طقت فى دماغى أكتب لحضراتكن يومياتى ...
سامعة واحدة بتقول بلاش قرف..والثانية بتقول والنبى بلاش .ماتخافوش أنا يومياتى مافيهاش حاجة ياريت ألاقى حاجة أكتبها من أساسه.
كل سنة وأنتم طيبين بمناسبة شم النسيم إيه أخبار الفسيخ ..كالعادة كل سنة لازم تدور حلقة نقاشية وإتنين داخل الاسرة عن ضرورة التغلب على عادة اكل الفسيخ والرنجة وإن مافيش شعب فى الدنيا بينتن الحاجة وبعدين يأكلها ....إلخ...إلخ
لكن يا اخواتى أول ما أدخل السوبر ماركت وأشوف الفسيخ قدامي على سنجة عشرة
متوضب ومحشى جزر والذى منه حتى انسى كل كلمة إتكلمتها مع زوجى فى الموضوع دة وريقى يجرى وأتناول وحدات الفسيخ بلهفة مغلفة بالادب وعدم
الإكتراث وأضعها فى سلة التسوق آل يعنى والله بس أناواخداها علشان الولاد
ها ها هالكن أنا تؤ تؤ تؤ ماليش فى الكلم ده
ولن تصدقونى إذا قلت لكم أنى أشعر بالنشوة بمجرد وجود الفسيخ فىثلاجة بيتى
المشكلة الحقيقية اللى بتواجهنا كنسوة يفترض فينا الرقة والرائحة الحلوة هى أكل
البصل وبالرغم من كل الإحتياطات اللى بأخذها بعد أكل البصل للتخلص نهائيا من رائحته وليس نص نص أخذت قرارا من عدة سنوات بعدم تناول البصل فى هذا اليوم حفاظا على أنوثتى أمام زوجى حيث كنت أحس من نظراته بعدم إرتياحه لهذا
السلوك غير الأنثوى معالعلم إنه هو بياكل بصل وبيغسل سنانه كويس ويتناول
حبات اللبان الغارقة فى طعم النعناع وتبادلنا الأدوار أصبحت أنا أوجه له نظرات كالتى كان يوجهها لى وانا آكل البصل سابقا
لكن هذا لا يمنعنى من أكل البصل وزوجى فى العمل وغسل أسنانى ومضغ أعواد البقدونس إن وجد أوالحبهان للتخلص من رائحة البصل الجبارة
ولا من شاف ولا من درى
على فكرة المفروض إن الراجل والمرأة يراعوا بعض فى سلوكياتهم بغض النظر
عن كونه راجل أوكونها ست فهو إنسان وهى إنسانة وقد يتضرر هو أو تتضرر
هى من سلوك ما يصدر من الطرف الاخر ...يعنى بالبلدى لازم الزوج والزوجة
يراعو بعض ..معلهش مضطرة أسيبكم علشان أنام بكرة مدرسة ودة موضوع تانى
فى أمان الله أترككم وبخير ألقاكم إن شاء الله
اذا اعجبك الموضوع و اردت نشره في المنتديات الاخرى فاستخدمي هذا الرابط:
يومياتى الحلوة والوحشة والنص نص
http://forums.fatakat.com/thread18197
