[بوسي كات]

بسم الله الرحمن الرحيم

يا ريت يا جماعه الل يقرا حلمي يستحملني شويه انا عارفه انه طويل بس انا بجد مستغرباه وبصحى منه مفزوعه
انا حلمت ان انا بذاكر في مادة اللغه العربيه وكنت بذاكر في فرع دروس القراءة وكان في درس انضاف جديد على المنهج بس الدرس ده رخم اوي ومش عارفة استوعبه كويس وكان طويل وماكنتش ذاكرت اي فرع من باقي الفروع لسه زي الادب والنصوص والنحو وكان باقي على الامتحان يوم واحد بس وكنت خايفه اني مالحقش اخلص مذاكرة الماده مع العلم ان انا في كليه هندسه واخر مره درست فيها اللغه العربية كانت في الثانويه العامة وبعدين قامت في واحده صاحبتي عرفتها من الكلية اسمها مديحه اتصلت عليا علشان تشوفني عملت ايه في المذاكره وقالتلي انها خلصت المذاكره وهاتدخل تنام وفي تاني يوم هتقعد تراجع المنهج اما انا مكنتش لسه خلصت وقلتلها كده قالتلي ماتقلقيش باذن الله تخلصي وبس
وخلص الحلم على كده بس لما صحيت كنت خايفه اني مالحقش اخلص المذاكره وفضلت فتره لحد ماستوعبت انه كان حلم وحمدت ربنا ومافكرتش في الحلم ده تاني
بس انا تاني يوم حلمت حلم تاني وقبل ما احكيه عايزاكو تعرفوا ان انا لسه مخطوبه قريب ولسه مخلصه امتحانات الكليه والنتيجه لسه ماظهرتش
حلمت ان النهارده يوم الامتحان وان انا ماكنتش خلصت مذاكرتي يعني كنت ذاكرت شوية دروس قراءة على شوية نصوص ومعاد الامتحان كان الساعه 7 وانا كنت قاعده مع خطيبي وكان في معاه ناس اصحابه انا ماعرفهمش في مكان بره البيت ولما الساعه بقت 7 الا 5 دقائق انا قلت لخطيبي ان انا رايه الامتحان وبعدين لقيت ان الطريق طويل ومواصلاته كتيره فقلت لخطيبي انه ييجي يوصلني بالعربيه بتاعته ده لانه بيسوق بسرعه فوافق وقام هو واخد واحد صاحبه معاه وركبنا عربية صاحبه وكان صاحبه هو اللي سايقها وكانت عربيه غريبه ماكانتش مقفوله من ورا وكان فيها 3 كنبات يتقعد عليها غير الجزء بتاع السواق وكان خطيبي دخل في البدايه وقعد وكان مرتب ان انا وهو نقعد جنب بعض في الكنبه اللي ورا السواق بس في ناس جهم وركبوا قبلي قام هو منزلهم علشان اقعد انا بس في ناس غيرهم جهم وركبوا قمت انا قلتله خلاص مش مهم وقعدت انا في الكرسي اللي وراه بس انا ماعرفش الناس اللي ركبوا دول كانوا اتنين تقريبا صراحه مش فاكره عددهم بالظبط لاني ماهتمتش وبعدين واحنا في الطريق لمحت صاحبتي مديحه واقفه مستنيه المواصلات فانا قمت شداها من الفاتحه اللي ورا وركبتها العربيه والعربيه كانت ماشيه وقالتلي كويس انها قابلتني وانها كانت مستنيه القطر وانا كنت خايفه علشان احنا كده اتاخرنا عن الامتحان ومديحه قالت ربنا يستر ةالامتحان ييجي كويس وانها ذاكرت الماده كويس اما انا قلتلها ان انا ماذاكرتش كويس وماكنش هاممني اوي الموضوع ده بس كنت قلقانه شويه اصل انا كنت حاطه في نفسي ان انا هافتكر الماده وانا في الامتحان من المذاكره بتاعتي ايام ما كنت في الثانويه العامه بس كنت قلقانه لاني كنت بدات احس اني ممكن مافتكرش على اساس ان عدى عليها دلوقتي 3 سنين قامت مديحه قايلالي ماهياش فارقه ربنا يسترها ان شاء الله قصدها تطمني يعني بس القلق كان بيزيد اوي بالذات بعد ما مديحه اتكلمت عن فرع الادب اللي في المنهج واكتشفت ساعتها ان انا كنت ناسيه ان الفرع ده معانا في الماده وماكنش في بالي خالص عندي وكان خطيبي قاعد بيتكلم ويهزرمع الناس التانيين وصحيت من النوم برده خايفه لان احنا لسه ماوصلناش الامتحان وماكنتش عارفه هاجاوب ازاي وانا مش مذاكره وفضلت فتره لحد ماستوعبت انه حلم مش حقيقه
عارفه اني كولت عليكم بس اعمل ايه بجد قلقت منه ويا ريت اللي يعرف تفسيره يفيدني جزاكم الله خيرا

[أم روان]

الرؤيا الاولى يا قمر ان انت كنت قلقانه وعايزه تفرحى زى البنات قام ربنا كرمك بابن الحلال والرؤيا تمت
الرؤيا التانيه معناها ان خطيبك فرحان بيك اوى وعمال يخلى الناس الى بيعرفهم يشفوك
وياريت ما تخليش صحباتك يخدو عليه علشان كده غلط ده معنى الرؤيا والله اعلم

[بوسي كات]

الف شكر يا ام روان على اهتمامك وردك انت احتمال كبير اوي ان يكون عندك حق لان صاحبتي مديحه هي الوحيده اللي في الشله بتاعتنا اللي اتخطبت من سنه ويمكن ده السبب اني اشوفها هي بالذات من غير بقية اصحابي في الحلم
بس انا عندي استفسار ايه معنى ان انا ادخل امتحان العربي بتاع الثانويه العامه تاني والمره دي ماكنش مذاكراه لاني معتمده على مذاكرتي ليه من 3 سنين فاتوا
واستفسار تاني معلش استحمليني ليه انت قلتي ان انا المفروض مخليش اصحابي يخدوا عليه يعني ايه اللي في الحلم خلاكي تقولي كده
وبجد جزاك الله كل خير عشان انا بجد كنت قلقانه