[مهندسة مصرية]

رجعنا تانى وبدء العد التنازلى

فاضل 180 يوم واكون رشيقة

النظاام بتاعنا عبارة عن معادلة

نظام غذائى لذيذ + تمارين ممتعة + وصفات هايلة = نزول فى الوزن + شد الجسم+ صحة وبشرة وشعر خياال

بأذن الله لو التزمتى بالنظام دا هتخسى 8 كيلو فى الشهر

بداية احب اكلمكم عن المشكلة الكبرى لينا كلنا بنبدأ رجيم تمام اسبوع وهوب نزهق وننفض

حد فكر لية؟؟؟؟؟؟؟؟؟؟؟؟؟؟؟؟؟ هقولك يا ستى

1- الزهق من الانظمة

بجد شىء مستفز الاحساس بالحرمان وكمان نوعيات اكل مستفزة

طب و الحل ؟؟؟؟

احنا هنوع فى الوصفات ومش هنحرم نفسنا من حاجة وعندك يوم فرى

2- طموحات الخسسان السريع والاستعجال

ياجماعة الدنيا متخلقتش فى يوم وبعدين ممكن تخسى فى اسبوع كيلو وهتزهقى جدا
لان الرجيمات الكيميائية بتجوع جدا وبتخلى الواحد معندهوش طاقة وبعدين بنسبة 98% بتفشل مع الناس لان صعب جدا الاستمرار فيها غير انه مضرة جدا

طب والحل ؟؟؟

كفايا جدا تخسى من 2 الى 2.5كيلو فى الاسبوع كدا تمام جداااااااا ياعنى فى اسبوعين 5 كيلو ياعنى فى شهر 10 كيلو وحشششش؟؟؟

ولا هتزهقى ولا هتحرمى نفسك ولا حاجة ودا هتحققيه بالبرنامج بتاعنا واوعى تفكرى فى الخسسان الاسرع من كدا هتزهقى فى نص السكة وحتى لو عزيمتك حديد مع الوقت هتضعف

3- احساس انك عمرك ما هتخسى وهتفضل كدا

مين قالك كدااااااااا؟؟؟؟؟؟؟؟؟؟؟ مش هكلمكم على حد خيالى
انا فى وقت من الاوقات وانا فى ثانوى كنت وصلت ل 120 كيلو يالهوى كنت كورة

انتظمت رجيم شهر 8 و 9 و 10 و 11 وصلت 76 كيلو ياعنى كنت بخس فى الشهر بتاع 12 كيلو على النظام دا ودخلت الكلية مززززززززززة

وبعدها بسنة بقيت 80 ورجعت خسيت لحد 60 كيلو فى شهرين ونص ( كنت بدلع شوية فى النص(

بس طبعا فضلت ثابتة 4 سنين على 60 65 وبعدين تعبت جامد واخدت ادوية كتير فضربت تانى

ودا لانى مكنتش عاملت نظام تثبيت وانا حاليا للاسف 96 كيلو وبحاول انتظم زى الاول عشان ارجع زى ما كنت واحسن ان شاء الله

　
يالا بقى كدا لازم كلنا نتشجع ونرجع رشقتنا لان 70% من جمال البنت الخارجى الرشاقة

( احنا بنخس اولا عشان نفسنا وصحتنا ونزود الثقة بالنفس عندنا مش عشان حد وكمان فعلا نظرة المجتمع بتفرق مع الكل بدون شعارات فاضية)

وقليل جدا اللى يحب البنت التخينة سواء فى جواز او فى شغل او حتى المنظر العام

متزعلوووووووش دا عدل من عند ربنا

مهو لو بصيتى على البنات هتلاقى ان حوالى 70% منهم اجسامهم عادية وكويسة

يبقى العدل ان 70 % منالناس يفضلوا البنت صاحبة الجسم دا

و30 % من البنات عندهم سمنة يبقى اكيد العدل ان يبقى نسبة30% من الناس بس اللى يفضلوا البنت التخينة

　
(طب ليةةةةةةةةةةة نحط نفسنا فى ال 30 % مندخل فى ال 70% احسن ما خطيبك يزلك زى حالاتى وخسى خسى قولتله انا خايفة اخس بصراحة لاحسن استكتر نفسى وحلاوتى عليك
كخكخخككخكخخكخكخكخكخكخكخككخكخكخكخكخخ باردة جدا انا وباخد حقى تالت ومتلت)

　

يالا يا جماعة انطلاااااااااااااااااااااااااااااق

　الجزء الاول من المعادلة (النظام الغذائى )

نيجى بقى لتعليمات النظام الغذائى :

1- مسموح بتناول الاتى بأى كمية اذا شعرتى بالجوع
(خس -خيار -كوسة مسلوقة - فجل - بقدونس – جرجير)
2- ممكن تاكلى جزرة – او برتقالة – او جوافاية
3- مسموح ب 2 معلقة سكر يوميا
4- يجب مضع الاكل جيدا
5- ليكى كوب لبن يوميا تاخديه مع الفطار مع العشا براحتك

الممنوعااااااااااااااااااااااااااات

　
1- جميع انواع الحلويات
2- اللبان (اللبان الخالى من السكر مسموح ) -اللب -السودانى - المكسرات
3- المياة الغازية (الدايت منها مسموح بنسبة قليلة لا تزيد عن 4 فى الاسبوع )
4- البطاطا – ( البطاطس لكن المسلوقة مسموحة بس ساعتها مش هتاكلى عيش) 5- الفينو
6- المخللات
7- لانشون - بسسطرمة - جبنة رومى - جبنة نستو - جبن بيضاء كامل الدسم
(القريش او جبن فيتا لايت بس هى المسموح بيها )

8- البلح - التين - الشمام - المانجو - القصب - العنب
9- القلقاس - البسلة - اللوبيا - الفاصوليا البيضاء - العدس - الترمس
10- الوز - البط - الحمام - الكلاوى - الكبدة - القوانص - كفتة الحاتى

　

الاسبوع الاول من 3 الى 4 كيلوووووووووو تمام

　

اولا الافطار

اختارى واحد من دول :

1- رغيف سن او ربع رغيف بلدىكبيراو نص من العيش الصغير ابو ربع دا + 4 ملاعق فول بدون سمنة او زيت + سلطة

2- ربع رغيف بلدى او واحد سن + بيضة مسلوقة + سلطة

3- ربع رغيف بلدى او واحد سن + جبنة قريش او لايت + سلطة

4- 2 ثمرة فاكهة + شاى بلبن

5- كوب لبن كامل الدسم او كوب زبادى كامل السم

6- كوب لبن خالى الدسم او زبادى لايت + ثمرة فاكهة

7- 7 تمرات + كوب لبن

8- طعمية دايت +بيضة مسلوقة +ربع رغيف او رغيف سن طرى

9- مسقعة دايت + جبنة لايت + رغيف سن
( بس لو مش بتخرجى على الصبح ياعنى )

10- باكو بسكويت لوكس او دايجستف 5 وحدات + شاى بلبن او لبن

11- واحدة جبنة مثلثات لايت + بيضة مسلوقة + ربع رغيف

　
12- 6 بقسماط دايت مش العادى + شاى بلبن او لبن سادة

ممكن تشربى كوب نسكافية فى الفطار بسكر دايت او اى مشروب زى مانتى عاوزة بس بسكر دايت واى وقت

　

الغدااااااااااء

نشويات + بروتينات +خضروات

　
1- النشويات :

- ربع رغيف بلدى
- او واحد سن
- او 3 ملاعق ارز عادى او 9 مسلوق
- او 9 ملاعق مكرونة

2- اللحوم

2 شريحة لحم مسلوق او مشوى
- او ربع فرخة مشوية او مسلوق
- او 4 سمكات متوسطة
- او 2 بيضة مسلوقة
- قطعة برجر مشوى
- واحد هوت دوج مشوى

3- الخضروات

　
- خضار نى *نى بأى كمية من غير سمن او زيت
- او خضار مشكل على البخار
- او مسبك اربع ملاعق

　

بعد الغداء بساعة

ثمرة فاكهة

　

العشــــــــاااااااااااااااء

1- زى الافطار بالظبط

2- سلطات متنوعة مثل :

سلطة لانشون - سلطة بالبقوليات – سلطة بالبطاطس المسلوقة – سلطة بالتونة كللل دول ممكن تختارى بينهم + نص رغيف سن

3- تونة مصفاة من الزيت + رغيف سن

4- سلطة فواكهة

5- بليلة كوب صغير باللبن

6- كوب لبن + 2 ثمرة فاكهة

　

الجزء الثانى من المعادلة : التمـــــــارين

1- الصبح وقبل الافطار 10 دقايق تمارين هنزلكم فيديو حلو اوى ودا كانت قايلة علية الفتوكة دلوعة دادا فى موضعها وبجد هايل اوى

- او الصبح على التلفزيون الارضى او المصرية بيجى الساعة 6.30 تمارين حلوة اعملى وراه لو انتى قاعة فى البيت

- لو بتشتغلى او بتروحى ومتاح تمشى وبتركبى المترو مثلا يبقى اركبى المحطة اللى بعدها ياعنى هتمشى محطة وهكذا حاولى تمشى على الاقل ربع ساعة مشى سريع يوميا

2- تمرين الرقص ياعنى على الحلاوة هنرقص 10 دقايق فى اليوم

فى بالذمة تمرين احلى من دا ودا هيكون بعد الغدا بساعتين

اية دا ما الاغانى حرام هاتى ياستى اغانى بتكون طبلة بس من غير موسيقى

ودى افضل

وخليها بنية الخسسان ولو اتجوزتى تسعدى جوزك بدل ما يبص برا

الرجالة دلوقتى عينها فارغة

　

الجزء الثالث من المعادلة : الوصفات الطبيعية

الوصفات بتاعتنا 3 وصفات كالتالى:

وصفة قبل الفطار على الريق

مشروب بيخسس وبينضف البطن وبيخلى البشرة والشعر خياااااااال

كوب ماء دافىء + م عسل نحل + م خل تفاح

وهتشربيهم على الريق

　
وصفة قبل النوم
مشروب رائع لشد الجسم كله وتعطير النفس وانقاص الشهية

　
هتجيبى ازازة بيبسى فاضية سعة 1.5 لتر وامليها مية

هتجيبى بجنية لبان دكر وهتضيفية للمية وهتسبيها طول اليوم

على بليل هترجى الازازة كويس هتلاقى المية بقت لونها ابيض جيرى

هتحطى الازازة فى الثلاجة وقبل ما تنامى على طووول هتاخدى كوب منها

　
　
**** لو جهزتى ادواتك دى زى مانا كاتبة بجد هترتاحى جدا ومش هتحسى اى وصفة عبء عليكى

ياعنى علبة العسل المخلط جاهزة – ازازة لبن الدكر جاهزة – اقراص التخسيس جاهزة
يبقى اية المشكلة ناقص بس تلتزمى بالرجيم

طيب النظام دا زى ماهو رجيم زى مهو صحى جدا وممتع وبيأئر فى البشرة

والشعر والجسم والصحة العامة وبعد اسبوع هتلاقى نفسك واحدة تانية وهتتشجعى تخسى اكتر واكتر

ان شاء الله هكتبلكم وصفات لوجبات رجيم لذيذة


طيب والاشتراااااااااااك؟؟؟؟؟؟؟؟؟!!!

للجادات فقط

المرة دى هنجمع عدد معين عشان نعرف نتابع مع بعض

وهيكون 30 ومش هنحدد مين معانا ومين لا غير بعد اول
اسبوع ونشوف الانتظام بتاع العضوات

طريقة الاشتراك


1- هيسجل وزنه وطوله وهدفه


3- هيكتب تقارير

4- الوزن كل اسبوع فى يوم محدد





دا رابط التقارير

http://forums.fatakat.com/showpost.p...&postcount=692

هناخده اقتباس ونغير فيه او هنحطه على الورد ونملاه كل يوم

7
7
7
7
7

يتبع

[مهندسة مصرية]

بعض الوصفات لوجبات رجيم رائعة

اولا الســلطات

انا بفضلها فى العشا بصراحة لانه لازم يبقى خفيف
ودلوقتى هقول على طرق متنوعة ليها

المقادير

خس كابتشو
كرنب احمر سلطة
جزرة واحدة
جرجير
ا طماطم متوسطة

اختارى اضافة من الاتى:

- 2شريحة لانشون
– او بطاطسية صغيرة قد حجم البيضة مسلوقة ومبشورة
- ( فاصوليا بيضاء او لوبيا + فول ناشف ) مسلوق كوب صغير
( هتنقعى كوب صغير فاصوليا بيضاء + فول ناشف ) فى المية من الصبح لبليل
- علبة تونة مصفاه من الزيت

التتبيلة

- فص ثوم مدقوق
- نص معلقة زيت زيتون
- رشة نعناع جاف
- ملح – كمون
- نص معلقة سكر
2- م كبيرة ماء
- م خل + ليمون

الطريقة

هنعمل التتبيلة بتاعتنا وهنحطها فى الطبق اللى هنخلط فيه
هنقطع الخضروات بتاعتنا - وهنقطع الجزء الاختيارى سواء لانشون
او بطاطس - او فاصوليا بيضاء

هننزل بالخضروات الورقية الاول فى التتبيلة وهنقلب وبعدين الطماطم

ونقلب وبعدين الجزء الاختيارى بعد التخليط كويس حطيهم فى طبق كدا

واكلى معاهم نص رغيف سن وبالهنا والشفا



ثانيا الطعمية الدايت

المقادير والطريقة

هتجيبى عجينة طعمية من الراجل وهتعمليها اقراص وهتحطيها فى الفريزر
كل ما تعوزى تطلعى قرص او اكتر وتحطيه فى صنية مدهونة زيت خفيييف
وتحطيها فى الفرن 10دقايق وهتبقى استوت وابقى فى النص اقلبيها على الوش التانى عشان تتحمر


ثالثا المسقعة الدايت

المقادير

- بذنجانة رومى مقطع دوائر او مكعبات
- فلفل رومى وحامى منذوع البذر
- بصلة مقطعة متوسطة الجحم
- 2فصوص ثوم مقطع
- م صغيرة زيت زيتون
- طماطم مقطعة مكعبات
- ملح + كمون + كسبرة ناشفة
الطريقة

هتخلطى المقادير كلها على بعض وهتحطيها فى حلة مكحمة الغطاء

ومن غير مية خالص وتغطيها وتسبيها على نار هادئة ممكن فى النص

تضيفى ربع كوب ماء

نص ساعة وهتكون استوت


رابعا خضار على البخار

خضار سوتية بالبروكلى



البروكلى الاول نتعرف على فوايده...................
أكدت الأبحاث العلمية أن نبات البروكلي يساعد في حماية القلب من الأزمات القلبية، وله دور هام في الوقاية من السرطان.

وأوضحت الأبحاث الأولية التي أجريت علي فئران تجارب تم أعطاؤهم جرعات يومية من البروكلي تراجع فرص إصابتهم بأمراض القلب والأزمات القلبية مقارنة بالفئران الذين تناولوا أغذية أخري.

وأشارت الأبحاث، وفقا لصحيفة "الجمهورية"، إلي حدوث تحسن ملموس في كفاءة ضخ القلب للدم بين الفئران التي تناولت البروكلي إلي جانب تراجع مستوي الأضرار التي قد تلحق بهم في حال عدم وصول الأوكسجين الكافي للقلب.

أفاد باحثون بأن نبات البروكلي وهو أحد أنواع الخضار من فصيلة القرنبيط يساعد على منع الإصابة بالسرطان، كما أنه يزيد من قوة جهاز المناعة.




هنيجى بقى للوصفة بتاعتنا هى بروكلى وخضروات بالبخار

الادوات........

1- حوالى طبق شوربة صغير (بروكلى مقطع صغير الى وردات)



2- خضار مشكل ( جزر - كوسة - فاصوليا - فلفل الوان ) بمعيار طبق شوربة

3- ملح - كمون - شطة

4- فص ثوم مقطع الى قطع صغيرة


الطريقة ........................

1- هنحضر حلة متوسطة وهنملى نصها مية ونحطها على النار لحد ما تغلى

2- هنجيب مصفاة غويطة بتاعة قلى البطاطس وهنحط فيها الخضار ونحطه على الحلة (حمام بخار )

ونغطى كويس

من دول :




3- بعد خمس دقائق هنحط الملح والكمون وفص الثوم والشطة ونقلبهم فى الخضار

4- بالظبط ربع ساعة والخضار بيكون استوى كويس جداااااااااااااااا


5- هتحطيه فى طبق مع ارز مسلوق بطريقتى الخاصة ولحمة او فراخ مشوية

وبيبقى طبق مشبع جدااااااااااااااا ورجيمى مية فى المية ومفيد بطريقة رهييييييييبة





طب والطعم ،،،،،،،،،،،،،،،،،،،،،

ولا اروع والجميل بقى انه من غير اىىىىىىىى دهون ياعنى لو عاوزة تعملى جردل هههههه اعملى

ولو تحبى بعدها تقلبيه فى معلقة زيت زيتون بيكون رائع

وهو دا كان طبقنا النهاردة ودمتم بكل صحة ويااااااريت يعجبكم



خامسا الارز الدايت بنكهة الكارى

بصوا انا امبارح كنت عند دكتور الرجيم وطبعا فى العادى بيكون النشويات

3 ملاعق رز - او 3 ملاعق مكرونة او - ربع رغيف بلدى او - رغيف سن

طبعا اهم حاجة عند الكتير الرز وانا منهم لانه بيشبع اكتر ومش لية اضرار زى العش السن احيانا

فالدكتور قالى على انى اعمله بطريقة هتخليه تحفة ومش هاكل غيرها


المقادير :

كوب ارز وسط

مرقة دجاج

زعتر معبقة صغيرة

كسبرة ناشفة حصى نص معلقة صغيرة

كسبرة خضرة ( حسب الرغبة )

جزرة صغيرة مبسورة


الطريــــــــــقــة:

1- هنجيب حلة صغيرة ونملى نصها مية ونسيبها تسخن شوية

هنضيف الكسبرة الناشفة - الزعتر - الجزر المبشور - الكزبرة الخضرا

2- اول لما المية تغلى هنحط مكعب مرقة الدجاج

3- نستنى دقيقة كدا وهنسقط الرز

4- نسيبه يغلى وبعدين نوطى النار خالص على العين الصغيرة للبتوجاز ونغطى الرز

5- بالظبط 7 او 10 دقائق وهتلقيه استوى وبالهنا والشفا



طبعا ليكى من 9 الى 10 ملاعق رز ياعنى طبق كبير جدا وخاصة لو عاملة جمبه خضار على البخار هيبقى تحفة


وبالهنا والشفة

وياريت اللى هتجرب الوصفة دى تقولى طعمها اية ؟

سادسا البيتزا الدايت

المقادير

- كوب صغير ردة
- نص كوب دقيق
- ملح
- خميرة فورية
- م زيت ذرة او زيتون
- محسنات عجينة من السوبر ماركت
- صوص بيتزا كالاتى بدون تسوية على النار
( اعشاب زعتر + روزمارى + م صلصة + م كبيرة كاتشب)

- مكونات البيتزا بدون جبن
( طماطم – فلفل – 2 زيتونة فقط – تونة – لحمة مفرومة - سوسيس ..الخ )

الطريقة

- هتخلطى
الدقيق بالملح بالزيت وهتفركى الدقيق بيه
- هتضيفى الردة ومحسنات العجينة والخميرة الفورية
- هتعجنيها بالمية لحد ما تتماسك
- هتفرديها فى صنية مدهونة زيت خفيف جدا وهتحطى عليها الصوص
وبعدين المكونات

- هتدخليها فى الفرن على 320 درجة وتسبيها 20 دقيقة بالكتير


ودى هتبقى وجبة غداء كاملة ياعنى مش تتعمل للعشا هااااااا غدا بس

[ديالا احمد]

حبيبية قلبي انا اتحمست جداااااااااااااااااا لموضوعك معاكي ياقمر انشاء الله

[Bonbonayaa]

تسلمى يا قمر

[tota love ahmed]

[***saly***]

معاااااااااااااااااااكي يا قمر
انا بقالي حوالي اسبوع ماشيه على رجيم
انا تقريبا 69 او 68 كيلو وعاوزه ابقى 60 او اقل ميضرش يعني
خديني معاكي بقى

[ديالا احمد]

بصي ياقمر بقي انا وزني 70 ونفسي اوصل ل60 انشاء الله متحمسه جدااااااااااا اتابع معاكي

[yoya 2012]

انا معاكى ان شاء الله ومش هكدب عليكى انا اشتركت فى جروبات كتير بس مكملتش ومن حوالى 8 شهور اشتركت فى جروب وخسيت بس نزلت اجازة مصر ولخبطت وزت تانى
لكن المرة دى انا اصلا كنت مقررة ابتدى وابتديت انهارده فهتابع معاكى
بس التمارين مش هقدر لانى مستنيه حمل لو مش فيه هبتدى ان شاء الله

[مهندسة مصرية]

بصي ياقمر بقي انا وزني 70 ونفسي اوصل ل60 انشاء الله متحمسه جدااااااااااا اتابع معاكي

اهلا بيكى يا جميل معانا وان شاء الله نوصل لهدفنا مع بعض

معاااااااااااااااااااكي يا قمر
انا بقالي حوالي اسبوع ماشيه على رجيم
انا تقريبا 69 او 68 كيلو وعاوزه ابقى 60 او اقل ميضرش يعني
خديني معاكي بقى

انتى معانا يا جميل وهنجمع بعض ان شاء الله وهنبتدى

[احضان الحبايب]

انا معاكى حتى انا كمان مشتركة فى جيم بس بلغبط خالص فى الاكل بس خلاص انتى بجد حمستينى خاااااااااااااالص انا معاكى بس هو انا بكتب التقرير كل يوم ولا كل اسبوع عشان عمرى ما اشتركت فى جروبات انا وزنى 90 وطولى155 وفرحى فى شهر 7 ان شاء الله ان اكتر واحدة محتاجاكى بعد ربنا