[مشمشة فتكات]

جدول الضرب مغلباك تعالي وانا اقولك بنتي حفظته ازاي...وهي علمتني احفظه ليها ازاي

انا بنتي مغلباني جدا فوق الوصف

واقولكم انا كمان عصبية جدا عليها (الله يهديني ويهديها ويهدي اولادنا كلنا يا رب بفضلك)

وبصراحة كانت عايزة اصبر لحد ما التجربة تنجح بنسبة 100% لكن قلت اكيد في غيري امهات تعبانيين والمفترض نساعد بعض

وهقولكم كمان تبادل الأفكار حول الموضوع بيخلينا نوصل لأفضل الطرق من خلال التجربة العملية

انا عارفة ان في موضوعات كتيرة عن الأمر ...بس التجربة بيكون لها وضع مختلف

المهم هقولكم الطريقة...وهي بسيطة... واحب اشكر في البداية دودو المعادي اللي اوحت ليا بالفكرة

انا قلت لبنت الضرب عملية تكرار بمعني انا عندي

4+4+4+4=16

وطلعت علي ايدها اليمين اربع صوابع علي ايديها الشمال اربعة وعلي ايدي اليمين اربعة وعلي ايدي الشمال اربعة وبدأت تعد..وبكده فهمت ان الضرب ما هو اللي اختصار لعملية الجمع المتكرر

وبعدي هنشرح ليكم مثال وطبقوه علي باقي الأرقام

قلتلها اي عدد ضرب الصفر بيساوي صفر...ليه هنفرض الهوا اهو واضربي بايدك في الهوا (زي الملاكم اللي بيتخانق مع الهوا...انت ضربت حد...ردت وقالتلي لأ)

قلتلها اذن نخلينا حافظينا ان اي رقم ضرب الصفر يساوي الصفر مباشرة

وهاخد جدول ضرب 2 مثال

2x0=0

وبعدين اقولها اكتبي

2x1=2

يعني بنطلع علي ايدينا 2 بنعد بعد الصفر علي ايدينا 1 ... 2

اذن حاصل ضرب 2 في 1 هو 2

2x2=4

يعني بعد 2 بنطلع علي ايدينا 2 ونعدهم بيكون معانا 4

وبكده كتبت جدول ضرب 2 كامل كله عن طريق العد

الجديد بقي اني خلتها كتبت كل الجداول بنفس الطريقة ومع بعض بالأضافة اللي هي عملتها بصراحة وكان الأبداع اللي عملته بنتي ربنا يحفظها...شئ خليني انا وهي قريبين من بعض

لأنها كانت ما تكتب جدول ترسم جنب منه


قلب وتكتب جواه "انا بحبك يا ماما"

فخليتها كل ما تكتب جدول تكتب انا بحبك يا ماما

وانا اكتب لها في النهاية بعد ما اعلم لها الجدول زي المدرسة

بحبك يا احلي بنت في الكون

هقولكم قربت منها قوي وهي كمان قربت مني وبطلنا بنسبة كبيرة نكون ناقر ونقير طول الوقت


وكتبت كل الجداول وفي ظرف اسبوع كانت حافظة الجدول بنسبة 50% تقريبا وبجدعن معاها جدا وبتكتبه كله يوميا بنفسها ولما بتتزنق بتعد علي صوابعها ما هي فهمة الفكرة

وانا كل يوم أسألها

4X2=????

طيب

2X4=???

وبكده عرفت ان عملية الضرب تبادلية

كده انا خلصت تجربتي

وانت تجربتك ايه؟؟؟

في انتظاركم

بحبكم في الله

مشمشة فتكات

[مشمشة فتكات]

ما شاء الله هي حفظت جدول الضرب لحد جدول 10 كله بنسبة 50% ودي انجاز بقالي شهر بحارب عشانه

ربنا يحفظها

ومن كتر تكرار الكلام الحلو بيني وبينها اصبح في ود اكتر وقرب اكتر وبطلت عصبية بشكل كبير معها حسيت معها بالدفء وبالهدؤ النوعي اللي انا كأم محتاجه

ادعولي ربنا يقوينا عليهم ويهديهم ليا

ولكم بالمثل

وياريت يا فتوكة تقولي تجربتك

تكسبي فينا ثواب

[سوما السمسومه]

ربنا يخليكم لبعض

[المستقلة عاطفيا]

ما شاء الله لا قوة الا بالله
ربنا يحفظهالك

[#نهى#]

ماشاءالله ربنا يباركلك طريقه جميله

[ميمي المدنى]

احنا عدينا المرحلة دى من زمان وكانت فعلا ازمة

[ريشة خفيفة]

ربنا يخليها ليكى حبيبتى

[بيبو هوب]

ماشاء الله
ربنا يبارك فيها

[من القاهره لكم التحيه]

هههههههههههههه ربنايحفظهالك حبيبتى انابنتى الصغيره فى الصف الثالث الابتدائى وبتنسى الجدول برضه انابقى ماشيه معاها بمبدأالتكرار يعلم الشطار

بخليهاكل يوم تكتب الجدول واراجعه معاها فى كراسه اسمها كراسة ماما ودى معوده اولادى كلهم عليها من صغرهم ربنايهديهم وينجحهم كلهم يارب

[YaYa_منار& ساحرة العيون]

ربنا يخليكم لبعض
و يوفقها و يفرحك بيها