[nescafe30]

بسم الله الرحمن الرحيم

ده أول درس من دروس الفيمو وهيكون فيه معلومات عنها. عايزة منكم قبل ما نبتدي حاجتين:

دعوة ان ربنا يشفيني لاني حاليا صحتي بعافية شوية ويوسع رزقي ويبارك لي فيه ويهديني ويرزقني الخير.

والحاجة التانية عايزة تقييمكم للموضوع ورأيكم فيه ولو فيه مقترحات طبعا فياريت تقولوها .. ويالا نبتدي ..

الفيمو هو أشهر أنواع الصلصال الحراري وهوعجينة يشبه للصلصال العادي لكن بيجمد وينشف في الفرن ويتحول لمادة شبيهة بالبلاستيك واستخداماته متعددة. والفيمو هو اسم الماركة مش اسم العجينة، وفيه انواع تانية منها بس اشهرها الفيمو. وكتير منا ممكن يشوفوا المصنوعات الجاهزة منها والابدعات اللي خارجة منها ومايصدقش انها كانت في البداية عجينة وتم تشكيلها.





والفيمو فيه منه نوعين:

النوع اللي يشبه العجين أو الصلصال ونوع سائل شفاف واللي ممكن نستخدمه كلاصق كمان للفيمو، بس انا هاتكلم عن نوع العجين اللي متوفر عندنا اكتر في مصر.

النوع العجين او اللي شبه الصلصال فيه منه انواع برده :

1- الكلاسيكclassic، وبيكون ناشف شوية وبيحتاج مجهود اكتر للتطرية والعجن.

2- الناعم soft، وبيكون أنعم من النوع الاول وبيحتاج مجهود اقل للعجن والتطرية.

3- التأثيرات effects، وبيكون فيه اضافات زي الجليتر او شكل الرخام.

4- البورسلين،وفيها 3 الوان: الطبيعي والابيض والوردي وهي عجينة رقيقة الملمس ومخصصة اكثر للدمى ولصنع الوجوه والملامح.

وممكن اننا نخلط الانواع دي ببعض والالوان ببعض كمان.

بس لازم نراعي ان عجينة الفيمو عبارة عن مادة كيماوية وسامة وهي مادة البولي فينيل كلورايد،علشان كده هي مش مخصصة للاطفال خالص، ولازم نغسل اليدين كويس جدا بعد استخدامها وحكهم جيدا بليفة خشنة علشان نضيع اثار الفيمو، وعدم استعمال المادة مباشرة علىالطاولة المخصصة للاكل ولا بادوات مخصصة للطعام، يعني أدوات التقطيع والخبز في الفرن تكون مخصصة للفيمو بس ولا تستخدم في الطعام، وكمان عند وضعها بالفرن نراعي اننا نسويها علي نار هادئة علشان مش تتحرق وتطلع ابخرة ضارة. وده تحذير مهم لازم نخللي بالنا منه. يعني انا باستخدمها علي ترابيزة خاصة وباكون مغطياها بمفرش وانا باستخدم ايدي ولو بتعرفي تشتغلي بجوانتي مفيش مشكلة، بعد ما باستخدمها وباقطعها باحطها علي صينية خاصة بالفيمو ومغطياها كمان بالفويل وباحطها علي جنب واغسل ايدي كويس جدا بليفة خشنة علشان اضيع اي اثر وبعدين ارجع احط الصينية في الفرن واغسل ايدي تاني والاحظ القطع في الفرن علشان ماتتحرقش.

عند استخدام الفيمو في الاكسسوار يجب عمل اي اخرام او فتحات قبل دخول العجينة للفرن لان بعد خروجها لا يمكن اننا نعدل فيها، وبعض الناس بتقوم ببرد اجزاء منها في حالة عمل الكور الخرز مثلا ولكن ده بيتم تحت الماء الجارى لعدم استنشاق الفتافيت والقطع الصغيرة منها ولكن انا باتجنب ده خالص.

والفيمو من العجائن اللي بتدخل للفرن، فرن عادي على درجة حرارة اقصى تقدير 130 درجة لمدة لا تزيد عن 30 دقيقة، ولا تحتاج القطع الصغيرة المصنعة مثلا كالاقراط سوى 15 او 20 دقيقة لا اكثر. يعني المدة اللازمة للطبخ نتحكم فيها على حسب حجم القطع.

عند اخراج القطع المطبوخة من الفرن عادي انها تكون لسه طرية شوية لانها لما بتبرد تماما بتبقي صلبة جدا،والعجينة – بعدالطبخ طبعا لا تتاثر لا بالشمس ولا بالماء، حتى انه يمكننا ان نضعها في الماء البارد لتسريع عملية التبريد مباشرة بعد اخراجها من الفرن.

وبعد الطبخ ممكن نضع عليها ورنيش أو لا، لان الورنيش هنا ليس للحماية وانما لجمالية القطعة ولاضفاء لمعة حلوة، الورنيش المستعمل لعجينة الفيمو هو خاص بها ولا يمكننا استعمال نوع آخر مخافة ان يحدث بينهما اي تفاعل غير مستحب. لكن لان الورنيش بتاعها مش متوفر في المكتبات فانا باتصرف وهاقولكم ازاي وقت الورنشة.

الفيمو بيتصنع منه حاجات كتير واستخدماته كتير لانه بيتصنع منه اكسسوارات زي الحلقان والاعقاد، الخ .. وممكن اعمال فنية للبيت وحتي بيتزين بيه الاظافر ، لانه مادة طيعة وممكن تشكيلها واستخدمها باشكال كتير.

الفيمو متوفرة في المكتبات الكبيرة وهي موجودة في القاهرة ومع الاسف انا ماعرفش مدي توافرها بالنسبة لباقي المحافظات، لكن ممكن تسألوا عنها جنب كليات الفنون. لكن بالنسبة للورنيش الخاص هو مش متوفر وانا لفيت عليه مكتبات كتير.

وده أول درس من دروس الفيمو وان شاء الله الدرس الجاي فيه معلومات اكتر والبداية للشغل، ولو فيه اي اسئلة انا موجودة. والمعلومات اللي بكتبها أنا جمعتها من منتديات كتير وقريت عنها مواضيع كتير جدا وزودت عليها خبرتي الشخصية.

ودي صور لعجينة الفيمو واستخدماتها:

يعني فيه منها اشكال فنية للزينة وعمل اطار للمرايات والبراويز:



























واشكال عرائس







الدروس ان شاء الله هتكون كل سبت وثلاثاء ومش هاطول في النظري علشان نبتدي شغل عملي،الدرس اللي جاي ان شاء الله هاحط الادوات اللي بنستخدمها للفرد والتشكيل وهانعرف ازاي نستخدم العجينة ونطريها.

[nescafe30]

واشكال للاكسسوار:














واكسسوار الاظافر:

[nescafe30]

و دي اعمال متفرقة























كده خلاويص النهاردة

[احنا الثوره]

تسلمى يا قمر بقولك ايه هى ايه اسعار العجينه دى ويا ريت كل نوع وسعره وشكرا يا قمر

[هناء سعيد]

موضوع رااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااائع وجه فى وقته لسه بافكر بجد فى الموضوع ده بارك الله فيك وفى انتظارك بكل حب وشغف موضوع ممتاز

[suska09]

الموضوع تحفة وجة فى وقتة انا حتابع معاكى ان شاء اللة بس ياريت تقولنا سعرة كام وممكن القية فى سمير وعلى او المكتبات اللى جنب كلية الهندسة ولا لا

[ميرو ام ادهم]

جزاكى الله خيرا انا معاكى ان شاء الله

[ام نفيسه]

شكرا ليكي يا قمر بس كنت عايزه اعرف سعر العجينه بكام وكمان الورنيش المستخدم بكام وايه هي الالوان المتوفره منه

وجزاكي الله خيرا

[nescafe30]

تسلمى يا قمر بقولك ايه هى ايه اسعار العجينه دى ويا ريت كل نوع وسعره وشكرا يا قمر

بصي يا قمر العجينة اللي حجمها 25 جرام تقريبا في حجم صوابعين من صوابع الايد بحوالي 6 جنيه واللي اكبر حجمها 56 جرام يعني حوالي اربع صوابع من الايد سعرها 12 جنيه علي اخر مرة جبتها وكل الانواع سواء كلاسيك او سوفت او ايفيكت سعر واحد. فيه حجم اكبر حوالي نص كيلو بس كان لتشكيل العرايس والدمي وانا مش فاكرة سعره. تسلمي يا جميل

موضوع رااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااااااااااااااااااااااااا اااااااااااااااااااااااااااائع وجه فى وقته لسه بافكر بجد فى الموضوع ده بارك الله فيك وفى انتظارك بكل حب وشغف موضوع ممتاز

ربنا يكرمك يا قمر ويا رب اقدر افيدك وتابعيني ان شاء الله واسألي علي اللي تحبيه

الموضوع تحفة وجة فى وقتة انا حتابع معاكى ان شاء اللة بس ياريت تقولنا سعرة كام وممكن القية فى سمير وعلى او المكتبات اللى جنب كلية الهندسة ولا لا

تسلميلي يا قمر. سعرها لسه قايلاه فوق . مكتبات كلية الهندسة مش عارفة هي موجودة فيها ولا لأ ، هي موجودة في المعايرجي وفي المكتبات اللي جنب كليات الفنون.

جزاكى الله خيرا انا معاكى ان شاء الله

ربنا يكرمك يا قمر

شكرا ليكي يا قمر بس كنت عايزه اعرف سعر العجينه بكام وكمان الورنيش المستخدم بكام وايه هي الالوان المتوفره منه

وجزاكي الله خيرا

العفو يا حبي، سعرها لسه قايلاه فوق في السؤال الاول، الورنيش بتاعها مش لاقياه قريب مني فمعرفش سعره انا باستخدم ورنيش عادي جبته من المكتبة وجربته علي قطعة صغيرة ولقيته مش بيتفاعل فاستخدمته والافضل في الورنيش انه يبقي مش تقيل. الالوان للعجينة فيه منها كل الالوان وعلي حسب المكتبة وكمان ممكن تخلطي درجات ببعض علشان توصلي لدرجة معينة لو تحبي

[MODY11]

بصى يا قمراية انا اعانى من حساسية فى الجيوب الانفيه واى روائح أو غبار بتأثر معايا و بتبهدل فهل الموضوع ده ملائم بالنسبه لى؟