[قطرات الندى 2]

.ياجماعه مع كثرة المشاكل الزوجيه فى البيوت والتى تكون اساسها فى معظم الاحيان ام الزوج وفى بعض الاحيان تكون الزوجه مظلومه فهل يعقل انه لايوجد راضع اى مانع دينى لهذه المشاكل يعنى مفيش حديث او حكايه كانت حصلت زمان ايام الرسول بتوضح حدود ام الزوج وحقوقها وامتى تتعاتب
ولا لا
وكمان لو كان الزوج من النوع شديد التعلق بامه واسرار بيته عندها ده انتهاك لحرمة الزوج ام لا عادى شىء طبيعى
واذا كان ليس طبيعيا وانتهاكا للحرمات فما الدليل القرءانى او حديث او اى شىء نستطيع ان نتكلم به
ارجو ان تكونوا فهمتونى.

[dodi80]

اختى العزيزة دودو
انتى بنت حلال واللهى انا عماله الف وادور علشان الاقى اجابة للسؤال ده علشان انا برده ساعات بلاقى حاجات غريبة بتحصل من ام زوجى وطلبات زيادة شوية بس طبعا مش بتكلم بس من جوايا ببقى متضايقة فببقى عايزة اعرف بس هى صح ولا غلط لأنى ساعات كتير اوى بقول لنفسى لازم تتحمليها حتى لو هى ايه علشان ربنا امرنا بكده بس هى ايه حدود التحمل ده اللى ببقى عاوزة اعرفه ؟
عندى واحدة قربتى مثلا مخطوبة عندها تقريبا 29 سنة وخطيبها عنده 34 سنة وبيعمل فى بلد عربى ورغم كده امكانياته محدودة وهى واقفت على الارتباط بيه لانها حست انه شخص كويس واتنازلت عن مطلبات كتير ليها هى كانت مخطوبة قبل كده بس هى وخطيبها دلوقتى مش قادرين يتزوجوا لأن والده متوفى ومامته عندها معاشها وليه اخ اكبر منه برده فى بلد عربى بس خطيبها حاسس بالمسئولية تجاه اسرته يعنى لو اخته بتولد هو اللى يتكفل بكل مصاريفها , من راى والله اعلم يعنى هى متزوجة وزوجها برده بيعمل فى بلد عربى يعنى مش محتاجة ليه هو يحمل نفسه فوق طاقته , يعنى احتياجات ام فوق الستين ايه غير اكلها وشربها هى لازم تجدد فى عفش بيتها وتشترى دهب وهو ميتجوزش علشان ده يبقى بر وهو معندوش مشكلة خالص بصراحة انا مش عارفة اقول لها ايه هو من الناحية الدينية عايز يبر امه ويخليها مش محتاجة اى حاجة , يعنى وجهة نظرى ام فى الستين من عمرها المفروض مالهاش طلبات ده احنا واللهى فى التلاتين من عمرنا ومالناش طلبات وهما فى الستين وطلباتهم اكتر مننا , يعنى هو مزنوق فى الجهاز دلوقتى بيبعت لمامته فلوس يقول لها اعملى بيها اى حاجة طب وبنت الناس اللى مستنيه بقالها سنة ديه تعمل ايه , وفى المقابل مامته تقعد تقول ده اصر انه يبعتللى فلوس واقوله يا بنى مش عاوزاه يقولها لأ لازم تخديهم يعنى هى لو مش عاوزهم بجد وعاوزة مصلحة ابنها تجيبله بيها حاجات تساعده بيها فى زواجه اللى انا اعرفه وشايفه اهلى بيعملوه يعنى لو امى فى نفس الموقف حتى لو معندهاش غير معاشها هتوفر منه علشان تساعد ابنها يعنى يمكن متاكلش علشان تدى لبنها ان مش عارفة بصراحة مين الصح ؟ وحدود البر ايه ظ وهل هى حتى لو صفة حميدة بس زيادة شوية يقى صح ولا ايه ؟ نفسى الاقى اجابة للأسئلة ديه

[توته1]

الموضوع فعلا صعب ، ومشكلة لما تتعارض المصالح بين الأم والزوجة
ومش هقول لكم ان أنا في البرج العاجي ومش حاسه بيكم
لكن عايزه أقول لكم حاجه وعن تجربة وهى
( إن الخير لايأتي إلا بالخير ) صدق رسول الله صلى الله عليه وسلم
ولما الواحدة تنوي بالخيرده انها تعين زوجها على بر أمه هي هتشاركه في الأجر وده في الآخرة
أما في الدنيا هتلاقي ربنا فتح عليكي _ ولو بعد حين _ بس متستعجليش
وخلوا بالكم ان الراجل أمه رقم 1 ، أما المرأة زوجها رقم 1
وحتى لو بالغ شويه في رضاها معلش .. دي دعوتها ليكم بالدنيا
واوعوا تفتكروا ان أنا مش حاسه بيكم أنا بقولكم عن تجربة
هي صعبة بس بنيتكم الطيبة ربنا هيكرمكم واوعوا تنسوا
( إن الخير لا يأتي إلا بالخير )

توته

[قطرات الندى 2]

عارفه يا اخت دودو مشكلت الفلوس دى مش مشكله خالص انا اسمع فى بعض البلاد الريفيه ان عيله كامله بتعتمد على واحد بس وتسفره بره وهو يصرف على كل العيله وبالنسبه للى هو بيعمله لامه او لاخته ده عادى من نحيت مصاريفهم وخطيبته متبصش لموضوع الفلوس بس تبص هو ياترى بيتعامل كده معاهم فى كل حاجه ولا الفلوس بس ثانيا هى المفروض تضغط عليه بس بطريقه غير مباشره يعنى مش تقوله ده انت اديتك مامتك فلوس واحنا لسه مفيش حاجه لا تقوله مثلا بابا بيسئل بابا متضايق انا خايفه انا قلقانه احسن بابا كده يعنى تبينله ان عندها مشكله فى التاخير
لكن مشكلة الفلوس دى انا بشوف كتير بيسرفوا على اهليهم وهما متجوزين بل بالعكس ساعات الراجل بيسرف على اهله عشان ميتدخلوش فى حياته ويسيبوه فى حاله

[قطرات الندى 2]

اخت توته انا متكلمتش على موضوع البر خالص انا معنديش مشكله انه يبرها انا عندى استعداد يصرف عليها كل مصاريفها وهو اصلا بيروح ليها كل يوم ومعطل شغله ومصالحه عشانه تقريبا بيعد معاه اكتر ما بيعد معا يا سواء بمزاجى او غصبن عنى كل ده مفيهوش مشكله عندى وانا الى بسئله رحتلها مرحتلهاش خلى بالك كده لكن تدخلها فى حياتى وطاعة الزوج العمياء ليها اظن الزوج دلوقتى معتش ابنها وبس بقى ليه زوجه مسئوله منه وليها حق الرعايه مش بالله عليكى ميرضيش ربنا ان جوزك يسيبك تعبانه بالساعات وميرجعش غير اخر الليل عشان خاطر قاعد معاها مع العلم انها صغيره فى السن وصحتها كويسه جدا وزى الفل يعنى وميرضيش ربنا انه يهملك وانتى لسه عروسه عشان مامته متقولش اخدته منا ويعامل بطريقه ناشفه قدامها عشان يعرفها ان هو صاحب الكلمه زى ما هى مواصيه دى بس التعاملات ومش عايزه احكيلك عن الافعال غير افعالها هيا غير سويه الواحد بيصعب عليه نفسه يا توته دى وصلتنى انى ادعى عليها مع انى مبحبش ولا عمرى دعيت على حد ووصلتنى انى اتمنلها الموت لانها اخدت فرحتى منى حتى الضيوف الى كانوا بيجوا لاى عروسه ويحسسوها بفرحتها هيا الى كانت بتقابلهم فى شقتها خدت احلى ايام عمرى خدت جوزى منى فى احلى ايام عمرى انا ساعات بحس انها ضرتى هههههههههههههههه
الحمد لله

[أم الطيب]

بصي يا دودو انا فاهمة انت تقصدي ايه انا مع توتة في كلامه وعايزة اوضحلك ان البر مش بالفلوس والماديات وبس.. لما يكون جوزك عارف انه لو مقعدش مع امه هتغضب عليه وهتزعل منه يبقى لازم يقعد معاها انا عايزة اقولك ان الام لا تُسأل يوم القيامة ما ابكاك ولكن تُسأل من ابكاك..
وان لو امه غضبت عليه يبقى مفيش بركة في حياتكم ولا خير فيه..
هو المفروض انه ياخد باله من متطلباتك ويقعد معاك واولاده زي ما بيقعد معاها وهو بتصرفاته دي مخليك حاسة انها ضرتك لانها بتاخده منك..
اما عن حقوقك فمن حقك الا يحكي لها اي شيء لها ولا رايحة فين ولا اشترتي ايه وممكن تقوليله انك مش مسامحاه لو حكى حاجة عنك لان كل بيت وله خصوصياته وكمان لا تسكتي ابدا عن حقوقك المؤجلة..
بس لازم تكوني ذكية وماتجيش مرة تقوليله يا انا يا امك لان كفة امه اللي هتكسب.
ربنا يهديلك الحال ويشرح صدرك ويهديلك جوزك.

[قطرات الندى 2]

انا اول ماشوفتك بره عامله رد دخلت بسرعه عشان اشوفك كاتبه ايه عشان بحب ردودك يا ام الطيب انا معاكى فى غضب الام وكل ده بس عندى مشكله جامده اوى لو تقدرى تساعدينى فيها جايز نفسيتى تستريح
ان انا مش بحترم مامت زوجى من جوايا ولا بعتبرها ام من تصرفتها وهى خاله ليا اصلا فكنت بشوفها من وانا صغيره مصدر انتقاد للجميع وكانت مغلبه جوزها اوى فتولد من جوايا عدم احترام ليها ومش معترفه بيها كام وغضبها وبرها مش معترفه بيه اصلا انا بس بصبر عشان جوزى ومشكلتى التانيه انى سلبيه جدا اى حاجه تحصل تضايقنى مبتكلمش ولا حتى بعبر بس بخزن جوايا وانا الى بتعب ومش بقدر اوجه زوجى خالص ومقدرش قاقوله انى مش راضيه لو قولتلها خصوصيتنا ولا ققدر قاقوله اى كلمه عن اهله لانى بحترم جوزى جدا وبقدر مشاعره وبخاف لاجرحه مع انى انا الى تعبانه بس ساعات بقول جايز يكون عارف ان مامته مش ست الحبابيب اوى وصابر عليها ومش بيبينلى فبلاش ازود او اخاف يكرهنى لو عاتبته مره على حاجه بسببها وخصوصا انه شديد التعلق بيها اوى وهى زارعه جواه ان الدنيا كلها ظلماها وانه معاشتش حياتها وانه مسئول عن كده مع انها واللهى مدلعه اكتر منى ولحد ناو

[dodi80]

على فكرة يا اخت دودو ان ساعات بحس باللى انتى بتقولى عليه ,وخاصة انها حاسة انها مظلومة ومعشتش حياتها علشان كده ساعات كتير بالتمس له العذر انه بيتعامل معاها كده , وبرده مدلعة نفسها اوى اوى اكتر منى بمليون مرة حتى قرايبى كلهم ملاحظين ده , وبرده مبتكلمش بس من جوايا مش عارفة انا بحبها ولا لأ , ده اللى بيضايقنى لما بتكون طيبة ومسكينة ببقى هاشلها جوا عنيى لأنى والحمد لله معنديش نية سيئة , لكن لما بتكون قوية وعنيفة بعامها كويس اه بس مش من جوه قلبى, ببقى مش مستحمل بس كله جوا نفسى برده
وعلى فكرة انا مش قصدى بر من الناحية المادية فقط لأ من كل النواحى
وليه البر ده مقصور على ام الزوج فقط هى امها مش ام برده ويجب عليها البر؟
انا ساعات كتير جدا باجى على امى علشان ارضى زوجى وميزعلش وكمان بيبقى على طلب من امى بس بصراحة امى بتصعب عليا يبقى اذن الموضوع مش موضوع بر بقى ده موضوع ان مامته مخها مش كبير شوية وبتزعل من اى حاجة وبتعمل نفسها كتير زعلانة علشان يعملولها اللى هى عاوزاه (هى نفسها اللى بتقول الكلام ده )فهل علشان ام عاقلة ودماغها كبيرة يبقى البر معاها كده وام تانية دماغها اصغر شوية يبقى البر معاها بالأسلوب ده , ودايما تحسسنى ان دعوة الحماة غير دعوة الأم خالص وليها مثل كده بتقوله ساعات بحس انها عاوزة تلغى امى مش عارفة ده مجرد احساس فقط واللى بيضايقنى انها مش بتقول لبناتها كده ، بحس ساعات ان المعاير بتختلف مش عارفة بصراحة ده احساس ولا حقيقة اللى بيضايقنى اوى شعورى الداخلى خايفة تكون دى كلها احساسات واكون ظلماها بمجرد الظن واشوف بقى ويلى يوم القيامة
وفعلا انا رقم1 عندى زوجى فعلا ده بيبقى مختلف عند الزوجة شوية لكن اخوات زوجى البنات رقم 1 فى حياتهم مامتهم ثم مامتهم ثم مامتهم فبضايق شوية من التناقض ده ايه رايكم؟

[أم الطيب]

اشكرك اولا على كلامك الجميل..
وثانيا انا عاجبني فيك انك فاهمة حماتك وفاهمة جوزك يبقى كملي بأه وكبري دماغك على الآخر وحاولي تعامليها زي ماهو بيعاملها وبكده هتكسبي رضا زوجك أكتر ويمكن رضا حماتك..
متديهاش فرصة تحس فيها انها بتضايقك او بتغيظك.. اسمعي من هنا وخرجي من هنا.
وانت بذكائك شدي جوزك ناحيتك شوية ادلعي عليه وطول اليوم تكوني لابسة لبس حلو ملفت يشد انتباهه.. لما يقعد يتفرج على التليفزيون او يقرأ او حتى يتكلم في التليفون الزقي فيه وبحركاتك بأه هتخليه حاسس انه معاك مدلل..
ربنا يهديه ويهدي حماتك ويهديك ويهديني انا كمان

[dodi80]

وعلى فكرة انا اول ماتزوجت كان زوجى على طول نبطشى هو يدوبك اول 10 ايام من الزواج بس لكن كان نبطشى تقريبا 3 ايام فى الأسبوع ومكانش بيجى البيت الا خميس وجمعة وباقى الأيام لو جه بيجى متأخر وتعبان وعاوز ينام علشان عنده صحيان بدرى وكنت باجى على نفسى كتير اوى واسيبه ينام ويرتاح علشان كنت بقدر ظروفه , واللى كان بيضايقنى اوى الاقيه مثلا جاى من شغله وجايب مامته وبابه واخوانه معاه تقريب كل يوم , ومرة يوم قالى انه هيكلمهم يجوا بس انا معرفش قولتله ازاى بلاش ,بس هو مكلمهمش فعلا بس دخل نام انا عارفة انه بيجى على نفسه وبيبقى نفسه ينام ويراح بس علشان ميزعلوش فكانوا تقريب على طول عندنا لأن مكنش فيه وقت نروح احنا , ولما عرفت انها بتزعل كنت بحاول يوم الخميس اللى هو فاضى فيه مع انه المفروض يكون معايا كنت بقوله نروح نزورهم تخيلوا انها كانت بتكلم واحدة صحباتها فى التليفون قدامى وتقولها ده اول مرة يجيلنا من يوم مااتزوج , وبرغم ده تقول ادام امى ديه اخدته وقدام زوجى والموضوع عدى طبيعى جدا ومش عادى خالص مفيش اى حاجة , على العكس بقى لو حماة بنتها قالت كده على بنتها زوجى نفسه بيقول لمامته طب ومردتيش عليها ليه؟
انا اللى بيضايقنى انى لما بتكلم فى الحاجات ديه بحس انها حاجات صغيرة اوى اوى مش مستاهلة اصلا ان الواح يفكر فيها بس ازاى الواحد يتغلب على الشيطان فى الموضوع ده؟

[مدام ساره]

بجد مش عارفه اقول ايه انا بدور علي حد يفدني في الموضوع ده لاحسن انا تعبت لما تكون ام الزوج هتكون السبب في خراب البيت وتشرد الابناء اعمل ايه والزوج بيخاف من مامته وديما بيصدقها في كل حاجهحتي ولو كانت علي حساب مراته افيدوني اعمل ايه عشان انا فعلا تعبت

[دعاءالامام]

ازيكم يا بنات انا مع رأى أم الطيب بس احب اوضح ان النوع دة من الرجال اللى امهم الاول مش هيتأثر لا بحركات ولا بدلع أنا رأى انها تسيبة وتأخد معاة الثواب وتصبر وتحتسب وما تحسسش حماتها انها متضايقة لكن اهم حاجة انة مايطلعش اسرار بيتة لها اما حكاية ان الزوج بيفرد أدام أمة دى حاجة كلنا بنعانى منها ربنا يهديلنا الحال جميعا ويهدينا

[قطرات الندى 2]

على فكره يادود انتى تقريبا بتحكى عن حماتى بظبط بس زياده عليها انها كمان ديما فى كلامها تهديد ليا بانى استقلالى فى شقه ده مش هيستمر وانها فى اى وقت هتخلينا نعيش عندها فى شقتها وديما بتفهمنى ان مفيش حاجه بتحصل غير بمزاجها وفعلا حكاية المخ الصغير دى
وعندى مشكله حديثه دلوقتى لسه بدءه تحصل وعايزالها حل حمايا
حمايا راجل يعانى من مرض مزمن وليه طرق معينه فى اكله وشربه وممنوعه عنه حاجات كتير مكنش بيخرج من غير حماتى لكن دلوقتى حالته اتحسنت وبقى بيخرج وبيزور الناس الحمد لله ورجع شغله تانى وبيجى يزورنى كتير هو وحماتى وفجاه ومن غير ميعاد وانا عادى لكن الجديد انه عايز يطلع من شغله عليا ويجى يعد معايا اولا مفيش حوار بنا نتكلم فيه ثانيا جوزى بيجى على بليل ثالثا انا معرفش اتحكم فى اكله ومش عارفه قاقول لجوزى ايه وجوزى حساس اوى وابوه مبيرداش يعاتبه ولا يكلمه على اى حاجه عشان تعبه رابعا انا حامل وبنام كتير واكيد ببقى عايزه قعد براحتى من غير تكتيفه غير طبعا مجيه معناه انى لازم اعمل غدا غير ان بطبخ تانى قبل ما جوزى يجيى عشان جوزى بيحب الاكل طازه وهو ومراته عارفين انى بنام كتير بس مش عارفه
وكمان بيجولى فجاه من غير ما ابقى عامله حسابى على اى حاجه وساعات بيجولى قبل ما ابنهم يجى بشويه ببقى انا قاعده بجهز عشان جوزى جاى وبحضر الاكل بيلخبطوا كل حاجه بس الجديد فعلا انه هيجيلى بعد شغله دى وبيعد فتره كبيره ومش عارفه احل الحكايه دى ازاى

[اسماء اسامه]

حبيبتى والله ربنا يكون فى عونك بجد انا حاسه بيكى بس مش عارفه اقولك ايه بجد غير اصبرى اصبرى اصبرى واحتسبى ذلك عند الله وحسبى الله ونعم الوكيل وربنا على كل ظالم ومفترى

[dodi80]

يا جماعة احنا عايزين الرد يكون من خلال اطار دينى ؟ ازاى يكون الحكم فى التعامل مع الحاجات ديه؟
انا الحمد لله مفيش مشاكل بتحصل مع ام زوجى لكن انا من جوايا مش مرتاحة بطنش كتير بس زوجى مش بيتحمل اقول راى فى اى موضوع خاص بمامته او بابه نهائى بالرغم انى بكلمه بالعقل وبمنتهى الأدب لكن هو مش بيتقبل ده نهائي بالرغم انه بيحبنى جدا وانا برده بحبه اوى , ولما الفت نظره انه ميتكلمش فى حاجة تخصنا يضايق اوى ويقولى ده ماما وبابا واخواتى مش حد غريب حتى واللهى لو مجرد ان احنا بنفكر مجرد تفكير فى حاجة عايزين نعملها لازم يقولها بصراحة لأى حد لأن ده طبعه مش هما تحديدا هما زيادة شوية وانا مش بحب كده خالص , بحس ان حياتى مش ملكى , ولما بحاول افهمه كده يقولى ان انا عاوزاه ليا لوحدى ومش عايزة حد يعرف عننا حاجة علشان بخاف من الحسد وان انا اللى مش طبيعية بس اللى انا بشوفه ان مامته بتتكلم كتير اوى فكتير جدا بتقولى على اخبار ناس متخصنيش اصلا وبتتكلم فيها وتقولى على اخبارهم فبالتالى اخبارنا برده بتبقى عند اى حد مش عارفة ايه رايكو؟
اللى بيجننى وبخاف منه اوى ان مفيش موقف صريح بالكلام ده كلها مجرد احساسات او تلميحات بالكلام او حكم فى مواقف مشابهة فخايفة جدا لحسن اكون ظلماها , زوجى دايما يقولى ان كلها اوهام ولو قلتله مثلا على حاجة ضايقتنى بيقولى انتى متعرفيش هى بتحبك انتى بالذات اد ايه فبحس ضميرى بيئنبنى اوى بس بيكون موقف يضابق واللهى ,وكمان بيضايقنى ان هو رغم انه بيحب اهلى بس لازم لو حاجة معجبتوش يعلق عليها ولو كلمة كده ولا كده ميعديهاش ابدا ولازم يبين انه زعلان تصرفاته ديه هى اللى بقت تلفت نظرى للى مامته بتعمله يعنى اللى كنت بعديه قبل كده معدتش بعديه وبقيت اوصله وجهة نظرى بالذوق بس برده مبيتقبلهاش فخلاص يتضايق من جوايا وخلاص بس من جوايا تعبانة ضميرى م~نبنى مش عارفة كده يبقى حرام عليا ولا ايه ؟نفسى ارتاح اوى من الموضوع ده نفسى ربنا يرزقنى الهداية واسمو بنفسى عن حتى مجرد التفكير فى الحاجات ديه وارتاح , يبقى شغلى الشاغل رضا ربنا وبس حتى لو حاجة فعلا تضايق ومش قادرة اتحملها ادعو ربنا يصبرنى واعملها علشان ارضيه
مستنية رايكو بفارغ الصبر دعواتكم

[dodi80]

ايه يا جماعة انتو روحتو فين؟؟؟
وفين ارائكو ؟؟؟
فينك يا دودو؟؟؟

[ريري]

السلام عليكم ورحمة الله

اولا يا (دودو صلاح )انت اكبر مشكله عندك ..انك مش بتفضفضى مع جوزك،وبالتالى بتخبى مشاعرك جواكى ...وده اكبر غلط
لانك لما تفضفضى معاه (طبعا بأسلوب جميل وبدون التعرض لامه بأى شكل)اكيد هوّ هايهديكى بكلمه طيبه او بخروجه او على الاقل هايوضح لك وجهة نظره
لكن لما يكون جواكى كل الضيق ده وهوّ ما يعرفش عنه حاجه .....؟؟؟؟
يبقى ما تقوليش انه مقصر معاكى لانه ما يعرفش انه مقصر

تانيا:انت خليكى زوجه ذكيه وشاطره..وبأنوثتك اتعلمى ازاى تاخدى وقتك اللى انت عايزاه منه..بمعنى انه لما يكون بالبيت تكونى (اجمل ست فى الدنيا)وتجذبيه لقاعدتك الحلوه بالكلام والحديث الجميل والدلع والرقه ،وطبعا ما يمنعش انك تكونى عامله جو رومانسى بالبيت ،وحاطه بخور ،وعامله حاجه حلوه ..يعنى (الف ليله وليله)
بس ما تنسيش انه لما يقعد معاكى الوقت بتاعك (من باب شكر نعمة الله عليكى)تقولى له ياللا قوم روح لامك علشان ده وقتها..وممكن تديله طبق حلو من اللى انت عاملاه..لانك كده هاتكسبى الام كمان..مش جوزك بس

وعلى فكره يا دودو ..الابن هوّ المسئول عن بر اهله (شرعا) مش انت ..يعنى لازم توضحيله انك تعبانه وما تقدريش تخدميهم ..وممكن تحتكموا للشرع فى هذا الامر
بصى ..انا فى الاول والاخر باقول (نتقى الله فى حمواتنا لاننا هانكبر وهانكون زيهم ،وكمان رضاهم بيخلى البركه تعم علينا) بس لازم ما اعملش حاجه انا مش راضيه عنها او مسببه لى ضيق..لانه مش من حق الزوج انه يفرض علىّ اهله
وانت ممكن تحلى الموضوع بأنك توضحى لجوزك انك تعبانه وبالتالى لما يرح شغله تروحى عند اهلك ..حاولى تلاقىلها حل...ربنا يعينك ويقويكى
ــــــــــــــــــــ
والعزيزه ..دودى
انت من حقك انك تقولى لجوزك (زى ام الطيب ما قالت)انا مش مسامحاك لو حكيت عن حياتنا وخصوصيات بيتى..وخليكى على كده مده (علشان يحس بتأنيب الضمير)
وممكن تخليه يسأل احد الشيوخ..حتى لو بالتليفون
وبالنسبه لتعليقاته على اهلك ..قولى له صراحة انك ما دمت لا تتدخلى فى امور اهله فانك تحبى انه ما يعلق على تصرفات اهلك ،او كل ما يحصل انه يعلق ما ترديش واظهرى انك مش مبسوطه..مره مع مره هاتلاقيه بطل يضايقك
على فكره ..انا مبسوطه منك قوى لانك بتقولى كل اللى عاوزاه لجوزك..بس خاللى بالك ان كلامك لازم يكون مرتب ولطيف جدا ولا يمس اهله ابدا..يعنى توصلى اللى انت عاوزاه من غير ما تخليه يزعل

ربنا يهدى الحموات الفاتنات..ويرزقنا العقل والحكمه فى الكبر..امين

[قطرات الندى 2]

المشكله يا ريرى انى بعمل الى انتى بتقولى عليه بس ساعات بحس انى بدى من غير مقابل وبعدين جوزى ما بيعدش معايا كتير زى ما انتى فاكره الوقت الفاضى بيبقى مع مامته ومبقدرش اوجهه باخطائه حتى باجمل الطرق يقوم قالب اليله غم وانا مبحبش الغم بحب اعدى اليالى كده وخلاص وحولت كتير مشكلة جوزة انه مبيحبش حد انه يقوله انت غلطان باى طريقه وكمان بحس انه بيتعامل معايا كان معاه كراسه مكتوب فيها ان المفروض يتعامل معايا ازاى وبيطبق ويخلص الى مكتوب فى الكراسه ويقول كفايه عليها كده ههههههههههههههههههه ده كويس انى عملت الى فى الكراسه هههههه بس عشان كده معتش بعرف اعاتب ساعات بقول ربنا يعنى هيجيبلى حقى بس بنات كتير قالولى سلبيتك دى هتخليه متعود على انك مش بتعترضى على اى حاجه والحاجات الى بتضايقك هتكتر بس ايه الحل

[ام لوجى]

واللة يا جماعة انا عندى نفس المشكلة مش حماتى بسلا اخوات جوزى كمان هم يقولوا وهى تنفز بالرغم من القرابة الا انى وصلت لدرجةانى اتمنين الموت من افعالها بس صراحة الحمد للة جوزى ربنا يكرمة مش مبيسمعش لحد وبيعامل ربنا فى ومدينى من وقتة بس امةمش سيبانى فى حالى لا انا ولا مرتات ولادها الباقيين