[eg.meramar]

وروني ذكائكوا يافتكاواااااااااات
بصوا انا خطر على بالى موضوع بصراحه كانت واحده صاحبتى بتحكى معايا واخدت الفكره من كلامها وقلت اعرضها عليكوا وتقولولى رأيكوا طبعا انا استأذنتها انى اعرض الموضوع عليكوا يالا بقى عشان نشوف لوا انتوا مكانها تعملوا ايييييييييه

لو انتى بتحبى جوزك قوى وهوه كمان بيحبك ومفيش بينكوا حاجه بتخبوها على بعض لدرجه انه كل حاجه بيحكيهالك طيب لحد دلوقتى كله تمام صح ماشى طيب لو هوه كمان بيحكيلك عن واحده شافها حلوه شكلها عجبه..بيتكلم معاكى عادى يعنى مثلا لو حكالك انا شفت واحده اجنبيه وركبنا الاسانسير وبيقولك اول مره اعرف ان الشيطان بيسوق الواحد وقعد يستغفر طبعا ماحصلش حاجه دى كلها حاجات فى دماغه يعنى اقصد انه بيقولها كل حاجه اللى حصلتله واللى ممكن تكون بتدور ف راسه قابل مين كلم مين كل حاجه كل حاجه ماشى هيه مشكلتها انها اكيد هاتغير وهاتتضايق بس بتتحكم فى اللى جواها عشان لما بتحاول تبين انها زعلانه او غيرانه بيقولها يعنى انا غلطان انى بحكى معاكى ومش بخبى عنك حاجه هوه عينه مش زايغه ومحترم قوى انا اتعاملت معاه عن قرب هوه دايما بيقولها انتى سري ولما بحكيلك كده بكون ساعتها بتكلم معاكى كانك واحد صاحبى يعنى هيه بالنسبه له كل حاجه اوقات مراته وامه واخته وصاحبه انتوا فاهمين ولا اييييييييييييييه
بس هيه ساعات بتحس بالخوف وبتبقى عايزه تقوله كده انت هاتخونى ؟ انت ممكن تحب واحده غيري بس بتخاف لا معدش يحكيلها حاجه هيه متلخبطه قوى قوى انا عايزه كل واحده منكم تحط نفسها مكانها وتقولولى هاتعملوا ايه وهاتتصرفى ازاى هاستنى ردودكم وخصوصا المتجوزين من فتره اوك

اذا اعجبك الموضوع و اردت نشره في المنتديات الاخرى فاستخدمي هذا الرابط:
ورونى ذكائكوا لو مكانها تعملى ايه
http://forums.fatakat.com/thread27635

[dr.sasu]

بسم الله الرحمن الرحيم
انا قريت موضوعك باهتمام يا ميرامار..
احنا كده يا ستات نقول بنحب الصراحة المهم ان الصراحة بتزعلنا ..
بصى يا ميرامار انا معالكى ان الصراحة شئ مطلوب فى العلاقة الزوجية بس مش لدرجة انه يقول ده انا شوفت فلانه و عجبتنى الا لو هو كان عاوز يخالينى اغير عليه ..و بكده بدون قصد بيضيع راحة البال و الثقة من الحياه الزوجية ...ياريت اختنا العزيزة فى وقت تكون قريبة منه تلفت انتباه انه الموضوع ده بيضايقها و ياريت لو تخاله كانه نكته يعنى قعدين يتفرجوا على التلفيزيون و شافت وحدة حلوة ..تقولوه بشقاوة بزمتك مش انا احلى منها ...لو هو صريح حبتن هيقول رايه كالمعتاد ساعتها قوليلوا انا بحبك لما تجاملنى عارف عنيك لو شافت وحدة احلى منى يبقى جالك ضعف نظر وهكذا ....طيب الاخ لم يرتجع و فضل على نفس المنوال يبقى الوضوح والصراحة انتى كمان ...متفهمنيش غلط ..مش معقولة انتى هتعملى زيه ...لا توجهيه بس بزوق تحكى عن فلانه اللى زوجها دائم البصبصة وانه بيحكلها ..و انك اندهشتنى لما بتحكى قدامك انه كان لما بيشوف واحدة حلوة بيقولها ...لحد مفجاءة عرفت ان فى واحدة بتطارده ...و ان زوجته مرحمتهوش اتسببت له فى مشكله فى الشغل ...اصلك متعرفش الست لما تنجرح ممكن تعمل ايه ...و استنى شوفى هل هيسالك انتى لو مكانها تعملى ايه و لو مسالش كفايه عليه يفكر .....اخر حل للراجل اللى بيكبر دماغه انك تجبيها على بلاطة ..

[eg.meramar]

شكرا على ردك يا ساسو ياجميله وان شاء اللهبقولها على رايك

[ناناودودي]

موضوعك محير اووووووووووووي بس انا رايي ان طالما الزوج صريح معاها للدرجه دي يبقي دي نعمه كبيره اوي لا يمكن يحسها الا الي محروم منها ودي بتبقي ميزه رائعه في الرجل لما بيعتبر مراته صديقته
لكن هيه مش تعاقبه بذنب الصراحه دي يعني هو لما حكي ليها عن الموقف الي اتعرض له وانه شاف وحده وبصره مال ليها هيه بينها وبين نفسها لازم تبقي عارفه ان جوزها مش ملاك ومهما كان متدين فلشيطان له طرقه وبالذات الرجاله بتضعف قدام الحاجات دي وهو بشر ممكن عينه تميل ولو دقيقه ويرجع يستغفر
لكن هيه المفروض تسمع منه وشويه كده وتقوله اه يا حبيبي بس انت عارف انك دلوقتي مغضتش بصرك وعارف انك كده عصيت ربنا وومكن تاخده بهزار وتقوله عنيك ما تزوغش تاني لانك لو عملتها هحس وهعرف وزعلي هيبقي وحش ودايما من وقت للتاني بشكل غير مباشر تلفت نظره لحرمانيت ده
وعايزه اقولك حاجه كمان هو كونه حكلها علي موقف زي ده مش معناه انه مش بيراعي شعورها لا بس هو اتعود علي الصراحه وهو ممكن يكون شايف انه كده جرحها من وراها وخان ثقتها فحب يكفر عن ذنبه بان يحكلها الموقف
انا من رايي اي واحده قدرت تكسب جوزها كصديق تحافظ علي ده بكل الطرق ولما يجرحك احسن من انه يخدعك وتعيشي معاه مغفله وانتي فاكره انه اخلص زوج

[eg.meramar]

انتى فعلا صح يانانا لان الراجل بيضعف والواحده مش فايدها غير انها تحافظ عليه وده احسن بكتير من انه يعمل اى حاجه من وراها انا ميرسى قوى على ردك يانانا

[كادبورى 81]

بسم الله الرحمن الرحيم
بصى بقى يا ميرامار انا بصراحة مش عارفة صاحبتك دى مستحملة ازاى
انا افهم ان الست ممكن تعدى لزوجها انة يبقى ماشى معاها فى الشارع وتلمحة بيبص على واحدة فتعمل نفسها مش واخدة بالها لا الللى انتى بتحكية دا لا يطاق
دا كأنة بيقولها فى وشها(( انتى مش مالية عينى))
وبعدين ازاى هو محترم ومؤدب وعينية مش زايغة زى ما انتى بتقولى ويتكلم بالبساطة دى عن ذنب كدة هو بيستحل الذنب وبعدين هو يعنى مش عارف ان العين بتزنى
لا انا مش مع صاحبتك خالص فى اللى بتعملة لازم تكلم جوزها ان مكنش عشان خاطر نفسها((لانها اكيد هتضر نفسيا ))يبقى عشان ربنا وحرمانية اللى بيعملة
يا ميرامار مش كل حاجة نعديها فية حاجات لازم يبقى فيها (( stop ))

[ضحي *]

بص يا شيماء الي مش قد الصراحة خلاص بقي يكدب عليها وعلي العموم لو جوزي عمل كده حشوف أيه الي عاجبه فيها وأعمل أحسن منه وبطريقتي بقه

[crazy_tota]

انا شايفة مدام الراجل مش بيخبي حاجة يبقي مش في نيتة حاجة تقلق اول ما يبدء يخبي بقي نقلق
وبعدين هو عاملها زي صاحبة يبقي المفروض تسمعة بعقلها مش بقلبها
وبعدين تشوف يعني لو عجبة فيها اية اللي شافها دي وتعمل في نفسها زيها عشان ميبصش برة
وعموما مفيش راجل مش بيبص

[همس الحب]

بصى يا حبيبتى انا كمان وجوزى كده وبيحكيلى اصخم من كده كمان بس لازم اتحكم فاعصابى بزعل اه بس لازم اكون فاخورةانى حاجة كبيرةاوى بالنسبالى وانه كل حاجة بيحكهالى حتى الخيال اللى بينه وبين نفسه رغم انى هزعل اوى بس هفرح اكتر ما هزعل وعمرى فحياتى مهدى لنفسى فرصه انى اكر انه ممكن يخونى يا حبيبتى الحب ده نوع نادر الوجود ومدام بيحبها اوى كده يبقا صعب يخونها
ياحبيبت قلبى حب الراجل للست مختلف تماما عن حب الست الراجل الراجل لاما بيحب بيحب بجد وعمره مينسا اللى حبها لو مهما فات الوقت
انما الست والحمدالله ربنا مدينا نعمه النسيان اكتر من الرجل مهما طالت مده حبنا بنقدر ننساها انننننما الرجل لاء قوليلها احمدى ربنا ومتحكيش لاى حد اللى بينهم ده عشان لا قدر الله ميبقاش عكسه بعد كده وقوليلها اطمنى اللى يحب بالدرجه ديه ميقدرش يخووووووووووووووووووووون

[ام سراج]

الصراحه حلوه جداً بس الزياده ممكن تجرح
رايي انها تقوله في قعده صفا انها بتحب صراحته بس برده هوه يعمل كنترول شويه مش يبص ويبحلق ويفصل ويتخيل ..ده كتير!!
امال فين غض البصر؟
ياريت..يعملوا حاجه دينيه مشتركه..يعني يصلوا جماعه كلما امكن..يقرأوا سوا قرآن في يوم محدد من كل اسبوع..وندعوا له بصلاح الحال وغض البصر