[m_maha]

السلام عليكم ورحمة الله,عاوزين نحكى اكتر موقف محرج ومضحك وبالاجماع نرشح صحابة الموقف

[ام مهند]

فكره حلوه بس انا مش فاكره الان عموما اول مافتكر هاقول

[أم لوجى و ملك]

اكتر موقف محرج حصل لى لما كنت فى الجامعه وكان عندنا امتحان فى المدرج وطبعا كان المدرج مليان وانا كنت قاعده فى اخر صف خلصت امتحان ونزلت عشان اسلم الورق بتاعى وانا نازله اتلوت رجلى ووقعت واخدت سلم المدرج كله وقوع وده طبعا امام الجميع ولما قمت لقيت زملائى يضحكون على فسلمت الورق بتاعى وخرجت بسرعه تجنبا للاحراج بس كان حتة موقف فظييييييييييييييع

[أم الطيب]

ياعيني... انا اكره اللي يضحك على حد وقع لان الخصلة دي للاسف في المصريين متفشية وهي صفة قبيحة .

[m_maha]

معلش ياأم لوجى حصلت لزميلتى فى الامتحان برده وكان نفسى أخدها فى حضنى لكن هى قبل الامتحان فوترها

[مرفت]

هو موقف حصل لصديقة عزيزة
كان عندها تؤم وطبعا عارفين يعنى ايه اطفال تؤم فى سن السنة ونصف كانو تعبنين وراحت تكشف عليهم فى مستشفى استثمارى غالية وطبعا لبست احلى ما عندها ووضبت نفسها .وراحت وحست ان كل الناس بتبص عليها .تقول ماشى يمكن الفستان عجبهم .تعرفوا كانوا بيبصوا ليه
كانت لبسة شبشب الحمام ومش بس كده كانت فردة خضراء وفردة حمراء

[توته1]

تحفة أوي يا مرفت

[سندريلا79]

انا بقى يا جماعه هاقولكم على موقف لكن ممنوع الضحك
الموقف حصل وانا فى الجامعه
كان جنب الكليه بتاعتى مدرسة ابتدائى وساعات كتير كانوا طلبة المدرسه يدخلوا الكليه عندنا نوع من حب الاستطلاع
وانا كنت بشوف الاطفال دول كل يوم
فدخلت الكليه فى يوم لاقيت الممر مزدحم جدا وانا كنت فى الخلف
فكل اللى قدامى بالطبع انا شيافهم من الخلف بس
فلاقيت قدامى طفل صغير من المدرسه وشعره ناعم
بطبيعيه جدا وضعت ايدى على شعر الطفل ده
يعنى نوع من المداعبه لطفل صغير
ويا ريتنى ماعملت كده
لاقيت الطفل الصغير رجع وبصلى فلاقيته
شاب كبير فى سننا بس يعنى قزم
فطبعا انا اتصمرت مكانى للحظات وعنيا اتملت بالدموع
ولا قيت نفسى خارجه اجرى لغاية الموقف وبسرعه ركبت العربيه وروحت البيت وقعدت اسبوع كامل ماروحتش الكليه خالص
ونفسيتى كانت زى الزفت

ايه رأيكم

[توته1]

يا الله بجد موقف صعب فهلا .

[اشرقت]

بجد يل سندريلا موقف رهيب على فكره انا بكتب ومش ماسكة نفسى من الضحك

[اشرقت]

الموقف حصل فى المدرسه اللي مامتى مدرسة فيها

المدير عمال ينادي كل طالب يدخل فى الطبور وطبيعى كل مدرس واقف قدام الفصل بتاعه والمدير عمال يزعق وواحد واقف قام الفصل هو قصير شوية وكان مدرس جديد
والمدير مسك العصاية وضربه لانه مفكره طالب ومش واقف فى الطبور
فين لما المدير خد باله صحبنا كان اتهرى ضرب

[أم لوجى و ملك]

لذيذه سندريلا واشرقت بجد موقفين اصعب من بعض

[annos]

موقف جميل يا اشرقت ينفع نكتة

[سندريلا79]

بقى كده يا اشرقت
انا مش قلتلكم محدش يضحك على الموقف اللى انا عملته
هههههههههههههههههههههههههههههههههههههههههههه
تصدقوا ان انا لغاية انهارده كل مافتكر اموت من الضحك والكسوف الاتنين مع بعض
والله يا جماعه ماتتصوروش شكلى كان ايه والشاب ده بيبصلى باستغراب
وانا واقفه مبلوله خالص بقول يا ارض انشقى وابلعينى
والله حرمت الاعب اطفال خالص

[رونا]

أنا بقى حصلى موقف وأنا فى الكليه
كنت فى سنه رابعه وكنت طالعه بماده من سنه تالته
رحت امتحينها وذاكرتها أوى وده كان فى الترم الأول على أساس أمتحنها فى ميعاد امتحان طلبة سنه تاتله
رحت بقى متأنتكه ولابسه إللى على الحبل ومذاكره كويس علشان مدخلش دور نوفمبر
رايحه ادور على لجنتى
وقابلنى دكتور قالى إنتى هتمتحنى ايه قلتلز كذا كذا
وده كان يوم أربعاء
قالى إيه يا ماما الإمتحان إمتحنوه يوم الأحد إللى فات سابنى ومشى
طبعاً إنهرت وقلت تلاقى الدكتور بيقول عليا أخر إستهتار
مع إنى كنت ناقله الجدول كويس
بحاول أعرف إيه إللى حصل يخلينى أغلض كده ويبقى فى فرق فى الايام
يلا عدت الايام وبردو دخلت دور نوفمبر ونورت فى الشهاده اننى خريجة شهر نوفمبر بسبب خطأ غبى منى

[m_maha]

بصراحة ياجماعة موقف سندريلا صعب قوى

[أم مريم]

يا عينى عل صاحبتك يا ميرفت أكيد كانت فى نص هدومها

[مورة]

معلش اعذريني يا سندريلا مش قادرة من الضحك ومتخيلة الرجل وهوبيبصلك بجد موقف فظيع

[سندريلا79]

امنعوا الضحك امنعوا الضحك
ايه يا جماعه هو كل اللى هنا بيضحك ليه
بقى كده ماشى
تصدقوا انا نفسى كل اما افتكر اموت من الضحك
وبقيت كل اما اشوفه من بعيد وانا فى الكليه ابعد على اد ما اقدر

[m_maha]

انا مش عارفة هو فهم قصدك ولا فهم حاجة تانية عموما مبروك