[شموسة]

يلا يافتكوات ياحلوين( طبعا قصدى على حبايبى الحلوين اللى منتظرين ابن الحلال زيى ولسه ماجاش)يلا انا وانتو ناخد بلأسباب عارفين ايه هى الاسباب هقولكو ايه هى بس بعد مانعرف ايه هى الحكايه اصلا..
الحكايه ان معظم ولاد الحلال بتوع اليومين دول شرطهم فى شريكة الحياه إنها تكون خريجة كلية الصيدله وده يكاد يكون الشرط الوحيد(وانتو طبعا عارفين ليه)
تخيلو بقى ده عقل يستاهل اننا نحترمه؟
مع احترامى لكل اخواتى الصيدلانيات هل يجوز انى احكم على انسان او اختاره لمجرد وظيفته؟ او تعليمه؟ بغض النظر عن اخلاقه او تربيته؟ مع ان اخلاقه وتربيته همه الضمان الوحيد لمعيشه محترمه وهادئه فى يومين زى اليومين دول،لكن عمر ماتعليم او وظيفه ابدا يضمنوا لى معيشه كريمه
فاكرين زمان لما العريس كان بيتقدم كانو بيسألو هو بيشتغل ايه؟ لكن دلوقتى العريس هو اللى بيسأل هى العروسه خريجة ايه او بتشتغل ايه؟ممكن يكون ده جزء وأنا بكررها جزءمن حقه فى ظل الظروف الماديه اللى احنا فيها دلوقتى وليس حقا كاملا له _او شرط ان الباشا مايتجوزش غير عروسه بتشتغل او ليها دخل ،على كده بقى العرايس اللى مالهمش دخل يخبطو دماغهم فى الحيطه؟
انا بقى ...لقيت الحل
وهو فى ايد السيد وزير التعليم العالىوهو
:فتح باب التحويل من جميع الكليات والمعاهد والدبلومات المتوسطه الى كلية الصيدله
:ثانيا:عشان الجماعه اللى مش عايزين يذاكرو ولا يتعبو نفسهم ليهم حل تانى وهو :اعطائهم شهادات معادله لبكالريوس الصيدله
:ثالثا وده الاسهل:ان السيد الوزير يحللنا مشكلتنا ويخلى كلياتنا كلها صيدله
والحلول دى يطبقوها لحد ماالناس تتجوز وبعد كده يلغوها تانى
ايه رأيكو؟
هههههههههههههههههههههههههههههههههه
طبعا الزواج قسمه ونصيب انا بس كنت بهزر وبتريق على الاوضاع الغريبه بتاعت اليومين دول واللى مرت عليا انا شخصيا

[semsema40]

ربنا يبعت يا حبيببتى

[نادو]

على رايك ياسمسمة
وروحى قدمى طلب لوزير التربية والتعليم ياشموسة وانا معاكى ههههههههههه

[أمة الله]

طب ممكن تكون دخلت صيدله قسمه ونصيب أو ببركة دعا الوالدين ياستي المهم الدين والاخلاق وبعدين اكيد متفقين ان ده رزق محدش بياخد رزق حد وله في حد بيموت قبل ما ياخد رزقه كامل يعني لو مكتبلك تتجوزي هتجوزي ولو معاكي محو اميه ولو مش مكتوب لا قد الله يبقي متتعبيش نفسك حتي لو بقيتي وزيرة التعليم العالي مشكوره

[أم لوجى و ملك]

طبعا فى البدايه اقولك ربنا يرزقك بابن الحلال انت وكل اللى لسه ما اتجوزتش
بس السؤال
اشمعنى كلية الصيدله

[Raniam_2010]

على فكرة يا شموسة ياحبيبتى مش بس مطلوب كلية صيدلة وبس
كمان طالبين مدرسات والموقف ده حصل معايا شخصياً
أكتر من شخص كان عاوز يرتبط بيا لمجرد إنه يعرف إنى بشتغل مدرسة
عشان هيسافر الخارج وياخدنى معاه وطبعا المدرسات هناك مرتباتهم عالية جدا
وطبعاً برفض كده لأنى بحس إنى مجرد شئ
هيحسن بيه دخله المادى مش أكتر
وآخر مرة كان من حوالى أسبوعين كان واحد بيدور على عروسة
وسألنى لو أعرف واحدة مدرسة أو ممرضة عشان هياخدها معه الكويت
مش معنى كده ان البنت مش كويسة بس طبعا لازم الأخلاق والدين والتربية
آسفة لو طولت عليكى

[النهى]

هههههههههههه

والله حاله شباب هاليومين.. تفكير مادي ...


نفس الشي بيحصل عندنا هنا بالسعودية...

بس الفرق بسيط حبتين .. الشاب بيحس انه صاحب الفضل ع البنت انه رضي يتجوزها<<< هههه بهزر..


ربنا يرزقك بخريج صيدلة..

[shimo_shiko]

يارب يوفقك كل بنت بالدنيا و تتزوج من زوج صالح إن شاء الله
أما أنا بالنسبة لي أنا إنعقد قراني منذ شهر و الفرح بعد فترة و يارب يقربنا من بعض

[hana]

كل شئ قسمة ونصيب فعلا وربنا يرزق انتى وكل البنات بابن الحلال

[اشرقت]

فعلا وضع غريب ان الراجل يبقى طلبه عروسة تدر عليه دخل

بس طبعا فى ناس كتير ليسوا كذالك ربنا يرزقنا بيهم

[مرمريكا]

عندك حق ياشموسة دة الوضع دلوقتى
عايز صيدلانية او دكتورة او مهندسة
وممكن ييجى على نفسه لو لقاها محامية
هههههههههههههههههههههههه

والمصيبة بقى لو هو معاه شهادة متوسطة وبيشترط يكون معاها شهادة عليا
قوليلى
واللى معاهم بكالوريوس تجارة حيعملو ايييية
ابلها واشرب ميتها مش كدة
هههههههههههههه

[drnahla]

بس انا اتجوزت وجوزى مش عايزنى اشتغل بالرغم من انى طبيبة
؟؟
واسالك اشمعنى كلية صيدلة؟

[ام مهند]

طب مايريح نفسه ويخلي مكتب التنسيق بتاع الثانويه العامه هو اللي يرشحله الكليه المناسبه(قصدي العروسه المناسبه)

ربنا يرزقكم بااولاد الحلال يارب اللي يعرفوا مقداركم يافتوكات زي العسل

[ام مهند]

اه اقولكم اشمعني صيدله

بصوا معروف ان الصيدلاني اللي بيفتح صيدليه مكسبها ماشاء الله

فهو ممكن يفتح الصيدليه باسم المدام ويشتغل هو فيها
وفي ظل التلوث الكتييير اللي احنا فيه دلوقتي اعتقد مفيش احسن من الوظيفه ده تدر ارباح(الناس مش بتبطل تعيا)

[OM MAIDA2]

انا اتخطبت فى الكلية (هندسة) ولم اعمل اطلاقا بناءا على رغبة زوجى
وسعادتى فى تربية اولادى وهم فى صيدلة يابنتى عمرها ما تتحسب كده
اللهم ارزق بنات المسلمين ازواج صالحين وعف شباب المسلمين
آآآآآآآآآآآآمين

[شموسة]

انا متشكره جدا ياجماعه على ردودكم
انا والله بهزر مش اكتر ربنا يرزق الجميع وكل واحد بياخد نصيبه بالمناسبه ياام مياده احنا زمايل انا كمان كلية هندسه

[شموسة]

انتو ليه واخدين الموضوع جد كده انا موقنه ميه بالميه انه لن يصيبنا الا ماكتب الله لنا وربنا سبحانه وتعالى لا يحدث شيئا الا بقدر حتى لو كان هذا الشىء صغير جدا وتافه بنظر البشر انا بس بستغرب على تفكير بعض الناس وبندحك مع بعض
تمنياتى للجميع بالتوفيق

[OM MAIDA2]

عسوووووووولة يا باشمهندسة
بس انا دفعة 85 شفتى صغنونة ازاى
ام ميداء علشان خاطر ربنا
ربنا يسعد ايامك مع من يختاره قلبك وعقلك