ملاعق حليب سائل قليل الدسم
رشه بسيطه جوز هند ( ممكن تستغني عنها )
قرفه
رشه لوز مبشور للزينه ( جسمك بيحتاج اللوز بالإضافه انه في دراسه انه القليل من المكسرات يساعد على خفض الوزن )
الطريقه
قطعي الفواكه كيف ما كان مابهم الشكل
اخلطي جميع المقادير مع بعض ماعدا اللوز والقرفه ( ممكن تخلطي القرفه معهم اذا بتحبي بس انا برشها على الوجه )
حطيهم بعلبه وغطيها واتركيها بالفريزر اربع ساعات على الأقل
طلعيهم من الفريزر وخليها على جنب من خمس الى عشر دقايق على حسب حرارة الجو عندك وبعدين اخلطيهم بالخلاط وقدميها بعد مل ترشي عليها قرفه ولوز
انا اكلتها هيك بس الباقيين حطيتلهم عليها عسل
ممكن اذا بتحبي الحلو كتير ترشي عليها سكر الريجيم
وكمان للي اولادها بيحبو الايسكريم ممكن تخلطي عليها ملعقتين ايسكريم فانيليا او فراوله اي على ذوقك بتطلع لذيذه كتيروحتى ممكن تتقدم لضيوفك مع ملعقة قشطه ورشة مكسرات وعسل بس ساعتها أوعي تمدي ايدك عليها
ــــــــــــــــــــــــــــــــــــــــــــــــــ ـــــــــــــــــــــــــــــــــــــــ
المقادير
خبز برجر أسمر أو فلفل كما في وصفة الفلفل السابقه
[بصل مقطع صغير
فطر مقطع شرائح
فلفل اخضر ( او اي لون ) مقطع صغير
بهارات على ذوقك
دجاج مسلوق او مشوي مسبقا ( ممكن الاستغناء عنه انا بصراحه ما بضيفه )
4 بيضات مخفوقين مع نص كاس حليب قليل او خالي الدسم ( ممكن تحتاجي اكتر على حسب كمية الخبز اللي عندك )
رشة جبنة تشيدر او موزاريلا قليله الدسم مبشوره
الطريقه
حضري الحشوه اولا حمري البصل على نار هادئه واستخدمي بخاخ زيت ولما يصير لونه بني فاتح اضيفي الفلفل والفطر وارفعي درجة الحراره تحته وقلبي لحد ما تنشف كل السوائل بعدين اضيفي الدجاج اللي عندك وقلبي دقيقتين اضيفي بهاراتك وطفي وخليها على جنب
جيبي الخبز وافتحي كل خبزه من الأسفل وليس من فوق وفرغيها من الداخل وانتبهي ما تفرغيها تماما من الأسفل ( اللي هوه المفروض انه الأعلى بس لا تنسي انك قلبتيها ) والسبب انك حتعبيها بيض ومابدك يطلع البيض من الخبز او ممكن تقطعيها بالنص وتفرغيها والفلفل متل العاده اقطعي من فوق وفرغيه
احشيها بالحشوه اللي عندك على قد ما تقدري بس ما تضغطيها كتير خلي مساحه للبيض
حطيها بصينية الكب كيك وعبيها بيض بهالشكل ودخليها الفرن الحامي مسبقا
بعد ما البيض يستوي رشي على الوجه الجبنه ورجعيها عالفرن من فوق بس حتى تسيح الجبنه
اذا تحمر الخبز ما تخافي بضل كتير طيب وهوه مقرمش وهي بعد ما صارت جاهزه
عبيها بالحشوه اكتر من الصوره بتطلع الذ بس يومها طلعت الحشوه قليله وكسلت اعمل كمان
شكلها بيشبه وصفة الفلفل السابقه بس سدقوني الطعم بيختلف
حشوة الخبز حمرتها بالفرن شوي وتركتها مكشوفه لتاني يوم وبعدين خلطتها مع بصله مفرومه وفصين توم مدقوق ناعم وبهارات دجاج وفلفل وحشيت فيها ديك رومي وممكن دجاجه اذا بتحبو وبعدين حمرته بالفرن صراحه طلعت الحشوه الذ من الديك الرومي جربوها بتدعولي
وهي وصفه للسمك للي بحبو السمك سريعه وسهله جدا
المقادير
سمك شرائح اي نوع يفضل شرائح سميكه
ورق غار ( ورقة لكل شريحه )
ملعقه ونص خردل
توم مدقوق
بقدونس مفروم ناعم
بهارات سمك على ذوقك
جبنة تشيدر قليلة الدسم
فلفل اخضر حلقات
الطريقه
سهله كتير اول شي قطعي الفلفل الاخضر حلقات وافتحي ورقة قصدير وحطي عليها الفلفل وحطي فوق الفلفل ورق الغار ورشي شوية بهار وفلفل
اخلطي جميع المقادير مع بعض ما عدا الجبنه وطبعا السمك وادهني كل شريحه بالخليط وحطيها على ورقة قصدير
رشي كل شريحه بجبنة التشيدر بهالشكل 
وغطيها بنفس القصديره وخزقيها من فوق حتى يتبخر الماء اللي بيطلع من الفلفل
دخليها الفرن لحد ما تستوي ما بتاخد وقت وقدميها وصحتين وهنا
للأمانه انا ما بحب السمك ولا هوه بحبني .. بس اللي عندي اكلوها وقالو لذيذه يعني جربوها بشريحه وحده ما عندي تعليق عليها
ام اللول تابعيني ما بتندمي راجعتلك مع اكله بتحبيها كتير
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ
المقادير
خبز أسمر أو اذا بالك فاضي وعيشك راضي اعملي عجينه بالبيت وهي عباره عن طحين بر وماء ورشة ملح ونتوفة خميره صغيره خليها تخمر على جنب واستعمليها بدل الخبز بس ام اللول بعرف حبيبتي بالك مو فاضي 
وحتختاري الحل الأسهل وهو الخبز الأسمر
طماطم مفرومه ( بالخلاط )
بصله مفرومه ناعم ( كمان عملتها بالفرامه شايفين ما احلى عصر السرعه )
ملعقة كبيره صلصة طماطم
اوريجانو
فلفل اخضر شرائح
فطر شرائح
زيتون
جبنة موزاريلا قليلة الدسم
ملعقة وااااااااحده فقط زيت زيتون ( لأنه بكفي الدسم اللي بالجبنه حتى ولو كانت قليلة الدسم فهي دسمه )
الطريقه
حمري البطل بملعقة الزيت وبعدين اضيفي الطاطم وملعقة الصلصه وخليها تتسبك وطفي عليها ( ممكن تحتفظي فيها بالبراد لوقت الحاجه ) وفي وصفات كتير بنستخدم فيها هي الصلصه مو بس البيتزا
بكل بساطه افردي الخبزه على صينيه وادهنيها بالصلصه بعدين رشي اوريجانو
عندك حلين ما الهم تالت اما انك ترشي الجبنه وفوقها الخضار المقطعه والزيتون او الخضار وفوقهم الجبنه والزيتون وممكن تحطي دجاج مسلوق أو اناناس أو على ذوقك
وهي الطريقتين جنب بعض
حمي الفرن من فوق بس ودخليها يكون حامي حوالي ربع ساعه او حتى تستوي الخضار شوي ودوقي وادعيلي
اول شي شفتها اتحمرت زياده من الاطراف قلت المره الجايه بدهنها كلها بالصلصه حتى الأطراف بس بعدين لقيت حبو الاطراف المقرمشه اكتر شي
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــ
المقادير مع الطريقه
اول شي احفري الكوسا والباذنجان ( شفتو الفصحى ) حفر سميك واحتفظي بلب الكوسا على جنب بعدين حضري حشوة المحشي متل ما بتحبيها يعني الموضوع بيعتمد على ذوقك الشخصي بس لا تضيفي الرز ولا الزيت انا مثلا بهرت اللحمه ( خاليه من الدهن ) بالكمون والعصفر والفلفل وبعدين اضيفي لب الكوسا اللي احتفطتي فيه على جنب( طبعا مو كله على حسب الكميه اللي عندك بس الغايه انك تملي معدتك من الخضار اكتر من اللحمه ) افرميه عالماشي بالسكينه بس حتى ينحشى معك بسهوله طبعا ممكن اضافة البقدونس والبصل والتوم للحشوه ومتل ما قلت على حسب ذوقك و كيف بتعمليها للعيله
بعض الأنظمه بكون فيها كميه من الرز مسموح بها مع الوجبه وبهالحاله ممكن تضيفيها للمحشي بس يفضل ارز بسمتي لأنه سعراته الحراريه اقل من الرز المصري بس انا هون ما اضفت رز
احشي الخضار اللي بدك تحشيها وبعدين بالخلاط افرمي كميه من الطماطم ( انا ما بقشرها حتى استفيد من الالياف اللي بالقشور ) فرم ناااااااعم يعني حتى تصير متل الصلصه واغليها على النار مع تمر هندي ( او بدون اذا ما بتحبي فيها حموضه ) وبعد ما تغلي اضيفي الخضار وخليها لحد ما تستوي وبعد ما قربت تستوي انا اضفت توم مدقوق ونعناع وخليتها تغلي عشر دقايق وخلص صارت جاهزه
انا بعطيكم الفكره بس كل وحده تعملها على حسب ما بتحب وعلى حسب ما اتعودت عليها
اما المحشي بالخضار
نفس الفكره بس هون ما بنقدر نستغني عن شوية رز والطريقه باختصار
حمري البصل بحوالي ملعقتين زيت ويتون ( او على حسب الكميه اللي عندك ) طبعا يكون بصل كتير نوعا ما وانا ما بقدر اعطيكم هون مقادير لأنه على حسب الكميه اللي حتعمليها
بعد ما حمرتي البصل اضيفي عليه الطماطم المقطعه قطع صغيره واالرز( قليل جدا من الرز يعني متل التبوله وما ننسى انه حينفش عالطبخ ) وقلبي حوالي 3 دقايق او حتى تحسي انه الرز شرب مية الطماطم
طفي النار واضيفي دبس رمان او عصير ليمون عصير الليمون هنا افضل لأنه اقل سعرات حراريه من دبس الرمان او ممكن تضيفي الاثنين ثم اضيفي البقدونس والنعناع يابس او طازج اضيفي شوية ملح وهون مافي داعي تضيفي لب الكوسا لأنك استعضتي عنه بالبقدونس والطماطم والبصل
كمان افرمي طماطم كما في السابق بس مو كتير يعني حوالي 3 بس ارفعي على النار الطماطم واضيفي تمر هندي وشوية ملح ( التمر هندي سعراته الحراريه ليست مرتفعه وهو يسهل الأمور الله لا يعسر عليكم أمر )
طبعا الحموضه على حسب انتي ما بتحبيها وما ننسى انه بالطريقتين بدك تحشي الخضار عالاخر يعني على قد ما تقدري ادفسيها وخصوصا اذا ما استعملتي رز والا بتطلع طريه كتير وفاضيه
ــــــــــــــــــــــــــــــــــــــــــــــــــ ــــــــــــــــــــــــــ
المقادير
باذنجان
بصل مفروم ناعم
طماطم متل العاده مخلوطه بالخلاط
جبنة موزاريلا او تشيدر قليلة الدسم
طبعا ملح ( متل العاده استغنيت عنه لأنه الجبنه فيها ملح ) بس اذا ما ببتحملي الاكل بلا ملح ما حتحتبيها بدون ملح هالمره فممكن رشه بسيطه
الطريقه
قشري الباذنجان نص تقشيره بشكل خطوط طوليه ثم قطعيه حلقات عريضه بخيه ببخاخ الزيت وحمريه بالفرن يعني شغلي الفرن من فوق بس وقربيه كتير ولما يتحمر اقلبيه على الطرف التي وحمريه من الجهه التانيه انا استغنيت عن بخة الزيت بهالخطوه وحمرته بدون شي ساده
صفيه بصينيه واعملي الصلصه كالمعتاد حمري البصل لحد ما تصير بني فاتح واضيفي الطماطم وسبكيها شوي على النار مع ملح وبهار
اضيفي من الصلصه فوق كل شريحة باذنجان ودخليها الفرن لحد ما تستوي وبعدين طلعيها ورشي الجبنه على الوجه ورجعيها خمس دقايق عالفرن من فوق بس وصحتين وهنا
طبعا ممكن تاكليها مع رز مسلوق او خبز او بدون شي
اما اذا حبيتي تستخدمي اللحمه المفرومه
اشوي الباذنجان بنفس الطريقه وحمري البصله بعدين اضيفي عليها اللحمه وقلبي لحد ما تستوي اللحمه بعدين اضيفي الطماطم وسبكيها وصبيها على البانجان وعالفرن لحد ما تستوي بس بهالحاله مافي داعي للجبنه لأنه اللحمه فيها بروتين كفايه وهي عملتي مسقعه دايت وممكن ايضا اضافة شرائح الفلفل بتطلع لذيذه طبعا موضوع الملح والبهارات بيرجع لذوقك
الطريقة الثالثه
كباب الباذنجان اللي بنعمله بسوريه وهو كالأتي للي ما بتعرف
حمري الباذنجان بالفرن كمان بنفس الطريقة
افرمي على جنب البقدونس مع بصله وااعجنيها مع اللحمه المفرومه وملحك وبهارك
اعملي صلصة الطماطم اللي ذكرتها سابقا طبعا بدون لحمه او ممكن تفرمي الطماطم وتستخدميها كصلصه عالوجه بدون اي طبخ مسبق
هلأ جيبي شريحتين باذنجان واعملي من اللحمه قرص متل قرص البرجر وحطي بالنص بين كل شريحتين وممكن كمان تقطعي الطماطم بالنص وتفرغيها شوي وتحشيها بنفس الطريقه استعملي لبها بالصلصه للوجه
رتبيهم بصينيه واضيفي الصلصه وسويها مع بعضها بالفرن وصحتين
سامحوني انا بالمقادير مو شاطره لأنه على حسب الكميه اللي بدك تعمليها ومنيح كتير اني عم اقدر رتب افكاري واكتب طريقه لأني فوضويه كتير من هالناحيه وعمري ما اتبعت طريقه بحذافيرها ولا حتى اتبعت نفس الطريقه مرتين دائما بغير من عندي على حسب المزاج
اما اذا قررتي تعمليها بصدور الدجاج
بتحتاجي
صدور دجاج مقطعه شرائح وممكن تنقعيها من قبل بيوم ببهار وليمون وبودرة توم على ذوقك ( بكره بصير اسمي روزاليندا على ذوقك 
) 
حلقات فلفل اخضر او اي لون بدك
شرائح فطر
شرائح بصل
الصلصة اللي ذكرتها سابقا بدون لحمه وممكن هنا تضيفي الأوريجانو عليها بس خلي فيها مي كتير لا تنشفيها لأنه حتطول بالفرن
جبنة موزاريلا طبعا قليلة الدسم ( ممكن الاستغناء عنها )
الطريقة
بهري شرائح الدجاج وصفيها بصينية الفرن
اضيفي عليها الصلصه وفوق الصلصه شرائح الفلفل والفطر والبصل
دخليها الفرن وبعد ما يستوي الدجاج اضيفي الجبنه المبشورة ورجعيها كام دقيقه وبالهناء والعافيه
ــــــــــــــــــــــــــــــــــــــــــــــــــ ــــــــــــــــــــــــــــــ
اذا عجبك اتفضلي الطريقه
المقادير
تفاحه مقشره ومقطعه شرائح صغيره
قرفه
خبز النان الأسمرساده طبعا او اي خبز اسمر بس يفضل خبز نان ( انا استخدمت الخبز الابيض لأنه ما كان عندي نان )
بديل سكر بني والكميه على حسب كيف بتحبي حلاوتها
الطريقه
ضعي شرائح التفاح بالمكرويف دقيقتين مو اكتر او بالفرن حوالي خمس دقايق الغايه انها تدبل بدون ما تستوي عالأخر 
طلعيها من المكرويف ورشي عليها قرفه وبديل السكر واحشيها بخبزة النان وبعدين على النار بخي المقلاه ببخاخ الزيت وحمريها من الطرفين وخلص صارت جاهزه ( اللي عندي بالبيت رشو عليها عسل واكلوها )
انا اخدت من التفاح المخلوط بالقرفه بعد ما برد واكلته مع فنجان القهوه سدقوني لذيذ كتير حتى بدون ما تعمليه باي بس مهم كتير يكون برد او ممكن تحطيه بالبراد
اما الموز اللي بالصحن فهو كالاتي
اقسمي الموزه بالنص بشكل طولي ( على فكره ما اسودت بالعكس لونها كان بيفتح النفس بس انا رشيت عليها قرفه )
امسحيها مسح بعصير الليمون ورشيها ببديل السكر البني وشغلي الفرن من فوق وحمريها شوي وانا بعد ما طلعت رشيت عليها قرفه لأني بحب القرفه كتير اذا ما بتحبي القرفه ممكن تستغني عنها حتى مع التفاح
طريقه حلو ثانيه
المقادير
لبن قليل الدسم
بديل السكر
قرفه
فانيليا
شرائح تفاح صغيره ضعيها في الفرن او المكرويف كما في الوصفه السابفه
الطريقه
سهله جدا وبعتقد واضحه من المكونات
اولا اخفقي اللبن بالسلك مع بديل السكر والفانيليا او ممكن تستعملي ملعقه صغيره سكر سعراتها الحراريه 35 سعر حراري فقط لا غير يعني ما حتأثر كتير
اضيفي القرفه واخلطي بالسلك بعدين شيلي السلك من ايدك وابعديه من وشك حتى ما تغلطي وتستعمليه لأنه بدك تضيفي شرائح التفاح وتحركي بدون ما تكسريها
كتير مهم انه التفاح ما يكون استوى كتير لما شويتيه يعني يادوب يدبل بس حتى ما يتغير لونه لأني مبارح اشتهيت الحلو وحطيته بالمكرويف دقيقتين ونص طلع مستوي كتير وما حبيته
ممكن تستعملي مع هالوصفه اي نوع من انواع الفاكهه بس معظمها ما بدها شوي ضيفيها على اللبن بعد ما تخلطيها بالخلاط مثلا الأناناس والفراوله بس للأمانه الأناناس مره اضفته لجبن الكوتاج صارت طعمها مر كتير وما قدرت اكلها ما بعرف السبب بس عاللبن ما جربت ضيفه
طريقه ثالثه
وهي اسرع واسهل شي وكتير ظريفه ايام الصيف
ضعي اي نوع من انواع الفاكهه بالخلاط مع قطع تلج وبديل السكر اذا بدك تكون حلوه انا بحط قرفه مع التفاح ما تكتري التلج يعني لو قطعة فاكهه وحده مكعبين تلج بتخيل انه كفايه اخفقيها بالخلاط وقدميها بكاسات شكلها حلو
مع الفراوله بتطلع لذيذه جدا وهي كمان بتنفع للي اولادها بحبو الايسكريم بس اضيفي شوية سكر وانا بستعمل للاولاد سكر بني على الاقل مغذيه ومفيده والأهم بتعرفي مكوناتها يعني خاليه من هالمواد الكيميائيه اللي بيدخلوها على أكلنا والله العالم بأضرارها سدقوني اجتني كيكه جاهزه هديه قريت مكوناتها لقيت فيها 25 ماده كيميائيه 
ما قدرت اكل منها ولا اكلها لأولادي ورميتها مع اني ما برمي اكل بالزباله بس صراحه ما قدرت هالمره والله يسامحني يارب 
ما ننسى عزيزاتي انه لما عم نعمل هالحلويات احنا بدنا ناكلها ونستمتع ونخسر وزن بنفس الوقت يعني ما تتوقعو طعمها يكون متل حلويات ستاربكس مثلا ..
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــ
متنسونيييييييييييش في دعواتكم يا فتوكات:-)
و على فكره ده منقوووووووووول ..
ودمتم بصحة وعافيه
ادعووووووووووولي حبيباتي .. .. اخلص دراسه و اروح عند زوجي و حبـــــــــــــــــــــــيـــــــبـــــــــي
