تنبيهات هامة:
اولا) اذا وصلتك اي رسالة خاصة من عضوة تعرض عليك الانضمام لمنتدى اخر فارسلي رسالة خاصة فيها اسم العضوة الى احدى المشرفات لايقاف سرقة العضوات، ايضا اذا وصلتك اي رسالة خاصة من عضوة تعرض عليك بضائع للبيع فارسليها الى احدى المشرفات.
ثانيا) تجاهلي اي موضوع يتكلم عن شحن الجوال ببلاش او وجود ثغرة في موبينيل او فودافون او اتصالات حيث انها تسرق رصيدك!
ثالثا) الرجاء عدم اضافة مواضيع عن الجرائم او الصور المفزعة او صور فيها نساء متبرجات او اغاني او انتقاص من قدر اي شخص.
شكرا يا crazy_tota على نصايحك الغالية انا بجد ارتحت لما قرات الرد بتاعك لانى حسيت انى الدنيا لسه بخير ولسه فيه حد بيهتم بالحب والمشاعر اللى بقت عند ناس كتير الايام دى كلام فاضى وطمنينى عليكى دايما
وياريت تردى على بسرعة فى الموضوع اللى خدت فيه رايك على الخاص
السلام عليكم ورحمة الله وبركاته
انا عضوه جديدة وموافققة جدا على وجود دكتورة نفسية بنا لأنى فعلا محتاجها علشان اعرف اعامل اولادى لأنى مش عارفة اكون صديقة لهم وخصوصا بنتى
السلام عليكم ورحمه الله وبركاته اخواتى الاحباء فى الله ارجو المشاركة معكم عجبتنى الفكره جداااااااا وربنا يهدينا جميعا الى الخير وعندى سؤال للدكتورة وارجو الرد السريع انا شخصيه عصبية جدا وخصوصا الفتره الاخيرة بعد ما انجبت ابنى الثالث واصيبت بمرض الغده وزادت عصبيتى مع زوجى وهو يظهر لى فى بعض الاحيان الشفقة والعطف والبعض الأخر يتنرفز من عصبيتى وانا فى الحقيقة مش عارفة اعمل اية بالرغم من انى شخصية محبوبة بين اصدقائى واخواتى ولكن فى وسط زحمة المسؤلية فى البيت بكون فى غاية التوتر وبحس انى قمه الضعف ارجوكى ردي عليا قبل مااخسر بيتى مع العلم انى الحمد لله متدينه
اختي ام كريم الف سلامه عليكي
بس معلش انا كنت عايزه افهم هل العصبيه دي بسبب ضغط البيت والجواز ولا انتي كده من زمان وهل ليها سبب صحي
انا هنا معاكي وان شاء الله هنوصل لحل يريحك
ممكن تسمحولي اتكلم معاكم بصراحه شوية
انا ملاحظه ان اغلب المشاكل اللي بيشتكي منها الفتوكات هنا هي مشاكلهم مع ولادهم
بس انا مش عارفه ليه
ليه يكون فيه مشاكل مع ولادكم وانتو عندكم اغلي حاجه واحسن طريقه تخلي ولادكم تحت جناحكم طول العمر
عارفين هي ايه؟؟؟؟
عاطفه وغريزه الامومه
اقوي الغرايز في الكائنات الحيه وعلي راسهم الانسان
وانتو طبعا مش محتاجين كلامي عشان تعرفوا الام ممكن تستحمل اد ايه من الالم والتعب والمشقه عشان خاطر ولادها
بس السؤال عنها اللي بيطرح نفسه انتي كأم بتعبري عن عاطفتك الفياضه دي لولادك ازاي وهل تعبيرك دي يساوي حجم العاطفه اللي جواكي دي ؟؟؟؟
يعني بطريقه ابسط
امتي اخر مره حضنتي فيها ولادك؟؟؟
امتي اخر مره قولتيلهم بحبكم اوي انتوا اغلي حاجه عندي في الدنيا؟؟؟
امتي اخر مره سمعتي لمشكلتهم؟؟؟
امتي اخر مره قعدتي معاهم تهزروا وتضحكوا كعيله؟؟؟؟
تعرفي اي هي احلامهم وامنياتهم؟؟؟
امتي اخر مره طبطبتي عليهم وهما خارجين ودعيتلهم؟؟؟
امتي اخر مره خرجتوا كلكم سوا تتفسحوا مع بعض؟؟؟؟
امتي اخر مره جمعتيهم وقولتي يلا نصلي جماعه ونقرا لو صفحه من القران سوا؟؟؟
ياتري بتعدلي بينهم زي ما سيدنا النبي عليه الصلاه والسلام امرك انك تعدلي بينهم حتي في الابتسامه؟؟؟
هل ولادك حاسين بحبك ليهم نتيجه حرصك علي اظهار حبك ليهم كل يوم؟؟؟
هل بتتخانقي انتي وجوزك ادامهم؟؟؟
هل انتي حريصه علي تذويب الخلافات اللي بينك وبين جوزك في تربيه ولادكم؟؟؟
بصي انا هقولك علي حاجه
تخيلي انك عندك في البيت احدث انواع المكانس الكهربيه مكنسه لهلوبه شغليها بس وهي هتعمل كل حاجه تكنس وتنضف وتمسح وانتي كل اللي عليكي انك تشغليها وتحركيها في الاتجاه اللي انتي عيزاها
لو انتي بئه مش بتشغليها هل هتحسي بامكانيات المكنسه دي. طبعا لا
هتفضلي تعبانه زي ما انتي في شغل البيت والمكنسه ولا كانها موجوده
طبعا انا اسفه علي التشبيه
انا اللي اقصده ان انتي جواكي امكانيات كبيره جدا موفراها ليها عاطفه الامومه بس انتي ممكن متكونيش بتظهريها لولادك وبالتالي هما مش حاسين بده هما اه متاكدين من حبك ليهم بس ممكن ميكونوش حاسين بيه وفيه فرق كبير جدا ان الواحد يعرف وانه يحس
تخيلي ان في الوقت اللي ولادك بيبعدوا فيه عنك بيكونوا في اشد الحاجه انهم يقربوا بس مش عارفين ازاي
صدقيني انتي مش محتاجه ليا او لاي حد تاني مهما كان علمه عشان يقولك تعملي ايه مع ولادك لانك معاكي الحل السحري الاكيد لمشكلتك
انتي عندك اللي مش عند اي حد تاني
انتي عندك حبك الكبير اوي لولادك
وكل اللي عليكي انك تطلعيه
مش عيب انك تحضنيهم وتبوسيهم وتقوليلهم انا بحبكم اوي
مش عيب انك تلعبي معاهم وتخرجوا تتفسحوا سوا
مش عيب انك تطلعي اللي جواكي ومتبخليش بيه عليهم
مش عيب انك تربيهم بالحب
التربيه بالحب هي الحل لكل المشاكل دي
ولادك اول ما بيتولدوا بيكونوا صفحه بيضه انتي اللي بتكتبي اولي سطورها وانتي اللي بتلوني اولي صفحاتها يا اما بالابيض يا اما بالاسود
بالاسود لو استخدمتوا معاهم اساليب التربيه دي زي التسلط والقسوة او النبذ والاهمال او التدليل والحمايه الزياده عن اللازم
او بالابيض لو استخدمتوا معاهم اسلوب التربيه الاسلاميه اللي فيه صحه وسلامه الاسره اللي بيكون اساسها المحبه والاهتمام وتقبل الطفل مهما كان والرعايه والحب الغير مشروط والاحترام والتقدير
انا عارفه ان الكلام ده صعب خصوصا في الظرف المنيله اللي احنا عايشين فيها دلوقتي بس مينفعش ننسي ولادنا في الزحمه
ولادكم مش محتاجين بس اكل وشرب ولبس وتعليم وفلوس
ولادكم محتاجين بيت وعيله
محتاجين يحسوا بحبكم وانهم اهم حاجه لان بيوصل عليهم وقت بيفتكروا ان الفلوس والشغل اهم منهم
انا مش بقولك اعملي كل حاجه لوحدك لازم جوزك يشترك معاكي في كل ده لان المركب مش هتمشي وتحافظ علي استقرارها بتجديف شخص واحد
وخلي بالك هي دي دوره الحياه
جدتك عملت كده مع امك
وامك عملت كده معاكي
وانتي هتعملي كده مع ولادك
ممكن ميكونوش عملوا كل الحاجات دي عشان ظروف التعليم والوعي كانت اقل
بس انتي طبعا نفسك تقدمي لولادك فرص احسن ويكونوا احسن منك في كل حاجه
ولو فيه مشاكل بين ولادك مع بعض لازم تعرفي ان حلها في الاساس بايدك انتي
لو ربتيهم علي انهم اخوات دم ولحم واحد مفيش حاجه ممكن تفرقهم لو فيه لقمه واحده يقسموها سوا
ربيهم علي انهم يحبوا بعض وان مفيش حاجه تستاهل ان الاخوات يتخانقوا بسببها
والعدل ثم العدل ثم العدل بين اولادك
انتي ممكن تفرقي بينهم من غير ما تحسي لان احيانا ممكن يكون فيه واحد منهم بيريحك عن التاني فانتي تميلي ليه وتفرقي من غير ما تحسي
متنسيش ان حبك لولادك غير مشروط
يعني انتي بتحبيهم عشان هما ولادك
حته منك
مش عشان هما حلوين او وحشين
او يستاهلوا او ميستهلوش
اسمعي لولادك وقت ما يحبوا يتكلموا مش وقت ما انتي تحبي تسمعيلهم لان ممكن وقتها ميكونوش عايزين يتكلموا بس المهم انهم يكونو حاسين انهم وقت ما يحبوا يتكلموا انتي هتكوني موجوده عشان تسمعي
تخيلي ان ربنا سبحانه وتعالي ادي للانسان العقل والمقدره انه يروض اشرس الحيوانات ويجعلها رهن اشاره منه
انتي بئه بكل اللي عندك من عقل وحكمه وغريزه وحب وخبره مش هتقدري تتعاملي مع المشاكل اللي بتقابلك مع ولادك
يبقي ليه لازمه استخدام الضرب والاهانه والتجريح والصوت العالي وانتي في ايدك الحل الاكيد
اي انسان في الدنيا التعامل والتفاهم بيقي معاه صعب جدا واحيانا بيكون مستحيل لو استخدمنا معاه الاساليب اللي بتقلل من قيمته كانسان
بس لو حس انه انسان مهم ومحبوب ومرغوب فيه بيقدر يطلع كل حاجه حلوه جواه
والله انتي ممكن تكسبي ولادك بمجرد كلمه حب او حضن حنين او لحظه ود مابينكم
المعادله بسيطه اوي
كوني لهم نعم الام هيكونوا ليكي نعم الابناء
انتي بس ابدئي واطلبي دايما العون من رب العزه انه يساعدك تأدي مهمتك الشاقه دي علي اكمل وجه ويحفظ ولادك ويصونهم ويقيهم شر نفسهم وشر الناس
وانتي كده بتطلبي العون من ارحم اراحمين واكرم الاكرمين
رب العزه اللي بيستحي ان يرفع العبد يده اليه فيردهما صفرا خائبتين
احتسبي تربيتك لولادك انها جهاد في سبيل الله
ايوه جهاد مستغربه ليه؟؟
يعني انتي دلوقتي لما تنوي انك تربي ولادك عشان ينفعوا الاسلام والمسلمين ده مش يبقي جهاد؟؟
شوفي بئه الثواب العظيم اللي هتخديه
هتكسبي ثواب
وهتكسبي ولادك
وهتكسبي راحتك
وهتكسبي الرضا عن نفسك كأم
اسفه لو قلت اي حاجه زعلتكم مني بس اقسم بالله ان الكلام ده نابع من قلبي ومليش منه اي غرض غير مصلحتكم
اسأل الله العظيم رب العرش العظيم ان يوفقكم لما يحبه ويرضاه
اختي حنان
الاحساس اللي بنحس بيه من تعاملنا مع الناس ده بيتوقف علي نيتنا في المعامله يعني لو انتي بتتعاملي ومنتظره المقابل من الناس اكيد هتتعبي لاننا مش دايما بنلاقي مقابل للي بنعمله
لكن لو بتتعاملي مع الناس وانتي مستنيه المقابل من ربنا كل مره هتحسي انك انتي كسبانه لانك بتعملي الخير عشان خاطر ربنا
ربنا اللي مفيش حاجه بتضيع عنده ابدا
لو انتي اتعاملتي مع الناس علي اساس انك بتعملي كده لوجه الله صدقيني مش هتتعبي ابدا
بالعكس انتي علي طول هتكوني سعيده ومبسوطه
صحيح ان الدنيا اتغيرت
بس هي الدنيا ايه اللي بيغيرها
هي في الاساس عباره عن ايه
الدنيا ده عباره عن انا وانتي وفلانه وعلانه
يعني التغيير ده جاي منا احنا
يعني لو عايزين الدنيا تبقي كويسه
لازم احنا نكون كويسين
ومينفعش تستني ان اللي ادامنا هما اللي يتغيروا الاول
لازم نبدء بنفسنا الاول
نرجع لدينا واخلاقنا الكريمه اللي هما اصل سعادتنا
اثبتي علي اخلاقك الحلوه واوعي تسمحي لحاجه انها تغير منها
ولو انتي خايفه تتجرحي من اللي حواليكي خلي تعاملاتك مع الناس بحدود
يعني متقربيش اوي عشان متتوجعيش منهم ومتبعديش اوي لدرجه انك متديش لنفسك الفرصه انك تعرفيهم
وكل انسان بيبان اصله ومعدنه من العشره والمواقف وساعتها ابقي اقربي واو ابعدي براحتك
احتسبي دايما اجرك عند الله وعاملي الناس دايما بخلق حسن عشان خاطر ربنا وعشان خاطر نفسك مش حد تاني لانك انتي اللي هتبقي الكسبانه في الاخر
لان لما يكون هدفك رضا ربنا ، ربنا اكيد هيراضيكي واللي عنده مش بيروح ابدا
ومتنسيش ما عند الله باقي ومع عند العبد فاني
اختي بسمه ياسر
الف مبروك علي جوازك ربنا يديم عليكي نعمته ويقر عينك بالذريه الصالحه
بس انتي ليه قلقانه كده
الولاد دول رزق من عند ربنا وهو كاتبه ليكي ووقت ما ييجي اوانه هيوصلك لحد عندك
وانتي الحمد لله معندكيش اي مانع للحمل بس لسه الاوان مجاش
ومعلش اعذري جوزك لان للاسف دي ثقافه مجتمع والموضوع ده يبقي حساس بالنسبه ليه اوي لانه يمس رجولته
وصدقيني هو الموضوع ده شاغله جدا بس ميقدرش يقولك عشان هو معتقد انه بكده هيهز صورته ادامك كراجل
وعلي فكره هو ممكن يروح يكشف ويحلل من وراكي
المهم انك تهدي خالص لان القلق المستمر ممكن يأخر الحمل
خلي بالك من نفسك ومن جوزك وحسسيه انه اهم حاجه عندك في الدنيا ومتتكلميش معاه في الموضوع ده تاني عشان متخلقيش المشاكل بينكم وانتو لسه عرايس
وانتوا الحمد لله لسه صغيرين والدنيا كلها ادامكم بس انتي اصبري شويه
انا عارفه انك نفسك في عيل يملي عليكي دنيتك ويكمل فرحتك
بس القلق والاستعجال ده مش هيفيدك بشئ
انتي الحاجه الوحيده اللي ممكن تعمليها دلوقتي انك تلجألي لرب العزه وتدعيه ان يمن عليكي ويرزقك بالذريه الصالحه ولحي عليه في دعائك وتوسلي اليه ومتتكسفيش تطلبي من ربنا لان طلبك عنده وحده وان شاء الله ربنا هيكتبلك اللي فيه الخير
وياستي بلاش الرسميات بتاعت سيادتكم والكلام ده احنا كلنا هنا اخواتك وانتي مش محتاجه لالقاب عشان تتكلمي بيها لان بيجمعنا محبتنا في الله وتحت امرك دايما
اختي توتا بطوطه
صراحه انا مش لاقيه حاجه اقولها بعد كلام اختنا crazy toto
بس انا كنت عيزاكي بس تعرفي اننا حاسين بيكي والله
وصدقيني الحب والود لسه موجود جوانا وعمره ماكان ولا هيكون كلام فاضي
لانه لو راح كنا موتنا من زمان
ممكن يكون لسه ربنا ما رزقكيش بصاحبه وفيه بس شوفي كام واحده هنا تشرفها ويسعدها انها تكون صاحبتك وانا اولهم واتمني انك تعتبريني كده
بلاش تكتمي حاجه جواكي مهما كانت صغيره احنا هنا كلنا موجودين في الاساس عشان نسمعكم ونحاول نريحكم اتكلمي ووصدقيني هنحس بيكي ونقدر كلامك
حبيبتي الجواز ده اولا واخيرا قسمه ونصيب ورزق ربنا كاتبهولك من يوم ماتولدتي ولن ينتهي عمرك حتي تستوفي رزقك
ولازم تتأكدي ان ربنا لو كاتبلك الجواز من الانسان ده هتتجوزيه مهما حصل وربنا هيحليه في عين اهلك مهما كان
يبقي تعتلي الهم ليه وفي الاخر اللي هيكتبه ربنا هو اللي هيكون
انتي بس اطلبي من ربنا كل اللي نفسك فيه وهو هيكتبلك اللي فيه الخير
وانتي عملتي احسن حاجه بانك لجأتي لطريق القران الكريم يعني انتي في حفظ ورعايه ربنا وبكده عمرك ما هتضري ابدا
وصدقيني كل حاجه ربنا بيكتبهالنا بيبقي فيها الخير لينا بس احنا احيانا مبنقدرش ندرك الحكمه دي
انتي عملتي اللي عليكي وان شاء الله ربنا هيكتبلك اللي فيه الخير
ولو احتجتي اي حاجه في اي وقت ياريت تعتبريني صحبتك وانا ان شاء الله مش هتأخر عنك ابدا
انا فعلا متشكرة كثير كثير جدا جدا للروح الجميلة ده علي فكرة انت جميلة وشكرا علي هذا الرد وربنا يخليكي يا wella انتي فعلا انسان جميلا الروح وكل حاجة وربنا يحميكي يا رب
لا يا حبيبة قلبي سماح سيبي شعرك اوعي تشدية
عندك يا قمرة بدل الدكتورة هنا اتنين فية ولاء وفية وردة لبنان
واذا مكنتش واحدة فيهم موجودة احنا كلنا يا قمرة موجودين وبنسمع بعض يعني فضفضي واحنا حنسمعك ونتكلم معاكي لحد ما يرد عليكي واحدة من الاتنين بس اهم حاجة ابعدي عن شعرك خالص خالص اصلي اكتئبت قبل كدة لدرجة اني قصيت شعري بايدي بعد ما كان طويل خالص دلوقت بصالحة واحايلة عشان يطول تاني ههههههههههههههههههههههه
لا الحمدلله اهو بيتحسن وبعدين غصب عنة حيطول هو بمزاجة
اضحكي يا قلبي ومتضايقيش احنا كلنا هنا عشان نسمع بعض
بنوتة يا حبيبة قلبي احنا كلنا عارفين فرحك قرب وبندعيلك من قلوبنا ولو انتي محتاجة واحدة فينا تنزل معاكي شتري اي حاجة طبعا احنا في الخدمة بس الا انا ههههههههههههههههههههه
اصلي من اسكندرية والمشوار بعيد
لاطبعا يا قمر والله لو طلبتي انزل عشان خاطر عيونك
اختي بطوطة حبيبتي اللي اسمها علي اسمي يا قمرة الدنيا حلوة بيكي وكل ما بقيتي انتي احلي كل ما الدنيا بقت احلي
انا رديت عليكي علي الخاص وابقي طمنيني عليكي ديما
اختي تسنيم
الف سلامه عليكي من التعب والمرض
بس اعذريني انا مش هقدر افيدك بتفسير الا اذا اتكلمتي عن مشكلتك الاول
انا مقدرش اقول اي كلام وخلاص علي اساس سطرين
ياريت لو تحبي تكلميني عن مشكلتك اكتر من كده
طلعي كل اللي جواكي مهما كان
ولو تحبي تبعتيلي علي الخاص تحت امرك طبعا
واسأل الله العظيم ان يشفيك ويفرج كربك ان شاء الله
