[zatoona magnoona]

السلام عليكم يا احلى فتوكات
دى تانى مرة انزل الموضوع
نزلته النهاردة الصبح و انا بعدل حاجة فى العنوان بعد ما خلصت دوست على زرار غيرلى الصفحة و كل حاجة اتمسحت

المهم دخلت نمت و فوقت كده
و جيت اكتب لكم تانى

انا كنت بعمل كيك زبادى و كيك برتقال لحماتى ربنا يخليها
و قلت انزلكم الطريقة
الاول كيكة الزبادى
هيه ليا طرق كتير
بس اظبط طريقة فيهم هية الطريقة اللى بتعايرى فيها الدقيق و السكر و الزيت بنفس كوباية الزبادى
الطريقة دى انا كنت اخدتها من منتدى تانى من زماااااااان ربنا يجازى صحبة الوصفة خير يارب
و فكرة الحشوة اخدتها من واحدة تانية خالص برضه من زمان و ربنا يجازيها الجنة بجد غيرت فى طعم الكيك و خليته احلى اكتر ما هوه حلو اصلا

بالمناسبة اول مرة عملتها جوزى قاللى الكيكة دى انتى حاشياها سنيكرز ؟؟ اه و الله ههههه
فعلا فيها طعم السنيكرز عشان الحشوة فيها زبدة الفول السودانى
معلش رغيت كتير اوى و زهقتكوا
خلاص خلاص كفاية رغى يا بت يا زاتونة و يلا بينا نبدأ

اولا الحشوة :
المقادير:

باكيت كريم كراميل
6 حبات اوريو
من 2 الى 3 معالق صغيرين بس مالينين زبدة الفول السودانى
شوكولاتة هيرشى ( حسب الرغبة )
فستق و جوز بيكان

هناخدهم كلهكم و نحطهم فى الفود بروسيسور

ونضربهم على سرعة متوسطة

و ده بقى شكلهم

و اخدتهم حطيتهم فى طبق تانى عشان استخدم الفود بروسيسور فى عمل الكيك

نيجى بقى للكيك حبيبى

المقادير :

المقادير كلها فى حرارة الغرفة

3 بيضات
معلقة صغيرة فانيلا
علية زبادى ( استخدمت اللى هيه 170 جرام لو مش عندكوا غير الصغيرة اللى هيه 90 جرام او 80 يبقى جيبو اتنين )
نفس العلبة سكر
نفس العلبة زيت
2 من نفس العلبة دقيق منخول ( انا بنخله و لمل اجى احطه على المقادير فى الفود بروسيسور )
معلقة كبيرة بيكينج باودر

الطريقة :

هنا حطيت الزبادى فى طبق و غسلت العلبة و نشفتها عشان اعاير بيها باقى المقادير

الاول نحط البيض و السكر مع بعض 5 دقايق كده و نضربهم كويس فى الفود بروسيسور

هنا بعد ما انضربوا كويس ( ممكن تحطى الفانيلا مع الالسكر و البيض بس انا عادة بعملها كده )

و بعدين تحطى باقى المقادير ماعدا الدقيق

و نضرب كويس هنلاقى الخليط تقل شوية كده

و بعدين نضيف الدقيق المنخول على دفعات واحد واحده
و دى كانت اخر دفعة

و د شكل الخليط فى النهاية

ندهن الصينية اللى هنستخدمها بزيت او زبدة و نرش الصينية بالدقيق

انا جبت صينيتين صغيرين و رشيتهم الاسبراى اللى فى النص ده

هنا بعد ما رشيتهم

و نحد نص الخليط بتاع الكيك

و بعدين نحط نص الحشوة

و دى صورة للصنيتين

استنونى فى المشاركة اللى جاية

[zatoona magnoona]

و بعدين نحط باقى خليط الكيك



و دى برضة صورة للصنيتين قبل دخول الفرن



و دخلتهم الفرن الساخم من قبل كده على حرارة 180 لمد نص ساعة تقريبا
و قبل ما نطلعها نتأكد من سواها بعود الشيش طاووق العود الخشب ده

و ده كان شكلها بعد ما طلعت معلش نسيت اصورالكوا قبل ما اقلبها



وده شكل الكيكتين



و طبقا زوقتها عشان طعمها يبقى احلى طبعا

جبت 6 كيرى و تقرينا نص نستلة ( حليب مكثف محلى ) و خلطتهم فى الخلاط




و صبيتهم على الكيكتين




و زينتها بهيرشى شوكلاتة و كراميل و واحده حطيت عليها
شوية جوز بيكان مجروش كمان و التانية شوية فستق مجروش

و دى صورتها النهائية




صورة كمان



و التانية بشوكولاتة اقل




الاتنين مع بعض



الكيك د على التلاجة عدل
كل ما اتساب فى التلاجة كل ما طهمه كان اطعم
بس لازم يتغطى بغطا الكيك ده عشان ماتنشفش من الجوانب لما تقطعى منها و تدخليها تانى التلاجة

واحده كانت لحماتى و واحده لينا و طبعا مكنتش كد بس يعنى عملت معاها كيك البرتقال وى ما هتشوفوا كمان شوية هم بيحبوه اوى ما شاء الله

المهم
دى كانت صورة الكيك من جوه بعد التقطيع



و دى كانت قطعة من الكيك



بجد نفسى أخبط على باب كل واحده فيكو و اديلها حتة من كتر ما انا عارفة انها حلوة
يارب تجربوها و تعجبكم باذن الله

نيجى بقى لكيك البرتقال
انا بشكر العضوة أم عتريسة جزاها الله كل خير لانها هية اللى عطيتنى الوصفة دى
و طبعا جزاها خير صحبة الوصفة الاصلية
الكيكة دى سهلة و مفياش مجهود و النتيجة مضمونة باذن الله طبعا

و مع انى مش بحب كيك البرتقال بس دى غير
هشة و طريه كده جميلة ما شاء الله

المقادير برضة فى حرارة الغرفة :




3 بيضات
رشة فانيلا
3/4 كوب سكر ( كده السكر مظبوط بالشعرة يعنى فا انا بفضل نزود معلقتين كبار كمان بس مش مليانين هيكون افضل )
3/4 كوب زيت
2 كوب دقيق منخول
2 معلقة صغيرة مليانة بيكينج باودر
كوب عصير برتقال
معلقة كبير بشر برتقال


انا مابشرتش ابرتقال عملتة بالمقشرة كده دى اصلا كانت طريقة صاحبة الوصفة ( لو انتى عايزة تبشريه ماشى مفيش مشكله )

و مناخدش خالص من الطبقة البيضة ماشى ؟؟؟



هنحط السكر و البيض و الفانيلا فى الخلاط و نضرب على اعلى سرعة 5 دقايق كده



لحد ما يبقى عامل كده



و بعدين نضيف الزيت و نضرب تانى



و نضيف العصير مع البشر






و نضرب كويس اوى عشان القشر يتفرم كويس كده




استنونى فى المشاركة اللى جاية معلش طولت عليكم

[zatoona magnoona]

هناخد الخليط بقى و نحطه فى طبق واسع و غويط كده




نحط الدقيق المنخول و البيكينج باودر




و بالمضرب اليدوى او الكهربائى بس على اقل سرعة نضرب الخليط و مانطولش عشان نحافظ على الهوا اللى جوه البيض

و كده الخليط خلص



و دهنت الصوانى بزيت و رشيتهم بالدقيق و حطيت فيهم الخليط




و اتبقى شوية من الخليط عملتهم كب كيك




و دى صورتهم مع بعض



و ندخلهم الفرن الساخن على 180
حوالى نص ساعة ل 40 دقيقة و نختبرها طبعا قبل مانطلعها و نكون مطفيين الشفاط بتاع المطبخ عشان ماتهبطش لما نطلعها و ياريت مانطلعهاش بسرعة من الفرن نفتح باب الفرن مثلا و نسيبها شوية بس ناخد بالنا منها احسن تتحمر زيادة من الوش من سخونية الفرن

و لو كانت استوت تمام يا بنات بس وشها ماحمرش نشغل الشواية ( بس انا ماحتجتش خالص الحتة دى ما شاء الله )

انا طبعا كنت مستعجلة عليها اوى فا صورتها و هيه مقلوبة ( قلبتها و هية سخنة شوية عشان كنت مستعجلة )




و دى من الجنب



ودى لما قطعتها







المفروض نزينها بسكر بودرة لما تبرد شوية
بس انا مالحقتش اصورها بعد ما رشيت السكر البودرة

و دى صورة لكيك الزبادى مع كب كيك البرتقال






الصورتين دول اخدتهم على السريع فا مطلعوش حلوين
بس حقيقى الكيكتين حلوين اوى
يارب تجربوهم و يعجبوكم ان شاء الله

اللى يعجبها الموضوع امانة عليها تدعيلى انا و جوزى و ابنى ربنا يهديه اللهم امين يارب
مش لازم تكتبيها بس قوليها من قلبك مش اجبار يعنى و الله
و ادعولى ارسى على نوع فرن كهربا كويس بدل ما انا محتارة كده

فى امان الله يا احلى صحبة فى الدنيا

[♥فتوكايه الفتوكات♥]

تسلم ايديكى ياقمر

[حبيبة توتا58]

تحففففففففففففففففففففففففففففففففففففففه والله تسلم ايدك

[mazamez]

تسلم ايدك

[om.gehad]

ايه الجمال دة تحفة......تسلم ايدك

[zatoona magnoona]

تسلم ايديكى ياقمر

تسلمى من كل شر يا قمر

[أم الحسن و فاطمة أحمد]

تسلم ايديكييييييييييييييييي

[الانسة فتكات هانم 2]

تحفةةةةةةةةةةةةةةةةةةةةةةة بسم الله ما شاء الله تم التقييم ممتاز ابقى اتحفينا بباقى ابداعاتك ما شاء الله, الله اكبر رائع