[missomega]

انا فتاة في العشرين من عمري
وانا في الثامنة عشر اصبت بسرطان الغدد اللمفاوية
هذه هى مشكلتي
انا تعافيت تماما منه المرض الخبث لكن المشكلة في ان الطبيبة التي كانت تشرف على علاجي قالتلي:
"بصي يابنتي الراجل اللي هيجوزك لازم تحكيله على كل اللي حصلك ده"
والناس المقربين ليا جدا نصحوني بأني مكلمش
وانا بصراحة يا جماعة مش عارفة اعمل ايه
ارجوكم ساعدوني برأيكم وبسرعة الله يخليكم

اذا اعجبك الموضوع و اردت نشره في المنتديات الاخرى فاستخدمي هذا الرابط:
انا مش هلاقي حد يرضى يجوزني
http://forums.fatakat.com/thread38662

[mohey303]

الصدق منجاة وياريت يكون حد فى نفس ظروفك عشان يكون قريب منك بارك اللة فيكى وانتى لسة صغيرة اوى وهاتابلى حاجات كتير وناس اكتر ووفقك اللة اللهم اتم شفاها وعافها واعفو عنها

[salwasoula]

يا حبيبتي ان شاء الله ربنا هيرزقك بالزوج الصالح الطيب ويفرحك بالذرية الصالحة
بس لازم تلتزمي الصدق لان الصدق منجي ومتنسيش ان الي بيجيلها المرض دة محتاجة تعمل اشعات و تحاليل سنوية..... يعني هيعرف هيعرف و سلمي امرك لله و اخلصي الدعاء.شفاكي الله و عفاكي

[هبه مجدى]

بصى يا حبيبتى لو المرض ده لا قدر الله ممكن يكون ليه تاثير جانبى على صحتك او على جسمك بعد كده لازم تقولى بصراحه انما لو ما فيش ليه اى تاثير بعد كده يبقى ما فيش داعى انك تقولى اعتبيريها مرحله وخلصت وانسيها خالص وركزى فى حياتك الجديده اللى باذن الله حتكون مافيهاش غير كل سعاده

[mashmosha]

والله انا شايفة انك تسالى حد من دار الافتاء وده احسن حل هما ممكن يفيدوكى اذا كان حرام ولا لا وكمان تسالى الدكتوره اذاكان لاقدر الله فى توابع للمرض تانى ولا لا (عفاكى الله من كل سوء وجعله فى ميزان حسناتك) وباذن الله متقلقيش ابدا من حكاية الجواز دى وان شاء الله تقوليلنا قريب اوى انك اتجوزتى وحامل كمان

[temoon.pompa]

حبيبتي حمد لله على سلامتك يا قمر وان شاء الله ربنا يعافيكي ومتكنش فى اى اثار ليه بعد كده وزى اخواتى ما قالوا ميكونش فيه غير كل خير وحياه هاديه وسعيده ان شاء الله يا قمر
وبالنسبه للانسان اللى هيتقدملك فياريت تصارحيه لان الصدق بينجى وبأذن الله ربنا يقدملك كل خير

[nona79]

انا باوفق مشموشة الرائ وسلامتك الف سلامة الحمد لله الي ربنا عفاكي وشفاءكي

[missomega]

والله بجد متعرفوش رودودكم دي"ردت فيا الروح"احسن حاجة في الدنيا انك تلاقي حد يقف جنبك ويطمنك بجد مكنتش متوقعة الفاعلية دي منكنم ربنا ميحرمنيش منكم ابداويبعد عنكم السوء

[أم لوجى و ملك]

اولا الف حمد وشكر لله على سلامتك
ثانيا زى ما بيقولوا الكذب مالوش رجلين
يعنى هو ممكن يكتشف الموضوع ده بالصدفه وهيكون ساعتها شكلك مش لطيف امامه ولازم تعرفى وتتأكدى ان نصيبك هتشوفيه رغم كل شىء يعنى لو ليكى نصيب تتجوزى الانسان ده ومهما قلتى اتأكدى ان كلامك ده مش هيأثر على الموضوع ولو ملكيش نصيب فيه وما اتكلمتيش ولا كلمه الموضوع مش هيكمل فأولا وأخيرا زوجك مكتوب عند الله سبحانه وتعالى
فرأيى طبعا انك تعرفيه الموضوع وممكن تعرضى عليه ان يجى معاكى للدكتور عشان يتأكد بنفسه من انتهاء المرض وانك ممكن تمارسى حياتك بشكل طبيعى
عزيزتى الصدق اقصر الطرق للاقناع ما دخليش نفسك فى دوامة انك مخبيه سر لانه لو معرفش منك بشكل مباشر ممكن يعرف عن طريق زلة لسان بسيطه منك او من اقرب الناس ليكى وزى ما قلت ليكى قبل كده ان كل شىء نصيب محدش هيقدر انه يغيره
وان شاء الله ربنا يبعتلك انسان مثقف وواعى ويقدر يفهم الموضوع بشكل صحيح ربنا يوفقك ان شاء الله

[جيهان عبدالله على ربع]

كلامك صح يا ام لوجي بارك الله فيكي يا قمر
وانتي يا مس اوميجا الصدق ثم الصدق ثم الصدق
واللي في نصيبك هاتشوفيه وربنا يهديكي ويشفيكي انتي وجميع المسلمين والمسلمات الاحياء منهم والاموات

[الايمان777]

انا من رايى انه لازم تقولى للى هتتجوزيه الحقيقه لان الصدق منجى وهو لو متمسك بيكى اكيد مش هيهتم بحكايه المرض لان ده شىء بتاع ربنا