[ام سيف الدين]

و الله انا لسة مدخلتش مرحلة الضرب دى لان سيف لسة عندة 8 شهور و اكيد اكيد مش فاهم حاجة
ساعات لما بوصل خلاص و الربع اللى فاضل بيطير من كتر ما هو عيزنى لازقة فيه بزعق و اقعد اقوله عندى شغل البيت و الطبيخ وو حاجات كتيرررررررررررررررررر بيبصلى و يضحكلى ااقوم على طول ضحكة و بيساه مباشرة و انتهى الخلاف

[em salam]

معاكي حق في كل الي بتقوليه
بس حنعمل ايه هم الي بيطلعو عقلنا
بس زي مقالت الاخت نضربهم ونقعد نبكي عليهم
وان شاء الله ححاول ابطل ضرب ليهم لاني لما بعصب بضرب من غير وعي

[rosey]

لا حول ولا قوة الا بالله يا رب انتقم من كل ذانب ومفترى

[bebsa]

بضربها بس لما بيفيض بيا هيه اساسا زئردة عندها سنتين بس عنيدة ولما ازعق تسايس امورها لحد ما اسكت وتقوم تعمل اللى ف دماغها فغصب عنى بضربها بس على ايديها بس ولما تعيط قلبى بيوجعنى ببقى عاوزة اخدها ف حضنى واطبطب بس بحاول امسك نفسى ومضعفش

[whisper]

مش بس كدة يا كادبورى ...........دة ليه تاثير نفسى كبيييييييييير لا يقل اهمية عما ذكرتيه ........... ممكن الواحد تكون شخصيته مهزوزة و غير واثق فى نفسه و غير قادر على التعامل مع الناس ............. يا جماعة حرام عليكم كل ام بتضرب ابنها تفكر كويس و مش تقرا و خلاص ........ ده له عواقب كتير انتوا مش حاسينها لانكوا مش اتضربتوا

[whisper]

كمان نسيت اقولك انه احتمال كبير مش يحبك لما يكبر و كمان مش هيكون عنده ثقة فيكى و اى حاجة عنده او مشكلة هيلجا لحد من برة نتيجة خوفه منك

[كادبورى 81]

شكرا ليكوا جميعا يا جماعه على المرور وفعلا يا whisper معاكى حق الاضرار اللى ورا الضرب مش جسديه بس... نفسيه كمان ..شكرا ليكى على الاضافه

[أم يوسف22207]

موضوع فعلا يستحق التثبيت
جزاكى الله خيرا
ربنا يهدى اولادنا جميعا

[وفاء ام صغنونة]

اسال الله العظيم رب العرش العظيم ان يهدى اولادنا ويجعلهم من الذريه الصالحه

[أم مهند الطيوبة]

كدة وجعتى قلبى دة انا على طول بضربة وبعضة كمان

[شكران]

ربنا يهدي لينا ولادنا يارب ويهدينا لهم
كنت باضرب إبني وأنا متعصبه ولما أهدي أعيط فيقولي كل شويه إضربيني وأقعدي عيطي ...كل شويه إضربيني وأقعدي عيطي
لحد ما وصلت إني باتخيله وهو راجل فاتراجع عن ضريه لأني بحس إني باهينه لما باضربه وما يصحش أضربه

[القطه]

اشكرك اشكرك اشكرك اشكرك

عالموضوع المفيد ده

ربنا يستر انا لما بتنرفز مش بشوف قدامى

لكن بجد اللى حكتيه ده ممكن يحصل مع اى حد

والافجع ممكن عين الاطفل تروح اى عاهه مستديمه

ربنا يسترها معانا ومع المسلمين اجمعين

انا لما بتعصب اقوم من مكانى جرى واقف فى المطبخ لوحدى

واركز على شئ معين وابصله اووووى واركز جدا فيه

يعنى مثلا كوبايه اى زجاجه مثلا اى شئ اى شئ

وافضل مركزه زومثبته عينى لغايه ما ازغلل وعلى طول بتلاقينى هديت واهتميت بالزغلله ونسيت النرفزه

جوزى نصحنى اعمل كده لما لاقانى ممكن احدف البنات من الشباك مثلا

وانا خارجه عن شعورى اثناء النرفزه

جبربوا الطريقه دى هى مش بتاخد دقيقتين تقريبا

اشكرك يا كادبورى موضوع جميل فعلا لعلنا نتعظ

[مدام سمر]

[مدام سمر]

هاجرب الموضوع داة يا قطة يمكن تتحل مشكلة العصبية دى

[بيدووجنة]

تسلم ايدك يا كادبوري على موضوعك الل جه عالوتر الحساس عند معظمنا
وفعلا احنا بنحب ولادنا جدا وبنخاف عليهم اوي وبيصعبوا علينا بعد ما بنضربهم ويعيطوا ونعيط معاهم ويمكن اكتر منهم
بس المشكلة انهم بينرفزونا جدا وبيعصبونا كتير

بس بجد بجد بلاش استخدام العنف والضرب مع الأطفال سواء الجسدي أو النفسي لأنه بجد بيكون شخصية مهزوزة والل بيحصل معاه دلوقت بيطبقه لما بيكبر

انا حاليا غيرت طريقتي كنت الاول بضرب بس مش اوي لكن بعصبية وازعق واصرخ و فلقيت ان فعلا ممكن العصبية تطلعك عن شعورك وتخلي طفلك عصبي زيك ويصرخ زي ما بتصرخي فبقيت اتحكم ف نفسي اكتر واخد نفس عميق واعد للعشرة اكون هديت شوية وبعدها أبدأ اتصرف ف الموضوع الخطأ الل حصل

لازم أعرفهم الغلط الل عملوه لان كتير مبيكونوش عارفين انه غلط وبيتصرفوا بطفولة وبراءة
وانبهم بعدها انه لو اتكرر هيكون فيه عقاب ولو فعلا اتكرر بعاقب علطول عاملة كورنر العقاب زي سوبر ناني وبتجيب نتيجة
ولما يخلص وقت العقاب لازم يعتذر ويقول اسف لان الل بيغلط لازم يعنذر ما يتكبرش على كلمة اسف
وبعد ما يعتذر أخده ف حضني وأقوله اني بحبه اوي اوي بس الل عمله غلط والل بيعمل حاجة غلط لازم يتعاقب لان ممكن يفسر ضربك وعقابك على انه قلة حب

والضرب بئا عالأيد فقط يدوب ضربة كده رمزية تعرفه انه غلط وبجد الضربة الخفيفة بتعمل تأثير أقوى من الضرب الجامد بتخلي الطفل عنده كرامة وعزة نفس ويعرف انه بينضرب عشان حاجة غلط عملها عكس الضرب القاسي الل بتخليه متبلد ويقل عنده الاحساس تدريجيا وواحدة واحدة يرسخ جواه مقولة علقة تفوت ولا حد يموت ويعمل الل عايزة وميفرقش معاه بئا ايه العاقبة والعقاب لانه خلاص اتعود على الضرب للأسف

وكل واحدة فينا بجد بتضرب غصب عنها بس بيجي عليها لحظة كده تكتشف بشاعة الضرب من نظرة طفلها وهو مخضوض مذعور وهيا متعصبة زي الوحش وعملاقة بالنسباله وهو يادوب اد كده!!!!
او موقف زي بتاع البنوتة الل تاهت ف المول كلها حاجات بتحسسنا بفداحة الل بنعمله
او زي ما حصل معايا بيفضلوا فاكرين موقف معين ويقعد بيدو وجنة يمثلوا الموقف دا تاني وصادف اني اتفرجت عليهم بيمثلوا الموقف دا بجد حسيت باحساس رهيييييب حسيت اني بتملي أسى وحزن شديييييييييييد جدا وعاهدت ربنا ونفسي اني اكون صبورة طويلة البال حليمة معاهم احسن الولاد يتعقدوا بجد وبقيت كل ما يجوا يعيدوا تمثيل الموقف ده الغوش واخدهم في حضني والاعبهم وادلعهم لحد ما الحمدلله ما نسيوه تمااااااااما مع ان الموقف واللهي مكنش حاجة قوية اوي كده بس الاطفال يا عيني بيكون حساسين كده جدا ومرهفين الاحساس واقل حاجة بتأثر فيهم
وبقيت ديما احضنهم وابوسهم كتير واحسسهم انهم مسئولين عن حاجات ف البيت وانهم كبروا ودي حاجة فرحتهم اوي
وبجد بتبقا فرحتي متساويش اي حاجة لما الاقي بيدو وجنة وانا واقفة ف المطبخ مثلا بعمل حاجة او قاعدة جايين بيحضنوني وبيقولولي بحبك اوي
بجد ماشاءالله بفرح جدا وبقول الحمدلله فعلا عمر القسوة ما كانت حل لاي حاجة بالعكس بتزيد الامور سوءا

والحمدلله ربنا بيعديها وبيسترها بس لازم ناخد بالنا ومش كل مرة تسلم الجرة!!!

ربنا يهديلنا ولادنا جميعا ويحفظهم من كل شر امين يارب العالمين

[كادبورى 81]

اشكركم كلكوا على مروركو يا فتوكات
وحلو اوى موضوع الزغلله دا يا قطه والله دمك زى العسل
ومعاكى حق يا ام بيدو وجنه القسوه فعلا عمرها ما بتجيب غير القسوه وربنا يباركلك فى اولادك ويفرحك بيهم ويباركلنا جميعا فى اولادنا اللهم امين

[دينا86]

عندك حق والله
انا سمعت القصة دى قبل كده وكل اما اسمعها جسمي يقشعر
وانا دايما باحذر قرايبي اللى عندهم اطفال من الطبع ده

[راداميس]

زى ماقلتى اولادنا بيخرجونا عن شعورنا وبنتعصب من اللى بيعملوه ربنا يهدى اولاد جميع المسلمين .بس نعمل ايه لما يغلطو؟