ستات و بنات كتير منهم اللى اتجوزا جداد و لسة عرايس و منهم اللى متجوزوش و منهم اللى بقالهم فترة متجوزين و سؤال بيفرض نفسه على كل دول ازاى اتعامل مع جوزى ؟؟
الواحدة مننا بتخرج من بيت باباها طفلة مدللة و تدخل بيت جوزها اميرة بس كل اميرة عليها مسؤليات و طبعا انا مش هقولكوا عن مسؤلية الجواز من بيت و اطفال و نظافة و طبخ و قبل كل ده الزوج
علاقة الزوج و زوجته و معاملتهم سوا هى اساس البيت و فى ستات كتير متجوزين بقالهم سنين و لحد دلوقتى مش قادرين يتعاملوا مع اجوازهم او ب معنى اصح مش فاهمين يتعاملوا معاهم ازاى
و طبعا راجل عن راجل يختلف بس انا هقولك حاجات مشتركة بين كل الرجالة :
1-كونى له اما حنونا يكن لكى ابنا مطيعا : الرجل طفل صغير عامليه كأنه ابنك اغمريه بحنانك و عطفك و لما يغلط بعفوك لما بيغلط ابنك و تزعقيله بيعيط لكن جوزك بيزعق و الله هو رد فعل واحد ف متتردديش انك تعفى عنه و تسامحيه الغفران و المسامحة ساعات بيبقوا اقوى من الزعيق و الخناق و اسهل
2- كونى له صديقة يأتمنك على اعز اسراره : يعنى دايما حاولى تسمعيله حتى لو بيتكلم ف الكورة و انتى مش فاهمة بس اسمعيه و حاولى تتفاعلى معاه و اهتمى متسرحيش منه اسمعى عنه و هو بيتكلم عن شغله و عن اصحابه و عن الماتش هتلاقيه بيحكيلك اللى اهم من ده و يوم ما يعترفلك ب غلطة هو عملها ف حقك اسمعيه بهدوء و حطى ف اعتبارك انه هو اللى جيه قالك و بيصالحك ف تعاملى مع الموقف بهدوء و قدريله ده عشان ميبطلش يحكيلك تانى و لو حكالك حاجة عن حد متروحيش تقوليها ولا تطلع من جواكى لى اى حد عشان يحس انك انتى اقرب حد ليه
3- كونى له امة يكن لكى عبدا : اوعى تحطى كرامتك بينك و بين جوزك يعنى متحسيش انك اكبر من انك تسمعى كلامه و تخدى اذنه او حتى تغسليله رجليه و تحسسيه باحتياجك ليه و ان الدنيا ملهاش لزمة من غيره ارضى كبريائه هيشيلك فوق رأسه بس متزوديهاش اوى عشان متلاقيهوش متجوز عليكى
4- ارضي عقله و روحه و قلبه و بطنه و جسمه على قد ما تقدرى يعنى مترضيش حاجة منهم على حساب حاجة ارضى عقله بذكائك و اطلاعك باللى بيحصل فى الدنيا خليه يحس انه ممكن يعمل حوار معاكى يعنى مش اول ما يدخل البيت تستلميه بقى و انتى يتحوطى البصل ف النار اتحرقتى و الواد كان بيعيط و جارتنا كانت بتنضرب وفرى ده لماما يا حبيبتى ف التليفون تانى حاجة ارضى روحه ب انك تحسسيه بالامان معاكى احضنيه و اوعديه انك عمرك ما تستغنى عنه و انك طول عمرك بتحلمى بيه كأنه براد بيت و فعلا هو فى عينك لازم يبقى احلى من براد بيت لانه هو جوزك و نصيبك وانتى حته منه و هو حتة منك ارضى قلبه بحبك ليه الصادق و بطنه بأكلك اللذيذ و اعدى جنبيه اكليه بأيديكى كأنه ابنك بالظبط و بصيله كدة و هو بياكل و اما يسألك فى ايه قوليله بحبك اوى يا حبيبى و اتحداكى لو مشوفتيش ف عنيه كلمة و انا بموت فيكى يا اجمل زوجة ف الكون
و اخيرا و ليس اخرا ارضاء الجسد زى ما كلنا عارفين ان الرجل طفل لعبته الجنس اوعى تهملى نفسك بعد كام شهر بقى و تقولى العيال و مش العيال و الشغل و البيت متنسيش ان قبل كل ده فى زوج ليه حق انه يستمتع بمراته ف حاولى دائما تكونى جميلة و متخليهوش يشوفك فى منظر ينفره منك كونى جميله و جددى ف حياتك و كل شهر اعملى يوم فى تعمليله عشا و تخدو حمام دافى سوا و تتكلموا كأنكوا لسة متجوزين و تنبسطوا و اليوم ده هيجدد شعلة الحب جواكو.
و يا رب اكون افادتكم و يا رب دايما ف سعادة.
اذا اعجبك الموضوع و اردت نشره في المنتديات الاخرى فاستخدمي هذا الرابط:
سؤال محير الجميع .. و ادى الاجابة !!
http://forums.fatakat.com/thread34116
الحمد لله عدد ما كان وعدد ما يكون وعدد الحركات وعدد السكون
