[سندريلا79]

انا هاكلمك انهارده عن مشكله انا فى رأيى انها كبيره
وهى سفر الزوج للعمل بالخارج وتركه زوجته
سواء عند اهلها او فى عش الزوجيه او عند اهله
انا بصراحه مش عارفه ايه الصح
هل ان الرجل يتجوز و يسافر ويترك زوجته ويبعدوا عن بعض
لإنه عاوز يبنى مستقبلهم ومايشوفهاش الا كل سنه ولا اتنين
ولا الاحسن ياخدها معاه بس ساعتها مش هايعرف يوفر فلوس
كلا الاتنين لهم حسانتهم ومساوئهم
انا عن نفسى جربت الاتنين وكلا الحالتين فى منتهى الصعوبه
الاولى صعوبة البعد عن الزوج واحساسك بالغربه حتى لو كنتى عايشه مع اهلك هاتحسى فى بعض الاوقات بالاحراج والكسوف
وبالذات لو معاكى اطفال
التانيه صعوبة المعيشه وعدم توفير المال لإن الراتب مش يدوب يكفى لأخر الشهر وكأنكم ماعملتوش حاجه والغربه مالهاش لزمه
انا اسفه انى طولت عليكم لكن انا شايفه ان الموضوع ده مهم
وحيوى جدا هذه الايام

ايه رأيكم

[hana]

فعلا سفر الزوج الى الخارج وتركه زوجته هو المشكلة ولكن سفر الاسرة كاملة ليس فيه اى مشكلة لأن لو صاحبهم الايمان بالله والصبر والنشاط لحققو مرادهم وآمانيهم

[اشرقت]

ان ايضا ارى ان سفر الاسره كلها احسن لانى حاسة ان الاسرة مش حتكون سعيدة لو الاب فى مكان والام واولادها فى مكان اخر
ربنا يسعدك دايمايا سندريلا انت وكل المسلمين

[ريري]

معكى حق يا هنا ،مش معقوله نضيع اجمل سنين العمر سواء عمرنا او اجمل فتره لاولادنا ونبقى بعيد عن بعضنا و لسنا متمتعين بمعنى كلمة اسره
اعتفد اننا مهما جمعنا فلوس او درجه علميه او...لن يساوى دقيقه يجمعنا فيها الحب معا

[أم لوجى و ملك]

أعتقد ان الزوج لو فكر فى السفر لازم يكون معاه زوجته واولاده وممكن يسافر وحده فى البدايه سنه او اتنين على الاكثر حتى تستقر اموره ثم تسافر له زوجته واولاده لان بعد الاب عن اولاده له اثاره المدمره على المدى البعيد فالام لاتستطيع ان تربى الابناء وحدها.

[سندريلا79]

ميرسى اوى يا هنا على مرورك وردك على موضوعى
وهو فعلا بعد الزوج عن الزوجه والاولاد شىء صعب جدا عن تجربه
ويا رب ماترجع تانى بس فعلا وجودهم مع الزوج فى السفر عبء كبير جدا
برضو
وميرسى مره تانيه على مرورك

[سندريلا79]

شكرا جدا على ردك ودعائك الجميل يا اشرقت
وفعلا عندك حق عمر الاسره ماهتكون سعيده وهما متفرقين
وبيعيشوا ايام سوداء مالهاش اخر

[سندريلا79]

ميرسى على ردك وكلامك الرومانسى يا ريرى
وهو فعلا فلوس الدنيا او اى شىء لا يساوى لحظه سعاده تجمع الاسره
بس صدقينى للأسف وخصوصا فى الايام الصعبه اللى احنا فيها دى
كتير من الازواج بيضحوا بسعادتهم علشان تأمين مستقبلهم ومستقبل اولا دهم
وعلشان يقدروا يعيشوا حياه كريمه

[سندريلا79]

ميرسى على مرورك يا ام لوجى وملك
وفعلا معاكى حق المفروض ان الزوج لا يبتعد عن الاسره اكتر من سنه ولا اتنين بالكتير
لإن مع الوقت للأسف الاسره كلها بتاخد على البعد عن بعض والسنين بتجر بعض
وتروح اجمل ايام العمر

[monee_2020]

السلام عليكم انا مش عارفه يا سندى هو انتى انا ولا انا انتى نفس مشكلتك مع اهل زوجك وبرضه بعد الزوج انا برضه متزوجه من 6 سنوات ودايما جوزى مسافر والله صعبه لو اشتغل هنا بعيد ولو بره برضه بعيد انا خلاص وعندى 3 اولاد وانا المسؤله من كل شىء والله عندى اخواتى ربنا يخليهم لكن مش بارضى اطلب منهم حاجه ربنا يعين كل واحد على اللى هو فيه لكن صدقينى لو الواحدد فى الغربه اجتهد شويه واستغل وقت عمل اضافى مثلا والواحده تروح مع زوجها حتى لو شافوه ساعه يظبت الدنيا احسن من البعد حانعمل ايه ربناييسر لنا امورنا جميعا

[نهنوهة]

أنا بردو بعانى من المشكلة دى بس أنا لسة معنديش أطفال
وهو حاول كتير أنى أكون معاه بس ربنا عايز كده وأنا عذراه خصوصا أنه مش من هواه جمع الأموال ولا السعى وراها
وأدعوا لى بقى انه ييجى بسرعة ويرزقنى بالذرية الصالحة
أنا عند أهلى مش فى بيتى بس فعلا حاسة أن ربنا جعلنى هنا فى بيتى علشان أشيل عنهم حاجات كتير معنوية وفعلا حابين انى اكون معاهك مش حمل تقيل عليهم

[منى محمد أشرف]

سلام عليكم يا سندريلا
انتى معاكى حق دى مشكلة خطيرة ونسبة كبيرة من الزوجات بتعانى منها بس الأوقع ان الأسرة كلها تعيش مع بعض فى أى مكان ودا ممكن يتوفر لما الأولاد يكونو فى سن يسمح لهم بالتنقل مع الأب والأم لكن تقولى اية لزوجة عندها أولاد فى سن حرج ومراحل تعليمية مش ممكن يخرجو منها للسفر مع الأب بعنى اتحكم عليها تفضل بعيد عن زوجها الى أن يشاء اللة وتضيع أحلى سنين العمر
حسبنا اللة ونعم الوكيل

[ام بسنت]

حبيبتى سندريلا انا كمان متزوجه من 4 سنين وزوجى بيسافر وعندى بنتين بس انا روحت معاه مره واحده لكن العيشه غاليه جدا بره وطبعا هو مسافر عشان يامن لنا مستقبلنا مش بايديه انه يبعد ونفسه نبقى مع بعض على طول لكن انتى شايفه ظرف البلد ومفيش شغل هنا ولسه ولادى متطلباتهم مكترتش لكن كلها كام سنه ويدخلوا المدارس والاحتياجات حتزيدلازم نستحمل واهو ربنا يسهلها من عندوه ويصبرنا جميعا

[سندريلا79]

حبيبتى مونى من الواضح فعلا ان حياتنا (الجميله والسهله)واحده
سواء من اهل الزوج او فى بعد الزوج تلاقى الحياه مشرقه من جميع الجهات
واكيد فى زينا كتيربيعانو برضو نفس الظروف لكن هانعمل ايه
الحمدلله على كل شىء وربنا يقدرنا نكمل

[سندريلا79]

نهنوهه يا قمر ربنا يرجعلك زوجك بالسلامه يا رب
واكيد انتى طبعا مرتاحه وانتى قاعده عند اهلك
انا بقى كنت قاعده عند اهل زوجى لما سافر وقعدت لمدة سنه مع الاشغال الشاقه
وده لإن والدى ووالدتى متوفيين
لكن بعد السنه دى قررت انى لازم اروح معاه وفعلا البعد غلاوه
اصبحت الامور هادئه جدا مع اهل زوجى والحمدلله

[سندريلا79]

منى حبيبتى انا عارفه ان بعد زوجك عنك وعن الاولاد مش سهل لكن معلش
استحملى علشان اولادكم
وصدقينى انا مسافره مع زوجى لكن مش عارفين نعمل حاجه علشان العيشه هنا غاليه جدا
لكن للأسف مقدرش ارجع مصر والحمدلله على كل شىء
على فكره اسمك غالى عندى اوى

[سندريلا79]

والله يا ام بسنت انتى عندك حق فعلا
ظروف البلد بقت زفت وفى النازل
وكلا الحلين مش نافعين
لا سفرنا مع بعض نافع ولا سفر الزوج لوحده نافع
انا قعدت فى مصر سنه وزوجى مسافر للأسف كانت سنه كبيسه
واما سافرت معاه مش عارفين نعمل حاجه خالص
ربنا يا رب يجمع كل الازواج على خير ونترحم من الهم ده بقى

[roro soso]

قرأت ما جاء عنكن ، فكلا الحالتين الفراق صعب وليس لي ماأقوله سوى : الله يقدم مافيه الخير للأجمعين ويلم شملكن انه سميع مجيب الدعوات

[مونى88]

فعلا موضوع رائع بس ليه السفر يعيشوا على ما اعطاه الله
وكده كمان يضيع اجمل واحلى سنين عمرهم
وجزاكى الله خيرا

[سندريلا79]

ميرسى على مرورك حبيبتى ريرى
وفعلا الحالتين اصعب من بعض لكن هانعمل ايه الحمدلله على كل شىء