تنبيهات هامة:
اولا) اذا وصلتك اي رسالة خاصة من عضوة تعرض عليك الانضمام لمنتدى اخر فارسلي رسالة خاصة فيها اسم العضوة الى احدى المشرفات لايقاف سرقة العضوات، ايضا اذا وصلتك اي رسالة خاصة من عضوة تعرض عليك بضائع للبيع فارسليها الى احدى المشرفات.
ثانيا) تجاهلي اي موضوع يتكلم عن شحن الجوال ببلاش او وجود ثغرة في موبينيل او فودافون او اتصالات حيث انها تسرق رصيدك!
ثالثا) الرجاء عدم اضافة مواضيع عن الجرائم او الصور المفزعة او صور فيها نساء متبرجات او اغاني او انتقاص من قدر اي شخص.
اخواتى فى الله
أنا مهندسة ديكور ..
حبيت أفيدكم بما انعم الله علي من علم فى مجال تخصصي
وفكرت اعمل الموضوع دا للفائدة العامة كالتالي:
1- أي استفسار من الفتوكات يا ريت يكون داخل الموضوع دا
علشان الرد يكون فيه فائدة للجميع ..يعني بلااااااااااااش رسائل خاصة..
2- يا ريت الفتوكات اللي مرو بتجربة تاثيث بيت جديد ( كعروسة مثلا )
أو عملوا عمرة وتجديد لبيتهم يحكوا للأخوات عن التجارب دي
علشان الكل يستفيد من الاخطاء ونتفادى السلبيات...
3 - ويا ريت حبيباتى بلاش تسألونى عن الصنايعية
او النجارين الكويسين لانى لا اعرف....
4 - وطبعا فوق كل ذي علم عليم لو اتزنقت فى سؤال حبقى اسال صحباتى
وانتوا كمان ساعدونى اللي يعرف حاجة كويسة يدخل يرد بقلب جامد...
وان شاء الله تستفيدوا من الموضوع دا....
ولا تنسوني من صالح دعائكم بظهر الغيب
ادعولى بالولادة السهلة
اللهم اني استودعك جنيني يا من لا تضيع ودائعه, اللهم ثبت حملي,اجعله سليم معافى لا زيادة في خلقه ولا نقصان, واجعله صالحا بارا بوالديه وحافظا لكتابك http://tickers.baby-gaga.com/p/dev311pr___.png
بسم الله الرحمن الرحيم
drnahla
اختيارك موفق فى البروسلين العسلي للرشيبشن
وانا معاكي الارضية كل ما تكون بسيطة ولونها محايد بتكون أشيك
وبدون اي حركات اللهم الا لو حبيتي تعملي السكولو لون اغمق + اطار 5 سم يلف المكان كله ....
الخشبي للمطبخ ظريف وخلانى اسرح فى الوان جريئة لدواليب مطبخك زي درجة معينة من البرتقالي او الازرق....
الحمام الموف حلو برضه لون هادى ومريح...
انا بس اللي قالقني لون ارضيات الغرف الابيض؟؟؟
ليه ما يكونش بيج برضه؟؟؟؟
بالنسبة لتعاملك معاهم على النت دا حلو جدا
ممكن كل اختيار يبقى بالصور لو عندهم كاميرا ديجيتال يصورو ويبعتولك
او تدخلى على مواقع السيراميك وتختاري اكتر بلاطة مريحاكى وتبعتي صورتها ليهم.....
وبشكل عام قاعدة ذهبية
خذي عينة من سيراميك الارضيات وخليها دايما معاكي
ومنها طلعى درجة لون الدهان المتناسق معها للحائط والسقف
و خدي عينه من الدهان والسيراميك معاكي في كل حتة وانتى بتختاري
الوان اقمشة التنجيد والستائر والسجاجيد
وكل ما كانت درجات الالوان فى البيت مدروسة كويس ومتناسقة
البيت حيبقى مريح جدا وبالبلدي ريحة خفيفة وشرح
عندى استفسار لو ممكن
انا بجهز في شقتى ها ركزى معايا
عندى اوضه من الاوض النوم الشباك بتاعها على منور والاوضه اللى جمبها فيها بلكونه يبقي حلوة لو فتحت باب بين الاوضه دى ودى على اساس انه يدخل هوا بس الاوضه هيبقي فيها كده اكتر من باب
ارجو انك تفدينى ولو قلتيلى افتح الباب او اقفله ياريت تقوليله ليه قواتى كده يعنى وجهه نظرك للموضوع ..ويبقي جزاك الله خيرا
بسم الله الرحمن الرحيم
fatmagdey
بخصوص فتح الباب بين غرفتين نوم ما ينفعش يبقى بغرض التهوية بس
لان غرف النوم اللي على المناور بنلجأ لحل مشكلة تهويتها بالتكييف
وخاصة النوع اللي بيغير وينقى هواء الغرفة يعني بيعمل زي شفاط المطبخ كدا
ومن فترة للتانية بنهوي الفرش والسجاد فى مكان فيه شمس .....
ولو حسبتي التكلفة بين التكييف وفتح الباب وشراء باب خشب الفرق مش حيكون كبير قوي
ولكن اذا:
كان فى استخدام تاني حتستفيدي من فتح الباب بين الغرفتين زي مثلا انه بين غرفة الوالدين وغرفة الابناء الصغار او مولود يعني....
وحتدرسي توزيع الفرش كويس في الغرفتين علشان كدا بتعملى اهدار للمساحة اللي عندك ..
ويفضل انه يكون باب جرار ( مدفون فى الحائط او على وجه الحائط )
علشان فتح الباب وغلقه برضه ما يستغلش مساحة فى الغرفتين...
اختى الغالية ديكوراتى :-
عندى سؤال :: كان من امنيات حياتى ان يكون عندى حمام فى غرفة النوم بتاعتى ولكن الظروف منفعتش .....وعند دراسة الشقة لقيت ان الحمام الرئيسى فى نص الشقة بيخدم غرف النوم كلها وبابه فى الطرقة الى فى النص ...
الاقتراح :: ان افتح باب يبدو صغير شوية (باب اوكارديون مثلا)فى الحمام من ناحية غرفة نومى ...على ان يكون الباب الاضافى ده خلف باب اوضة النوم ..يعنى محدش هيشوفه غير لما يقفل باب الأوضة ...
والغرض بصراحة استعمال الحمام بليل بشكل شخصى من غير ما الأولاد يحسو بيا .
بشرط قفل ترباس باب الحمام الرئيسى من الداخل..
بسم الله الرحمن الرحيم
انا معاكي يا ساندي
الحمام فى غرفة النوم الرئيسية حلو جدا
انا فهمت من شرحك ..مافيش مشكلة طبعا حتتاكدي من
المكان اللي حتهدي الحيطة فيه اذا كان فيه اعمدة ولا اناابيب مياه او غيره..
هوا المشكلتين اللي حيقابلوكى انتى والاولاد حكاية اللي يدخل الحمام يقفل
بابين بدل باب
دي اكتر حاجة غير عملية فى الموضوع وفى المستقبل كمان ...
وكمان الباب الاكورديون حيخليكي تخلي الحمام زي الفل على طول لانه مش بيعزل الريحة والحاجات بقى.....
لو تعرفي ترسميلي بلان لشقتك وتنزليه فى الموضوع ..مخطط يعني توضحيلي المقاسات التقريبية واشوف معاكي ما ينفعش نخلق حمام تانى فى اي حتة ...او استحملي بقى انتى والاولاد سلبيات فتح باب تانى ..والغاوي ينقط بطاقيته .........ههههههههههه
صباح الخير عايزة اسالك انا بجهز شقتى دلوقتى بس موضوع الالوان للحيطان محتارة فيها عايزة اعمل افكار جديدة وحلوة لان خطيبى مش هنا وانا بختار لوحدى واية رايك فى الاسبونش واحلى درجاتة اية
بسم الله الرحمن الرحيم
sadrose
ربنا معاكي ويتمملك على خير يا رب
الالوان بنختارها غالبا بالترتيب التالي حسب دورها فى تشطيب الشقة
اولا الوان الارضيات
ثانيا الوان الحوائط والاسقف
ثالثا الفرش والستائر
حاولى تختاري لون يكون اساسي محايد يغلب على الوان تشطيبات الشقة كلها
مثلا البيج ...
يمكنك فى كل غرفة التركيز على حائط يكون النجم مثلا الحائط خلف كنبة الصالون
الحائط خلف السرير فى غرفة النوم...وتدهينيه بلون اخر متناسق..او سبونج بلون اغمق بدرجة او درجتين...وغيرها من الحلول..
او تركيزي على الاسقف والكرانيش وتخلي الحوائط سادة
واليك هذا الموقع المفيد العبي فى اختيار الالوان براحتك http://www.behr.com/behrx/workbook/
السلام عليكم يا ريت عندى استفسار انا حجيب عفش شقتى ان شاء الله على لون البنى و نفسى اعمل الستائر على اللون النبيتى فى الذهبى يعنى البرقع ذهبى و الستاره نفسها نبيتى و فيها شغل خفيف ذهبى هل ينفع ولا مش حيبقى حلو ؟
و لو مش حلوه الالوان تنصحينى بأيه؟ اسفه للتطويل
بسم الله الرحمن الرحيم
raghoda
الستائر النبيتي بتدي شياكة للمكان وملفتة لو اتعملت صح
وانتى لسة ما اشترتيش الفرش ليه قررتي يكون بنى؟
اذا جبتى مثلا السفرة البنى الجوزى مش مشكله ولو فيها لمسات ذهبي فى قطع النحاس مثلا حتبقى حلوة ...
بس بالنسبة للصالون ليه ماتجبيش لونه ذهبي مط ومترب لو مابتحبيش الذهبي الانجليزى الفاقع...
ولازم يكون لون اقمشتك فيه درجات من الذهبي والنبيتي
ويفضل انك تحطي سجاد نبيتي او بيج وفيه لمسات من النبيتي
ولو لازم ولابد يعنى ومصرة الفرش يبقى بنى ارمي مفرش نبيتي في ذهبي على طرف الكنبة و وزعى خدديات نبيتى ومفرش الصالون كمان نبيتى
كدا بتعملي توزيع للون النبيتى فى المكان ....
علشان مايبقاش فى حتة واحدة بس ومنفصل عن بقية الوان الرسيبشن
بسم الله الرحمن الرحيم
drnahla
اختيارك موفق فى البروسلين العسلي للرشيبشن
وانا معاكي الارضية كل ما تكون بسيطة ولونها محايد بتكون أشيك
وبدون اي حركات اللهم الا لو حبيتي تعملي{ السكولو q}لون اغمق + اطار 5 سم يلف المكان كله ....
سورى ..يعنى ايه سكولو؟؟
الخشبي للمطبخ ظريف وخلانى اسرح فى الوان جريئة لدواليب مطبخك زي درجة معينة من البرتقالي او الازرق....
انا فعلا عندى مطبخى الالوميتال لونه لبنى ف ازرق
الحمام الموف حلو برضه لون هادى ومريح...
بالنسبه للبانيو هل المستطيل الكلاسيك اجمل ولا اللى بزاوية؟؟؟؟وله اشكال غير منتظمة
انا عاجبنى المستطيل العادى
انا بس اللي قالقني لون ارضيات الغرف الابيض؟؟؟
ليه ما يكونش بيج برضه؟؟؟؟
انا بقول ان الابيض بينور الغرف
العسلى ممكن يعمل جو كابة
ولا ايه رايك
اخليه عسلى احسن؟؟
بالنسبة لتعاملك معاهم على النت دا حلو جدا
ممكن كل اختيار يبقى بالصور لو عندهم كاميرا ديجيتال يصورو ويبعتولك
او تدخلى على مواقع السيراميك وتختاري اكتر بلاطة مريحاكى وتبعتي صورتها ليهم.....
وبشكل عام قاعدة ذهبية
خذي عينة من سيراميك الارضيات وخليها دايما معاكي
ومنها طلعى درجة لون الدهان المتناسق معها للحائط والسقف
و خدي عينه من الدهان والسيراميك معاكي في كل حتة وانتى بتختاري
الوان اقمشة التنجيد والستائر والسجاجيد
وكل ما كانت درجات الالوان فى البيت مدروسة كويس ومتناسقة
البيت حيبقى مريح جدا وبالبلدي ريحة خفيفة وشرح
ع فكرةانا عندى عفش بيتى وهننقله ف الشقة الجديدة
النوم لونها كريمى
الانتريه بيج
الصالون كحلى
اشكرك جدا يا قمر وفعلا موضوعك ممتاز
وكنت محتجاه
ادعولى بالولادة السهلة
اللهم اني استودعك جنيني يا من لا تضيع ودائعه, اللهم ثبت حملي,اجعله سليم معافى لا زيادة في خلقه ولا نقصان, واجعله صالحا بارا بوالديه وحافظا لكتابك http://tickers.baby-gaga.com/p/dev311pr___.png
drnahla
السلام عليكم ورحمة الله
1- السكو لو يعني نهاية حرف الحائط مع الارضية بيبقى حوالى 10سم وبارز بتاع 1.5 سم كدا....فى ناس بتعملو دهانات عادي وانا بفضل انه يتكسى من نفس خامة الارضية ....
2- انا برضوا رايي ان البانيو المستطيل عملي اكتر وشكله حلو برضه خاصة لو فصلتي ليه ستارة موف وحركات بقى...البانيو الزاوية انا بعتبره كماليات يعنى لو عندك حمام تانى للضيوف مثلا ممكن تركبيه هو شكل اكتر من وظيفة....
3- السيراميك الابيض حيتعبك فى النظافة وفكرة ان يفتح مش قوية اوى اي لون فاتح بيفتح المكان .....وانتى بتقولي النوم لونها كريمي...ممكن تجيبي سيراميك بصلي فاتح قوى ...وتدهنى الحائط خلف السرير ريهات بيج فى بصلي مثلا...والسجاجيد والستائر تكون بصلي علرفة لون قشرة البصل اللي مش برتقالى ومش بنى ححاول انزلك صورة بدرجة اللون..
4- الصالون الكحلي كان نفسي ادخل الفضي معاه بس ما ينفعش علشان لون البروسلين والانتريه
فاحنضر نختار ستائر ذهبي ونعملها اكسسوارات كحلى ...وماوصكيش بقى مفارش وخدديات كحلى فى الانتريه وتابلوه صيراما كحلى فى ذهبي مثلا خلف كنبة الصالون...ولو عرفتى تعملى كسول او مرايا بروازها كحلى فى ذهبي او بوكيه ورد كبير كحلى فى ذهبي يعني وزعي الالوان فى الرسيشن وطبعا يا ريت سجادة الصالون تكون كحلي..
5- وممكن بلمسات بسيطة تغيري في فرشك وتجدديه يعنى تجيبي استورجي لغرفة نومك يعدل دهناتها ويضيف لمسة بشياكة بسيطة يعنى من الذهبي عليها وتغيري مقابض الدواليب وتنجدي كرسي التسريحة وممكن تزوي مرايات على الدولاب ..والانتريه لو مش عايزة تغيري تنجيده ممكن خدديات حلوة كدا عند خدديات حلوة قوى كانت فى القرية العالمية فى دبي الجناح الفلبيني مطرزة بشرايط الستان ومش غالية الواحدة ب عشرة درهم تقريبا
