[سمسمه26]

السلام عليكم
أنا اول مرة اكتب عن مشكله عندى وادخل بيتى بينكو بس انا نفسى اتكلم مع حد انا حاسه انى رايحه للمجهول ، الحكاية انى مسافرة تقريبا اول الشهر اللى جاى دوله عربية وممنوع اخد ولادى وجوزى معايا غير بعد شهرين تلاته يعنى لما اخد انا الاقامه هناك
المشكلة انى مش قادرة ابعد عن ولادى طبعا هتقولولى هتسيبيهم فين ؟ عند ماما وبابا الله يكون فى عونهم وجوزى ، مش عارفة الخطوة دى صح ولا غلط ، الناس مابترحمش
اولهم حماتى لقيتها جت تزورنى واحنا قاعدين ناكل قاعده تستفسر كالعادة هى مامتك موافقه ؟ او تقولى كملى السنه لوحدك هناك اقولها مش هقدر ابعد عن ولادى هينسونى تقوللى النت موجود
تقوللى ازاى مامتك مخلياكى تسافرى ؟ ماردتش عليها (عايزة تحمل ماما مسئوليه السفر بعيد عن ابنها )
وانا قلت لجوزى هى ماما مالها علما بان انا كنت بشتغل هنا فى مصر وماما هى اللى قعدتنى من الشغل علشان الولاد
دلونى اسافر ولا لا ؟
ساعات اقول بلاش القاعده جنب ولادى بالدنيا وساعات اقول بقى بعد ده كله وتوثيق ورق ودفع فلوس واقول دى فرصه للولاد عشان حتى اعلمهم كويس واهو لو زهقت ارجع

اذا اعجبك الموضوع و اردت نشره في المنتديات الاخرى فاستخدمي هذا الرابط:
عاوزة ردكو ضرورى
http://forums.fatakat.com/thread40354

[smsmah]

بصي يابنتي
مبدئيا كده شكلك مسافره عشان تحسني احوال معيشتك انتي وجوزك وبما ان انتي خلاص كل الورق اتعمل واتجهز ومش فاضل غير السفر معني كده انك انتي وجوزك قعدتوا واتكلمتوا وفكرتوا وقررتوا واللي بيحصل دلوقتي خوف من كلام فاضي ملوش اساس يعني حماتك بدال متقلك مامتك ازاي موافقه كان المفروض تفهم ان حياتك انتي وجوزك وقرارتكوا سوا ملهاش علاقه لابمامتك ولا بمامته
انتي ياسمسمه لو شايفه ان حياتكو فعلا محتاجه فلوس زياده ومش هتنفع من غير السفر بجد لازم تسافري انتي شايفه الدنيا عامله ازاي
بس مينفعش اولادك يتسابوا هما وجوزك ف مصر وخصوصا جوزك انتي شايفه البلاوي اللي احنا فيها بصي لازم يسافروا معاكي او ورا منك بفتره قليله ومش سنه ولابتاع
وبعدين انتي هتكوني ف الغربه انتي وجوزك وولادك وكلها كام سنه وترجعوا يعني مفيهاش اي حاجه الناس كلها بتسافر وبتحسن معيشتها وكده
بس حاوطي علي بيتك وعيالك يعني تاخدي بالك منهم كويس ومن جوزك كمان وانتوا مسافرين وف النهايه دي كلها ارض ربنا وكل حاجه بايد ربنا
يعني سافري ياجميل وانتي مطمنه وطبعا اامل انك قبل ماتكوني خطيتي اي خطوه تكوني صليتي صلاه استخاره ودعيتي ربنا ولازم تصلي وتدعي ربنا كتير
وربنا يوفقلك كل الظروف يارب
وبما انك قررتي وفكرتي كويس متخليش كلام حماتك يأثر فيكي
وقولي دايما توكلت علي الله وامنت بالله
وادعيلي طبعا لاني اول حد يرد عليكي
ياله ربنا يوفقك

[ام سراج]

حبيبتي الناس كلها مخنوقه من الغلا والمعيشه الصعبه واللي بيلاقي فرصه يحسن دخله مايسبهاش..اهم حاجه ان اولادك وجوزك مايتأخروش عليكي يعني تلات ارع شهور ويلحقوكي وتعاهدي جوزك على كده..اما لو رجع في كلامه..او فضل انه يفضل جمب طنط الست مامته..يبقى ارجعي على طول انت اصلاً مش مكلفه بالانفاق على البيت ..دي مسؤليه الراجل..وماتشتريش الفلوس وتبيعي حياتك..لأ
يا يسافر هوه..يا تسافري وييجي وراكي..يا تقعدوا سوا وربك يعدلها
اوعي تضحي باولادك مهما كان التمن الفلوس ممكن تشتري لهم لقمه حلوه بس عمرها ماتشتريلهم قلب حنين زي قلبك

[القطه]

سمسمه انا مش معترضه على سفرك
ولكن هل امنتى من الاخطار هنا فى مصر
اللى كلها امن وامان وعزه وكرامه وووووو الى اخره من شعارات
لما تسافرى بره قدرتى المخاطر اللى ممكن تتعرضى ليها لا سمح الله
انا هاقولك
اختى كانت مع جوزها وقعدت 20 سنه فى بلد عربى اسلامى
ولم تسلم من المضايقات طول المده من اهل البلد ومن غيرهم
وكانت مع جوزها اومال لما تبقى لوحدك ؟؟؟؟؟؟
خللى بالك من نفسك وحافظى عليها وربنا يوفقك ولكن تذكرى
يا حبيبتى للاسف لا كرامه للشخص الا فى بلده
للاسف واول واهم حاجه ممكن تكون فى بلدى
انها تكفينى ولاتجعلنى اهرب منها بالمشوار لبلد اخرى
تحت ضغط الحاجه وللاسف البحث عن المستوى الافضل بعد الغلا اللى النظام معيشنا فيه بقت اهم معالم المواطنه
سافرى يا سمسمه لوحدك لوحدك بس خلى بالك من نفسك
اوووووووووووووووووووووووووووووووووووووى
ربنا يحفظك ويبعتلك اولادك وجوزك فى اقرب وقت
ويسترها معاكى ويوسع عليكى وعلينا وعالمسلمين اجمعين اميييييييييييييييييييييييييييييييييييييييييييييييي ييييييييييين
اتمنى لكى التوفيق

[سمسمه26]

متشكرة خالص لردودك يا سمسمه وام سراج والقطة
وربنا يوفقنا كلنا

[مايو]

ازيك ياسمسه بصى انه راى من راى سمسه وام سراج والقطه بس فى حاجه عايزه اسالك عليها وتفكرى فيها كويس حتى لو جوزك واولادك حصلوكى وسفرولك ياترى جوزك هايقدر يتئقلم هناك ويلاقى الشغل المناسب ليه لان لو دا محصلش متهيقلى هايكون فى حساسيه جامده وانت هاتكونى استقرتى فشغلك وهو لاء ودا طبعا مش هايبسطك وغير كدا متنسيش اولادك هايكونوا بعيد عن بلدهم واهلهم وانت وبابهم مش هاتكونوا فضينلهم كل واحد مطحون فى شغله فكرى فى تمن الغربه لو حاسه انك تقدرى تدفعيه سفرى انا اسفه انى سوتلك الدنيا بس لازم تفكرى فى الاحتمالات دى وتلاقيلها حل قبل ماتسافرى وياسيتى ربنا مابيسبش حد وعلى العموم ربنا يوفق وياريت تكونى صليتى صلاه استخاره

[سمسمه26]

يا جماعة انا بفكر الغى الحكاية دى خالص ( مش قادرة ) ومش عارفة اعمل ايه
جوزى مشجعنى عليها وانا مرعوبه وخايفة مووووت ، خايفة اسيب جوزى وولادى اصلهم لسه صغيرين وامى وابويا
هو قاللى هيجيلى بعد شهرين تلاته بس خايفه يدينى بمبه
يارب اهدينى للى فيه الصالح
وارجوكم ردوا عليه متسيبونيش وتمشوا

[ام ايفان]

الله يكون في عونك بصراحة حاجة صعبة..
انا افضل ان الزوجة ماتترك زوجها حتى لايتعود انه يبعد عنها..والاولاد كمان بس مادام زوجك مقتنع وانتي عارفة انك لو تتركي اولادك في بيت اهلك وماما وبابا عندهم تحمل انهم يربون اولادك ويكونو ن مش محتاجين حاجة فلا باس ..يعني بصراحة اذا كنتي مضطرة للسفر بسبب تحسين الحالة المادية او سبب قوي آخر فلازم تضحي لبناء مستقبل لك ولاطفالك..بس لو كان السفر مجرد تغيير دولة او شيء مايستاهل فبلاها ..
لاتتسرعين اتخذي القرار الصح بس بدون استعجال..

[ام سيف الدين]

سمسة انتى مسافرة فين
لو عندنا فى الامارات الموضوع ياخد اقل من شهرين
بس لازم اهليك يجولك هنا لان الحياه هنا من غير راجل صعبة جدا
و لو عزتى اي خدمة احنا تحت امرك

[سمسمه26]

متشكرة خالص يا ان ايفان على ردك
بس ضحكتينى هههههه على تغير الدوله دى ، ده انا لما جيت انقل شقتى كنت زعلانه تقوللى تغير دوله انتى مفكرانى بعمل جولة حول العالم

[سمسمه26]

انا مسافرة الكويت يا أم سيف
ومتشكرة جدا
واى حته من غير راجل مابتبقاش صح دايما بيبصوا للست نظرة مش اد كده اللى لوحدها
اساسا انا ماينفعش من غير جوزى بحس انه مينفعش اعيش لوحدى انا مرتبطه بيه جدا بالرغم من انى ممكن ماشوفهوش غير ساعه ونص فى اليوم وباقى الساعات شغل ونوم
مش عارفة الاجرااءت هناك بتاخد اد ايه ياريت اللى يعرف يقوللى

[ام سيف الدين]

اسكندرانى فى الكويت يا ريت ترد عليكى انا ممكن اعمل لينكك بينك و بينها

[سمسمه26]

ههههههههههه دى اول واحده سالتها وربنا يكرمها طمنطينى على العيشه هناك

[مني محمد]

ههههههههههههههههه علي قد انتي مضحكه علي انتي حزينه هي فعلا مشكله صعبه
انا بقالي فتره بفكر في الموضوعك هو انتي وجوزك وخدين قرار وفكرته انتو هتعملو ايه في حياتكو انا رايي من راي ام يفان

[ام سيف الدين]

طيب تمام على العموم انا بعت الينك بتاعك لها
و انشء الله تكون رحله سهلة و افامة مريحة و استقرار سريع
و بعدين معجبتكيش الكويت تعالى على الامارات
احان بسم الله ما شاء الله قربنا نعمل مستعمرة داخل الامارات
و اى خدمة يا قمر

[مني محمد]

انا مش عرفه هقولك ايه بس مشكله دي طحيرررررررررررفعلابصي اللي في خير
يقدمو ربنا هو اللي هيكون

[ماجي2008]

اوعى تضحي باولادك مهما كان التمن الفلوس ممكن تشتري لهم لقمه حلوه بس عمرها ماتشتريلهم قلب حنين زي قلبك

الله يكون فى عونك يا سمسة وتسلمى يا ام سراج العبارة دية بامانة ربنا وجعتى قلبى رغم انى لسه بنت ومجربتش احساس الامومة بصى يا جميلة هم قولوا يا اهل الرجال مشى يا اهل النسا عشان يا حبيبتى جوزك ما يرمشى هلب عليكى ويعتمد عليكى وفى الاخر مفيش شكر مفيش رجل بمعنى اصح ليه امان انا عارفه انتى عاوزه تسافري ليه عشان ولادك بس شوفتى القطة على صغارها بتعمل اية لاه هو اللى ملزم بيكى وبولادك دية فتنة انت ست مسلمة والرسول عليه افضل الصلاة والسلام قال فيما معناه نهنا عن سفر المرآة لوحدها من غير محرم فما بالك لما تروحى للمخاطر برجليك ان بنصحك اقعدى هنا وهو لوجت له فرصة للسفر يسافر هو وربنا معاكي ويهديكي للخير

[سمسمه26]

انا مش عرفه هقولك ايه بس مشكله دي طحيرررررررررررفعلابصي اللي في خير
يقدمو ربنا هو اللي هيكون

اه والله تحير خالص
يلا ادينا ماشين مع الدنيا لما نشوف هتودينا لفين

[سمسمه26]

متشكرة خالص يا ام سيف نتعبك لك كده يوم فرح سيف ان شاء الله

[سمسمه26]

بس هى كمان يا ماجى قالتللى يجولك بعد فترة وعموما انا ناويه لو الاولاد ماجاوليش هانزل ده اتفاق واحنا متفقين على كده