[ام خديجة بإذن الله]

السلام عليكم فتوكاتى الحلوين

انامحتاجة افضفض لكم جداااا

لانى انا وزوجى لسه متخانقين دلوقتى

والسبب

اهله

انا فى بيت عيلة..ليا شقتى المستقلة..وحماتى واخواته ساكنين تحت

المشكلة بقى فى ايه؟؟؟؟؟

ان زوجى كل ما ينزل او يطلع طبعا بيعدى على امه يسلم عليها خصوصا انها تعبانة بتغسل كلى

بس لو نزل مثلا يصلى المغرب
يطلع لى العشا

وهكذا

وكل يوم مثلا اتفاجىء بموبايله بيرن
مين؟؟؟ امه عيزاه
ينزل لها تحت يشوفها عايزة ايه

يطلع لى بعد ساعة اتنين مثلا

ولا كإنى فى البيت

وانا هبقى قاعدة هموت من الغيظ انه سابينى لوحدى كل ده وقاعد تحت
وياريت مرة
لا الموضوع ده مكرر

وكذا مرة انبهه انى بتضايق لما يسيبنى لوحدى كده ويتأخر عليا

مثلا ييجى من الشغل واكون محضرة الغدا الاقيه اتأخر عليا

والاكل برد

اتاريه تحت عند امه
جى م الشغل عدى عليها وطوّووووول

وانا ولا كإنى هناااا

واللى هيجننى انى لما اسأله ايه اخرك كده تحت

الاقى اسبابه غير مقنعة

مش حاجات مهمة يعنى

وآخر حاجة النهاردة

خد اجازة م الشغل كالمعتاد علشان يروح مع امه المستشفى
رغم انها لها ولاد كتير غيره

لأ ياخد لها اجازة مخصوص..والله لو انا عمره ما ياخدلى اجازة مخصوص علشانى

والنهارده جى معاها من مشوار المستشفى

ويادوب نام واتغدينا ونزل يصلى واتأخر طبعا تحت كالمعتاد
وعلى ما طلع ولسه يادوب هنقعد مع بعض لقينا الموبايل بيرن مين؟؟؟؟ امه راح نزل لها وطلع لى من شوية وعادى ولا كإن حاجة حصلت
رغم انه حس انى زعلانة
لا وعايز يكون فيه علاقة خاصة
بس انا قلت له انى متضايقة ومش هقدر
ولإنى زعلانة منه وواخدة على خاطرى من الموضوع بتاع تأخيره تحت دايما كده ويسبنى

مش عارفة اعمل ايه
انا فعلا زهقت
وقلت ياريتنى ما كنت سكنت فى بيت عيلة
وبفكر بكرة اروح لاهلى يومين اغير جو

دلوووونى ربنا يكرمكم

[om aya yoyo]

معلش حبيبتى الست مريضة وحابة تتمتع بولادها ممكن جوزك حنين عليها اكتر من اخواته فبتحب قعدته ربنا يباركله ويشفيها

[totayasoo]

(حسبنا الله سيؤتينا من فضله انا لله وانا اليه راغبون)


حطي نفسك مكانه واعتبري دي امممممممممممممممممممممممممممك

[الجميله2]

ربنا يصلحلك الاحوال يارب

[الفتوكة الرائعة]

دى ست مريضة استحملية
هقولك حاجة بردة انتى ليكى حقوق علية ماشى
بس دى امة امة
اعتبريها والدتك يا ستى

[love Life]

يا رب ييسر الامور بس متزعليش يا قمر دى امه بردو ومتسبيش بيتك

[totayasoo]

تفتكري لو مامته اتوفقت في اي لحظة ومشافتهوش وكانت محتاجة تشوفه وانت جعلتي نفسك سبب انها متشفهوش
هتبقي مرتاحة في حياتك بعد كده؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[حماتي مدير عام]

طيب انتي حماتك تحت أنا حماتي في الاوضة اللي جنبي وبيحصل كده بالظبط
دي يابنتي مش حاجة تغيظ دي حاجة تجيب شلل
ربنا يصبرنا

[وردة الماس]

اصبري شوية وطولي بالك ارجوك .. وكل الامور هتتحسن لان مهما كان الراجل بيكون حريص على استقرار بيته لكنه مشتت بينك وبين الواجب نحو أمه ، وربنا يجازيه خير على بره بها ويهديه لك

[يّٱ وِٱدُ يّـٱ تُقَيّـل]

حبيبتي انا مش شايفة اي مشكلة خاااالص

لا بالعكس دا انتي المفروض تكون فرحانه ان زوجك جنب امه في الظروف دي

وانا شايفة كمان انك تقوليله استنا انا هلبس وانزل معاكي اطمن علي طنط او حاجة

علي فكرة الموضوع دا بجد هيبقا ليه تاثير كبير اوي علي علاقاتك باهل زوجك

انا اخويا قاعد معانا ف نفس البيت وعادي بينزل كتير وبيسيب مراته واحيانا بتنزل وراه

وكمان هيا احيانا اللي بتسيبه وتجيب بنتها وتنزل تقعد معانا لو عنده شغل بيعمل او حاجة