[tota_h]

.انا عايزه كل فتوكة متزوجة تيجى تحكلنا وتراجع معانا ذكرياتها يوم زفافها
اليوم من اوله كان ازاى ؟
كانت خايفة و قلقانة وكان ايه احساسها؟

واليوم ده بالنسبة ليها من اسعد ايامها ولا................؟

وكان ايه احساسها اول ما دخلت عش الزوجية

عايزاكو يا فتكاوات تحكولنا بالتفصيل وترجعو الذكريات وتقوليلنا بقالك كام سنة متزوجة

وايه التغير اللى حصل لحياتك بعد الزواج؟


عايزه بقه تفاعل شديد منكم


يلا مش قرأتى الموضوع احكلنا بقه مستنية ايه؟.

[جالاكسى2006]

انا ياستى بقالى سنه ونص متجوزه يوم فرحى كان يوم جميل قوى بس صاحبتك بقى كانت قبل الفرح ب 3 ايام عندها نزله برد شديده وسخونيه مش بتنزل وحقن فى الوريد وهيصه كان دراعى مشوه بس مين اتنططت وغنيت وعملت اللى ف نفسى كان قلبى حاسس ان اللى بعد اليوم ده عذاااااااااااب خناق وتلاكيك المهم خلينا ف يوم الفرح روحنا ياستى البيت وانا مش شايفه قدامى وحرارتى 40 بس مش مبينه ودخلت لبست روب شتوى غامق لونه وحش قوى وشويه لقيت جوزى بيندهلى الحقينى الحمام غرق قعدنا نشيل فى الميه لان البلاعه مسدوده ونرميها فى البانيو اكتر من نص ساعه وبعدين اتعشينا ونمنا اخوااااااااااااااااات لان اختكم كانت بتفرفر من السخونيه والصبح الساعه 8 كان عندى الدكتور وكتبلى حقن تااااااااااااانى والاكل مسلوق واحنا الاتنين وبكده قضيت اول اسبوع ف جوازى مسلوق ف مسلوق وجوزى معايا كمان اظن مستحيل الاقى واحده قصتها تشبه قصتى بس بصراحه رغم التعب والزكام والحراره الا انها كانت ذكريات جميله قوى ياااااااااااه الله يسامحك فكرتينا ليه دلوقت لو ميت زكام ولا هايسال
موضوعك راااااااائع

[tota_h]

ميرسى يا جميلة على مشركتك بس فعلا يوم غريب جدااااااااااا بس اكيد ذكريات حلوة ربنا يسعدك

وعايزه تفاعل من كل فتوكة متزوجة يلا تعالو

[همسات حب]

يوم زواجى من اوله عادى مشغوله مع الكوافيره واللون ده حلو واللون ده وحش وماسكات وكريمات والسكينه سارقانى اول ما لبست الفستان ابتديت اتوتر
اندمجت شويه مع المعازيم ونسيت انى رايحه بيت تانى كمان شويه
وبعد ما ركبت العربيه كنت عاوزه ارجع فى كلامى ودقات قلبى يسمعها اللى نايم فى اليابان دخلنا الشقه يا نهاااااار غيرت هدومى ومسحت كل الماكياج والمانيكير كمان
تصدقى اصل احنا كنا حنصلى ركعتين وانا بأصلى عيطت عياااااااااااااااااااااط
ومن ساعه ما دخلت بيتى وانا مررررررررررعوبه كأنى فى بيت الاشباح
دلوقتى انا متزوجه من 8 سنين وبأضحك على خوفى زى العيل اللى تايه من امه

[tota_h]

هههههههههههههههههههه
جميل اوى فيلم الرعب ده اكيد هحسه لما اعيشه ربنا يستر
مشكورة يا همسات ربنا يسعدك

[شيماء مراد]

صباح الفل انامتجوزه من سنتين الا شهر عشان هتفرق يوم جوازى كان يوم جامد جدا بذكائى قلت اجيب كوافيره البيت واخرج من بيت ابويا لكن يارتنى ما عملت كده طلعت الهانم هتعمل ميكب بس واى حاجه تانيه هعملها بره وانا اندعكت نزلت الساعه 12 الظهر رحت للكوافير اللى انا اتنمردت عليه عملت المسكات وظبطت وشى وبعدين اشتريت حاجات كانت نقصانى ورجعت للكوافير تانى اعمل شعرى بدل ما كنت عملته وعرق من الحر وبعدين روحت البيت الساعه 7 المفروض ان الكوافيره هتيجى 8 دخلت استحميت وطلعت ولسه مجتش الساعه بئت 8ونص ومجتش قلت اكلمها مردتش لحد 9 ردت قالت انها فى الطريق 9ونص مجتش اتصلت قالت الزحمه فين جت 10 وربع خلصت 11 نزلت اتصورت ويادوب دخلت القاعه 12 هيت مع الناس وعملت نفسى مش واخده بالى لحد ما جه وقت المرواح كان هو اللى سايق قعدت اتحايل عليه يطول لحد 4 ونص رجعنا ابيت صلينا وكان الفجر بيدن قلتله انزل صلى عشان ربنا يباركلنا ونزلته طلع لقانى نمت من غير ما احس وده جزاء اللى يسمع كلمه ماما تقولها ويجيب كوافيره البيت

[tota_h]

عسل اوووووووووووى يا شيماء ربنا يهنيكى يا رب

واتمنى نكون اصحاب بس مش عارفة ارسلك رسالة خاصة يا ريت تردى عليا

[7abibet gozha]

انا اليوم اللى قبل فرحى منمتش خالص فضلت طول الليل قلقانة اوى مش مصدقة انى خلاص هتجوز حبيبى و الستعة بقت 2 الصبح بعدين الفجر ادن قمت صليت و قلت احاول انام لقيت محمد بيتصل بيا و بيقولى يا مريم انا مش عارف انام خالص انا مش مصدق نفسى اعدنا نتكلم لحد ما انا نمت منه عل تليفون صحونى تانى يوم الساعة 10 نزلت البيوتى سنتر و استلمونى بقى ماسكات و حمام مغربى و معرفش ايه و كان معايا اختى و اخوات جوزى و صاحبة عمرى و جت الساعة 9 و نص كنت خلاص خلصت شعرى و ميك اب و لبست و حيه محمد اول ما شافنى تنح و قالى ايه الجمال ده يا بت :d بس بعدين روحنا الفرح بقى و بجد كان تحفة اوى من الايام اللى متتنسيش و حمادة هلال كان زى القمر و بغدين الفرح خلص على 4 من ساعت ما نزلنا من العربية و الاسانسير و فتح باب الشقة وهو ماسك ايدى
دخلنا بيتنا و اخدت شاور و غيرت قام اخدنى على رجله واعد يهزر معايا كان فى عل سفرة علبة شيكولاته ماما كنت جيبهالى عشان نقدمها للمعازيم قعدنا كلنا نصها انا و هو بعدين دخلنا قوضتنا و لما جت الساعة 10 صحينا و سافرنا شهر العسل
بسس و انا بقالى شهرين و نص متجوزة

[lol5]

موضوع حلو

أنا فرحي كان قصة... أنا تزوجت يوم 26/11/2007

احنا كان المفروض اننا نتجوز في الصيف.. ولكن لظروف خاصة شوي، اتخذنا قرار الزواج يوم الجمعة 23/11 بأن يوم الاثنين 26/11 يكون العرس.. ولكم أن تتخيلوا كيف يتحضر لعرس بتلات أيام..

رحت حجزت الفستان قبلها بيوم.. ولما خلاص نقيت وقست وعجبني.. وقلت للرجال خلص احجز.. قال لي الاستلام بعد اسبوع.. قلت له لا بكره الصبح استلمه.. طبعا عصّب وصار يحكي بالهندي (سمنتيكبنىيتنيةرك باكتىكنبيظيسيب) وأنا كأني ولاااااااااااااااا سامعة شي ، وربنا سهّل واستلمت الفستان تاني يوم

يوم الفرح الصبح كتبنا الكتاب.. وكانت لحظات لا يمكن أنساها.. عيطت شوي .. وحضنت إمي وحضنت حماتي.. وكنت فعلا مش مصدقة نفسي.. وطلعنا رحنا اكلنا بيتزا عشان قدامنا يوم طويل وغالبا مش ح ناكل شي وقتها

بعدها.. على محل الورد ركض.. جبت المسكة.. وكانت كتيييييير حلوة، ولحد الآن أنا محتفظة فيها مع إن الكل بنهاية الفرح قال لي ارميها.. فال كويس.. وانا أقول لهم أبداً.. مسكتي ولازم تعيش معي

كنت اتفقت مع الكوافيرة تجي الساعة 4 العصر وعلى مكياج بس لأني كنت محجبة، الحفلة كانت الساعة 7 او 8 المفروض الناس تبدا تيجي.. طبعا دخلت استحميت وكريمات وتجهيزات.. ووصلت الكوافيرة.. كنت انا في الاوضة جوا.. وأولاد أخواتي كل شوي رايحين جايين يقولوا: خالتو صارت عروسة هههههه

بدأت الحفلة.. وأول ما دخلت الصالة.. كانت غنية ماجدة الرومي: نشيد الزفاف.. وحسيت قلبي بيركض ورهبة وشعور غريب.. حتى زوجي بيقول لي انتي ايديك كانت بترجف بشكل مش طبيعي

وضحكنا وتصورنا وانبسطنا ورقصنا.. والحمدلله كانت حفلة بسيطة في منتهى الرووووووووووووعة

لما رحنا لبيتنا.. كان معانا أهلي وأهله وصلونا.. وبتذكر اللحظة اللي اتقفل فيها الباب كنا مش مصدقين نفسنا.. ومش متخيلة إني بودع أهلي وأقول لهم مع السلااااامة وإني خلص بقيت مع حبيبي

والحمدلله كانت أحلى ليلة في عمري

[tota_h]

الف مليون مبروك يا قمرات وادعولى احصلكو بقه شوقتونى اوى للجواز

ربنا يسعدكم يا رب
وعايزه باقى الفتكاوات يشاركونا

[caper]

ياجماعة انا يوم فرحى دة كان يوم تحفة مع إن أنا وجوزى إستنيناه 6 سنين بس من شدة أعصابنا وقلقلنا على كل حاجة فى الفرح وفرش الشقة أتحول اليوم دة لخناقات من أوله لحد ما جه خدنى من عند الكوافير مبدئيا أنا نمت يوم الفرح الساعة 7 الصبح لمدة ساعتين عشان أصحى أروح للكوافير
وصحيت مش شايفة أدامى ورحت مع أختى وبنت خالتى وكنا عند الكوافير 6 عرايس أنا أول واحدة لبس وعملت ميك الساعة 4 ونص و قعدت إستيت الأستاذ اللى جالى الساعة 9و نص ووقف مستنينى برة لما أطلعله ما دخلش خدنى من جوة زى كل العرايس حتى ما بعتليش مع راجل الأمن زى ما عملوا كل العرسان ولما قلتله ليه كدة قالى أصلى ما أعرفش بيعملوا ايه العرسان فى المواقف دى وبس رحنا النادى حوالى الساعة 11 ونص كنت تعبانة جدا جدا وكان فى ظروف تمنهعنى حتى من إنى أقوم من علىالكوشة طبعا كلكم فاهمين قصدى وبعدين لقيت جوزى بيكلم الدى جى عشان يخلصوا الفرح الساعة واحدة قلت كويس عشان ألحق المسلسل الساعة 2 وعقبال ما نروح ونغير هدومنا ونتعشى يكون المسلسل بدأ وبس لفينا شوية بالعربية وبعدين روحنا وبعد العشا والمسلسل نمنا طبعا زى الإخوات وهو لحد دلوقتى مش قادر ينسىالمقلب اللى عملته فيه ليلة الدخلة لأنى أنا اللى محددة المعاد دة وعلى فكرة أنا متجوزة من 11 شهر

[tota_h]

ليه المقلب الجامد ده يا caper بس يوم لذيذ ربنا يهنيكى

[caper]

ميرسى يا جميل على فكرة الموضوع الجامدة

[tota_h]

ميرسى ليكى انتى يا قمر انك نورتى الموضوع

ونفسى كل الفتكاوت يدخلو يحكولنا

[heba & hema]

ياااااااااااااااه ده انا ضحكت ضحك عالحكايات اللي الفتوكات كاتبينها ههههههههه
والله قصص مذهله

واليكم بقي قصة زفافي

بالظروف كده جه فرحي تاني يوم من شبكه اختي يعني شبكتها كانت يوم الحنة بتاعي
وهيا عملت حفلة شبكتها في قاعة حفلات فكانت روعه وطبعا روحنا يومها تعبانين جدا وانا اللي هبقي عروسة بكرة كنت مرهقة جدا بسبب الترتيبات بتاعة فرحي وفرح اختي
المهم نمت يادوب بعد الفجر كم ساعه وصحيت الساعه 11 ورحت عالكوافيرة الساعه 12
وقبل ماروح الكوافيرة رحت اجيب الفستان لقيته مش هوا اللي كنت مختاراه اتاري البنت اللي في المحل بدلته واعطته لواحده تانيه ومن اولهااااا ونا كشرت
بس الفستان اللي مش بتاعي ده كان حلو برضو
المهم خلصت عند الكوافيره وحبيبي جه اخددني واول ماشافني مسك ايدي وباسها وقاللي ايه الجمال ده؟
اكيد القردة فعين جوزها غزال هههههههه
وطبعا احنا الاتنين هنعيش هنا في اسكندريه واحنا مش منها اصلا هوا من محافظه ونا من محافظه تانيه وهنعيش في محافظه تالته
فكان من المترتب علي كده اننا يدوب نسافر عشان نلحق نروح عش حبنا بدري ونلحق نقعد مع بعض وكده يعني
ونا من اول ماخلصت عند الكوافيرة ونا قلبي بقي يدق يدق يدق ومرعوبه وحاسه ان بطني بتوجعني
ومشينا في الطريق من بيت بابا للاسكندريه وكل مانقرب قلبي يطب وبطني توجعني لدرجه اني كنت حاسه اني عايزة ارجع يعني اجيب اللي فبطني مع اني مش اكلت حاجه يومها ونفسي كانت مسدوده
المهم وصلنا شقتنا واهلي واهله كانو معانا فحبيبي لما لقاهم هايطولو في القعده وزعهم وقالهم يالا مع السلامة بقي ههههههههه
دخلت اخدت دش وهوا كمان وصلينا ركعتين طوااااااااااااال وبعدين اتعشينا (ولو اني مش حسيت بطعم اي اكل) وبعدها ضحكنا شويه ولعبنا شويه وكده يعني وبعدين نمنا وبقي هيما كل شويه يفتح عينيه وهوا نايم يبوصلي ونا كمان افتح عينيا واقوله في حاجه؟ يقوللي انا مش مصدق نفسي انك نايمة جنبي ونمنا لغاية الفجر ونزل يصلي وخلاص كفايه عليكو كده

وكانت هذه قصه فرحي بالرغم من انه مكنش في قاعه ولا حاجه وكان عالمستعجل عشان السفر لكن كان روعه بالنسبه ليا انا وحبيبي وكنا مش مصدقين روحنا من الفرحه واننا خلاص بقينا مع بعض لوحدنا
وتوته توته خلصت الحدوته
وشكرا ليكي ياتوته عالموضوع الجميل وربنا يرزقك بالزوج الصالح وتجيبيلنا بنوته صغنتوته

[بنبونى]

هههههههههههههههه
ماشاءالله ربنا يهنيكم ويسعدكم كمان وكمان

عقبالى يارب
والله عماله اتخيل انا وحبيبى حيكون فرحنا ازاى بس بقول كله باوانه
بس شوقتونى للجواز )

[tota_h]

الف مبروك ليكى يا هبه وعقبالى انا وبنبونى بقه لما نحصلكم ادعولنا

بحبكم اوووووووووووى

وعايزه ردود كتييييييييييييييير

[tota_h]

ايه يا فتوكات مش عايزين تشاركونى بذكرياتكم الحلوة ؟؟
كده توتا تزعل منكم انا بحبكم اووووووووووى