|
رد: عايزه أتطلق
السلام عليكم يا جماعة الخير - آسفه جداً على التأخير ودا بس عشان أجيبلكوا آخر تطورات الموقف - وأنا شاكره جداً لتفاعلكم مع الموضوع ولدعواتكم الصالحه --- أنا كبرت الخط شويه أهه - وبالنسبه للأخت أللى بتسأل عن زواج المسيار فده جواز على يد مأذون وبشهود بس الراجل فيه غير ملزم نهائى بالزوجه من ناحية الإنفاق عليها وتوفير منزل زوجيه وحق المبيت عندها يعنى من الآخر جواز بغرض المتعه فقط وفيه شيوخ أجازوه و شيوخ أعتبروه زنا مقنع ودا رأيى بصراحه .
-------------------------------------------
المهم تعالوا نكمل --- الأخ دا راح يجيب القسيمه من شقة الجديده وراح معاه أبن صاحب البيت أللى فيه المكتب وحكى أللى حصل - أتضح إن الست دى عندها شبان كبار ومعندهمش علم بالحكايه دى أصلاً ولما عرفوا إن أمهم محبوسه مسكوا الراجل ضربوه وحبسوه فى بيتهم لحد أمهم ما ترجع ودوروا على القسيمه وطلعوا بيها على صاحب البيت أللى افرج عنها طبعاً - وبعدين يحكى أخينا أللى حصل بعد ما رجعوا أنهم طلبوا منه يا يطلقها يا يشوف لها سكن وسابوه جه على عندنا إحنا بقا والساعه بقت 6 الصبح من غير منشوف طعم النوم ومراته تتصل وتقول لازم يطلقنى ويجيب الفلوس عليه وزوجى يكلمه يقول دا حقى أنا معملتش حاجه حرام وهى ملهاش عندى حاجه ولو عايزه تطلق أطلقها بس مصرفش على عيالها جنيه واحد وخليها تمشى فى المحاكم ( إفترا)------ المهم يا جماعه إن زوجى قدر يقنعها إنها تسيبه يرجع البيت بعد ما تعهد قدام إخواتها إنه حيطلق الجديده وجوزى الناصح ضمنه فى الحكايه دى وخلص اليوم عالساعه 12 بالليل ---- بس من ساعتها معرفناش طعم الراحه كل يوم تيليفونات منه دور ومن مراته دور هو يقول هى والعيال مش طايقنى ومكشرين فى وشى وهى تقول نازل شخط ونطر فينا ولازم أشوف قسيمة الطلاق بعينى وبما إن الأستاذ بتاعى وعد وأدى كلمه إن هو أللى حيجيبلها القسيمه بنفسه بقى كل يوم يلف ورا صاحبه لدرجة أنه خده من إيده وداه للمأذون أللى طلب منه قسيمة الجواز قاله مش معايا ( أمال رايح يطلق أزاى؟ ) بعدين بقى لما أبقى أجيبها --- وأمبارح بس صارح جوزى إنه مش عاوز يطلق لأنه مبسوط معاها ( طبعاً لا مسئوليه ولا وجع قلب) وإنه لو طلق حيبقى عشان خاطره هووكلمته قدام الناس !!!!!!!!!!!!! ( هو حيركبنا ذنبها دا ولا آيه ) ---- وإمبارح بالليل كنا عندهم ولما إنفردت بمراته سمعتنى العجب وبصراحه يا جماعه متزعلوش منى بعد أللى سمعته لقيت إن الراجل دا من حقه يجوزعليها دا فيه حاجات كتييييرعاديه بتعملها أى زوجه عايزه تسعد زوجها هى مبترضاش تعملها قال أيه بتقرف ( حتى من البوسه !!!!) - طب أهو راح للى مابتقرفش - ما هو برضه لازم الواحده تعمل أللى تقدر عليه فى الحدود أللى أمر بيها ربنا عشان تسعد جوزها وتحافظ عليه ---- المهم إنى صارحتها بكده وقلتلها مدام مش قادره تيجى على نفسك وتريحيه سيبيه لغيرك وأهو أنتى ربى عيالك - تقول خلاص يبقى مايجيش جنبى - طب يا ستى دا يبقى حرام عليكى - تقول أنا مش طايقاه خلا ص يطلقنى ويصرف على عياله وهو يقول لو طلقت مش صارف --------------- طب دلوقتى ايه العمل لاهو عاوز يطلق التانيه ويريحها ولاهى عايزه تيجى على نفسها وتريحه --------- ولعلمكوا بقى أنا عارفه كويس إنه حتى لو طلق الست التانيه هى مش حترتاح وحتفضل الحكايه دى زى المسمار فى دماغها --- طب والله ما صعبان عليا فى الحكايه دى كلها غير ولادهم كل اللى بيحصل دا قدام عينيهم وأكيد حيأثر على نفسيتهم وأبوهم وأمهم ما بيفكروش إلا فى نفسهم وبس كل واحد فيهم بيدور على حقه طب ودول فين حقهم ؟
ياريت يا جماعه أللى عنده فكره ولا طريقه يدلنا نعمل أيه ودعواتكم معانا .............
|
نيللي هيبه 
