إزاي نشتري قماش ؟
وازاي نعرف كمية القماش اللي هتاخدها الستارة؟
أول حاجة قماش " الترجال " او " الاورجانزا" ودي بتبقي أول طبقة في الستائر اللي هي الطبقة الشفافة عرض القماش بيكون 3 متر لو القماشة سادة ممكن نقلب الطول عرض أو العرض طول ولازم يكون فيها كشكشة كتير وفيه حاجة أسمها " كشكشة دوبل " يعني بنكشكش القماش قد الشباك مرتيم وفي حاجة تانية أسمها " كشكشة تربل " يعني بنكشكش القماش قد الشبك ثلاث مرات ..
تاني حاجة هو القماش العادي اللي هو جوانب الستارة بيكون عرض القماش 140 سم لو الشباك عرضه 2 متر يبقي هنحتاج نجيب له عرضين يعني 6 متر قماش أو 12 متر قماش لو أحنا عايزين الجناب تكون مكشكشة كتير..
ملحوظة هامة : لو الشباك في وسط الحيطة لما نيجي نعمل ستارة بناخد 20 سم من بعد الشباك فقط يعني بلاش نعمل ستارة من الحيطة للحيط , ولازم ناخد بالنا ان لو الشباك ما فيهوش شيش يبقي لازم نحط قماش بلاك اوت علشان نحمي الستارة من الشمس والاتربة.
إ زاي نختار موديل الستارة
واحنا بنختار موديل الستارة لازم ناخد بالنا من شوية الحاجات دي...
ـ 1 ـ
شكل الشباك
لو الشباك بتاعنا عبارة عن شيش وزجاج هنلاقي ان من الصعب نعمل موديل فيه جناب عريضة او برقع عريض ، لان ده هيمنع فتح الشباك ومش هيبين جمال الستارة..
ولو الشباك الومنيوم منزلق يبقي ممكن نعمل اي موديل احنا عايزينه.
ـ 2 ـ
فرش البيت والميزانية
لو البيت كلاسيك والميزانية كويسة
لو احنا فارشين البيت كلاسيك يبقي لازم الستارة يكون فيها برقع درابية ويكون قماش الستارة من الحرير ، ويكون فيها عقادة كتير ، وبمناسبة العقادة فهي الشراشيب اللي بتتحط في الستائر وتتركب في اطراف البرقع واطراف الجوانب ، وفي منهاه اشكال كتير وعلي فكرة العقادة اللي فيها حبات كريستال هي الموضة اللي نازلة دلوقتي .
لو البيت كلاسيك والميزانية محدودة
يبقي ممكن نعمل برقع من العقادة وكل قماش الستارة يبقي من " الاورجانزا " او " الترجال " وعلي فكرة قماش " الاورجانزا " بيبدا سعره داخل مصر من 20 جنيها للمتر .
لو فرش البيت مودرن
يبقي الستارة بيكون شكلها أخف بكتير بتكون من قماش " الكتان " السادة او " القطن " او ممكن يكون من قماش " كاروه " او " مقلم " ويكون الموديل بسيط جدا ويكون نازل منسدل.
بالنسبة لبيوت الصيف
ممكن تكون الستارة مصنوعة من البامبو أو قماش الخيش .
ـ 3 ـ
لازم ناخد بالنا كويس قوي من أن لون الستارة يكون مناسب للون الحيطة وبالنسة لالوان الستائر بصفة عامة بنلاقي :ـ
ان اللون "الدهبي" مع " النبيتي " بيليق علي حوائط " البيج".
واللون " الدهبي" بيليق مع " الاخضر " بيليق مع الحوائط " الصفراء".
واللون " الازرق " بيليق مع الحوائط " الرمادي " .
واللون " البستاج " بيليق مع الحوائط " السيمون " .
ودي تشكيلة رائعة من الستائر
