[ام سراج]

مبدئياً اسمك حلو يا بنبوني وعجبني جداً
ثانياً ماتفرطيش في الراجل ده..ايه يعني شغال على تاكسي ؟ياستي ده في امريكا..بيننا وبينهم بلاد وانت مش لازم تعملي اعلان انه شغال على تاكسي في امريكا كفايه اللي حواليكي يعرفوا انه دكتور بيحضر دراسات عليا في امريكا
انا خالتي متجوزه مهندس وعايشه في بروكلين من 30 سنه بس الاول كانت عايشه في حته زباله في نيويورك وجوزها كان بيشتغل في جراج
وابن خالي التاني عايش في داوننج تاون في بنسلفانيا وهوه دكتور برده بس ليه 4سنين بيشتغل في مطعم علشان يكفي مصاريف الدراسه والبيت..يعني وضع خطيبك عادي..امال انت فاكره واحد مهاجر طلباً للعلم مالوش سند الا ربنا ح يشتغل ايه هناك..رئيس وزرا؟ وبعدين اصلاً هوه اكيد عامل كده غصباً عنه حد يلاقي راحه ومايرتحش؟..وموضوع انه ماعندوش مشاكل..لأ..ممكن يكون عنده بس مخبيها علشان مايشغلكيش معاه..ده طبع الرجاله مش سهل يشكوا زينا
احمدي ربنا يابنبوني..ولوزعلانه من الاسلوب يبقى معاكي حق..كلميه وعاتبيه بالراحه دي انت سنده الوحيد في الدنيا..ماتزوديهاش عليه..يا اما لو مش طايقاه سيبيه.. وربنا يعوضك ويعوضه

[حنان ام عمر]

لا لازم انتي تكلميه دلوقت لانه هو اتصل اكتر من مرة وما قصرش معاكي
لازم انتي تطلبيه وتكلميه بكل هدوء وتفهميه انك زعلانة من اسلوبه في الكلام معاكي وانه لازم تنسوا اي فروقات فيما بينكم وتبنوا حياة ليكم لوحديكم تسعدكم وتليق بيكم بالطريقة الي بتشوفوها مناسبة

[أم مريم]

انا من رأى اختك انتى ركزى معاه بس فى اسلوب الحوار اللى اتكلم معاكى بيه

و فعلاً زى انتى ما بتقولى لو انك فارق معاكى المستوى الاجتماعى مكنتيش وافقتى من الاول

و بعدين انتى بتقولى انه دكتور و شغله على التاكسى ده عشان يصرف على دراسته و يعرف يتجوزك
وان شاء الله لما يخلص دراسته اكيد هو من نفسه هيبطل شغل على التاكسى
لأنه هيبقى دكتور و ليه مكانته و شغله فى مستشفى مثلاً او عيادة بعد كده كمان ان شاء الله
فمش معقول هيبقى دكتور و سواق تاكسى فى نفس الوقت
المهم انك تقفى جنبه لحد المرحلة دى ما تنتهى
دى مرحلة مش هى الاساس
ده كله بغض النظر عن ان سواق التاكسى ده مهنة شريفة احسن من ناس كتير ممكن يكون ليها مراكز مرموقه و بيصرفوا على بيوتهم من مال حرام

[الايمان777]

شوفى مين الاقرب ليكى والدتك ولا والدك وشوريه فى الموضوع ده واكيد هيبقى رايهم افضل من رايك وهيتصرفوا باسلوب صح اكتر منك

[بنبونى]

ام سراج
ميرسى يا جميل بنبونى ده سمهولى فى البيت من كتر ما باكل بنبونى

عارفين والله يا جماعه
انا بجد بحبه وعايزاه ومش عايزه افرط فيه
ولو كنت حسه باى فرق مكنتش استنيته 3 سنين ولا كنت اصلا شغلت بالى بكل ده
بس بجد انا عارفه انه الحمدلله كويس وبيحبنى وبحبه اوى وعارفه انه ملوش غيرى بس اسلوبه بصراحه دايقنى اوى خصوصا اننا مش بنتكلم بالاسلوب ده خالص خالص
ولا عمرنا الحوار ما بينا وصل للدرجه دى

بس اكملكم اللى حصل

بعد ما كتبتلكم لاقيته بقى اون لاين كلمنى ورديت عليه عادى وبقيت كنت حقوم علشان بابا كان عايز الجهاز
وقولتله انى ماشيه وسلام سلام
بعد كده متصلش بيا زى كل يوم بليل عادى قبل ماانام
روحت بعتله مسدج فاضيه علشان يتصل ( عادى بدل الرنه متعودين على كده علشان الفويس مايل بيفتح عليا وبيخلص فى ثانيه الرصيد)
الغريب بقى انه متصلشششششششششش
وطول الليل سايبه الموبايل مفتوح متصلش
وطبعا هوا دلوقتى نايم
وحتجنن واكلمه وحشنى والله بس مش عارفه بقى لازم اقوله الكلمتين اللى مدايقنى دول الاول

بجد قولولى انا غلط علشان مش عاجبنى اسلوب الحوار؟؟

ماما وبابا مينفعش اقولهم
لان ماما حتقولى ياسلام عادى عادى كل الرجاله كده ومش حتكبر الموضوع وخلاص علشان تريح نفسها
اما بابا فحيعملها قضيه وحيكلم خطيبى فى الموضوع وانا عارفه انه فى الاخر الاتنين حيدايقوا وخلاص ويرجع خطيبى يقولى قولتلهم ليه من الاول انتى السبب

وبصراحه بقى
انا اتعملت انىن محكيش حاجه خااااااااااالص الا بقى لو موضوع اكبر منى ومنه
لان اى حاجه بينى وبينه تعتبر سر ومحبش ان حد يعرفه وكمان علشان اتعود ان فى بيتى محدش يعرف اسرارنا

انا غلط ولا صح؟

[undonelife]

يابنتي متحمليهوش فوق طاقته يمكن معرفش يلاقي شغل في الطب هبصرف منين.. الشغل مش عيب وبعدين ده مؤقت
متعمليش زيي وتفكي في لحظة غضب بعدين تندمي
صدقيني

[بنبونى]

عارفه يا undonelife vbmenu_register("postmenu_492652", true); انا حقيقى مش بحمله فوق طاقته
وبج دعارفه ان ده مؤقت وانه اصلا بيعمل كده علشان الدراسه وعلشان نلحق نتجوز
بس انا كل الىل دايقنى فى الموقف انه يكلمنى بالاسلوب ده وكمان اسلوب ده اللى عندى اخبطى راسك فى اكبر عمود
واحنا من الاول خالص متفقين على كل حاجه ومخططين لكل حاجه فميجيش ره واحده الاقيه اخد قرارات وحاجات من غير اصلا ما يقولى ولا نفكر فيها
انا مش مشكلتى انه يشتغل على تاكسى طبعا شغل حلال ومفيهاش حاجه بس كل اللى اقصده انه يركز بقى فى الطب
بقاله 4 سنين كده ومش حاسه انه بيركز خالص
واكيد بينسى الطب زيه زى اى حاجه ويرجع يذاكر تانى وتالت من ااالاول نفس الحاجات
وهو الحمدلله شاطر كدكتور ولما بينزل هنا مصر بجد العيانين بيحمدوا ربنا انه رجع فنفسى بجد يركز ويخلص بقى الدراسه بتاعته

ادعولى كده ربنا يكرمكم

[ماجي2008]

معلش اراء كتير ممكن تشقلب دماغك شوية هو الفرق فى اية فى انه سواق تاكسي الشغل عمره ماكان عيب بدليل انتى عارفة وموافقه وخلتيى الخطوبة تستمر
الشغل مفهوش سواق تاكسى ولا عامل نطافة ولا غيره
رئيس الهند مثلا كان بائع جرائد مش كده و لو انتى مثقفة ومتفتحة لم تقاس بالمنظر ده
ثانيا اوعى تقولى لاهلك حاجة انه اهنى او قالى او حاصلى ياماه هتحصل بينكم مشاكل مش كل حاجة تجري على اهلك ده عمل وساوي
ده كده غلط ومعلش سامحي واعتبريه ذلة لسان او لحظة نرفزة الواحد بيطلع عن شعوره استهدي بالله ربنا يهديك بلاش عتاب كتير عشان العتاب بيجيب مشاكل وربنا يصالح ليكي ولينا الحال يارب

[بنبونى]

ربنا يكرمك يا ماجى انتى وكل البنات يارب ويباركلكم فى حياتكم

[undonelife]

ربنا يرجعهولك ويصلح حاله ان شاء الله ويسعدكم

[ام سراج]

ازيك يا بنبوني.. عندي اعتراف خطير..بصراحه انا كنت مضايقه من موقفك امبارح..بس خفت اشد عليكي تزعلي مني..فحاولت اوصل لك وجهه نظري باهدا طريقه.. بس النهارده..قريت كلامك الجديد وبصراحه ربنا يخليلك عقلك ده رغم ان عمرك صغير بس ماشاء الله عليكي..
نرجع لموضوعنا
كويس انك مش بتقولي لبابا وماما على المشاكل ..لانها ح تكبر ع الفاضي
بالنسبه لخطيبك وانه ممكن ينسى الطب..فشدي حيلك وجودك جمبه..حيفرق في حاجات كتير..وح يخليه ينجز ويخلص علشان اولادكم اللي ح ييجوا ان شاء الله..
بالنسبه لانه زعلك ..كلميه بصراحه وبهدوء..وتحطوا حد للموضوع ده علشان مايتكررش تاني لا منك ولا منه
اذا كنتي حاسه انه ممكن يكون حاسس بنقص علشان الفرق مابينكم...حسسيه دايماً بالعكس..انه احسن راجل في الدنيا وان مفيش احسن منه وانك عمرك ماتلاقي زيه
وكرري الكلام ده لغايه مايطمن ويهدا..بس اوعي تخليه يتغر عليكي ماشي يا بونبونايه؟

[بنبونى]

ربنا يكرمكم يارب جميعا لانكم ساعدتونى اوى
وميرسى ليكى ياام سراج
بصى والله انتوا بس فى الاول فهمتونى غلط او انا اكيد اكيد عرضت الموضوع غلط علشان كده فهمتونى غلط انى متعاليه وكده

بصوا بقى اللى حصل

مكلمنيش من امبارح ... تمام
قولت عامل فيها المقموص ولا يكون حصل حاجه؟ خفت بصراحه
لحد الساعه 5 العصر مكلمنيش مع انه الصبح لازم بيكلمنى قبل ما ينزل وبيكون على 3 بالكتير
المهم وانا مروحه بعتله قولتله انت فين كل ده
اتصل بيا بس كنت فى المترو ( وسيله التعذيب الاولى فى مصر
ومعرفتش اسمعه وقالى انه بيحاول يكلمنى من الصبح بس الخطوط وحشه ومش راضيه تجمع
قالى حكلمك لما تروحى
المهم متصلش وجيت انام حسيت انى نفسى اكلمه اوى بعتله قولتله call متصلش نمت بقى وانا زعلانه خالص
بس صحيت اختى قالتلى انه اتصل على البيت وقالها تقولى ان الخطوط مش بتجمع على الموبايل وحيحاول يكلمنى تانى
بس
كلمنى بقى على 11 كده بس عادى لانه على البيت وسط البيت كله ( تليفون ثابت ومش عندنا سماعه تانيه) وكلمته عادى الى هوا ازيك وبتاع والاخبار وكده وبس قفلنا على طول بس كل واحد فينا طبعا مقموص من التانى وبنتكلم كده بس علشان منبقاش قاطعين لان القطيعه دى بتجيب حاجات مش لطيفه خالص بعد كده
فكده اهون لحد ما نعرف نتكلم وعلشان محسسوش انى قاسيه عليه وانا اصلا مقدرش

بس ده الى حصل


تصوروا انا حسه انى نسيت انا زعلانه ليه بس عماله افكر نفسى لانى لازم اتكلم فى الموضوع واحط حدود علشان ميحصلش كده تانى

بجد انتوا ناس جدعه اوى ولذيذه اوى
بحبكم بجد اوى

[مها5215]

انا رايى انك تقفى جنبه لانه مش بيلعب ده بيتعب علشانك وعلشان يبقى اد مستواك الاجتماعى
يمكن يكون هو متنرفز شويه من كلمه لا لانك مادرتيش ظروفه فقلك الكلام الجارح ده
لو انت بتحبيه سدقينى هتشوفى اى حاجه بيعملها انها شيئ عظيم وكبير
لازم تستحملوا بعض
والغلط كان هين وانت ممكن تعتبيه عليه
وربنا يكرمكوا

[راهيف]

واضح ان خطيبك بيحبك بدليل انه اتصل أكتر من مره وأكيد أنه زعلك وهو غاضب
أتصلى عليه واكلموا مع بعض وأكيد هتوصلوا لحل يرضيكم
وممكن تتفقوا انه يشتغل على التاكسى لحد ميحس انه وقف على رجليه وبعد كده يرجع للطب تانى

[بنبونى]

انا جايه اقولكم ايه الى حصل
عشان مبقاش بس بجيلكم فى الزعل لا والفرح كمان اهو

بصوا بقى
قعدنا بتاع يومين كده من بعد الموضوع ده مش بنتكلم غير الاساسى ازيك عامله ايه ازيك عامل ايه وبس وبنقفل على طول ( ماهو كل واحد مقموص من التانى )
بس لحد اول امبارح بليل كلمنى وكانت اختى جنبى ومكنتش عارفه اتكلم براحتى هوا بقى راح متكلم وقعد يقولى ماانتى رديتى عليا وقولتى كذا وخلتينى اتنرفز وانا مكنتش عايز كده وقعد بقى يتكلم بتاع ربع ساعه وانا مش عارفه ارد عليه وقولتله ان اختى جنبى علشان كده مش عارفه ارد

المهم امبارح بقى اتكلمنا وقولتله كل اللى نفسى اقوله
قولتله على الاسلوب وازاى يتكلم بيه وان ده مش اسلوبنا خالص فى الحوار
وان احنا متفقين من الاول وكده وبس قعدت اتكلمت معاه وقولتله ايه مووضوع اداب وطب ويعنى ايه بنت ناس ومش اى كلام والكلام ده
وقعد يفهمنى انه مش يقصد الكلام كده وانه قصده كذا وكذا وقالى معلش انا انفعلت عليكى بس انتى دايقتينى اوى
وبس بقى كلمه من هنا وكلمه من هنا وفى الاخر الحمدلله يعنى اتصالحنا وقالى متزعليش وحقك عليا وقولته متزعلش منى وكده يعنى بقى

بس
ميرسى ميرسى ميرسى ليكم اوى بجد ربنا يكرمكم ويجازيكم الجنه

[ام سراج]

بنبوني..ازييييييييييييييك
الف مبروك ع الصلح...وعقبال ماتعزمينا ع الفرح يا سكر
والله فرحتلك خالص..ربنا يديم عليكم المحبه والوفاق..ويخليكم لبعض

[ريبو]

مبروووووووووووووك

[شيماء عبد الله]

بصى يا قمر هو لى حق يزعل وياخد الموضوع على اعصابو لانو حس انك بتفكرى فى المستوى
المهم دلوقتى انك تتكلمى معاه وتقوليلو مش هينفع ان ده يكون اسلوب حوار مابنا لازم نتناقش وكل واحد يقول الى عندو ده هيبقى احسن ونقضر نتوصل لحل
وبنا يوفقك ويحل مشاكلك ويهديكى للطريق الصح

[زهرة ساحرة]

حبيبتي انا فهمت شخصيتك وفهمت انتي عايزة اية
انتي متأثرة بحياة اهلك وماتتخيليش ان مستواكي يتدنى عن مستوى اهلك وكمان محتاجة تكوني في مستوى راقي زيهم ومش مستعدة تتعبي معاه وعايزاه يكون في مستوى اهلك ولو مستوى اهلة اقل ممكن تستحملي لاكن هو مايتنداش ابدا.. انا حاسة بيكي وعايزة اقولك اني مش قادرة اعبر عن اللى حاسة بالشكل المطلوب ولاكن عايزةة افهمك شئ
انتي عيشتي حياتك بشكل معين وعايزة حياتك الشخصية فالمستقبل تكون بنفس الاسلوب ولاكن الحياة مع العيلة شئ والحياة الزوجية شئ تاني
الحياة العائلية انتي بتكوني فيها انسان غير مسؤل وفيها بتكوني انتي عضو مش رئيس عكس الحياة الزوجية تماما
الحياة الزوجية بتكوني فيها انتي القائد بارائك وارشادك وصبرك وتحملك وتضحيتك مع زوجك مهما كان مستواه سواء رئيس جمهورية او عامل بسيط
لازم تتحملي وياة ضغوط الحياة ولازم تفهمي كويس ان اي راجل مهما كان مركزة هايمر بازمات ولازم يكون في تضحية وتنازل عشان تقدروا تتخطوا الصعوبات والمشاكل في الحياة
انا عارفة انك مش قادرة تتقبلي الموقف ولاكن نصيحتي ليكي .. حاولي تتنازلي عن كبريائك الاجتماعي ولو لجزئ بسيط ودي نصيحة عامة ليكي سواء كتبلك نصيب مع الانسان دة او مع غيرة هاتمروا بمشاكل وهاتحتاجي فيها للتنازل..
اما بالنسبة لاسلوبة في الكلام معاكي فهمية ووبخية باسلوب مهذب وعرفية غلطة واتعلمي ان الزعيئ مابين كل انثى ورجل بينتهى نهاية سيئة ماحبش اذكرها ودة بيكون ناتج عدم الاحترام لكل طرف وعدم الفهم لاسلوب المعاملة وقلة التحكم في الاعصاب وقلة الحكمة في التصرف ودة علاجة المصارحة وفتح القلوب اكتر لكل طرف ودة صدقيني افضل الطرق لحل اي مشكلة بالعالم مهما كان حجمها .
.................................................. .............................................
اسفة اني طولت عليكي في الكلام .. بتمنى اكون قدرت اقدم ولو شئ بسيط تكوني استفادتي منة . بتمنالك حياة جميلة وهنية وعروسة ذات عقل وقلب واعي قادرة على احتواء المواقف وحلها بحكمة .

[زهرة ساحرة]

الف مبروك حبيبتي وربنا يتمم ليكي بكل خير ... وماتنسيش تعزمينا على الفرح بقى ههههه ..... ربنا يباركلكم يا رب.