|
رد: ادخلو دكتوره نفسيه هنا
مروشكا لازم اقولك طبعا ان ده سن مراهقه لان كل سن وليه متغيراته ولازم نتعامل مع ولادنا علي اساسها بنتك في الوقت ده بتحس ان مفيش حد فاهمها وبتتمرد علي كل شئ والعنصر المؤثر في حياتها في الوقت دة بيبقي اصحابها ان مش بقولك سبيها كدة تعمل اللي هي عيزاه ومينفعش تعملي كل حاجة هي عايزاها المفروض لا نشد اوي ولا نرخي اوي يعني خليكي جنب بنتك من غير ما تخنقيها حسسيها انك بتثقي فيها وان ربنا ثم ضميرها هو اللي رقيب عليها وانها لما هتكون كويسه دة هيكون ليها ولما هتكون وحشه دة برضه ليها لانكم مش هتفضلوا ليها بس ده ميمنعش انك تخلي بالك منها من بعيد لبعيد من غير ما تحس اعرفي اصحابها واعزميهم في البيت في اي مناسبه نجاح او عيد ميلاد واتعرفي عليهم عشان هما دول اكتر ناس هيكون ليهم تأثير عليها في الوقت دة ومتجبريهاش علي الكلام معاكي خليها تحس بحبك ليها وحنانك عليها وعرفيها انك موجوده دايما جنبها وانها دايما هتلائيكي لما تحتاجلك وان بطبيعة خبرتك وسنك ممكن تقدري تفيديها واياكي تلعبي ادامها دور الملاك البرئ اللي عمره ما غلط لان كلنا بنغلط اهم حاجه اننا نتعلم من الغلط ومنكررهوش ولازم تحطي حدود للاحترام بينك وبينها يعني مفيش حاجة اسمها تعلي صوتهاعليكي او تقل ادبها لان اي عيل بيجرب السلوك الاول لو لقي تشجيع عليه بيكرره لاننا بندعم السلوك ده عنده ممكن تعاقبيها بحاجة بتحبها يعني تحرميها من الخروج او تخاصميها تماما بس من غير اهانه او جرح لنفسها لازم تتعلم ان فيه حاجه اسمها اداب الحوار واياكي توعديها بحاجه ومتنفذيهاش او تعاقبيها علي غلط وانتي تعمليه ومفيش حاجه اسمها في اختلاف في التربيه بينك وبين ابوها لان دة اكبر غلط لازم تعالجوا الاختلافات اللي ما بينكم بعيد عن الولاد طبعا لان في النهايه انتو عايزين مصلحه ولادكم حاولي تنزلي نفسك لمستوي تفكيرها عشان متبقيش انتي في وادي وهي في وادي تاني خالص ولازم طبعا ابوها يكون ليه دور ممكن تحددوا وقت ينا سبكم كلكم تخرجوا فيه تروحوا الجنينه او اي مكان مفتوح هزروا اضحكوا العبوا مع ولادكم ده مش عيب ولا حرام ممكن تتضايق في الاول او ميعجبهاش النظام دة بس مع الوقت هتحبه وهتندمج معاكم اتمني اكون قدرت افيدك وربنا يعينك انا عارفه انها مهمه صعبه بس ربنا معاكي الجنه مبتبقاش تحت اقدام الامهات من فراغ لازم تتعبي وصدقيني في النهايه هتحصدي نتيجه تعبك بالخير ان شاء الله
|
جنا حبيبة ماما
