[تناهيد بنوتة مصرية]

مساء الورد على احلى بنات وستات عندى ليكم فكرة او اقتراح كل وحدة تعرف وصفة اكل دايت او تنفع للرجيم تحطها هنا هههههههههههههه وبما انى بقالى سنتين بعمل رجيم فطبعا كل طريقة اكلى اتغيرت وبحاول يكون كلو دايت فيلا ورونى شطارتكم يا بنات وانا حكتبلكم وصفة حلوة يارب تعجبكو

صينية الخرشوف بالفراخ (دايت طبعا) على فكرة الاكلة دى من اختراعى بس حتعجبكو جدا

المقادير:

كيس خرشوف مثلج ويقطع الخرشوف لمكعبات (طبعا الخرشوف هو الارضي شوكى عشان لو فى جنسيات اخرى)
بصلية مفرومة + فصين ثوم مفروم + نص فلفله خضراء حلوة مقطعة صغير
كوب مشروم (عيش الغراب) مقطع
3 صدور فراخ مكعبات
2 حبة طماطم مقطعة صغير جدا
معلقتين صلصة
ملح - فلفل - بهارات مشكلة (عموما البهارات حسب الرغبة ممكن مثلا تضيفي شطة او قرفة حسب ما بتحبي انتى واسرتك)

الطريقة
فى طاسة تيفال حطى معلقة اكل زيت وحدة حمرى فيها البصل ثم التوم ثم الفلفل الحلو ثم صدور الفراخ حتى تأخذ لون دهبي ثم المشروم والخرشوف والملح والفلفل والبهارات واخر شئ توضع الطماطم ونضع الخليط بصنية فرن ثم ندوب معلقتين الصلصة بكوب ماء ونحطهم عليها وندخلهم الفرن لمدة نص ساعة.
على فكرة للي تحب تجرب الاكلة دى بس مش دايت ممكن تحط عالوش كوب كريمة او جبنة مبشورة وتدخلها الفرن

صدقونى لذيذة جدا ومشبعة وداااايت طبعا

والف هنا وشفاء يلا مستنية وصفاتكو الدايت

كل وخالص حبي

[مرمريكا]

حلوة فكرتك ياجميل

وانا ححط اكلة دايت بعملها بردة من اختراعى

بردة عبارة عن خضار

انا بحط كوسة وجزر وممكن فاصوليا
واحط عليهم مياه وملح وفلفل ونقطة زيت زيتون
واحطهم على النار او فى الفرن

اكلة بسيطة وبتشبع وفى نفس الوقت سهلة

وممكن عند الاكل تحطو عليها ليمون انا بعمل كدة

[تناهيد بنوتة مصرية]

اه حلوة اوى يا مرمريكا انا كمان بعملها بس بزودلها مشروم شكرا على مرورك يا جميل

هههههههههههههههههه شكلو محدش غيري انا وانتى بيعمل رجيم

[أم الطيب]

انا كمان عندي وصفة سمك للريجيم بس مش مشوي..

ممكن سمك بلطي او بياض او قشر بياض..
بتغسلي السمك كويس وتحضري الخلطة اللي بتتكون من:
بصلة مبشورة خشن وطماطم مبشورة خشن وقرن فلفل رومي او حار وكام فص ثوم مدقوق وملح وفلفل وكمون ويتحط في صينية الفرن نص الخلطة ويرص السمك فوقها وبعدين يصب باقي الخلطة فوقها وممكن شوية زيت زيتون على الوجه وتدخليها الفرن لما تستوي وممكن تقلبيها لما تستوي من تحت.
شكرا للموضوع الجميل..
قيموه علشان يتثبت واي واحدة عندها اضافة ممكن تضيفها علشان كلنا نستفيد منها.