[miss_soso]

بسم الله الرحمن الرحيم
انا من زمان محتاره اول موضوع ليا في المنتدى يبقى ايه بس قررت اني ابتدي بالحلو وطبعا بما ان الشيكولاته معشوقة الجماهير فقلت اعمل حاجه الكل يحبها

الكيكه دي ماقديرها كتير شويه بس سهله جدا و لذيذه جدا جداااااااا
هانحتاج ثلاث اوعيه واحد كبير واحد متوسط وواحد صغير ولازم نشغل الفرن اول مانبتدي نحضر المقادير ولالالالالالالالالالالازم جدا المقادير تبقى بره التلاجه قبلها بفتره

اولا : نحضر الوعاء المتوسط ونضع في المكونات التاليه:
170 جرام زبده سايحه (نسيح الزبده ونسيبها تبرد شويه)
170 جرام زيت نباتي (يفضل زيت ذره)
300 مل ماء مثلج باااااارد جدا
ثانيا : نحضر الوعاء الكبير وننخل فيه المكونات الجافه الاتيه :
400 جرام دقيق
250 سكر بودر
100 جرام سكر غامق (لو مافيش حطي نفس المقدار سكر عادي بس الافضل بيه)
50 جرام كاكاو (ياريت تنخليه عشان بيبقى فيه سكر ولو خام يبقى احسن)
2 ملعقه صغيره بيكنج بودر

بعد ما ننخل المقادير الجافه ونقلب القادير السائله نحط السائل على الجاف ونقلب بمعلقه خشب عادي زي مانكون بنقلب شوربه ولو طلع كتل ماتقلقيش

ثالثا: في الوعاء الصغير نمزج المقادير الاتيه :
1 كوب كريمه حامضه (لو مافيش ممكن لبنه او قشده انا احسن حاجه استخدمتها جهينه كريمه حامضه او بينار لبنه او قشده)
3 بيضه
1 ملعقه كبيره فانيليا
بعد مانقلب المقادير مع بعض نحطهم على الخليط السابق الي في الوعاء الكبير ونقلب كمان مره هنلاقي الكتل راحت لو كان فيه كتل

نيجب صنيتين متوسطتين اليهم مقاس 24 نفرشهم ورق زبده لو مافيش ندهن زيت ونرش دقيق خفيف عشان طعمه مايطلعش في الكيكه ونقسم فيها الكميه ولو ماعندكيش نجيب صنيه كبيره ونفرشها برضه بالذي سبق ونحط فيها الكيكه ونحط في الفرن على درجة حراره 180 لمدة 30-35 دقيقه ولو فرنك حرارته عاليه خليها على 170 او كفايه 25 دقيقه على الكيكه وقبل ماتطلعيها من الفرن خالص شدي الرف لبره واغرزي فيها عو خشب او مكرونه اسبجتي مش مطبوخه طبعا ولو طلع نضيف يبقى الكيكه استوت لو طلع عليه حاجه اقفلي الفرن وسيبها 5 دقايق وطلعيها

للتزين :
150 جرام زبده
275 جرام سكر بودره
250 جرام شيكولاته خام 70-8-% كاكاو (ودي بقت موجوده في كل السوبر ماركتات ولو مش بتحبي مرراة الشيكولاته الغامقه ممكن تجيبي نسبة كاكاو اقل يعني 50% حلو اوي)

نكسر الشيكولاته قطع ونحطها في حمام ماء عشان تسيح وبعد ماتشيح نسيبها تبرد شويه صغيرين على بال ماتخلصي الزبده والسكر

نضرب السكر والزبده بمضرب البيض لحد ماتنفش وتبيض تقريبا 5 دقايق ونحط فانيلها حسب الرغبه وبعدين نحط الشيكولاته ونقلب من فوق لتحت عشان الهوا مايطلعش لحد مايمتزج

لو عامله صنيتين يبقى حلو اوي هاتي الحامل الي هاتقدمي عليه الكيكه حطي واحده وحطي عليها شوية كريمه من الي عملتيها فوق وبدأي من النص لبره لحد ماتحسي ان كده كفايه لو بتحبي الكريمه كتير حطي ولو مش بتحبي ماتحطيش كتير
وبعدين براحه تحطي الكيكه التانيه فوقها وتحطي بقيت الكريمه على الوش والجوانب

انا بعد ماخلص بعمل وردات كريم شانتيه ورش عليها فارماسيلا او انخل شوية كاكاو عليها بيبقى شكلها تحفه وطعمها جناااااااااااان الحمد لله كل الي جربها عجبته جدا
وبالهنا والشفا وطبعا مش محتاجه اوصيكم الي تجرب تدعلي وتطمني

[ام البنات3]

تسلم ايديك يا قمر

[مدام ديدى]

تسلم ايدك شكلها هتطلع روعه وانا سيفتها

[loli]

شكلها هتطلع حلوة قوي

[miss_soso]

نورتو بالهنا والشفا وماطرح مايسري يمري هي بصراحه من اجمل الكيكات الي كلتها وانا اصلا مش بحب الحلويات بس الكيكه دي مفضلتي فعلا
مبسوطه جدا بدخولكم

[مريم خالد]

تسلم ايدك ويارب تتطلع حلوة معيا تقبلى مرورى اختى الحبيبة

[nana_ay]

[lol5]

شكلها ح تطلع تحفة يا سوسو.. تسلم إيديكي

أنا فاتحة قسم الحلويات وقاعدة اتخيل من الصبح.. والريجيم خرب بقى له فترة.. يعني فتحتوا نفسي ع الآاااااخر

ههههههه تسلمي يا عسل

[ام الاولاد]

[أم ايثار]

تسلم ايدك

[miss_soso]

اهلا وسهلا وبالهنا والشفا
lol انا عامله رجيم بقالي فتره بس لما بفتكرها او اعملها طبعا بيبوظ بس بحاول اعوضها بحاجات تانيه

[rehab]

شكلها جميله بس انا عندي سؤال هي البنه جبنه نستو يعني ولا أيه

[miss_soso]

لا اللبنه زي القشطه المعلبه بيبقى دايما مكتوب عليها لبنه تركي هاتلاقيها في السوبر ماركت في الجبن والحليب وكده
لو مافيش لبنه او قشطه او كريمه حامضه استخدمي بدلهم نص كوب حليب

[lol5]

اهلا وسهلا وبالهنا والشفا
lol انا عامله رجيم بقالي فتره بس لما بفتكرها او اعملها طبعا بيبوظ بس بحاول اعوضها بحاجات تانيه

هو الحقيقة الريجيم بيبقى ذل

يعني أنا اقعد حارمة نفسي من "الأشياء الحلوة" عشان اجي في يوم آكل كيك وشكولاته و..و..

وأقعد بعدها أحس بالذنب

يلا ان شاء الله ربنا يسهل وأحافظ على وزني.. بس ما ازيد