[امةالرحمن]

دائما انا مع خلاف مع ابى وامى على اقل حاجة مع انى وربى شاهد بحاول على قد مااقدر انى ارضيهم لكن دايما فى فجوة بينا ماما مش بتقدر اى حاجة انا بعملها معها وكذلك والدى ولانى الاخت الكبيرة على عبأ كل حاجة فى المنزل وكمان اتحمل اى غلط من اخوتى مع انى والحمد لله ملتزمة جدا والكل يحسد ماما عليا لانى مش زى بنات الايام دى على حد قولهم لكن على طول ماما شايفه انى ارأئى متعصبة ومع ذلااتحمل علشان خاطر ربنا سبحانه .
مفيش حاجة بتعجبها حتى لما بتزعل من اخوتى بتزعق ليا انا ومش بتكلم وبعتذر لها على كل حاجه ومش بستنى لاشكر ولاكلمة حلوة
ولا حتى حنية
لكن من يومين غلطت فيا جامد وزعقت وشتمتنى كتير وكل ده لانى كنت قاعدة على الكمبيوتر،وصعب عليا انى الاخت الكبيرة وكل ده ادام اخواتى الاصغر منى وبرضة اعتذرت لها ومفيش فايده مش بتكلمنى وتقريبا مش طيقانى
وعايزة اسأل كل ام سؤال هو عيب لما تغلطى انك تعتذرى لبنتك؟؟؟؟؟؟؟؟؟
ياترى انت فاكرة ان ده هيقلل من قيمتك بالعكس ده هيكبرك فى نظرها اوى ايه المشكله لما تحسى انك غلطت معها انك تقولى لها حقك عليا
انا بتمنى من كل ام مزعله حد من اولادها تواضعى وروحى اعتذرى لهم كبار اوصغار كويسين او وحشين
لانى مفتقدة الموضوع ده حاسة به اوى
كل حلمى الاقيها تيجى تبوسنى وتصالحنى ولانى مش قادره احققه نفسى انتو تحققوا مع اولادكم لانهم محتاجين لده ، محتاجين لنظرة حنان لقبله رضا لكلمة طيبه
ارجوكم ماتتأخروش فى فعل ده علشان جسر البعد بينك وبين اولادك مايتبينيش مش بعد المسافات بعد القلوب.
يلابسرعة روحيلها احضنيها حسى اد ايه بنتك او ابنك نعمه فى ناس كتير بتتمناها
ده رضاك عنها اوعن ابن اكتر حاجة بيتمنوها لاتحرميهم منه

اذا اعجبك الموضوع و اردت نشره في المنتديات الاخرى فاستخدمي هذا الرابط:
نداء الى الامهات ممكن نظرة حنان
http://forums.fatakat.com/thread41208

[اسكندرانى]

أمة الرحمن
فى البدايه أحب أشكرك على طرح الموضوع
وأحب كمان أحيكى على خوفك من الله سبحانه وتعالى
وخوفك من عقوق الوالدين
جزاكى الله كل الخير على معاملتك الطيبه لوالدتك

معظم البيوت فيها نفس مشكلتك مش مع الام بس ده احيانا
كمان مع الاب والام والاخوات
انتى احمدى ربنا وحاولى توصلى لطريق مشترك بينك وبين والدتك
أكيد فى حاجه معينه انتى بس اللى تعرفيها
هى اللى مخليه علاقتكم كده

أنا بضم صوتى لصوتك ان كل أم تتقرب من اولادها اكتر
وربنا ميحرمناش من امهاتنا يارب ولا من دعواتهم لينا

[ام سراج]

ازيك يا امه الرحمن
انتي الاخت الكبيره؟!
ماهو علشان كده لازم يشدوا عليكي..بالنسبه لهم انتي المسئوله..والعاقله..مهما اخواتك التانيين كبروا ..مامتك ح تشوفك دايماً اكبر وهما صغيرين
واضح برده ان سنك صغير وانك في البيت على طول يعني قصدي ماروحتيش جامعه بعيده واضطريت تسيبي البيت وتسكني في بيت طالبات..
كلنا عدينا بالمرحله دي..وانا كنت في وقت فاكره ان ماما دي قاسيه ومفتريه..وبعدين رحت الجامعه بعيد عن بيتنا..وشفت معامله الناس الغريبه ليا ازاي..وان قسوه ماما جمب اللي بيحصلي..تبقى منتهى الحنيه
انا معاكي ان الاهل ساعات بيزودوها..وده بيوجع اكتر لما ييجي من الام
موضوع انها تعتذر لك ده صعب..وربنا علشان عارف ده امرنا احنا اننا نصاحبهم في الدنيا معروفا..كملي جميلك ..وكلميها انتي واقعدي معاها..قولي لها انك بتحبيها..لأنهم بيبقوا ناسيين..ايوا والله..طيب جربي كده..روحي بعد ماتصلي المغرب..بوسيها وقولي لها يا ماما انا بحبك..ومابحبش اني ازعلك..وبسمع كل كلامك علشان بحبك..وانا من ايديك دي لايديك دي بس انا كبرت ومحتاجه حنيتك..ولو انا غلطانه حاسبيني..بس بلاش ادام اخواتي الصغيرين..انتي ترضي ان خالي يزعق لك ادامنا؟..واضحكي في وشها..وبوسيها كل شويه
وابقي قولي لي الاخبار

[مصراويه]

معلش يا عسل ما أنتى الكبيره بتاعتهم برضه وعلى فكره دا فى معظم البيوت
إن الأبن أو البنت الكبيره بتكون عليها مسئوليه جامده وغير مسموح لها بالخطأ
لأنها قدوه لأخواتها الصغار وعنييهم دايماً عليها .
وحكاية القسوه دى ممكن تكون نتيجة ظروف الحياه الصعبه والضغوط اليوميه
إللى بيتعرض لها الوالدين خصوصاً الأم إللى أكيد أكيد بتحبك وبتخاف عليكى
لكن معندهاش فرصه ولاوقت تعبر فيه عن الحب ده أو حتى ممكن تكون
كل فكرتها عن تربية البنات هى بالشده عشان حالهم ما يميلش وأنتى عارفه وسامعه أكيد عن إللى بيحصل فى الدنيا اليومين دول دى حاجات تشيب الجحش
ههههههه
قلبك أبيض يا جميل وأنا معاكى طبعاً وبرفع نداء لكل أم
شوية حنيه تخلى العيشه هنيه

[samasemo]

متزعليش ياقمر للاسف بعض الاباء والامهات بيفتكروا ان القسوة هى اللى تربى الاولاد ويطلعوا ملتزمين او مبيعرفوش يعبروا عن اللى جواهم لانه بيحسوا انه حيبقى ضعف اكيد مامتك بتحبك بس بتتبع طريقة غلط فى تربيتك
حاولى تقربى منها وتتكلمى معاها واكيدحتلاقى نقاط تقربكم من بعض

[امةالرحمن]

شكرا جدا لكل الفتكاوات اللى شاركونى مشاعرى وحسوا بيا وادونى رايهم وصدقونى احساسى انا مش لوحدى وان فى حد معايا وحاسس بيا احساس رائع بيدينى دفعة لادام
شكرا جدا وربنا يخليكوا ليا

[امةالرحمن]

واوعدك ياام سراج انى اعمل اللى انت قولت لى عليه مع انى وربى عالم على طول بعمل كده معها هى وبابا

[toto s]

انا رايي من راي البنات
وربنا يوفقك ويسعدك مع امك

[امةالرحمن]

شكرا ياتوتو ياقمر