[ناننو]

عندي مشكله مدوخاني مع بنتي ... بتمص صباعها بطريقه مستمره والايد التانيه بتشد في شعرها وتعقده ... لما اتجننت منها خالص ... جربت معاها حاجات كتير
جبتلها no hapits من الصيدليه وماجبش نتيجه ... وجبت صبر من عند العطار وبرضه مافيش فايده وجربت اسلوب الثواب والعقاب والتحفيز يعني لو ماحتطيش هانحط star على sheet وكل 3 stars بحاجه حلوه برضه مافيش ولعبتها كل الالعاب ود. الاسنان قال لي لازم تبطل دلوقتي علشان اسنانها وفكها مايبوظوش ... اعمل ايه حد عنده حل؟

اذا اعجبك الموضوع و اردت نشره في المنتديات الاخرى فاستخدمي هذا الرابط:
مص الصوابع وشد الشعر
http://forums.fatakat.com/thread18547

[ام بسنت]

هى بنتك عندها اد ايه
حاولى تحطلها حاجه علىايديها اربطيها حطى شطه

[ناننو]

3 سنين ... وهاتجنن منها يا ام بسنت وكمان بتصعب عليا ومابحبش اضربها

[ناننو]

وبخاف من الشطه احسن تدعك عنيها

[wella]

الي الاخت الحبيبه ناننو اولا لازم تعرفي ان بنتك مش مريضه واللي عندها مجرد سلوكيات اتعودت عليها وهي زي اطفال تانين كتير وهي في السن دة الموضوع ميدعوش للقلق المشكله لو السلوكيات دي اتنقلت معاها لسن 4 سنين فما فوق اهم حاجة لازم كل اللي في البيت والمحيطين بالطفل يشتركوا في حل المشكله ومتحاولوش توصلوا لبنتكم انها بتعمل حاجة غلط او انها بتضايقكم لانها ممكن تستخدم العادات دي كوسيله للضغط عليكم لازم تحددي هي بتعمل كدة امتي وليه يعني لما بتتضايق او تكون لوحدها لان الطفل ممكن يعمل كدة لشعوره بالوحدة او الفراغ او عدم الاشباع العاطفي او كرد علي اسلوب الزجر العنيف او اهانته وضربه امام الاخرين او لوجود مشاكل في البيت وعدم تنفيس الطاقه الهائله اللي جواه في الحاله دي بيلجأ الطفل لاي وسيله ممكن تخفف التوتر اللي جواه احنا ياكبار لما بنحس بالتوتر والقلق بنفضل نهز في رجلينا ونلعب في ضوافرنا ما بالك بئه بالاطفال اللي دفاعاتهم النفسيه اضعف مننا بمراحل اياكي تعاقبي بنتك علي حاجة هي ملهاش ذنب فيها وكمان الضرب والزعاق ادام الناس ده بيضعف من شخصيتها وبيخليها تدمن العادات دي خلي فيه دايما وقت مخصص للمرح ما بينكم وبين بنتكم وديها جنينه وخرجيها وخليها تلعب خليها تتصاحب علي بنات في سنها تلعب معاهم وتشاركهم واحذري من الخناق بينك وبين زوجك امامها وحاولي متخليهاش لوحدها مدة طويله صدقيني الولاد طول عمرهم بيبقوا في امس الحاجه للحنان والحب والاهتمام من اقرب الناس ليهم الاب والام والاخوات ومحدش بيقدر يعوضهم عن دة بنتك جواها احتياجات نفسيه كتير حاولي تدوري عليها وتشبعيها علي اد ما ربنا يقدرك طبعا في حدود المسموح ومقصدش بكدة الدلع اللي بيضيع العيال خليكم اصحاب من الصغر اسمعي مشاكلها اللي ممكن تكون تافهه بالنسبه لك بس ممكن تكون مصيبه بالنسبه لها احضنيها كتير وقوليلها بحبك عشان ميجيش اليوم اللي تتخنق فيه من حضنك وبلاش تحمليها فوق طاقتها ومتنسيش ابدا انها طفله خليها تعيش احلي سنين عمرها تجري وتلعب وتتنطط وتضحك صدقيني النتيجه هتبقي هايله وكله بتوفيق ربنا اسأل الله ان يعينك ويهديك لما فيه الخير والصلاح وياريت تبقي تطمنيني عليكي وعلي بنتك

[أم لوجى و ملك]

دى نفس مشكلتى مع بنتى عمرها سنه وشهرين وصباعها ده ما بتشيلوش من بقها ومفيش فايده

[أم لوجى و ملك]

اوعى يا ناننو موضوع الشطه ده
حراااااااااااام عليكى يا ام بسنت شطه دى صعبه اوى
ممكن كمان زى ما ناننو قالت تحط صباعها فى عينها

[رانيه]

حبيبه البي زي ابن اخوي انولد وهو مص اصبعه حولنا كتير ما فيش فايده

[shimo_shiko]

حاولي تحطي أي حاجة علي صابع بنتك علي رأي أم بسنت و لو خايفة من الشطة في حاجة عن العطار إسمها مر و بتتنقع في المية و تضعيها علي يدها
فتكره إبنتك الطعم و تكره وضع إصبعها في يدها
و تصوري أنا بنت خالتي كده و لكن تركوها ربما تنسي هذه العادة لما تكبر و لكن مفيش فايدة كبرت البنت و أصبحت في المرحلة السادسة الإبتدائية و لا زالت بهذه العادة السيئة وخالتي ياحرام هتجنن منها و مش عارفة تتصرف لأن فات الأوان

[ناننو]

شكرا حبايبي على المشاركه هاحاول اجرب الحلول دي خصوصا رأي ويللا مع اني بخللي بالي من النقط اللي ذكرتيها بس هاركز اكتر ... وانا جربت المر اللي عند العطار يا شيمو بس مافيش فايده ... بتروح تغسل اديها المجرمه وتمص ... اههههئئئ