[د/لولى]

انا هقولكو ازاى تعملوا الشمع البارد فى البيت وخطواته سهله جدا ومكوناته متوفرة فى اى بيت

يلا بينا على الخطوات على طول وبعدين هقولكو النتيجه والمميزات والعيوب وكله كله

الخطوات
صبى ٢ فنجان ماء و٢ فنجان سكر انا استعملت سكر التموين ماما سيبهولى للخلطات

تحوطى الحله على نار متوسطه لمده دقيقه مع التقليب المستمر لغاية ما كل السكر يدوب

ودا شكله بعد دقيقه تسخين وتقليب

سبيه دقيقه يبرد شويه
**

**
ضيفى ربع كوب زيت زيتون وربع كوب ليمون وقلبى

حطيه على نار بين المتوسطه والهاديه وضيفى نص كوب ماء تانى

وبعد نص ساعه شكله كدا لاحظى لون الفقاقيع دهبى مبيض

وبعد ٤٥ دقيقه بالتمام والكمال هتكون الفقاقيع كلها بنى بالشكل دا اطفى النار على طول

ودا شكله بعد ما طفيت النار

ضيفى معلقة كريم جليسوليد الاحمر وقلبى كويس وغطيه بغطاء الحله فورااااا ودخليه التلاجه

(يمكن استبدال الجليسوليد بمعلقة جلسرين)

وبعد مرور ساعه ونص فى التلاجه

هتلاقيه مجمدش وسايح زى العسل كدا

هتلاقى طبقة زيت متجمعه فوق قلبيها بسرعه بسرعه عشان بتجانس كله مع بعضه

تاخدى منها معلقه كدا و بسرعه تغطي الحله فورا وتدهنى المعلقه كلها مرة واحده على منطقه معينه وتفرديها على جسمك بدهر المعلقه

بحيث انها تكون طبقه رقيقه جدا

ودلوقتى قدامك حلين يا تجيبى مناديل الواكس العاديه وتستخدميها والمنديل اللى بتشيلى بيه تقدرى تستخدميه اكتر من مرة
او تجيبى بادى رجالى داخلى القطن دا وتقصيه ٤ ارباع وتشتغلى بيه وبعدها ممكن تغسليه وتشيليه لكل استخدام

وبعدين تاخدى معلقه تانى وتفرديها بدهر المعلقه وتغطى الحله اهم حاجة وهكذا

الكميه دى كفتنى رجلى لحد فوق الركبه وايدى كلها وتحت الباط واتبقى حته كمان بس رميتها عشان كنت تعبانه مقدرتش اكمل اكتر من كدا

المميزات

اولا هى وسيله لازالة الشعر من الجذور

ثانيا درجة حرارتها ساقعه يعنى ولا تتحرقى ولا تلتهبى زى الواكس العادى

ثالثا مش بتلزق زى الواكس تقدرى تشيليها بالمايه بس

رابعا ودا اللى عجبنى اوى انها بترطب البشرة وتنعمها بهبــــــل ودا عشان الجليسوليد والزيت

خامسا طريقتها سهله ومفيش مجال انها تتحرق منك او تجمد او تسيح زى السويت

العيوب

هى ملهاش اى عيوب غير انك ممكن متعرفيش توزعيها بدهر المعلقه كويس يعنى متعرفيش تخليها طبقه رفيعه اوى

هتشيل الشعر عادى بس قصدى هتستهلكى منها جزء اكبر من المطلوب

*************************************
خلصت الموضوع لو عندك اى سؤال انا موجوده

والموضوع مجهودى الشخصى واسمح بنقله لتعم الفائده لكن مع ذكر المصدر

ومتنسيش التقييم سواء عجبك الموضوع او لاء لانه رأيك يهمنى

سلام يا قمرات

[CaTwOmAn]

تسلم ايديك

[koke2000]

طريقة حلوة اوى بس الكسل بعيد عنك

[ارق الزهور]

تسلم ايدك يا قمر فكرة حلوة جدا

[مىمى22]

موضوعك حلو تسلم ايدك ممتااااااااااااااااااااااز

[poopoo]

تسلم ايدك طيب انا ممكن احطها جوه علبه الشمعه الفاضيه واشتغل بالرول ولا ايه رايك؟؟؟؟

[*البشوشه الطيبه*]

[خطيبة وليد]

والله قيمت من قبل ماراد
ممتااااااااااااااااااااااز مش عايزة كلام

[Negoom]

تسلم ايديك يا قمر

[حدوتةاسكندرانية]

تسلم ايدك طيب انا ممكن احطها جوه علبه الشمعه الفاضيه واشتغل بالرول ولا ايه رايك؟؟؟؟

تسلم ايدك فكرة حلوة قوى وسهلة بس انا برضه بسال نفس السؤال تنفع فى الشمعة بتاعة الواكس الفاضية

وشكرا ليكى يا قمر