بتحبوا الكسكسى المصرى انا بموت فيه
طريقته اليدويه فى البيت سهله جدا
انا صادفنى الموضوع ده من حوالى شهر نقلته عالكمبيوتر
واهملتها بعض الوقت ومن فتره قلت اجربها هاخسر ايه؟
جربته وطلع حلو (بالنسبه لانه يدوى واول مره)
امى كانت استاذه فى عمله ولكنى لم الحق اتعلم منها
طريقته ما كنتش اهتم كتير اقف معاها وهى بتعمله
المهم انا نقلته زى ماهو بنفس طريقه الكاتبه وحتى بالكلام لم انقص حرفا
لان طريقتها فى الكلام حتى طريفه وبالصور والله هى مشكوره عالمجهود
شوفوه لو عجبتكم الطريقه جربوها
ولو معجبتكوش نفضوها ودمتم بحفظ الله
طبعا كلكم عارفين الكسكسي
و اكيد معظمكم بيشتريه علب و يحضره بالماء المغلي
لكن حماتي بتعمله بنفسها من الدقيق و بيبقي طعمه احسن من العلب مليون مرة
حاجه مختلفه خالص
فقررت اني اتعلمه منها و اعمله بنفسي
و فعلا قالت لي علي طريقته امبارح و عملته النهارده
بس بجد بجد مش مصدقه نفسي انه طلع معايا مظبوط جدا و بالجمال ده من اول مره
و ده بشهادة حماتي لأنها ساكنه معايا في نفس العماره و دوقتها منه قالت لي انه تمام و مظبوط جدا
انا رغايه اوي مش كده
انا بس حبيت اقول لكم انه اسهل من أي اكله تانيه و طعمه احلي من العلب بكتير
الطريقة:
نحطي مقدار الدقيق في العجانه علي حسب عائلتك (انا استعملت 1/2 كيلو لفردين و طفل سنه و نص)
و تضيفي عليه مياه قليله بالتدريج و تعجني و لو حسيتي انه عايز ميه تاني زوديه
المهم انه يبقي بالشكل ده بعد العجن
و علي فكره العجن لمجرد ثواني بس
و بعدين نيجي لمرحله السواء:
لو عندك الحله الخاصه بالكسكسي استعمليها
لكن لو مش عندك اعملي زيي و هاتي حله فيها ميه و حطي عليها مصفاة المكرونه و فيها قطعه شاش كبيره و حطي فيها الكسكسي بالشكل ده
و بعدين اقفلي الشاش و غطي المصفاه و سيبيها علي نار عاليه لمده حوالي نصف ساعه
و بعد النص ساعه افرغي الكسكسي في صينيه او اي وعاء واسع و ها تلاقيه بالشكل ده
بعد ما يبرد افركيه بايدك كويس علشان يتفكك من بعضه
ها تلاقي الكسكسي قاسي او ناشف شويه
هاتي شويه ميه قليله جداااااا و رشيهم عليه
و بعد كده امسكي الكسكسي بايدك و انثريه او ابذريه في الصينيه لحد ما تحسي انه بقي طري او مندي بالميا
(اوعي تفركيه بعد وضع المياه و الا يبقي عجين و يخرب)
رجعيه في المصفاه تاني و غطيه و خليه علي نار عاليه حوالي 45 دقيقه
و بعدين فرغيه في صينيه و رشي عليه سمن بلدي كتير و هو لسه ساخن جدا
و قلبيه كويس
و بعد ما يهدي شويه ابدأي افركيه تاني بادك علشان السمن يتوزع فيه كويس
و علشان لو فيه حاجه متكتله تتفكك
و ده شكله بعد ما فركته بالسمن
و قدميه بالطريقه اللي بتحبيها
و بس
و طبعا طرق تقديم الكسكسي مختلفه من بلد لبلد
احنا مثلا بنحب ناكله مع بط او وز محمر مع المرقه و السطة الخضرا
و ممكن ناكله حلو باننا بضيف عليه سكر بودرة و قرفه مطحونه
اوعوا تقولوا انه صعب لأن لو جربتوه مش ها تقولوا كده ابدا
منقول
وبالهنا والشفا
اذا اعجبك الموضوع و اردت نشره في المنتديات الاخرى فاستخدمي هذا الرابط:
كسكسى بيتى باسهل طريقه (بالصور)
http://forums.fatakat.com/thread32921
(اللهم رحمتك أرجو فلا تكلنى