[المحتااااااااره]

بصوا احكموا انتوا بالعدل لو سمحتوا عشان انا بجد تعبت والله تعبت
والله بكتبلكم وانا ببكي بجد من اللى بيعملوا ابويا فيا
انا دلوقتي مخطوبة ليا شهرين ماشي
خطيبي كنت اعرفه قبلها ب3 سنين
بس طبعا قولوا كنت بشوفه فالسنة مرتين بالضبط
عشان هو فالبلد وانا عايشة فبلد تانية عشان بيتنا وشغل اخويا وحوارات كتير كده من ضغرنا بعاد عن بلدنا الاصلية
المهم دلوقتي احنا اتخطبنا من شهرين
وقعدنا سوا بالضبط اسبوع وكتاب الله مكملناه
كل يوم طبعا نفسنا نشوف بعض
عشان خلاص كان هو الاسبوع ده وانا بعدها هسافر وهو كمان كان مسافر السعودية ومش هيجي غير بعد سنة
وابويا كل يوم خطيبي يقولوا يعمي يعني عاوز اقعد معاكم شوية
يقعد يتلكك
لحد مجيه يوم الخميس اللى المفروض بعد بيوم انا مسافرة خلاص
راح بليل يقول ايه
انا قال مكنتش اعرف ان بكره الخميس
انا كنت فاكر ان بكره الاثنين
عشان كده بقولكم مش كل يوم تتقابلوا تخيلوا
والله خلاص هموت
ورحنا خرجنا وقعدنا سوا برا
والايان اللى قبلها كنا نخرج يوم اه ويوم لا
وطبعا بابا مكنش بيعرف بكده
كان اخويا الله يباركله هو اللى كان ياخدني كاننا هنزور اهلنا عشان هو مبيعرفش فالسكك فالبلد المهم
دلوقتي خطيبي مسافر
وبنتكلم كل يوم بليل على 11 او 11 ونص كده على النت عشان مواعيد شغله بيخلص 12 بتوقيت مصر يعني 11
ابويا من شوية بيتصل علينا عشان هو معظم الايان مقضيها فالبلد وسايبنا هنا
فبيقولي اخبار السعودية ايه قولتوا كويس بيسلم عليك
يقولي بتتكلموا
قولتلوا اه بنتكلم على النت عشان ببلاش عندهم
بيقولوا بتتكلموا امتى
قولتلوا على 11 او 11 ونص كده بنقعد نص ساعة لو كتر يبقي ساعة عشان شغله وشغلي
قالي انا مش عاجبني الوضع ده
انتي لازم تعملي حد ومش كل يوم كل يوم
قولتلوا شوف يبويا اللى انت عاوزوا وانا هعمله حاضر
يقولي مش قصة اللى انا عاوزوا قصة انتي تعملي انتي مش صغيرة دلوقتي
قولتلوا يعني اعمل ايه
عاوزني متكلمش كل يوم حاضر
عاوزني ابطل اكلمه خالص حاضر
يروح يقولي ايه
يقولي انا بصراحة مش عارف حكايته ايه خطيبي يعني
يقولي انا الاول كنت معتبره زي اخوكي بالضبط ويمكن اكتر بس دلوقتي عاوز يقول نزل من نظره يعني
طب احكموا انتوا بالعدل
واحد مسافر متغرب
ميطمن على حبيبته يجدعان كل يوم
والله حرام عليه بجد
ده ابويا كل يوم كل يوم الساعة 3 بليل بيقعد يكلم فالستات والله اعلم تقربوا ايه الستات دي
ولما بنيجي نكلمه نقولوا مين دول يقول مبكلمش حد
يعني انت حلال عليك تقعد تكلم فالحريم كل يوم كل يوم
وانا خطيبي اللى متغرب اخر الدنيا وحالته حاله مكلمهوش يجدعان
هو دلوقني قالي لما اجي بكره نبقي نكلم
قولت والله لهخربها لو اتلكم نص كلمة
ده الخطيب بيشوف خطيبته ولو مرة فالشهر مش هقول كل اسبوع
وكل يوم بيتكلموا بال100 ساعة والله لو اليوم 100 ساعة هيتكلموا
وانا خطيبي حتى النت مكلمهوش عليه
انا بكره لو اتكلم معايا هقولوا هات التليقون هعمل مكالمة وهتصل بالست اللى بيكلمها
رقمها معايا
هقولوا في رقم بيتصل عليا هات اشوف مين
هعمل نفسي كأني مشفتش الاسم الرجالي اللى مسجل الست هانم بيه
وهتصل وابهدل**** من تليفونه
وهو طبعا هيقوللي هاتي انا ابهدلها
هيلاقيها الست هانم
هكسفه هوريه نفسه
هوريه انه كبر خلاص بقي جد من بدري وبناته محتاجين يتستروا
انا بجد تعبت وهتجنن
حد يرحمتى والنبي لحسن تعبت قوى قوى

[Turn To ALLAH]

لا حول و لا قوة إلا بالله
يا حببيتي اصبري و فترة الخطوبة دي بتعدي بسرعة و مسيرك تتجوزي
ريحيه مهما كان والدك
أما عن تصرفاته مش من حقك أبدا انك تتصلي بالأرقام الي انتي شاكة انهم ستات
و مش من حقك تحاسبيه
ادعيله بالهداية و خلاص
ربنا ييسر أمرك

[بحب بناتي]

اعملى اللي يريحك بلا دوشة دماغ

اهالى عجيبة والله العظيم

[جيسىكيمو]

ربنا يصلح ليكى حالك ويتمم ليكى على خير يارب

[روني و انوش]

اية اللي انتي بتقولية دة يا بنتي ابوكى بيحافظ عليكي وبيحفظ كرامتك يعنى لو خطيبك دة عجبتو واحدة تانية او حصل اي خلاف حيقول دى كانت بتكلمنى بالساعات كل يوم ومحدش بيقولها حاجة دى عيلة سايبة انما لما تتجوزو كلمية انشاالله كل ثانية وبعدين عيب عليكى تقولي علي باباكي الكلام دة تاني حتى على موضوع التليفون انتى تنبهية بس وبالمعروف

[أم جولى]

كل شئ بهدوء و بتفاهم قوليلو يا بابا لازم اكلمو و يكلمنى لازم نعرف بعض علشان اعرف تفكيرو و شخصيتو كويس امال الناس بتتخطب ليه علشان العلقاة و الكلام مايكونش حرام و قلويلو هيا ساعة و لا ساعة و نص كل يوم نتكلم فيها على النت علشان نفهم بعض كفاية انو مسافر مش معقول كمان مش هكملوا امال هتجوزو و اعرفو و ادرسوا ازاى

و بهدوء و براحة المناقشة

و ادعى ربنا يهديه ليكى

و موضوع الستات دة انتى مالكيش دعوة بيه ادعيلو بالهداية و خلاص

و استغفرى ربنا عنوان موضوعك حرام لازم تبرى ابوكى و تسمعى كلامو مهما حصل محدش ادو هيخاف عليكى

و ربنا يصلحلك الحال

[نيو نونه نونو]

يارب يتمم جوازك علي الخير ويفرحك ياارب

[Atteyat]

ربنا يصلحلك الحال

[NOUR EL HODA]

عارفة لو عملتى كدة ممكن يعند معاكى ويفسخ خطوبتك مش بعيد طراخ على وشك قلم معتبر انا اتعلمت درس عمرى ماهنساه الام الاب هما بس اللى يحاسبوا عيالهم لكن احنا منحاسبهمش تعرفى انا مرة حاسبت امى قالتلى عيال اخر زمن جاية تحاسب امهاتها ههههههههههه

[أم عبدالله المطيري]

ربنا يكتب لك الخير