[heba & hema]

السلام عليكم يابنات
لو سمحتولي يعني انا عندي استفسار عن حاجه
انا في اخر الشهر التامن من الحمل يعني فاضل شويه ان شاء الله وادخل التاسع وبما ان دي اول مره اقصد في الحمل
فانا كنت عايزة اعرف الميه اللي بتخرج قبل الولاده دي اللي بيسموها السائل الامينوسي
يعني هيا بتنزل كتييير اوي؟ولو حطيت فوطه ممكن تستوعب كل الكميه؟ وبعدين هيا ليها ميعاد معين ولا في اي وقت؟اصل لو هيا بتيجي في اي وقت متهيالي اني اول ماادخل في التاسع هقعد في بيتي ومش خارجه احسن اتفضح وانا في زيارة مثلا
ولا ايه رايكو؟
عايزة واحده مجربه تقوللي
هيبقي موقف محرج بالنسبه ليا ؟متضايقه اووي من الموضوع ده وعايزة اعرف تجاربكو واعرف كمان اعمل ايه تجنبا للاحراج
وشكرا مقدما للي هاترد عليا

اذا اعجبك الموضوع و اردت نشره في المنتديات الاخرى فاستخدمي هذا الرابط:
ولادتي قربت وعايزة اسالكو علي حاجة
http://forums.fatakat.com/thread38862

[رشا محمود]

أختى الحبيبة
ربنا يكرمك ويقومك بالسلامة وتفرحي بطفلك يا رب. مش شرط يا حبيبتي تنزل الميه كعلامة على الولادة ، انا في المرتين لم ينزل ماء، وكان علامة الولادة ، مخاط أخضر اللون ، وفي المرة التانية مخاط مع دم ، لكن اللي اعرفه أنه اذا اتفتح كيس الجنين بينزل ماء كتير وفي أي وقت ، عموما في التاسع يفضل انك تبقي بالبيت وتتحركي داخل البيت واتمشي كويس علشان ربنا يسهللك الولادة ان شاء الله

[heba & hema]

ربنا يخليك يارشا علي نصايحك
يعني اتكتب عليا الحبسه في البيت لغاية مااولد
مش مشكله كله فدا سلمى بس تيجي بالسلامة
مشكوره علي مرورك وردك ياحبيبتي

[ام بسنت]

ربنا يقومك بالسلامه يارب بصى مش شرط انها تنزلك فيه ناس مش بتنزلهم غير لما تكون حتولد بتبقى كتير قوى وتعب بقه
انتى عارفه انا كان بينزل عليا من وانا فى التامن كان كل شويه ينزل واروح اعمل اشعه عشان اشوف الميه اللى حواليها بس قالى مااتحركش كتير
يعنى كل واحده بتختلف عن التانيه وعيشى حياتك عادى والحركه حلوه جدا فى التاسع بتسهل وربنا يكملك على خير وتقومى بالسلامه

[أم لوجى و ملك]

ربنا يقومك بالسلامه يا هبه
انا فى ولا دتى الاولى والتانيه نزلت الميه قبل الولادى علطول تقريبا قبل راس البيبى
وكنت بخرج واعمل كل اللى انا عاوزاه قبل ولادتى علطول يعنى اليوم اللى ولدت فيه لوجى كنت بتمشى قبلها علطول اول لما روحت جانى الوجع وعموما انا عن نفسى كنت بعرف انى هولد من المغص المتقطع اللى هو بداية الطلق بيبقى مغص متقطع فى الاول وبعد كده بيجى بشكل اقوى وعلى فترات متقاربه وبعد كده بيبقى وجع صعب جدا جدا فى البطن والضهر يعنى مش اول لما يجىمغص تجرى على المستشفى لا بياخد وقت خصوصا لو اول بيبى انا جانى الوجع الساعه 11 بالليل ولدت الساعه 4 ونص الفجر دى اول ولاده والتانيه الوجع بدأ 7 الصبح ولدت العصر يعنى فيه وقت
ربنا يقومك بالسلامه ان شاء الله

[samasemo]

مفيش داعى للحبسة من ا ول الشهر يعنى اكيد الدكتورة حتحدد لك ميعاد الولادة وممكن متنزلش ميه خالص متقلقيش كل واحدة مختلفة عن الاخرى والحركة مهمة فى الشهر الاخير والدكتورة قالت لنا ان الحركة فى البيت مش كويسة زى ماتخرجى برة وربنا يقومك بالسلامة

[زيزى]

حبيبتى ربنا يقومك بالسلامه فكرتينى انا والده من 3 شهور والميه مانزلتش الا لما الدكتورة هى الى نزلتها وهى بتشوف الراس قربت ولا لسه واوصيكى بالحركه على قد ماتقدرى عشان ربنا يسهلك علطول خصوصا انتى اول مرة والرحم لسه مفتحشى أنا يوم ماولدت المغص كان معايا من الصبح بس زاد المغرب وفضلت اولد 5 ساعات وشرف ونزل الساعه 12 باليل ربنا يعطيكى ساعه سهله واتمشى كتييييييييييييييييير

[bosycat0200]

ربنا يقومك بالسلامه
انا الميه نزلت عندى وانا نايمه صحيت الصبحلقيت السرير مبلول هههههههههه
بس الميه نزلت وتانى يوم فى نفس الوقت ولدت سلمى وكنت بتحركم عادى ونزلت للدكتور بالليل وحطى فوطه انا منزلش ميه كتير وغيريها كل شويه
وهى ساعه وتعدى

[ماما دودو]

ربنا يوصلك بالسلامة
أنا في ابني البكر نزلت مني الماية قبل بيوم من الولادة كانت كثيرة وفي ولادتي الثانية نزلت مني بس كانت قليلة قوي
أنا رأيي انك تخرجي وتتفسحي اصل المشي بيسهل الولادة يكفي انك لو عايزة تحطي فوطة بس لو نزلت منك الماية فلازم طبعا تروحو فورا للدكتورة
ربنا يرزقك بالذرية الصالحة

[heba & hema]

ربنا يخليكو علي ردودكو المميزة والله افدتوني
بوسي كات انتي جبتي سلمي؟؟
انا ان شاء الله في انتظار سلمى برضو ^_^

[ام البنات3]

ربنا معاكى ويقومك بالسلامه وتيجى سلمى بالسلامه
وفعلا ذى الاخوات ماقالوه الولادات مش ذى بعضه بتختلف من ولاده لولاده
بس عيشى حياتك عادى خالص انا كنت فى 3بنات بخرج وبمشى كتير فى اخر شهر
لان المشى بيسهل عملية الولادة وطبعا كل ده براى الدكتور
وطبعا لو نزل عليكى مياه لازم الدكتور يعرف وابقى طمنينا عليكى

[ام كوكو]

ربنا يتمملك علي خير وتقومي بالسلامه انا عن نفسي ولدت قبل نهايه التاسع باسبوع قيصري فمفيش حاجه نزلت عليا بس اكيد زي الاخوات مقالولك كل واحده بتختلف عن التانيه

[الزوجة الاولى]

بنا معاكى ويجعلها ساعه سهلة يارب
وتقومى بالسلامة انتى وسلمى بس امشى كتير فى التاسع علشان ربنا يسهلها عليكى

[mascallil]

الله معاك يا بنتي لا تخافي
اللي ممكن انصحكبيه هو من الآن الى غاية الولادة انشاء الله
لازم تاخدي من وقتك ساعة تتمشي فيها على راحتك على مهلك
المشي يسهل الولادة
اما الماء الكثير ادا نزل فداك موعد الولادة
تشجعي ولا تخافي .كل شيء سيمر على خير.

[ام حودة]

عمر ما كانت المية علامة ولادة وبالعكس الحركة مفيدة جدا فى الشهر الاخير الا اذا اوصى الطبيب بغير ذلك ومتخفيش دة مفيش اسهل من كدة بس ياريت لما تحسى بوجع الولادة تبتدى تدعى ربنا وتقولى اذكار دة كان طلب الدكتورة منى اثناء الولادة والحمد لله محستش بوجع جامد
ربنا يرزقك ساعة سهلة ان شاء الله

[nona dala3]

أنا مش هقدر افيدك يا هبهوبه علشان انا مخطوبه ومعنديش تجربه بس صاحبتى حصلها كده والدكتوره نصحتها تنام على ضهرها
والف الف سلامه وربنا يقومك على خير يارب

[fadhila]

ana dakhalt echahr 9 wa el doctora mwassiyani aal machy ktir, chokr liki , kan aandi nefs el-soual wa thanks for all fatoukat ala el maaloumat

[ام سيف الدين]

و الله يا حبيبتى انا ولدت قيصرى و لغايه مدخلت غرفة العمليات و لا نزل عليا و لا نقطة ميه واحد مع العم انى ولدت قبل ما اخلص التاسع بخمسة ايام بس يعنى كنت استويت ههههههههههههههه
على العموم متفكريش كتير و انشاء الله تجبلنا احلى سلمى فى الدنيا و نجوزها لسيف ابنى
و ابقى ابعتيلنا صورة البيبى

[مصراويه]

إن شاء الله تقومى بالسلامه وتجيبى أحلى بنوته .
أنا يا ستى ولدت مرتين عادى وفى المرتين كانت الميه تنزل من الصبح لحد ماأولد بالليل وأول ما تنزل عالدكتور على طول لأن الميه دى مهمه اوى للجنين ولتسهيل عملية الولاده وخطر جداً إنها تخلص من حوالين الجنين قبل الولاده .
وطبعاً المشى مهم جداً والأحسن منه فعلاً هوطلوع السلالم لأنه بيوسع الحوض ويسهل الولاده بس لازم بأمر الدكتور - وما تديش ودنك لحد وتقعدى تسمعى حكايات عن صعوبة الولاده وألمها لأن مش كل الستات زى بعض دى حاجه تانى حاجه المهم هو تساهيل ربنا وإن شاء الله تكون ساعه سهله -وعلى فكره بقى أسهل حاجه فى خلفة العيال هى الولاده وبعد كده خدى عندك سهر وقلق وغيارات وتسنيين وتطعيم وحقن وغيره وغيره ربنا يقدرك ويديكى الصحه .
بقولك أيه يا هبه أبقى حطى صورة النونو لما تقومى بالسلامه إن شاءالله ولو طلعت حلوه كده زى مامتها أنا حأخطبها لأبنى وهولسه فى تانيه إعدادى يعنى يادوبك عقبال ما يكون نفسه تكون هى بقت عروسه وأهو زيتنا يبقى فى دقيقنا يا عسل -وربنا يطمنا عليكى إن شاء الله .

[رشا محمود]

بصي يا حبيبتي الدعاء ده احفظيه وقوليه على طول وأهم وقت ساعة الولادة ، كانو كاتبينه على الدولاب جنب سرير الولادة لما أنا ولدت، وأهم شيء فعلا أنك تفكري في عظمة ربنا في كل شيء ، وفي موضوع الولادة يا سبحان الله لما تخرج النفس من النفس ، ولما الجسد ينفصل عن الجسد ، والله مافيش أحلى من اللحظة دي، أوعي تخافي ولا تفتكري أنها مؤلمة ، والله العظيم أنها هتبقى أسعد لحظات عمرك ان شاء الله ، وخدى طفلتك في حضنك على طول زي ما هي ، علشان الحنية تاخدها منك ، الحضن ده مهم جدا على فكرة ، واوعي تنسي تدعي لها تكون من الصالحات البارات لان دعاء الحامل مستجاب.
الدعاء:
اللهم لا سهل إلا ما جعلته سهلا.وأنت تجعل الحزن إن شئت سهلا.

اللهم حسن خَـلقه وخُلقه.وهون حمله وولادته.واجعله من الصالحين.
ـ اللهم يا مسهل الشديد ملين الحديد .ويا من هو كل يوم في أمرجديد.أخرجني من حلق الضيق إلى أوسع الطريق .بك أرفع ما أطيق وما لا أطيق.وصلى الله على سيدنا محمد
وعلى اله وصحبه وسلم.
ـ يا خالق النفس من النفس يا مخلص النفس من النفس يا مخرج النفس من النفس خلصني.