[شيف دلوعة]

السلام عليكم روحمة الله وبركاتة

بشكر الإداريات والمراقبات في منتدى فتكات وبشكر المشرفة حجابي على تتنظيمها الرائع لمسابقة :-

♥♥ تورتة فتكات للربيع العربي ♥♥


وبقولها انتي مشرفة متميزة وبتمنالك النجاح المستمر ومن تميز إلى تميز أيتها المتميزة .

وبشكر المتميزتين
ام سودق
&
vovo2010
وبقولها ألف ألف مليون مبروك على الفوز بالمسابقة وان شاء الله عقبال الفوز في المسابقات القادمة بإذن الله .


ودي تورتتي الي فرزت فيها في المسابقة .




يا جماعة أنا عندي دور برد جامد بس كنت مستنية المسابقة تخلص بأسرع وقت علشان بتمنى فعلا أنزل طريقة تورتتي بأسرع وقت وكل شوي ابعت في رسايل للمشرفة حجابي وهاتك يا زن على الموعد الي حقدر انزل الطريقة فيه . والحمد لله النهاردة طلعت النتايج وقلت لازم انسى التعب والعطس وأنزل الطريقة لبسبب مهم وهو إني ده اول موضوع أنزله حصرياً لمنتدى فتكات . بإسم الله نبدأ علشان الموضوع طويل 125 صوره من مطبخ الشيف لطيفة :




استخدمت في التورته دي المكونات التالية :-


الكيك الاسنفجي وده رابط موضوعي الي كنت منزله فيه الطريقة المصوره
http://forums.fatakat.com/thread2040508

كريمة الزبدة بطريقتي(حنشرح الطريقة في الملف ده)

الكريم شانتي(حنشرح الطريقة في الملف ده)

الأيسنج وده رابط موضوعي الي كنت منزله فيه الطريقة المصوره
http://forums.fatakat.com/thread2108391

الفندان(اشتريتو جاهز من محل الاتحاد للتجارة الي في العتبة)




نبدأ بطريقة كريمة الزبدة بطريقة شيف لطيفة
هنا شكل المقادير كلها مع بعض





حنحتاج نص كيلو سكر بودرة





2كوب زبدة طريقة باردة , دول 4 صوابع كل صباع =1/2 كوب





1/3 كوب كريمة لباني او كريمة خفق غير محلاه , 1/4 كوب شورتنج (سمنة نباتيه)





ده شكل الكريمة الي استخدمتها في كريمة الزبدة





وده شكل القوام كثيف جدا ومتاسك وخدو بالكم يا بنات علشان في كريمة خفق محلاة يعني مضاف لها سكر وفيه لا وكل واحدة ليها استخدامتها




وده شكل الشورتنج يا بنات الي هي سمنة الحلويات الي بيسألوني عليها كتير جداً . العلبة الزرقاء دي انتاج امريكي وحتلاقوها متوفرة في سبنس وكارفور وده شكلها





هنا شكل العلبة من الجنب بصو مكتوب اية للطبخ والخبز والقلي





وده شكلها لتوضيح أكتر




والبنات الي في الخليج وممكن ما يلاقوش النوع الامريكي مع انو متوفر جدا شركة مازولا للزيت نزلت شورتنج خاص بالحلويات وده شكل العلبة ومتوفرة في كل السوبرماركت حالياً . ولاحظو مكتوب على العلبة سمنة نباتي للكيك





وترجمتها شورتنج

[شيف دلوعة]

بإسم الله نبدأ طريقة عمل كريمة الزبدة
في البداية زي ما قلنا حنحتاج لزبدة طرية بس بارة يعني ما تكونش سايحة قوي وحنحط عليها الشورتنج او سنة الحلويات . هنا نلاحظ شكل وقوام الزبدة




حنبدأ نخفق والسر في نجاح كريمة الزبدة هو فترة الخفق المناسبة علشان تطلع معنا كريمة جميلة وناعمة ولونها فاتح مايل للأبيض





هنا بدأت أخفق لاحظو الزبدة لسه متماسكة ازي ما ذابت ولا ساحت وده الي بقصو بكلمة طرية باردة





هنا الزبدة والشورتنج اندمجو لما خفقنا



حنبدأ نضيف السكر البودة (وممكن نستخدم السكر الي بنطحنو في البنت عادي)




ونضيف كماية بسيطة من الزبدة ونخفق لحد ما يندمج السكر مع الزبدة





هنا صور قريبة لشكل وقوام الزبدة في مرحلة اضافة الزبدة .




هنا ضفت نص كمية الزبدة بالظبط حوالي كوبيتين وربع وبخفق بعد كل اضافة لحظوا لون الكريمة بدا يبدأ فاتح جدا ازاي




هنا صورة قريبة لشكل الخليط




واستمريت في اضافة السكر على دفعات بسيطة حوالي 1/2 كوب في كل مرة




ونضيف حوالي معلقتين طعام من الكريمة ونخفق وهكذا لحد ما نخلص كمية السكر والكريما




وهنا بعد ما خلصت عمل الكريمة لاحظو القوام كثيف ازاي




وهنا صوره أقرب جدا




هنا اختبار للكريمة بإستخدام المعلقة بصو مكان المعلقة متماسك وأملس





ولو عملتي اي تشكل او دزاين على الوش بيحافظ على شكلو جدا





وفي التورتة دي لونت جزي من الكريمة باللون الاحمر ببساطة خدت كمية بسيطة من الكريمة في بولة منفصلة وضفت عليها نقاط من اللون الاحمر بالتدريب





وخفقت فطلعت الكريما على بمية رجعت زودت من اللون الاحمر





وده شكلها وكل ما تفضل لونها حيبقى أحمر غامق زي ما حنشوف بعد كده




وحتى مضرب الخفق بقى لونين احمر وأبيض

[شيف دلوعة]

الكريم شانتيه

واستخدمت في التورته الكريم شانتيه وممكن تبقى بشكلين شكل بودرة زي ما احنا عارفينه وهو الدريم ويب او الي بنشترية من محل مستلزمات الحلواني وبرضو بيطلع رائع وجميل . وفي نوع يا بنات بيبقى سائل بس القوام بتاعة جميل وطمعو أخفق من البودرة بكتير وده نوع من الانوع الي منتشرة في الخيط اسمو مكتوب وبستخدمو كتير في التورت والجاتوهات




بصي مكتوب اية منتج بديل عن الكريمة معالج بالحرارة العالية . وبرضو مكتوب محضر من الدهن يعني الكريمة النباتية يعني مش كريمة بقري يا بنات




وهنا صوره للمكونات ومعومات عنه بتكون مشتركة بين كل الكريمات من النوع ده .




وطريقة استخدامه بسيطة مجرد تخليه بارد وتحطية في وعاء الخفق وتخفقيه




هنا لما خفقته بس لسه طري ما تماسكش




وهنا بقى كريمة جامدة وجميلة ولونه ابيض فاتح جدا





تحضير الكيكة الاسنفجية


هنا يا بنات كنت عاملة صينية كيك اسفنجي قبلها بيوم واحدة دائرية ووحدة مربعة وغلقتهم بالبلاستك وحطتهم في الثلاجة





وما كانش في دماغي شكل معين للتورته وفضلت الأفكار تاخذني وتجبني ساعة كده





وساعة أقول لا كده





وفي النهاية قررت أعمل تورته دورين الكيكة الدائرة حتبقى زي ما هي والكيكة المربعة حقطع منها دايرة اصغر. علشان شغلي بقى مرتب حقطع الكيك على حتة ورق زبدة . جبت طبق او حاجة مدورة قياسها أصغر من الكيكة الدائرية التانية بالصوره دي




وقطعت من الكيكة المربعة الدائرة الاصغر زي ما قلتلكم .




وده بقى شكل الكيكة بعد التقطيع




وهنا الدايرة الحلوة بتاعتنا شايفين الدقة والحواف المتساوية للكيكة وده بسبب انها باتت في التلاجة لحد تاني يوم . لو استخدمناها على طول بعد الخبز كانت فرولت مننا





بعد ما عرفت أشكال التورت الي عندي حطتهم في طبق وغلفتهم واحتفظ بيهم في الثلاجة لحد ما أجهز باقي الحجات الخاصة بالتورتة النهائية .طبعا حنعمل تورت عادية من الدائرتين الصغيرة والكبيرة هنا شكل الصغيرة حقطعها ل3شرايح بإستخدام سكين منشار بالصور دي . احط ايدي الشمال فوق الكيك واقطع بالسكين بإيدي اليمين وبدور الكيكة بايدي الشمال علشان التقطعي يبقى متساوي .فيه اداه خاصه لتقطع الكيك بس في الملف ده استخدمت الحجات المتوفرة عند كل الفتوكات .





هنا شكل الشريحة الأولي





هنا شكل تقطيع الشريحة التانية




وكده ما خلصنا وبقى عندنا 3 شرايح

[شيف دلوعة]

وحنعمل نفس الحاجة بالنسبة للكيكة الكبيرة وحنبدأ نشيل الحواف الي فوق ونخلي السطح متساوي بالصوره دي




كده أول شريحة برضو





بصو بعد التقطيع السطح متساوي ومش مفرول بس لسه طرية جدا وناعمة زي القطن




ونحرص يا فتوكات على اني سمك الشرايح يبقى متساوي على قد ما نقدر





ودي شرايح الكيك بعد ما خلصنا




بصو ورقة الزبدة بتفيد ازاي جمعت كل فرولة الكيكة




وممكن تثني الورقة وننفض الي فيها ونستخدمها تاني في اي حاجة .





ونحاول يا بنات نبقى منظمين كده وحركتنا في المطبخ مدرسوة. ومهم لما نقطع الكيكة الاسفنجية نخلي جنبا طبق نحط فيه القطع الزيادة .





البدء في عمل التورته

حنبدأ نعمل التورته حنحتاج لأدوات التزين زي الاسباتويلا الاحجام المختلفة لتوزيع الكريمة بشكل متساوي وحنحتاج لبرود او القرص الكرتون علشان نحط عليه التورته وحاولت ما استخدمش ادوات معقدة لا كلها متوفرة عندكم وبروض حنحتاج للقرص الدوار المستخدم في تزين التورت




وده شكل القرص الدوار من قريب





وحنحتاج لشوية سيرب او شربات خفيف جدا .





حنحط البورد الذهبي على القرص الدوار وحنحط ورقتين زبدة علشان لما نزين التروتة بالكريمة على الجوانب ما نوسخش البورد الذهبي .





وحنبدأ نحشي التروته عادي جدا كل شريحة حنوزع عليها الشربات الخفيف بالفرشة





وكمية من الكريم شاتيه للحشو هنا ممكن تتحكمي بالكمية براحتك لو بتحبيها كتير او قليل





ونحاول نوزع الكريما بشكل متساوي على كل الشريحة بالصورة دي





ونكمل للنهاية بالصوره دي





وحنبدأ نوزع قليل جدا من كريمة الزدبة على كل التورته





ناخذ كمية بسيطة بالصورة دي ونبدأ نوزععها ودي تعتبر يا بنات أول طبقة

[شيف دلوعة]

بصو هنا كريمة الزبدة ناجحة ازاي متماسكة وبتتفرد بسهولة




وهنا صور من كل الجهات لأول طبقة للتورته يا بنات . وحتلاحظوا اني في فروله الكيكة باينة مش مهم كل ده حيتغطى بالطبقة التانية من الكريمة .وبعد المرحلة دي حندخلها الثلاجة لمدة نص ساعة تجمد والكريمة تتماسك








وهنا بعد ما الطبقة الأولى من الكريمة اتماسكة حنحط الطبقة الاخيرة زي فكرة الطبقة الاولى حنحط كمية على السطح وبإستخدام الاسباتويلا حنوزعها بشكل متساوي . هنا يابنات في المرحلة دي محتاجين يبقى بالنا طويل وناخذ وقتنا في توزيع الكريمة علشان في النهاية تبقى التورتة متساوية .أسبكم مع صور مراحل توزيع الكريمة.






















وهنا الشكل النهائي يا فتوكات التورته بقت متغطية بشكل كويس جدا جدا والسطح متساوي





وعملت في التورته الصغيرة نفس الطريقة بس بالكريمة الحمرا الي لوناها لكن للأسف قررت أغطيها بالفندان الفرد فاللون ده مش حيبان.







وباقي الكريمة حطيتو في أكياس التزين للإستخدام لاحقاً

[شيف دلوعة]

تغطية التورته بالفندان


هنا قررت أغطي التورتة الصغيرة بالفندان بس حعمل شكل عمل مصر فححتاج للون الأسود والأحمر وطبعاً فندان جاهز للتشكيل والفرد.




هنا بحط نقطة من اللون وبعجن لحد ما يندمج اللون كويس في الفندان


وده شكل الفندان باللون الأسود




هنا ألوان العلم بقت جاهزة عملتها على شكل عمود وفردتها شوية .





حرجع للتورته الحمراء وحقيس ارتفاعها علشان العلم يبقى نفس المقاس بالظبط




وبقسم إرتفاع التورتة على الثلاث ألوان للفندان والمسطرة حتفدني جدا في المرحلة دي




وبقطع بإستخدام عجلة تقطيع البيتزا علشان تديني أطراف متساوية زي كده .



وهنا المستطيلات الثلاثة جاهزين للفرد




حنحطهم جنب بعض بالصوره دي ونبدأ نفرد بالنشابة





هنا لما بدأت أفردها بالطول وبتفرد معايا عادي وشكلها بيفضل زي ما هو




هنا بعد ما خلصت الفرد وعجينة الفندان الي على شكل علم بقت رقيقة وجميلة وقطعت الطرف




بصو هنا جميلة ازاي ومتماسكة ورقيقة مش تخينة




غلفت التورته الصغيرة بالعلم وما تخافش حيمسك ببساطة علشان التورته متغطية بكريمة فحتعمل زي اللزق




وحطيت تورته العلم فوق التورته الكبيرة البيضاء وعملت نقط بسيطة من كريمة الزبدة حوالين التورته الصغيرة من تحت.

[شيف دلوعة]

الأيسنج

وهنا يا فتوكات كنت عاملة أعلام 4 دول عربية كانو موضوع التورتة وهما (مصر-تونس-سوريا-ليبيا)




وعملت معاهم حبيبي قلبي علم دولة الامارات




علم دولتي الحبيبة




وهنا صور قريبة لشكل الأعلام وعلمتهم بالشكل الدائري كنوع من التغير عن الشكل المربع المتعارف عليه هنا علم الامارات




وعلم حبيبة قلبي وروحي مصر (بس النسر الي في النص عامل شغل يا جماعة)




هنا صوره أقرب لشكل علم مصر




تونس الخضراء




سوريا العز والفخر




ليبيا الصمود والغيره




هنا يا جماعة بدأت أفنش التورته . شلت ورق الزبدة الي تحت بصو البورد الذهبي نظيف وجميل ازاي وكنت عاملة برضو بالايسنج كلمة مصر بالثلاث ألوان الي هما ألوان العلم متداخلين مع بعض.




وبدأت أرص أعلام الدول العربية على جوانب التورتة بشكل متساوي .




هنا من زاوية تانية




وياسلام على كباية شاي وانتي بتشغلي على رواق




فاكرين الكريمة الي فاضت بعد التزين حطيتهم في كيس تزين اكبر .




وعملت وردات من الكريمة على وش التورتة الصغيرة وبروضة وردة كريمة في النص بالصوره دي




وده شكلها من الجنب بصو جميلة ازاي




وكملت رص باقي قطع الايسنج الي عملتهم على كل التورته




وحطيت كلمة مصر الي عملتها بالايسنج فوق في وسط التورته الصغيرة




وبرضو لزقت كلمة مصر على الجنب بس خلت شكل التورته جميلة ورائعة .

[شيف دلوعة]

هنا كان فايض عندي فندان أحمر فردتو قطعتو على شكل مستطيل علشان أكتب عليه وأحطه على التورتة.

وعملته على شكل رسالة بالصوره دي ألف الجناب رول بس متعاكس

هنا شكلها من قريب علشان توصلكم الفكرة

وكتبت عليهم كذا عبارة (مسلم & مسيحي) (ثورة 25 يناير) (11فبراير إسقاط النظام)

وتمت التورتة بحمد الله وده شكلها من فوق . يا جماعة علشان تبقى التورتة محترفة لازم لما نشوفها من فوق تبقى متناسبقة من حيث الشكل

هنا صور التورته كلها

هنا صوره ZOOM للتورته .

وقطعناها واحتفلنا بالثورة اتفضلوا يا جماعة معانا

أتمنى موضوعي المتواضع ينال إعجابكم يا فتوكات . وأتمنى أكون أضفت لكم حاجة جديدة , أمانة كل فتوكة تدخل تدعيلي ربنا يحقق لي الي في بالي ويوفقني . وبجدد النية ليكون هذا العمل خالص لوجه الله وبنيه نشر العلم .

بحبكم يا فتوكات

شيف لطيفة

[DAHAB]

انا قلت اقولك تسلم ايدك وبجد انا متابعه كل مواضيعك لما شفت مرة بالصدفه الفطير المشلتت وترتيبك ونظافتك وجمال اكلاتك لدرجة بجد بيبقى نفسى بس ادوق حته من صورة الحاجات تسلم ايدك بجد ونسيت اقولك انى مبسوطة انى اول رد عليكى وحستنى لما الموضوع كله يكمل وكان نفسى اعرف اسم الشيف الدلوعه بس يتهيالى انه شيف لطيفه

[ام ملك ومروان]

اجدع سلااااااااام مربع من فاطمة الى لطيفة هذا النداء من قبل ما اشوف حاجة لانى واثقة فيكى وف ابداعاتك
والف مبرووووووووووووووك ليكى وللفائزات ام سودق وفوفو ومن تقدم لتقدم ان شاء الله ف منتدانا الرائع

:sFun_cheerl eader2: