[dodi80]

السلام عليكم ورحمة الله وبركاته
محتاجة رايكم اوى يا جماعة لانى بجد حال الدنيا ده غريب اوى اصطدمت افكارى وعاداتى بواقع الحياة الغريب والدنيا الغريبة وبجد واللهى معدتش عارفة ايه الصح وايه الغلط بقيت تايهه.
يا جماعة ان ولله الحمد من اسرة فوق المتوسطة والدى رحمة الله عليه مركزه مرموق ومعروف جدا والحمد لله باخلاقه العالية ودينه القويم ومساعدته للناس جميعا والحمد لله وامى كذلك ربنا يخليهلنا ويطولنا فى عمرها فاهلى والحمد لله ربونا على الدين والأخلاق بس مش عارفة ليه انا تعبانة اوى فى الدنيا مش عارفة اتعامل مع الناس اى حد افكاره غير افكارى مش ببقى عارفة اتعامل ابدا مش عارفة هل ده من اساس التربية نفسها ولا من نفسى ولا من الشيطان ولا ده ابتلاء والله مش عارفة حاجة
يا جماعة انا مثلا اول ماتزوجت كان فى دماغى ان ام زوجى امى ووالده والدى وكنت بتعامل من هذا المنطلق وهما الحمد لله بيحبونى اوى وانا برده الحمد لله بعاملهم كويس وباتودد اليهم لكن شوفت مواقف كتير قدامى وتصرفات من والدة زوجى مش ليه بس لزوجة اخوه مثلا او لأقارب ازواج بناتها بقيت اخاف اوى وخاصة ان انا مش بحب المشاكل ولا بحب حد يزعل منى , المشكلة بقى ان انا بحس ان انا مش براحتى ابدا حياتى مش ملكى يعنى زوجى كويس وبيحب اهلى جدا والحمد لله بس كان ساعات لما يزعل من حد من اخواتى واى كلمه حتى لو امى اللى قليتها مع انه عارف انها بتحبه جدا كان بيين اوى انه زعلان مع انه بيكون كلام عادى ميزعلش اصلا وهما يحاول يراضوه بشتى الطرق لكن هو من النوع اللى بيترضى بالوقت مش بالأسف حتى هو معايا كده فانا طبعا كنت باتضايق وبطنش على النقيض بقى مامته كانت بتقول كلام يضايق كتير جدا واسلوبها مش حلو شوية بس انا كنت بطنش وحتى مش بحسسه باى حاجة بس هو لما بقى بيزعل من اى حاجة بيقولوها بقيت انا كمان اقوله على اى حاجة بتزعلنى فيكون رده وايه يعنى دى مفيهاش حاجة تزعل فخلاص باسكت بس بكون من جوايا متضايقة , اخوات زوجى عند مامتهم كل يوم وانا مش غاوية نزول كتير بس لو عرفوا ان انا روحت لماما او خرجت معاها بحس انهم متضايقين بقيت لما اروح عندهم اصلى قضاء حاجة قبل ما اروح ان ربنا يسهلى الموضوع وعاوزة الوقت يعدى علشان امشى كنت بتضايق اوى من الأحساس ده لو روحت عند امى ابقى حاملة الهم ليعرفوا ويزعلوا مع ان بناتها بيعملوا كل اللى هما عاوزينه يعنى عندها كل يوم اللى بيضايقنى انى بحس انهم عاوزين هما يبقوا كل حاجة وبيلغوا الطرف التانى شوية هما مستواهم عادى بس بيحاولوا يثبتولى انهم احسن ناس فى الدنيا وبيخرجوا عن طبيعتهم شوية , متعودين انا واخوتى كل يوم جمعة نروح عند ماما هما معندهمش كده لا هى تعزمهم ولا هما يعزموها اه هما عندها كل يوم بس من غير عزايم سنوا قانون لينا احنا بالذات ان احنا نروح عندهم كل خميس ولو اعترضت يقولى طب مااحنا بنروح عند ماما كل جمعة مع ان مروحنا لماما من الخطوبة اصلا واحنا متعودين على كده , والمشكلة كمان مامته بتكلم كتير اوى لو عرفت حاجة مبتسكتش وانا طبعا انا مش بحب كده خالص لو عرفت عن حاجة معينة مثلا بعملها ازاى لازم تنشرها للناس كلها , لو جبت حاجة لازم الناس كلها تعرفها ويشوف لو حاجة جبتها يقلدونى ويجيبوا زيها وانا مبحبش كده خالص خالص بس طبعا مبقدرش افتح بؤى بس باتضايق اوى , وكمان باتضايق اوى ان زوجى بيقول لبابه عن كل حاجة بحجة انه لازم يشركه فى كل حاجة وياخد رايه مع انه فى مواضيع كتيره جدا مبيكونش له راى فيها او يكون رايه معاكس وبرده زوجى بيعمل اللى هو عاوزة ايه الأشراك فى كده بقى انا بصراحة باعتبرها نوع من انواع عدم الخصوصية يعنى لازم يعرفوا احنا بنقبض كام ومعانا كام وبنصرف كام وطبعا مش هما وبس لأ الأخوات كلهم وممكن حد غريب كمان
ودلوقتى ربنا رزقنا بشوية فلوس والحمد لله كل هدفه دلوقتى يجيب لباباه ومامته شقة يسكنوا فبها لأن هو بيقول ان شقتهم مش قد المقام وعاوز يجيبلوهم عريبة موديل 2008 هو ايه ىده يا جماعة هو ده عادى ولا انا اللى مش طبيعية مع ان اهلهم كلهم غلاب جدا بس هما اللى طموحين شوية وانا طبعا كل حاجة بيفكر فيها هو بيقول لينا بس بتبقى ليهم فلما يقولى نجيب شقة او نجيب عربية ببقى عارفة علشانهم فبقيت حاسة ان حياتى كلها ليهم ولما اقوله يقولى ده بابا وماما فحين ان انا باشتغل وعندى اخوت مش متزوجين وامى حزينة جدا على وفاة والدى وحاسة انها لوحدها وطبعا ظروفها متغيرة عن الول فلو انا حسستها ان انا معاها وانا باشتغل اصلا فايه المشكلة ان انا اقف جنبها حتى لو فى وجهة اى حد انها مش محتاجة بس طبعا محدش يعرف داخليات حد مع العلم ان زوجى كويس جدا ومتدين انا اللى بخاف لكون انا اللى وحشة بس بتجنن بصراحة من افكاره ديه ايه رايكم انا واللهى يا جماعة ده اللى بيدور جواى مش عارفة مدى مصداقيته ايه ؟ هل كل ده مجرد احساس وممكن يكون خاطىء ارجو الأفادة آسفة طولت عليكم جدا
والسلام عليكم ورحمة الله وبركاته

[انعام]

السلام عليكم ورحمه الله
احمدي ربنا انك بتخافي انك تكوني انتي اللوحشه
ده مش اي حد بيحس كده
واضح من كلامك انك خرجه من بيت محترم
استعيذي من الشيطان وما تغكريش كتير
ومادام زوجك بيخاف ربنا هو عايز ياخذ رضا والديه
ده ربنا حيبارك له في اولاده
وربنا يهدي النفوس

[مونى88]

انا من راى انعام كلامها صح
والحمدلله وربنا يهدى ليكم الحال يارب

[rehab]

أهل جوزك لما بيبقوا عايزينك معاهم فدي حب ليك
وساعات كمان بيبغيروا لما تروحي لمامتك ده العادي أدام بيحبوكي
صلي ع النبي بس ومفيش مشاكل ولا حاجة
بس أنتي لازم تروحي لمامتك اليومين دول كتير عشان تهوني عليها وفاة والدك
والبقاء لله

[راندام]

على فكره مش أنتى بس اللى كده فى ناس كتيييير كده لدرجة انهابقت حاجه طبيعيه و المفروض اننا منتكلمش فيها خلاص لكن بصى انا أتعلمت حاجه مهمه جدا و يمكن هى دى اللى ريحتنى شويه انهم يعملوا اللى يعملوه و يقولوا اللى يقولوه لكن اللى يقرب من بيتى ويحاول يمسه بسوء.........يمكن ده يكون مش صح بس مفيش حل تانى و نصيحه منى خافى على بيتك على أد ماتقدرى و أوعى تخسرى جوزك علشان أى حد و حاولى متتكلميش معاهم كتيير بس ماتقصريش برده و فى الأخر أن ما كنش ليه خير فى أهله ملوش خير فى حد تانى و أنتى روحى لمامتك و متشليش هم حاجه متخليش حد يقصر على حياتك للدرجه دى و أوعى تحسسى مامتك بحاجه علشان متزعلش عليكى كفايه اللى هى فيه و معلش هى الحياه كده فيها الحلو و فيها الوحش و الله المستعان ((و حافظى على بيييييتك))

[dodi80]

جزاكم الله خيرا يا جماعة على ردودكم ديه ريحتنى اوى وحسيت ان فيه حد حاسس بيا لنى ساعات كتير بحمل نفسى فوق طاقتها واحس انى انا اللى غلط ولازم انى انا اللى اتغير بس زى ماقولتلكو انا مش بحب يعرفوا حاجة عنى علشان كتر الكلام مش اكتر وبحاول افهم زوجى كتير حتى اهلى مش متعودين يسئلوا ويطئسوا عن حياتى طالما ماشية ومطمنين عليا خلاص يعنى مش بطلب منه حاجة انا مش بعملها حتى هو نفسه لما يقول لمى حاجة عملناها مثلا من ان وماما اصحاب جدا والحمد لله اقوله انت ليه بتقول ديه حاجة خاصة بينا متفرقش مع حد ناه يعرفه بس علشان ديه امى بتكلم براحتى شوية بس بعمل كده علشان افهمه وبقوله انا بكلم براحتى علشان هى ماما لكن لو حد تانى مش هقدر اقول حاجة , فوجهة نظره ان احنا اللى غلط وهما اللى صح فبسكت , بس اللى عايزة اعرفه منكو لو طلب منى مثلا انى اصيف معاهم مع انهم مش بيصيفوا بس انا متوقعة ده اعمل ايه؟
وهو عايز يربط امى واخواتى بمامته وباباه ماما بيعاملوهم كويس وبيحبوهم بس مش بيرتاحو فى الكلام مع مامته شوية بيطلب منى ان احنا نروح نصيف كلنا مع بعض وانا شخصيا مش عاوزة طبعا وماما واخواتى انا عارفة انهم مش بيحبوا ده فلما قالى على الموضوع ده قلتله طب وليه محدش كده هيبقى عللى راحته ومش انا واللهى مش عاوزة لا اصيف ولا غيره عندى اقعد فى بيتى مرتاح من غير وش ووجع دماغ اريحللى ايه رايكم؟
عندى حاجات كتير اوى بس مش عاوزة ادوشكم كتير
وامانة تدعولى انا واختى بالذربة الصالحة وجزاكم الله خيرا

[زهـرة]

اهلا بك اختي الحبيبة
انا ولو عضوة جديدة لكن قريت قصتك وفهمتك
وانا متأكدة ان كل العضوات في هذا المنتدى الجميل حسو فيكي كمان
لكن اعملي بنصائح خواتك ويارب يوفقك ويسهل عليكي
وكوني قريبة من الله سبحانه وتعالى وادعيه على طول


تحياتي لكِ

[حتة سكرة]

بصى لو مامتك واخواتك رفضو خلاص هو مش هايغصب عليهم وحاولى تفهمية ان دة رايهم وهما حرين
لكن انتى لازم تروحى معاة طبعا دة هايفرق معاة كتييييير
معلش استحملى مدة المصيف دى مع اهلة وربنا يعديها على خير
انتى بنت حلال وربنا هايبعد عنك المشاكل باذن الله

[المعتزه بإسلامها]

إزيك يادوشانى عامله إيه ياجميل إيه يابنتى الكلام اللى إنتى بتقوليه ده هى دى مشاكل أقولك أنا على المشاكل الحقيقيه واللى بيحصل هنا بين المصريين وبعض أنا عارفه لو قلت لك قصه واحده هتسجدى شكر لله .إسمعينى كويس يا حبيبتى خدى خلاصة التجربه يالا أهو كله بثوابه بصى يا حبيبتى قولى آه لا آه طويله شويه ههههههههههه أنا عاوزاكى تطلعى من المود ده اللى إنتى حطه نفسك فيه وتسألى نفسك كام سؤال كده ومنهم هل زوجك بيسهر بره . هل جوزك بيشرب حاجه لا قدر الله . هل بيفضل أقاربه عليكى .هل مقصر فى حقك وحق بيته . هل بيكذب عليكى . هل بينافقك .هل بيخونك لا سمح الله . انا عارفه انك بتردى عليا وبتقولى لأ لأ لأ يبأه كله يهون والكره فى ملعبك ياجميل بس بالحيله ومتحسسهوش بحاجه خالص ولا تقوليلو حاجه عن أهلك خالص العمليه كلها فى إيدك يا جميل ولا تشيليه هم لو أخواتك مرضيوش على المصيف متفتحيش عينيه على الحاجات دى يا ذكيه خلى علاقتك إنتى بأهلك طبيعيه وهو يشكر إنه فكر فيهم ولغاية هنا وكملى إنتى يعنى مثلا قوليلو إن إخواتك مكنوش عاملين حسابهم السنه دى وأى حاجه كده المهم إبعديه تماما عن أى شئ عن أهلك يا ذكيه حتى لو هو كويس جدا واحمدى ربنا وأسكتى بأه إنتى فى نعمه مش حاسه بيها ماشاء الله عليكى ولا حول ولا قوة إلا بالله .
وسلام يا أموره

[شرين عمر]

راى زى الاخوات حافظى على بيتك وبلاش الشيطان يلعب بدماغك وارمى حمولك على اللة وان شاء اللة ربنا يهديكى ويبعد الوسوس دة عنك ومحدش يعرف دة رزق مين بالتحديد

[dodi80]

جزاكم الله خيرا جميعا وخاصة اختى المعتزة بالله عين العقل واللهى يا بنتى انا كنت عارفة واللهى الكلام اللى انتى قولتيه كويس اوى ودايما واللهى كنت بقوله لنفسى بس الشيطان بقه انتى عارفة مبيسبش حد فى حاله وخاصة لما يقرب من ربنا بيجيب حاجات غريبة متعرفيش بيجبها منين , وكنت عاوزة اعرف ان صح ولا غلط لانى كنت ساعات كتير ببقى تايه اوى ومش عارفة حاجة وبحس ان المشكلة عندى انا ساعات كتير بحس انى انا اللى غبية ومعنديش ذكاء اجتماعى بس اعذورونى لنى متعودش آخد حقى شوية فبطنش كتيييييييييييييييييييييييييييير فكنت عاوزة بس اعرف انا فين من الصح؟

[dodi80]

ومش عارفة ليه بعقد الدنيا كلها فوق دماغى كده مع ان انا عارفة كويس جدا انها مش مستاهلة خالص بس ساعات بقول يمكن يكون مجرد التفكير ده ابتلاء والله اعلم على العموم جزاكم الله خيرا جميعا وكل اللى بتمناه انى اخرج من الدنيا ديه بخير وسلام وربنا راضى عنى مهما كانت الحياة
جزاكم الله خيرا جدا جدا جدا وآسفة لو كنت دوشت حد فيكم سلام